Ang Alagad ni Jehova—“Gidughang Tungod sa Atong Kalapasan”

“Siya gidughang tungod sa atong kalapasan; siya gidugmok tungod sa atong mga kasaypanan. . . . Tungod sa iyang mga samad dihay pagpang-ayo alang kanato.”—Isa. 53:5.

1. Unsay angay natong hinumdoman sa dihang atong saulogon ang Memoryal, ug unsang tagna ang motabang kanato sa pagbuhat niana?

 KITA magsaulog sa Memoryal aron sa paghandom sa kamatayon ni Kristo ug sa tanang napalampos sa iyang kamatayon ug pagkabanhaw. Ang Memoryal magpahinumdom kanato sa pagbindikar sa pagkasoberano ni Jehova, pagbalaan sa iyang ngalan, ug sa pagkatuman sa iyang katuyoan, nga naglakip sa pagluwas sa katawhan. Tingali wala nay laing tagna sa Bibliya nga molabaw pa nianang narekord sa Isaias 53:3-12, nga tin-awng naghulagway sa halad ni Kristo ug sa napalampos niana. Si Isaias nagtagna sa mga pag-antos nga maagoman sa Alagad ug naghatag ug espesipikong mga detalye bahin sa kamatayon ni Kristo ug sa mga panalangin nga matagamtam sa iyang dinihogang mga igsoon ug sa iyang “ubang mga karnero” tungod sa iyang kamatayon.—Juan 10:16.

2. Ang tagna ni Isaias maoy pamatuod sa unsa, ug unsay epekto niini kanato?

² Mga pito ka siglo sa wala pa si Jesus sa yuta, gidasig ni Jehova si Isaias sa pagtagna nga ang Iyang piniling Alagad magpabiling matinumanon bisan pa sa grabeng pagsulay. Kini nagpakita nga si Jehova masaligon gayod nga ang iyang Anak magmaunongon kaniya. Samtang atong susihon kining tagnaa, ang atong kasingkasing matugob sa pagkamapasalamaton ug ang atong pagtuo molig-on.

 “Gitamay” ug Giisip nga “Walay Hinungdan”

3. Nganong angay untang dawaton sa mga Hudiyo si Jesus, apan giunsa nila siya pagtratar?

³ Basaha ang Isaias 53:3. Handurawa kon unsay nalangkit sa pagbiya sa bugtong Anak sa Diyos sa kiliran sa iyang Amahan ug pag-anhi sa yuta aron sa paghalad sa iyang kinabuhi ug sa ingon maluwas ang katawhan gikan sa sala ug kamatayon! (Filip. 2:5-8) Iyang gihalad ang iyang kinabuhi aron mabatonan ang tinuod nga kapasayloan sa mga sala, nga gilandongan sa mga halad nga mananap ubos sa Moisesnong Balaod. (Heb. 10:1-4) Dili ba angay unta siyang dawaton ug pasidunggan, ilabina sa mga Hudiyo, kinsa nagpaabot sa gisaad nga Mesiyas? (Juan 6:14) Hinunoa, si Kristo “gitamay” sa mga Hudiyo, ug “giisip . . . ingong walay hinungdan,” sumala sa gitagna ni Isaias. Si apostol Juan misulat: “Miabot siya sa iyang kaugalingong panimalay, apan ang iyang kaugalingong katawhan wala modawat kaniya.” (Juan 1:11) Giingnan ni apostol Pedro ang mga Hudiyo: “Ang Diyos sa atong mga katigulangan . . . naghimaya sa iyang Alagad, si Jesus, kinsa inyong gitugyan ug gidumilian sa atubangan ni Pilato, sa dihang siya mihukom nga buhian siya. Oo, inyong gidumilian kanang usa nga balaan ug matarong.”—Buh. 3:13, 14.

4. Sa unsang paagi si Jesus nakasinatig sakit?

⁴ Gitagna usab ni Isaias nga si Jesus ‘makasinatig sakit.’ Panahon sa iyang ministeryo, may mga higayon nga si Jesus gikapoy, apan walay timailhan nga siya nasakit. (Juan 4:6) Apan iyang nakita ang mga sakit sa mga tawo nga iyang gisangyawan. Siya naluoy ug nag-ayo kanila. (Mar. 1:32-34) Busa, si Jesus nagtuman sa tagna nga nag-ingon: “Sa pagkatinuod ang atong mga sakit mao ang iyang gidala; ug kon bahin sa atong mga kasakit, iyang gipas-an kini sila.”—Isa. 53:4a; Mat. 8:16, 17.

