Nganong Angay Nimong Huptan ang Imong Integridad?

“Hukmi ako, Oh Jehova, . . . sumala sa akong integridad.”—SAL. 7:8.

1, 2. Unsa ang pipila ka situwasyon nga magsulay sa integridad sa usa ka Kristohanon?

 HANDURAWA kining tulo ka situwasyon: Ang usa ka batang lalaki gibugalbugalan sa iyang mga eskolmet. Gusto nilang masuko siya, kaha mamalikas o makig-away. Mobalos ba siya, o magpugong sa iyang kaugalingon ug mobiya? Ang usa ka bana nag-inusara diha sa ilang balay nga nanukiduki sa Internet. Mitungha sa eskrin ang panganunsiyo bahin sa usa ka law-ay nga Web site. Motan-aw ba siya niana, o likayan gayod kana? Samtang nakig-estorya ang usa ka Kristohanong babaye sa pipila ka sister, iyang namatikdan nga sila nanglibak na sa usa ka igsoon sa kongregasyon. Mosumpay ba siya, o putlon niya ang estorya ug maghisgot ug laing butang?

² Lainlain kana nga situwasyon, apan kanang tanan nagkinahanglag panglimbasog aron mahuptan ang integridad ingong Kristohanon. Naghunahuna ka ba sa imong integridad samtang imong giatubang ang imong mga buluhaton, panginahanglan, ug mga tumong? Kada adlaw, ang mga tawo maghunahuna bahin sa ilang panagway, panglawas, panginabuhi, mga higala, ug bisan sa ilang mga hinigugma. Tingali ato kanang gihatagag dakong pagtagad. Apan, unsa gayoy hinungdanon kang Jehova samtang iyang ginasusi ang atong kasingkasing? (Sal. 139:23, 24) Ang atong integridad.

3. Unsa nga pribilehiyo ang gihatag ni Jehova kanato, ug unsay atong hisgotan niining artikuloha?

³ Si Jehova, ang Maghahatag sa “matag maayong gasa ug matag hingpit nga regalo,” naghatag kanato ug lainlaing gasa. (Sant. 1:17) Iya kitang gigasahan ug lawas, hunahuna, kahimsog, ug lainlaing katakos. (1 Cor. 4:7) Apan, dili kita pugson ni Jehova sa pagpakitag integridad. Kita maoy iyang pagbut-on kon ato ba kining ugmaron o dili. (Deut. 30:19) Nan, angay natong susihon kon unsa ang integridad. Hisgotan usab nato ang tulo ka rason kon nganong hinungdanon kaayo kining hiyasa.

Unsa ang Integridad?

4. Unsay nalangkit sa integridad, ug unsay atong makat-onan sa balaod ni Jehova maylabot sa halad nga mga mananap?

⁴ Daghang tawo ang wala makaseguro kon unsay kahulogan niining hiyasa. Pananglitan, sa dihang ang mga politiko magpasiatab sa ilang integridad, sagad nga ang ilang gipasabot mao ang pagkamatinud-anon. Hinungdanon kanang hiyasa, apan bahin lamang kana sa integridad. Sumala sa paggamit niini diha sa Bibliya, ang integridad naglangkit ug pagkabug-os sa moral, pagkawalay-depekto. Ang Hebreohanong mga pulong nga nalangkit sa “integridad” naggikan sa usa ka lintunganayng pulong nga nagpasabot ug walay depekto, kompleto, o walay sala. Ang usa niining mga pulonga gigamit maylabot sa mga halad nga gitanyag kang Jehova. Dawaton lamang niya ang gihalad nga mananap kon kini walay depekto, o kompleto. (Basaha ang Levitico 22:19, 20.) Gisaway ni Jehova kadtong tinuyong misupak sa iyang sugo pinaagi sa paghalad ug mga mananap nga piang, masakiton, o buta.—Mal. 1:6-8.

5, 6. (a) Unsang mga pananglitan ang nagpakita nga kita sagad magpabili sa usa ka butang nga tibuok, o kompleto? (b) Kinahanglan bang magmahingpit ang usa aron mahuptan ang integridad? Ipatin-aw.

⁵ Natural lamang nga atong magustoan ug pabilhan ang usa ka butang nga bug-os, o kompleto. Pananglitan, handurawa ang usa ka tigkolektag libro nga nakakita sa usa ka bililhon kaayong libro nga dugay na niyang gipangita, apan pag-ando pa, daghan diay kinig kulang nga hinungdanong mga panid. Kay nahigawad, iya tingali kining iuli sa estante. O handurawa ang usa ka babaye nga naglakawlakaw sa baybayon, nga namunit ug kinhason. Nalingaw  siya sa kadaiyahan ug katahom niini, busa matag karon ug unya mopunit siyag kinhason ug tan-awon kini pag-ayo. Unsa may iyang tipigan? Kadtong tibuok pa, walay buak. Sa samang paagi, ang Diyos nangitag mga tawo nga nakabaton niining hiyas sa pagkabug-os, o pagkakompleto.—2 Cron. 16:9.

