Pabilhi ang Talagsaong Papel ni Jesus sa Katuyoan sa Diyos

“Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.”—JUAN 14:6.

1, 2. Nganong interesado kita sa talagsaong papel ni Jesus sa katuyoan sa Diyos?

 LATAS sa kasaysayan, daghan ang naningkamot nga malahi sa uban, apan pipila ra ang nakahimo niana. Gani, maihap ra ang mga tawo nga makaingon nga sila talagsaon sa pipila ka paagi. Apan, si Jesu-Kristo, ang Anak sa Diyos, talagsaon sa daghang paagi.

² Nganong interesado kita sa talagsaong papel ni Jesus? Tungod kay nalangkit niini ang atong relasyon sa Diyos! Si Jesus miingon: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6; 17:3) Hisgotan nato ang pipila ka paagi kon nganong talagsaon si Jesus. Pinaagi niana, mouswag pa ang atong pagpabili sa iyang papel diha sa katuyoan sa Diyos.

“Bugtong nga Anak sa Diyos”

3, 4. (a) Nganong makaingon kita nga talagsaon ang papel ni Jesus ingong bugtong nga Anak? (b) Sa unsang paagi talagsaon ang papel ni Jesus sa paglalang?

³ Si Jesus dili lamang basta “anak sa Diyos,” nga maoy pagtawag kaniya ni Satanas sa dihang gitental siya niini. (Mat. 4:3, 6) Siya haom nga gitawag nga “bugtong nga Anak sa Diyos.” (Juan 3:16, 18) Ang Gregong pulong nga gihubad ug “bugtong” nagkahulogang “nag-inusara sa iyang matang” o “talagsaon.” Si Jehova adunay ginatos ka milyon nga espirituhanong mga anak. Kon mao, nganong ikaingon nga si Jesus “nag-inusara sa iyang matang” o “talagsaon”?

⁴ Si Jesus bugtong o talagsaon tungod kay siya lamang ang direktang gilalang sa iyang Amahan. Siya ang panganay nga Anak. Gani, siya “ang panganay sa tanang kalalangan.” (Col. 1:15) Siya “ang sinugdan sa kalalangan sa Diyos.” (Pin. 3:14) Talagsaon usab ang papel sa bugtong nga Anak diha sa paglalang. Siya dili mao ang Maglalalang, o Tagmugna, sa mga butang, apan siya gigamit ni Jehova ingong instrumento sa paglalang sa ubang mga butang. (Basaha ang Juan 1:3.) Si apostol Pablo misulat: “Alang kanato sa pagkatinuod adunay usa lamang ka Diyos nga Amahan, nga gikan kaniya ang tanang butang, ug kita alang kaniya; ug adunay usa ka Ginoo, si Jesu-Kristo, nga pinaagi kaniya ang tanang butang, ug kita pinaagi kaniya.”—1 Cor. 8:6.

5. Sa unsang paagi gipakita sa Kasulatan ang pagkatalagsaon ni Jesus?

⁵ Apan si Jesus talagsaon sa daghan pang paagi. Diha sa Kasulatan, daghang titulo ang gigamit alang kaniya nga nagpaila sa iyang talagsaong papel diha sa katuyoan sa Diyos. Tagdon nato karon ang lima pa sa mga titulo nga gipadapat kang Jesus diha sa Kristohanon Gregong Kasulatan.

“Ang Pulong”

6. Nganong haom ang pagtawag kang Jesus nga “ang Pulong”?

⁶ Basaha ang Juan 1:14. Nganong gitawag si Jesus nga “ang Pulong,” o Logos? Kining tituloha nagpaila kon unsay iyang papel sukad sa paglungtad sa ubang intelihenteng mga linalang. Gigamit ni Jehova ang iyang Anak sa pagpahayag ug mga impormasyon ug instruksiyon ngadto sa ubang espirituhanong mga anak, ug ngadto usab sa mga tawo sa yuta. Ang papel ni Jesus ingong ang Pulong, o Tigpamaba sa Diyos, mapamatud-an sa iyang gisulti ngadto sa mga Hudiyo: “Ang gitudlo  ko dili akoa, kondili iya sa nagpadala kanako. Kon si bisan kinsa magtinguha sa pagbuhat sa Iyang kabubut-on, mahibalo siya mahitungod sa pagtulon-an kon kini gikan ba sa Diyos o nagsulti ba ako sa akoa rang kaugalingon.” (Juan 7:16, 17) Si Jesus padayong nagbaton sa titulong “Ang Pulong sa Diyos” bisan sa dihang mibalik na siya sa langit.—Pin. 19:11, 13, 16.