Samag “Binunalan sa Diyos”

5. Giunsa paglantaw sa daghang Hudiyo ang kamatayon ni Jesus, ug nganong nakapasamot kana sa iyang pag-antos?

⁵ Basaha ang Isaias 53:4b. Daghan sa mga katalirongan ni Jesus ang wala makasabot sa hinungdan sa iyang pag-antos ug kamatayon. Sila nagtuo nga ang Diyos nagsilot kaniya, nga samag naghampak kaniya sa usa ka makaluod nga sakit. (Mat. 27:38-44) Giakusar sa mga Hudiyo si Jesus ingong mapasipalahon. (Mar. 14:61-64; Juan 10:33) Siyempre, si Jesus dili makasasala ni mapasipalahon. Apan tungod sa iyang dakong gugma sa iyang Amahan, ang pag-akusar kaniya ingong mapasipalahon lagmit nakapasamot sa iyang pag-antos ingong Alagad ni Jehova. Bisan pa niana, siya andam nga magpasakop sa kabubut-on ni Jehova.—Mat. 26:39.

6, 7. Sa unsang diwa si Jehova ‘nagdugmok’ sa iyang matinumanong Alagad, ug nganong kini “gikahimut-an” sa Diyos?

⁶ Dili ikatingala nga si Isaias nagtagna nga ang uban mag-isip kang Kristo nga “binunalan sa Diyos.” Apan kita lagmit matingala sa laing tagna nga nag-ingon: “Si Jehova may kahimuot sa pagdugmok kaniya.” (Isa. 53:10) Sanglit si Jehova nag-ingon usab: “Tan-awa! Ang akong alagad, . . . ang akong pinili, nga giuyonan sa akong kalag,” sa unsang paagi si Jehova “may kahimuot sa pagdugmok kaniya”? (Isa. 42:1) Sa unsang diwa ikaingon nga kini nakapahimuot kang Jehova?

⁷ Aron masabtan kining bahina sa tagna, angay natong hinumdoman nga pinaagi sa paghagit sa pagkasoberano ni Jehova, gikuwestiyon ni Satanas ang pagkamaunongon sa tanang alagad sa  Diyos sa langit ug sa yuta. (Job 1:9-11; 2:3-5) Pinaagi sa pagpabiling matinumanon hangtod sa kamatayon, napamatud-an ni Jesus nga sayop gayod si Satanas. Busa, bisan tuod gitugot ni Jehova nga si Kristo mamatay sa kamot sa iyang mga kaaway, siya seguradong naguol sa kamatayon sa iyang piniling Alagad. Apan, siya nalipay gayod nga ang iyang Anak nagmatinumanon kaniya sa bug-os. (Prov. 27:11) Dugang pa, si Jehova nalipay kaayo kay siya nahibalo nga ang kamatayon sa iyang Anak maghatag ug mga kaayohan sa mga tawong mahinulsolon.—Luc. 15:7.

“Gidughang Tungod sa Atong Kalapasan”

8, 9. (a) Sa unsang paagi si Jesus “gidughang tungod sa atong kalapasan”? (b) Giunsa kini pagpamatuod ni Pedro?

⁸ Basaha ang Isaias 53:6. Sama sa mga karnero nga nahisalaag, ang mga tawong makasasala naglatagaw, nga nangitag kaluwasan gikan sa sakit ug kamatayon nga ilang napanunod gikan kang Adan. (1 Ped. 2:25) Sanglit dili hingpit ang mga kaliwat ni Adan, walay usa kanila ang makaarang sa pagbayad sa iyang giwala. (Sal. 49:7) Apan, tungod sa iyang dakong gugma, “gipahinabo ni Jehova nga ang sala natong tanan mahinagbo niya,” ang iyang minahal nga Anak ug piniling Alagad. Pinaagi sa pagsugot nga ‘dughangon tungod sa atong kalapasan’ ug ‘dugmokon tungod sa atong mga kasaypanan,’ si Kristo nagdala sa atong mga sala diha sa estaka ug namatay alang kanato.

