Nahinumdom Ka Ba?

Gipabilhan mo ba ang bag-ong mga gula sa Ang Bantayanang Torre? Buweno, sulayi kon makatubag ka ba sa mosunod nga mga pangutana:

• Sa unsang paagi kita larinong makasulti sa “putli nga pinulongan,” ang kamatuoran bahin sa Diyos ug sa iyang mga katuyoan? (Sof. 3:9)

Sama sa pagsultig usa ka pinulongan, kita larinong makasulti sa “putli nga pinulongan” pinaagi sa pagpatalinghog pag-ayo, pagsundog sa larinong mga mamumulong, pagsag-ulo sa ngalan sa mga basahon sa Bibliya ug sa pipila ka teksto niini, pagsubli sa mga butang nga atong nakat-onan, pagbasag kusog, pagtuon sa gramarya, o sumbanan sa kamatuoran, pagpadayon sa pag-uswag, pag-eskedyul ug tinong mga panahon sa pagtuon, ug “pagsulti” kanunay sa putli nga pinulongan.—8/15, panid 21-25.

• Unsa ang pipila ka butang nga nalangkit sa pagkaila sa Diyos?

“Jehova ang iyang ngalan,” ug gusto niya nga atong mailhan ang iyang ngalan. (Ex. 15:3) Siya ang “Diyos sa gugma ug sa kalinaw.” (2 Cor. 13:11) Siya “usa ka Diyos sa kahibalo” ug “sa kaluwasan.” (1 Sam. 2:3; Sal. 25:5) Ang Diyos moduol o makigsuod niadtong nakaila kaniya.—9/1, panid 4-7.

• Sa unsang paagi ang ideya bahin sa “tulo ka bakukon nga pisi” mapadapat diha sa kaminyoon?

Ang ekspresyong “tulo ka bakukon nga pisi” masambingayon. (Eccl. 4:12) Sa pagpadapat niini diha sa kaminyoon, ang duha ka bakukon mao ang bana ug asawa, ug ang pangunang bakukon mao ang Diyos. Kon ang magtiayon nahiusa sa Diyos, sila makabaton ug kusog sa pagsagubang sa mga problema ug sila magmalipayon.—9/15, panid 16.

• Unsay gitumong sa “pagpandong sa mga kamot” diha sa Hebreohanon 6:2?

Inay ipadapat sa pagtudlog mga ansiyano sa kongregasyon, lagmit ang gitumong sa pagpandong sa mga kamot mao ang pagpasa ngadto sa uban sa milagrosong mga gasa sa espiritu. (Buh. 8:14-17; 19:6)—9/15, panid 32.

• Unsa nga mga panginahanglan sa mga anak ang nahibaloan sa usa ka maayong amahan?

Ang pipila sa ilang mga panginahanglan mao ang (1) iyang gugma, (2) maayong ehemplo, (3) usa ka malipayong panimalay, (4) pagtudlo kanila nga pabilhan ang ilang relasyon sa Diyos, (5) disiplina, (6) ug panalipod.—10/1, panid 18-21.

• Sa unsang paagi ang mga nagapanguna magpasidungog sa uban?

Ang usa ka paagi nga mahimo kini sa usa ka ansiyano mao ang dili gayod niya pagpahimo sa mga butang nga siya mismo dili gustong mobuhat. Usab, iyang ikapakita ang pagtahod pinaagi sa pagpatin-aw kanila kon nganong ipabuhat niya ang usa ka butang.—10/15, panid 22.

• Unsa ang pipila ka hinungdanong butang nga makatabang aron magpabiling maunongon diha sa kaminyoon?

Ang duha niini mao ang: (1) Paghatag ug unang pagtagad sa imong kaminyoon. (2) Paglikay sa tanang matang sa pagkamaluibon. Lig-on man o daghag problema ang imong kaminyoon, kinahanglang makita sa imong kapikas nga ikaw naningkamot gayod aron kini magmalamposon.—11/1, panid 18-21.

• Unsay makat-onan sa usa ka ansiyano sa kongregasyon bahin sa paggamit ug nagkurba nga sungkod sa usa ka magbalantay sa karnero sa karaang Israel?

Ang usa ka magbalantay mogamit ug nagkurba nga sungkod, o baston, sa paggiya sa iyang panon. Sa dihang ang mga karnero mosulod o mogawas sa toril, sila moagi “ilalom sa baston” mao nga maihap sila sa magbalantay. (Lev. 27:32) Kinahanglang mahibaloan usab sa usa ka Kristohanong magbalantay ang kahimtang sa panon sa Diyos nga ubos sa iyang pagdumala.—11/15, panid 9.

• Sa unsang paagi ikapakita sa usa ka inahan nga hinungdanon ang kahinlo?

Ang pagkaon dali rang mahugawan, busa manghunaw una siya sa dili pa kini andamon ug tabonan kini kanunay. Siya manglimpiyo kanunay sa balay aron walay mga ilaga ug insekto. Ang laing paagi naglakip sa regular nga pagpanglaba ug pagkaligo. Kining mga paagiha nahiuyon sa Bibliya.—12/1, panid 9-11.