7. Sa unsang paagi atong masundog ang pagkamapaubsanon ni Jesus ingong “ang Pulong”?

⁷ Hunahunaa ra kon unsay kahulogan nianang tituloha. Bisag si Jesus ang labing maalamon sa tanang linalang ni Jehova, siya wala mosalig sa iyang kaugalingong kaalam. Siya misulti lamang sa mga butang nga gisulti kaniya sa iyang Amahan. Kanunay niyang gipasidunggan ang iyang Amahan, dili ang iyang kaugalingon. (Juan 12:50) Pagkamaayong sundogon ang iyang panig-ingnan! Kita usab gihatagag talagsaong pribilehiyo, nga mao ang ‘pagpahayag sa maayong balita sa maayong mga butang.’ (Roma 10:15) Kon atong gipabilhan ang panig-ingnan ni Jesus sa pagkamapaubsanon, kita dili gayod magtudlo sa atong kaugalingong ideya. Maylabot sa pagsangyaw sa nagaluwas-ug-kinabuhi nga mensahe diha sa Kasulatan, dili nato buot nga ‘mosaylo sa mga butang nga nahisulat.’—1 Cor. 4:6.

Ang “Amen”

8, 9. (a) Unsay kahulogan sa pulong “amen,” ug nganong si Jesus gitawag ug “Amen”? (b) Sa unsang paagi gituman ni Jesus ang iyang papel ingong “Amen”?

⁸ Basaha ang Pinadayag 3:14. Nganong gitawag si Jesus nga “Amen”? Ang pulong nga gihubad ug “amen” naggikan sa Hebreohanong pulong nga nagkahulogang “matuman kana,” o “segurado.” Ang lintunganayng pulong (root word) niini nagkahulogang “matinumanon” o “kasaligan.” Ang maong pulong gigamit usab sa paghubit sa pagkamatinumanon ni Jehova. (Deut. 7:9; Isa. 49:7) Nan, sa unsang paagi talagsaon si Jesus sa dihang siya gitawag nga “Amen”? Matikdi kon unsay tubag sa 2 Corinto 1:19, 20: “Ang anak sa Diyos, si Kristo Jesus, nga giwali taliwala kaninyo . . . , wala mahimong Oo apan diay Dili, apan ang Oo nahimong Oo sa iyang kahimtang. Kay bisag unsa pa ka daghan ang mga saad sa Diyos, sila nahimong Oo pinaagi kaniya. Busa pinaagi usab kaniya ang ‘Amen’ ginaingon ngadto sa Diyos alang sa himaya.”

⁹ Si Jesus maoy “Amen,” o katumanan, sa tanang saad sa Diyos. Siya hingpit nga nagmatinumanon dinhi sa yuta ug iyang gihatag ang iyang kinabuhi isip halad. Tungod niana, ang tanang saad ni Jehova nga Diyos mamatuman. Pinaagi sa iyang pagkamatinumanon, gipamatud-an ni Jesus nga bakak ang akusasyon ni Satanas nga si Jehova isalikway sa iyang mga alagad kon sila makasinatig kalisdanan, pag-antos, ug pagsulay. (Job 1:6-12; 2:2-7) Sa tanang linalang sa Diyos, ang panganay nga Anak lamang ang makahatag ug dili-malalis nga tubag sa maong akusasyon. Labaw sa tanan, si Jesus naghatag ug kinamaayohang pamatuod nga si Jehova lamang ang may katungod sa pagmando ingong Soberano sa tibuok uniberso.