⁹ Si apostol Pedro misulat: “Niini nga dalan kamo gipanagtawag, tungod kay bisan si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob. Siya nagpas-an sa atong mga sala diha sa iyang kaugalingong lawas sa estaka, aron kita mamatay ngadto sa kasal-anan ug mabuhi ngadto sa pagkamatarong.” Dayon, sa pagkutlo sa tagna ni Isaias, si Pedro midugang: “Ug ‘pinaagi sa iyang mga labod kamo nangaayo.’” (1 Ped. 2:21, 24; Isa. 53:5) Kini naghatag ug kahigayonan sa mga makasasala nga mapasig-uli ngadto sa Diyos, sumala sa dugang gipamulong ni Pedro: “Si Kristo namatay sa makausa alang sa tanang panahon maylabot sa mga sala, usa ka matarong nga tawo alang sa mga dili-matarong, aron siya magtultol kaninyo ngadto sa Diyos.”—1 Ped. 3:18.

‘Gidala Sama Gayod sa Usa ka Kordero Aron Pagaihawon’

10. (a) Unsay gisulti ni Juan Bawtista bahin kang Jesus? (b) Nganong haom ang mga pulong ni Juan?

¹⁰ Basaha ang Isaias 53:7, 8. Sa pagkakita ni Juan Bawtista kang Jesus nga nagdangadanga, si Juan mipatugbaw: “Tan-awa, ang Kordero sa Diyos nga magakuha sa sala sa kalibotan!” (Juan 1:29) Sa pagtawag kang Jesus nga Kordero, lagmit nahinumdoman ni Juan ang mga pulong ni Isaias: “Siya gidala sama gayod sa usa ka [kordero] aron pagaihawon.” (Isa. 53:7) Si Isaias nagtagna bahin sa “pagbubo [ni Jesus] sa iyang kalag ngadto gayod sa kamatayon.” (Isa. 53:12) Makaiikag, sa gabii nga gisugdan ni Jesus ang Memoryal sa iyang kamatayon, iyang gihatag ngadto sa iyang 11 ka matinumanong apostoles ang kopa sa bino ug miingon: “Kini nagkahulogan sa akong ‘dugo sa pakigsaad,’ nga igabubo alang sa daghan sa kapasayloan sa mga sala.”—Mat. 26:28.

11, 12. (a) Ang pagkaandam ni Isaac nga ihalad nag-ilustrar sa unsa bahin sa halad ni Kristo? (b) Unsay angay natong hinumdoman bahin sa Dakong Abraham, si Jehova, sa dihang atong saulogon ang Memoryal?

¹¹ Sama kang Isaac, si Jesus andam usab nga ihalad ingong lukat. (Gen. 22:1, 2, 9-13; Heb. 10:5-10) Bisan tuod si Isaac andam sa paghalad sa iyang kaugalingon, si Abraham maoy nagtanyag niini nga halad. (Heb. 11:17) Sa samang paagi, si Jesus andam nga mamatay, apan si Jehova ang mihimog kahikayan kon sa unsang paagi itagana ang lukat. Ang pagtagana ni Jehova sa iyang Anak ingong halad maoy pamatuod sa dakong gugma sa Diyos alang sa katawhan.

¹² Si Jesus mismo miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Misulat si apostol Pablo: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:8) Busa, samtang atong pasidunggan si Kristo pinaagi sa paghandom sa  iyang kamatayon, angay natong hinumdoman nga ang usa nga mihimog kahikayan aron ikatanyag ang halad mao ang Dakong Abraham, si Jehova. Atong saulogon ang Memoryal alang sa iyang kadayeganan.

Ang Alagad Nagdalag “Matarong nga Pagbarog sa Daghang Tawo”

13, 14. Sa unsang paagi ang Alagad ni Jehova nagdalag “matarong nga pagbarog sa daghang tawo”?