⁶ Apan, mangutana ka tingali kon ang integridad nagkinahanglan bag kahingpitan. Tungod sa atong sala ug pagkadili-hingpit, lagmit maghunahuna kita nga susama kita sa kulang-ug-panid nga libro o sa buak nga kinhason. Mao ba nay imong bation usahay? Magmasaligon nga si Jehova wala magdahom nga kita magmahingpit sa bug-os nga diwa. Dili gayod siya magdahom ug labaw pa kay sa atong maarangan. a (Sal. 103:14; Sant. 3:2) Bisan pa niana, siya nagdahom nga atong huptan ang atong integridad. Nan, may kalainan ba tali sa kahingpitan ug sa integridad? Oo. Sa pag-ilustrar: Ang usa ka batan-ong lalaki nahigugma sa batan-ong babaye nga iyang minyoan. Siyempre, dili siya magdahom nga hingpit ang iyang pangasaw-onon. Apan, natural lamang nga magdahom siya nga higugmaon siya niini sa tibuok niyang kasingkasing, sa ato pa, siya lamang ang higugmaon ug wala nay lain. Sa samang paagi, si Jehova maoy “Diyos nga nagapangayo ug bug-os nga pagkamahinalaron.” (Ex. 20:5) Siya wala magdahom ug kahingpitan gikan kanato. Hinunoa, siya nagdahom nga ato siyang higugmaon sa tibuok natong kasingkasing, nga siya lamang ang atong simbahon.

7, 8. (a) Unsang panig-ingnan ang gipakita ni Jesus maylabot sa integridad? (b) Sumala sa Kasulatan, unsay tinuod nga kahulogan sa integridad?

⁷ Mahinumdom tingali kita sa tubag ni Jesus sa dihang gipangutana siya kon unsa ang labing hinungdanon sa tanang balaod. (Basaha ang Marcos 12:28-30.) Wala lamang ihatag ni Jesus ang tubag; siya nagkinabuhi uyon niana. Iyang gipakita ang kinalabwang panig-ingnan sa paghigugma kang Jehova sa tibuok niyang hunahuna, kasingkasing, kalag, ug kusog. Iyang gipakita nga ang integridad ipadayag, dili sa pulong lamang, kondili sa mga buhat nga tinukmod sa maayong mga motibo. Aron atong mahuptan ang integridad kinahanglan nga atong sundon ang mga tunob ni Jesus.—1 Ped. 2:21.

⁸ Sumala sa Kasulatan, ang integridad nagkahulogan ug kinasingkasing nga debosyon ngadto sa usa lamang ka langitnong Persona, si Jehova nga Diyos, ug sa iyang gipadayag nga kabubut-on ug katuyoan. Ang paghupot ug integridad nagkahulogan nga sa atong adlaw-adlaw nga pagkinabuhi, kita maningkamot labaw sa tanan nga pahimut-an si Jehova nga Diyos. Atong isipon nga hinungdanon ang mga butang nga hinungdanon para kaniya. Atong hisgotan ang tulo ka rason kon nganong importante kaayo kini.

1. Atong Integridad ug ang Isyu sa Pagkasoberano

9. Sa unsang paagi ang atong paghupot ug integridad nalangkit sa isyu sa unibersohanong pagkasoberano?

⁹ Ang pagkasoberano ni Jehova wala magdepende sa atong integridad. Ang iyang pagkasoberano matarong, dumalayon, ug unibersohanon. Magpabilin gayod kining ingon niana bisan unsa pay isulti o buhaton sa iyang mga linalang. Apan, ang pagkasoberano sa Diyos gihagit didto sa langit ug dinhi sa yuta. Busa, kini kinahanglang mabindikar—mapamatud-an nga nahiangay, matarong, ug mahigugmaon—atubangan sa tanang intelihenteng mga linalang. Ingong mga Saksi ni Jehova, ganahan kitang maghisgot bahin sa unibersohanong pagkasoberano sa Diyos kang bisan kinsa nga gustong mamati. Apan, sa unsang paagi kita makabarog dapig sa pagkasoberano ni Jehova? Sa unsang paagi mapakita nato nga atong gipili si Jehova ingong atong Soberano? Pinaagi sa paghupot ug integridad.