10. Sa unsang paagi atong masundog si Jesus sa iyang papel ingong “Amen”?

¹⁰ Sa unsang paagi atong masundog si Jesus sa iyang talagsaong papel ingong “Amen”? Pinaagi sa pagpabiling matinumanon kang Jehova ug sa pagdapig kaniya ingong Soberano sa uniberso. Sa pagbuhat niana, atong ikapakita nga kita misanong gayod sa hangyo ni Jehova diha sa Proverbio 27:11: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.”

Ang “Tigpataliwala sa Bag-ong Pakigsaad”

11, 12. Nganong talagsaon ang papel ni Jesus ingong Tigpataliwala?

¹¹ Basaha ang 1 Timoteo 2:5, 6. Si Jesus ang “tigpataliwala sa Diyos ug sa mga tawo.” Siya mao ang “tigpataliwala sa bag-ong pakigsaad.” (Heb. 9:15; 12:24) Apan si Moises tigpataliwala usab—ang tigpataliwala sa pakigsaad sa Balaod. (Gal. 3:19) Busa, sa unsang paagi talagsaon ang papel ni Jesus ingong Tigpataliwala?

¹² Ang orihinal nga pulong nga gihubad ug “tigpataliwala” maoy usa ka termino nga gigamit diha sa korte. Kini nagtumong kang Jesus ingong legal nga Tigpataliwala (o samag usa ka abogado) sa bag-ong pakigsaad, nga nagpaposible sa pagkahimugso sa bag-ong nasod, ang “Israel sa Diyos.” (Gal. 6:16) Kining nasora gilangkoban  sa dinihogan-sa-espiritu nga mga Kristohanon, nga mag-alagad ingong mga ‘hari ug saserdote’ sa langit. (1 Ped. 2:9; Ex. 19:6) Ang pakigsaad sa Balaod, nga si Moises maoy tigpataliwala, wala makapatungha ug nasod nga sama niana.

13. Unsay nalangkit sa papel ni Jesus ingong Tigpataliwala?

¹³ Unsay nalangkit sa papel ni Jesus ingong Tigpataliwala? Buweno, gipadapat ni Jehova ang bili sa dugo ni Jesus niadtong mahimong bahin sa bag-ong pakigsaad. Niining paagiha, sila gipahayag ni Jehova nga matarong. (Roma 3:24; Heb. 9:15) Tungod niana, mahimo na usab silang isipon sa Diyos nga takos sa pagsulod sa bag-ong pakigsaad uban ang paglaom nga mahimong hari ug saserdote sa langit! Ingong ilang Tigpataliwala, si Jesus motabang kanila aron mamentinar ang ilang hinlong baroganan atubangan sa Diyos.—Heb. 2:16.

14. Nganong angayng pabilhan sa tanang Kristohanon ang papel ni Jesus ingong Tigpataliwala, sa langit man o sa yuta ang ilang paglaom?

¹⁴ Komosta kadtong dili bahin sa bag-ong pakigsaad, nga adunay paglaom nga mabuhi sa walay kataposan dinhi sa yuta, dili sa langit? Bisag sila dili bahin sa bag-ong pakigsaad, sila makapahimulos niini. Sila pasayloon sa ilang mga sala ug ipahayag nga matarong ingong mga higala sa Diyos. (Sant. 2:23; 1 Juan 2:1, 2) Sa langit man o sa yuta ang atong paglaom, angay gayod nga atong pabilhan ang papel ni Jesus ingong Tigpataliwala sa bag-ong pakigsaad.

“Hataas nga Saserdote”

15. Nganong ang papel ni Jesus ingong Hataas nga Saserdote lahi nianang sa uban nga nag-alagad kaniadto ingong hataas nga mga saserdote?