¹³ Basaha ang Isaias 53:11, 12. Bahin sa iyang piniling Alagad, si Jehova miingon: “Ang matarong, ang akong alagad, magdalag matarong nga pagbarog sa daghang tawo.” Sa unsang paagi? Ang kataposang bahin sa bersikulo 12 motabang kanato sa pagtubag niana. “Ug siya [ang Alagad] nagpataliwala alang sa mga malapason.” Ang tanang kaliwat ni Adan natawo nga mga makasasala, “mga malapason,” mao nga ilang nadawat “ang suhol nga ginabayad sa sala,” nga mao ang kamatayon. (Roma 5:12; 6:23) Kinahanglang mapasig-uli ang mga makasasala ngadto kang Jehova. Ang Isaias kapitulo 53 tin-awng naghubit kon sa unsang paagi si Jesus ‘magpataliwala,’ o mangatubang, alang sa makasasalang katawhan, nga nag-ingon: “Ang pagkastigo nga alang sa atong kalinaw diha ibabaw niya, ug tungod sa iyang mga samad dihay pagpang-ayo alang kanato.”—Isa. 53:5.

¹⁴ Pinaagi sa iyang pagkuha sa atong mga sala ug paghalad sa iyang kinabuhi alang kanato, si Kristo nagdalag “matarong nga pagbarog sa daghang tawo.” Si Pablo misulat: “Nakitang maayo sa Diyos nga ang tibuok kabug-osan mopuyo diha kaniya [kang Kristo], ug pinaagi kaniya ipasig-uli nganha sa iyang kaugalingon ang tanang ubang butang pinaagi sa pagpakigdait pinaagi sa dugo nga iyang giula diha sa estaka sa pagsakit, kini mga butang man sa yuta o mga butang sa mga langit.”—Col. 1:19, 20.

15. (a) Kinsa ang “mga butang sa mga langit” nga gihisgotan ni Pablo? (b) Kinsa lamang ang may katungod nga moambit sa mga emblema sa Memoryal, ug ngano?

¹⁵ Ang “mga butang sa mga langit” nga napasig-uli ngadto kang Jehova pinaagi sa giula nga dugo ni Kristo mao ang dinihogang mga Kristohanon, nga gitawag aron magmando kauban ni Kristo sa mga langit. Ang mga Kristohanon nga “mag-aambit sa langitnong pagtawag” gipahayag nga “matarong alang sa kinabuhi.” (Heb. 3:1; Roma 5:1, 18) Dayon, sila pagadawaton ni Jehova ingong espirituwal nga mga anak. Ang balaang espiritu nagpamatuod kanila ingong “kaubang mga manununod ni Kristo,” nga gitawag aron mahimong mga hari ug mga saserdote sa iyang langitnong Gingharian. (Roma 8:15-17; Pin. 5:9, 10) Nahimo silang bahin sa espirituwal nga Israel, ang “Israel sa Diyos,” ug sila gidala ngadto sa “bag-ong pakigsaad.” (Jer. 31:31-34; Gal. 6:16) Ingong mga membro sa bag-ong pakigsaad, sila may katungod nga moambit sa mga emblema sa Memoryal, nga naglakip sa kopa sa pula nga bino, nga mahitungod niana si Jesus nag-ingon: “Kini nga kopa nagkahulogan sa bag-ong pakigsaad tungod sa akong dugo, nga igabubo alang kaninyo.”—Luc. 22:20.

16. Unsa ang ‘mga butang sa yuta,’ ug sa unsang paagi sila nakabaton ug matarong nga pagbarog atubangan ni Jehova?

¹⁶ Ang ‘mga butang sa yuta’ mao ang ubang mga karnero ni Kristo, nga may paglaom nga mabuhing walay kataposan sa yuta. Sila nakabaton usab ug matarong nga pagbarog atubangan sa Diyos tungod sa pinili nga Alagad ni Jehova. Kay nagpasundayag man silag pagtuo sa halad lukat ni Kristo ug sa ingon “ilang gilabhan ang ilang tag-as nga mga  besti ug gipaputi kini sa dugo sa Kordero,” sila gipahayag ni Jehova nga matarong, dili ingong espirituwal nga mga anak, kondili ingong iyang mga higala, nga naghatag kanila sa kahibulongang paglaom nga makalabang buhi “sa dakong kasakitan.” (Pin. 7:9, 10, 14; Sant. 2:23) Sanglit ang ubang mga karnero dili man bahin sa bag-ong pakigsaad ug busa walay paglaom nga mabuhi sa langit, sila dili makig-ambit sa mga emblema sa Memoryal apan motambong niana ingong matinahorong mga tigpaniid.