10. Unsang sumbong ang gipasaka ni Satanas maylabot sa integridad sa tawo, ug unsay gusto nimong buhaton niana?

¹⁰ Tagda kon sa unsang paagi nalangkit ang imong integridad. Sa diwa, nangangkon si Satanas nga walay tawo nga mobarog dapig sa pagkasoberano sa Diyos, nga walay mag-alagad kang Jehova tungod sa tiunay nga gugma. Atubangan sa daghan kaayong espiritung mga linalang, ang Yawa miingon kang Jehova: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag.” (Job 2:4) Matikdi nga dili lamang ang matarong nga si Job ang iyang giakusar kondili ang katawhan sa katibuk-an. Busa ang Bibliya  nagtawag kang Satanas nga “magsusumbong sa atong mga igsoon.” (Pin. 12:10) Iyang gitamay si Jehova pinaagi sa pangangkon nga ang mga Kristohanon—hasta ikaw—dili makapabiling matinumanon. Si Satanas nangangkon nga imong talikdan si Jehova aron lang maluwas ang imong kinabuhi. Unsa may imong pagbati niining mga sumbong nga gipasaka ni Satanas batok kanimo? Gusto ba nimong pamatud-an nga siya bakakon? Pinaagi sa paghupot sa imong integridad, ikaw makahimo niana.

11, 12. (a) Unsang mga pananglitan ang nagpakita nga ang atong paghimog mga desisyon sa adlaw-adlaw nalangkit sa isyu sa atong paghupot ug integridad? (b) Nganong dako kaayo nga pribilehiyo ang paghupot ug integridad?

¹¹ Busa tungod sa isyu labot sa imong integridad, hinungdanon kaayo ang imong adlaw-adlaw nga panggawi ug mga pagpili. Tagda pag-usab ang tulo ka situwasyon nga gihisgotan ganina. Sa unsang paagi mahuptan nila ang ilang integridad? Ang batan-ong lalaki nga gibugalbugalan sa iyang mga eskolmet gusto gayong mobalos, apan iyang nahinumdoman kining tambaga: “Ayaw kamo pagpanimalos, mga hinigugma, kondili hatagig dapit ang kapungot; kay nahisulat: ‘Akoa ang panimalos; ako magabalos, nag-ingon si Jehova.’” (Roma 12:19) Siya mibiya kanila. Ang bana nga naggamit sa Internet mahimong motan-aw sa mga hulagway nga makapukaw sa gana sa sekso, apan iyang nahinumdoman ang prinsipyo sa giingon ni Job: “Ako mihimog pakigsaad sa akong mga mata. Nan unsaon ko man pagtan-aw nga maibogon sa usa ka ulay?” (Job 31:1) Sa susama, ang bana wala motan-aw sa law-ayng mga hulagway, nga naglikay niana nga daw kana samag hilo. Ang Kristohanong babaye nga kauban sa grupo sa mga sister nga nanglibak wala mosumpay sa ilang giestoryahan kay siya nahinumdom sa tambag: “Magpahimuot ang matag usa kanato sa iyang silingan sa kon unsay maayo aron sa paglig-on kaniya.” (Roma 15:2) Ang maong tabitabi dili makapalig-on. Makadaot kana sa reputasyon sa iyang igsoon ug dili usab kana makapahimuot sa iyang langitnong Amahan. Busa iyang gipugngan ang iyang dila ug naghisgot siya ug laing butang.

¹² Sa matag usa nianang mga situwasyona, ang Kristohanon mohimog pagpili nga sama rag  miingon siya: ‘Si Jehova ang akong Magmamando. Maningkamot ako sa pagbuhat kon unsay makapahimuot kaniya.’ Sa dihang mohimog mga pagpili ug mga desisyon, naningkamot ka ba usab sa pagpahimuot kang Jehova? Kon imo kanang buhaton, imong gituman ang makapadasig nga mga pulong nga nasulat sa Proverbio 27:11: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” Dako kaayo nga pribilehiyo ang paglipay sa kasingkasing ni Jehova! Dili ba takos gayod sa paningkamot ang paghupot ug integridad?

2. Ang Basehanan sa Paghukom ni Jehova Kanato

13. Sa unsang paagi gipakita sa mga pulong ni Job ug David nga ang integridad maoy basehanan ni Jehova sa iyang paghukom kanato?

¹³ Atong nasabtan nga ang integridad motabang kanato sa pagbarog dapig sa pagkasoberano ni Jehova. Busa mao kanay basehanan sa Diyos sa iyang paghukom kanato. Nasabtan gayod ni Job kanang kamatuorana. (Basaha ang Job 31:6.) Nahibalo si Job nga ang Diyos nagtimbang sa tanang katawhan diha sa “tukmang timbangan,” nga naggamit sa Iyang hingpit nga sukdanan sa hustisya aron sa pagtino kon kita naghupot ug integridad. Sa susama si David nag-ingon: “Si Jehova magpakanaog ug paghukom sa mga katawhan. Hukmi ako, Oh Jehova, sumala sa akong pagkamatarong ug sumala sa akong integridad nga ania kanako. . . . Ug sanglit matarong man ang Diyos siya magasusi sa kasingkasing ug sa mga rinyon.” (Sal. 7:8, 9) Nahibalo kita nga ang Diyos makakita sa kinasulorang pagkatawo, ang mahulagwayong ‘kasingkasing ug mga rinyon.’ Apan, angay natong hinumdoman kon unsay iyang gipangita. Sumala sa giingon ni David, si Jehova maghukom kanato sumala sa atong integridad.