¹⁵ Daghan kaniadto ang nag-alagad ingong hataas nga saserdote, apan talagsaon gayod ang papel ni Jesus ingong Hataas nga Saserdote. Sa unsang paagi? Si Pablo nagpatin-aw: “Dili kinahanglan nga siya sa adlaw-adlaw, ingon sa ginahimo niadtong hataas nga mga saserdote, motanyag ug mga halad, una alang sa iyang kaugalingong mga sala ug unya alang niadtong sa katawhan: (kay kini iyang gihimo makausa alang sa tanang panahon sa dihang gihalad niya ang iyang kaugalingon;) kay ang Balaod nagtudlo sa mga tawo nga may mga kaluyahon ingong hataas nga mga saserdote, apan ang pulong sa panumpa nga miabot human sa Balaod nagtudlo sa usa ka Anak, nga nahimong hingpit hangtod sa kahangtoran.”—Heb. 7:27, 28. a

16. Nganong talagsaon gayod ang halad ni Jesus?

¹⁶ Si Jesus hingpit nga tawo, nga katugbang gayod ni Adan sa wala pa kini makasala. (1 Cor. 15:45) Tungod niana, si Jesus lamang ang makahimo sa pagtanyag ug hingpit nga halad—ang matang sa halad nga dili na kinahanglang sublion. Ubos sa Balaod ni Moises, ang mga halad itanyag kada adlaw. Apan, ang maong mga halad maingon man ang pag-alagad nga gihimo sa mga saserdote maoy landong lamang sa gibuhat ug buhaton pa ni Kristo. (Heb. 8:5; 10:1) Busa talagsaon gayod ang papel ni Jesus ingong Hataas nga Saserdote tungod kay kini mas epektibo ug permanente.

17. Nganong angay natong pabilhan ang papel ni Jesus ingong Hataas nga Saserdote, ug sa unsang paagi mahimo nato kana?

¹⁷ Kita nagkinahanglan sa pag-alagad ni Jesus ingong Hataas nga Saserdote aron kita makabaton ug maayong baroganan atubangan sa Diyos. Maayo gayod kaayo ang atong Hataas nga Saserdote! Si Pablo misulat: “Ang atong hataas nga saserdote, dili usa nga dili mobati sa atong mga kaluyahon, kondili usa nga nasulayan sa tanang paagi sama kanato, apan walay sala.” (Heb. 4:15) Busa, kon kita tinuod nga nagpabili niini, kita matukmod gayod sa ‘pagkinabuhi dili na alang sa atong kaugalingon, kondili alang kaniya nga namatay alang kanato.’—2 Cor. 5:14, 15; Luc. 9:23.

 Ang Gisaad nga “Binhi”

18. Unsay gitagna sa dihang nakasala si Adan, ug unsay gipadayag sa ulahi maylabot niining tagnaa?

¹⁸ Balik didto sa Eden, sa dihang ang tawo nawad-an na sa tanan—sa iyang hinlong baroganan atubangan sa Diyos, kinabuhing walay kataposan, kalipay, ug kinabuhi sa Paraiso—si Jehova nga Diyos nagtagna ug usa ka Manluluwas. Siya gitawag nga “binhi.” (Gen. 3:15) Ang maong Binhi, nga wala pa ipaila niadtong panahona, nahimong tema sa daghang tagna sa Bibliya latas sa linibo ka katuigan. Gitagna nga siya kaliwat ni Abraham, Isaac, Jacob, ug ni Haring David.—Gen. 21:12; 22:16-18; 28:14; 2 Sam. 7:12-16.

19, 20. (a) Kinsa ang gisaad nga Binhi? (b) Nganong ikaingon nato nga gawas kang Jesus, aduna pay uban nga nahilakip sa gisaad nga binhi?

¹⁹ Kinsa ang gisaad nga Binhi? Ang tubag niini makaplagan sa Galacia 3:16. (Basaha.) Apan sa ulahing bahin nianang kapituloha, si apostol Pablo mipadayon sa pagsulti ngadto sa dinihogang mga Kristohanon: “Dugang pa, kon kamo iya ni Kristo, kamo sa pagkatinuod binhi ni Abraham, mga manununod maylabot sa usa ka saad.” (Gal. 3:29) Kon si Kristo ang gisaad nga Binhi, sa unsang paagi nahilakip niana ang uban?