Magpasalamat Kang Jehova ug sa Iyang Giuyonan nga Alagad!

17. Sa unsang paagi ang pagtuon sa mga tagna ni Isaias bahin sa Alagad mag-andam sa atong hunahuna alang sa Memoryal?

¹⁷ Ang pagsusi sa mga tagna ni Isaias bahin sa Alagad maoy usa ka maayong paagi aron atong maandam ang atong hunahuna alang sa Memoryal sa kamatayon ni Kristo. Kini mopalihok kanato nga “tutokan ang Pangulong Ahente ug Maghihingpit sa atong pagtuo.” (Heb. 12:2) Atong nakat-onan nga ang Anak sa Diyos dili rebelyoso. Dili sama kang Satanas, si Jesus nalipay nga mahimong tinudloan ni Jehova, nga nag-ila kaniya ingong Soberanong Ginoo. Atong nasayran nga panahon sa ministeryo ni Jesus dinhi sa yuta, siya nagpakitag kaluoy sa mga tawo nga iyang gisangyawan, nga nag-ayo kanila sa pisikal ug espirituwal nga paagi. Sa ingon iyang gipakita kon unsay iyang pagabuhaton ingong Mesiyanikong Hari sa bag-ong sistema sa mga butang sa dihang “iyang ikapahimutang ang hustisya sa yuta.” (Isa. 42:4) Ang kasibot nga iyang gipakita sa pagsangyaw sa Gingharian, ingong “kahayag sa kanasoran,” magpahinumdom sa iyang mga sumusunod nga kinahanglan nilang isangyaw nga masiboton ang maayong balita sa tibuok yuta.—Isa. 42:6.

18. Nganong ang tagna ni Isaias makapatugob sa atong kasingkasing sa pagpasalamat kang Jehova ug sa iyang matinumanong Alagad?

¹⁸ Ang tagna ni Isaias mopalalom usab sa atong pagsabot sa dakong sakripisyo nga gihimo ni Jehova sa dihang iyang gipadala sa yuta ang iyang pinalanggang Anak aron mag-antos ug mamatay alang kanato. Si Jehova may kahimuot, dili sa pagtan-aw sa iyang Anak nga nag-antos, kondili sa pagpabilin niining matinumanon hangtod sa kamatayon. Kita usab angayng malipay, sama kang Jehova, ug magpabili sa tanang gihimo ni Jesus sa pagpamatuod nga si Satanas bakakon ug sa pagbalaan sa ngalan ni Jehova, sa ingon nagbindikar sa Iyang pagkasoberano. Atong nakat-onan usab nga si Kristo nagkuha sa atong mga sala ug namatay alang kanato. Pinaagi niana, ang gamayng panon sa iyang dinihogang mga igsoon ug ang ubang mga karnero nakabaton ug matarong nga pagbarog atubangan ni Jehova. Samtang magtigom kita sa Memoryal, hinaot nga ang atong kasingkasing matugob sa pagpasalamat kang Jehova ug sa iyang matinumanong Alagad.

Agig Pagsubli

• Sa unsang diwa nga si Jehova “may kahimuot” sa pagkahimong ‘dugmok’ sa iyang Anak?

• Sa unsang paagi si Jesus “gidughang tungod sa atong kalapasan”?

• Sa unsang paagi ang Alagad nagdalag “matarong nga pagbarog sa daghang tawo”?

• Sa unsang paagi ang pagtuon sa mga tagna bahin sa Alagad nag-andam sa imong hunahuna ug kasingkasing alang sa Memoryal?

[Mga Pangutana sa Pagtuon]

[Hulagway sa panid 26]

“Siya gitamay, ug atong giisip siya ingong walay hinungdan”

[Hulagway sa panid 28]

‘Iyang gibubo ang iyang kalag ngadto sa kamatayon’

[Hulagway sa panid 29]

Ang “ubang mga karnero” motambong sa Memoryal ingong matinahorong mga tigpaniid