14. Nganong dili kita angayng maghunahuna nga ang atong pagkadili-hingpit mopugong kanato sa paghupot ug integridad?

¹⁴ Handurawa si Jehova nga Diyos nga nagsusi sa bilyonbilyong kasingkasing sa katawhan karon. (1 Cron. 28:9) Daghan ba siyag nakita nga naghupot ug Kristohanong integridad? Sa pagkatinuod, pipila lamang. Apan, dili kita angayng maghunahuna nga ang atong pagkadili-hingpit mopugong kanato sa paghupot ug integridad. Sa kasukwahi, aduna kitay maayong katarongan sa pagsalig, sama kang David ug Job, nga makaplagan kita ni Jehova nga naghupot ug integridad, bisag dili kita hingpit. Hinumdomi, ang kahingpitan dili garantiya nga ang usa makahupot ug integridad. Tulo lamang ka hingpit nga tawo ang nabuhi sukad sa yuta, ug ang duha, si Adan ug Eva, napakyas sa paghupot ug integridad. Bisan pa niana, milyonmilyong dili-hingpit nga mga tawo ang milampos sa paghupot niana. Ikaw usab mahimong molampos.

3. Hinungdanon sa Atong Paglaom

15. Sa unsang paagi gipakita ni David nga ang integridad hinungdanon sa atong paglaom sa umaabot?

¹⁵ Tungod kay ang integridad maoy basehanan ni Jehova sa iyang paghukom kanato, hinungdanon kana sa atong paglaom sa umaabot. Nahibalo niana si David. (Basaha ang Salmo 41:12.) Naglaom siya nga madawat ang pag-uyon sa Diyos sa walay kataposan. Sama sa matuod nga mga Kristohanon karon, si David naglaom nga mabuhi sa walay kataposan, nga nagpadayon sa pagpakigsuod kang Jehova nga Diyos samtang nag-alagad kaniya. Nahibalo si David nga kinahanglan niyang huptan ang integridad aron iyang makita ang katumanan nianang maong paglaom. Sa susama, si Jehova magpaluyo, magtudlo, maggiya, ug magpanalangin kanato samtang atong huptan ang integridad.

16, 17. (a) Nganong determinado ka nga maghupot ug integridad? (b) Unsang mga pangutana ang hisgotan sa sunod nga artikulo?

¹⁶ Ang paglaom hinungdanon sa atong kalipay karon. Kini makahatag kanato sa kalipay nga atong gikinahanglan sa paglahutay sa malisod nga mga panahon. Ang paglaom manalipod usab sa atong panghunahuna. Hinumdomi, diha sa Bibliya ang atong paglaom gipakasama sa usa ka helmet. (1 Tes. 5:8) Maingon nga ang helmet manalipod sa ulo sa  sundalo diha sa panggubatan, ang paglaom manalipod sa atong kaisipan batok sa negatibong mga hunahuna nga gipasiugda ni Satanas niining himalatyon nga daang kalibotan. Ang kinabuhi walay kapuslanan kon wala kitay paglaom. Kinahanglang matinud-anon natong susihon ang atong kaugalingon, nga maampingong sutaon ang atong integridad ug ang paglaom nga nalambigit niana. Ayawg kalimti nga pinaagi sa paghupot ug integridad, imong gibayaw ang pagkasoberano ni Jehova ug gipanalipdan ang imong bililhong paglaom sa umaabot. Hinaot nga padayon kang maghupot ug integridad!

¹⁷ Sanglit hinungdanon man kaayo ang integridad, kinahanglang tagdon nato ang dugang mga pangutana. Sa unsang paagi atong maugmad ang integridad? Sa unsang paagi mahuptan nato kini? Ug unsay angayng buhaton kon ang usa wala na magpadayon sa paghupot niana? Hisgotan kana sa sunod nga artikulo.

[Footnote]

Unsay Imong Tubag?

• Unsa ang integridad?

• Sa unsang paagi ang integridad nalangkit sa isyu sa unibersohanong pagkasoberano?

• Sa unsang paagi ang integridad nahimong basehanan sa atong paglaom?

[Mga Pangutana sa Pagtuon]

[Mga hulagway sa panid 5]

Ang adlaw-adlaw nga pagkinabuhi magsulay sa atong integridad