²⁰ Milyonmilyong tawo ang nangangkon nga sila kaliwat ni Abraham, ug ang uban kanila nangangkon pa gani nga sila mga manalagna. Ang ubang mga relihiyon nagpasigarbo usab nga kaliwat kono ni Abraham ang ilang mga manalagna. Apan sila ba ang gisaad nga Binhi? Dili. Sumala sa gipahayag ni apostol Pablo ubos sa pagtultol sa Diyos, dili makapangangkon ang tanang kaliwat ni Abraham nga sila mao ang gisaad nga Binhi. Ang kaliwat sa ubang mga anak ni Abraham wala gamita aron mapanalanginan ang tanang tawo. Ang maong binhi maggikan lamang kang Isaac. (Heb. 11:18) Busa, ang pangunang bahin sa gisaad nga Binhi mao lamang si Jesu-Kristo, kansang kagikan girekord diha sa Bibliya. b Sa ulahi, ang ubang mga tawo nahimong ikaduhang bahin sa  binhi ni Abraham tungod kay sila nahimong “iya ni Kristo.” Oo, ang papel ni Jesus sa katumanan niining tagnaa talagsaon gayod.

21. Nganong nakadayeg ka sa paagi ni Jesus sa pagtuman sa iyang talagsaong papel sa katuyoan ni Jehova?

²¹ Unsay atong nakat-onan niining pagsumaryo sa talagsaong papel ni Jesus sa katuyoan ni Jehova? Sukad pa sa pagkalalang sa bugtong Anak sa Diyos, siya talagsaon na. Apan, kining talagsaong Anak sa Diyos, nga sa ulahi nailhang si Jesus, mapaubsanon kanunay sa iyang pag-alagad subay sa kabubut-on sa iyang Amahan, nga wala gayod maninguha sa iyang kaugalingong himaya. (Juan 5:41; 8:50) Pagkamaayong panig-ingnan niana alang kanato karon! Sama kang Jesus, hinaot nga kita maningkamot nga ‘himoon ang tanang butang alang sa kahimayaan sa Diyos.’—1 Cor. 10:31.

[Mga footnote]

Nahinumdom Ka Ba?

• Unsay imong nakat-onan diha sa mga titulo ni Jesus maylabot sa iyang talagsaong papel? (Tan-awa ang panid 15.)

• Sa unsang paagi masundog nimo ang panig-ingnan sa talagsaong Anak ni Jehova?

[Mga Pangutana sa Pagtuon]

[Kahon/Hulagway sa panid 15]

Pipila ka Titulo nga Nagpaila sa Talagsaong Papel ni Jesus sa Katuyoan sa Diyos

◼ Ang Bugtong nga Anak. (Juan 1:3) Si Jesus lamang ang direktang gilalang sa iyang Amahan.

◼ Ang Pulong. (Juan 1:14) Gigamit ni Jehova ang iyang Anak ingong Tigpamaba aron ipahayag ang mga impormasyon ug instruksiyon ngadto sa ubang linalang.

◼ Ang Amen. (Pin. 3:14) Siya hingpit nga nagmatinumanon dinhi sa yuta ug iyang gihatag ang iyang kinabuhi isip halad. Tungod niana, ang tanang saad ni Jehova nga Diyos mamatuman.

◼ Ang Tigpataliwala sa Bag-ong Pakigsaad. (1 Tim. 2:5, 6) Ingong legal nga Tigpataliwala, gipaposible ni Jesus nga mahimugso ang usa ka bag-ong nasod, ang “Israel sa Diyos,” nga gilangkoban sa mga Kristohanon nga mag-alagad ingong mga ‘hari ug saserdote’ sa langit.—Gal. 6:16; 1 Ped. 2:9.

◼ Ang Hataas nga Saserdote. (Heb. 7:27, 28) Si Jesus lamang ang tawo nga makatanyag ug hingpit nga halad nga dili na kinahanglang sublion pa. Iya kitang gihinloan gikan sa sala ug gipahigawas sa makamatay nga epekto niini.

◼ Ang Gisaad nga Binhi. (Gen. 3:15) Si Jesu-Kristo lamang ang pangunang bahin sa gisaad nga binhi. Ang ubang mga tawo, nga sa ulahi nahimong ikaduhang bahin sa binhi ni Abraham, maoy “iya ni Kristo.”—Gal. 3:29.