Mga Pangutana Gikan sa mga Magbabasa

Sa Nehemias 8:10, ang mga Hudiyo gisugo sa ‘pagkaon ug mga tambok,’ apan ang Balaod diha sa Levitico 3:17 nag-ingon nga “dili gayod kamo magkaon sa bisan unsang tambok.” Nagkasumpaki ba kining duha ka teksto?

Sa orihinal nga pinulongan, ang mga pulong nga gihubad ug “mga tambok” sa Nehemias 8:10 ug “tambok” sa Levitico 3:17 magkalahi. Ang Hebreohanong pulong nga cheʹlev, nga gihubad ug “tambok” sa Levitico 3:17, nagtumong sa tambok sa mananap o sa tawo. (Lev. 3:3; Maghu. 3:22) Ang konteksto sa bersikulo 17 nagpakita nga ang mga Israelinhon gidid-an sa pagkaon sa mga tambok nga anaa sa tinai ug amimislon sa mga hayop nga ihalad, bisan sa tambok sa dapidapi tungod kay “ang tanang tambok iya ni Jehova.” (Lev. 3:14-16) Busa ang tambok sa mga hayop nga ihalad ngadto kang Jehova dili pagakan-on.

Sa laing bahin, ang pulong nga gihubad ug “mga tambok” sa Nehemias 8:10 maoy mash·man·nimʹ, ug niining tekstoha lamang diha sa Hebreohanong Kasulatan nga kini mabasa. Gikan kini sa berbo nga sha·menʹ, nga nagkahulogang “pagpatambok.” Ang pangunang ideya niining pulonga lagmit nagpasabot ug kauswagan ug kaayohan. (Itandi ang Isaias 25:6.) Ang usa sa mga pulong nga kasagarang gikuha gikan niini nga berbo mao ang sheʹmen, nga kasagarang gihubad ug “lana,” nga nalakip sa ekspresyong ‘lana sa olibo.’ (Deut. 8:8; Lev. 24:2) Sumala sa paggamit niini diha sa Nehemias 8:10, ang pulong mash·man·nimʹ  lagmit nagtumong sa pagkaon nga giluto sa daghang mantika ug mahimong nag-apil sa unod nga may diyutayng tambok apan dili sa bagang tambok sa hayop.

Bisan pag gidid-an ang mga Israelinhon sa pagkaon sa bagang tambok sa hayop, sila makakaon gihapon ug lamian nga mga pagkaon. Ang pipila niini, sama sa tinapay nga hinimo sa lugas, kasagarang giluto sa lana sa olibo, dili sa mantika sa hayop. (Lev. 2:7) Busa, ang Insight on the Scriptures nag-ingon nga ang “mga tambok” dinhi “nagtumong sa undanong mga bahin, dili sa bukogong mga bahin, nga giluto sa mantika nga gikan sa utanon.”

Siyempre, angayng hinumdoman sa mga Kristohanon nga ang pagdili sa pagkaon ug tambok maoy bahin sa Balaod. Ang mga Kristohanon dili na ilalom niana, lakip na sa sugo nga nalangkit sa paghalad ug mga hayop.—Roma 3:20; 7:4, 6; 10:4; Col. 2:16, 17.