Ikaw ba “Piniyalan sa Dili-Takos nga Kalulot sa Diyos”?

“Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.”—Roma 12:10.

1. Unsang mga pasalig ang atong makaplagan diha sa Pulong sa Diyos?

 ANG Pulong sa Diyos balik-balik nga nagpasalig kanato nga si Jehova andam motabang sa dihang kita maguol o mobatig kasakit. Pananglitan, matikdi kining mga pulonga: “Si Jehova nagasapnay sa tanan nga napukan, ug nagabangon sa tanan nga naumod.” “Siya nagaayo sa mga may gun-ob nga kasingkasing, ug nagabugkos sa ilang masakit nga mga bahin.” (Sal. 145:14; 147:3) Dugang pa, mismong ang atong langitnong Amahan miingon: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”—Isa. 41:13.

2. Sa unsang paagi si Jehova nagtabang sa iyang mga alagad?

² Sa unsang paagi si Jehova, nga nagpuyo sa dili makita nga kalangitan, ‘mohawid sa atong kamot’? Sa unsang paagi siya ‘magabangon kanato sa dihang kita naumod’ tungod sa mga kasakit? Si Jehova nga Diyos nagtabang sa lainlaing paagi. Pananglitan, siya naghatag sa iyang katawhan ug “gahom nga labaw sa kasarangan” pinaagi sa iyang balaang espiritu. (2 Cor. 4:7; Juan 14:16, 17) Ang mga alagad sa Diyos napalig-on usab sa gahom sa mensahe nga anaa sa inspiradong Pulong sa Diyos, ang Bibliya. (Heb. 4:12) Aduna pa bay laing paagi nga si Jehova nagpalig-on kanato? Atong makaplagan ang tubag niana diha sa unang basahon ni Pedro.

Ang ‘Dili-Takos nga Kalulot sa Diyos Gipahayag sa Nagkadaiyang Paagi’

3. (a) Unsay gisulti ni apostol Pedro maylabot sa mga pagsulay? (b) Unsay gihisgotan sa ulahing bahin sa unang sulat ni Pedro?

³ Maylabot sa dinihogan-sa-espiritu nga mga magtutuo, si apostol Pedro misulat nga sila may maayong rason nga magmalipayon tungod sa dagayang ganti nga naghulat kanila. Dayon, siya midugang: “Bisan tuod nga karon sa makadiyot, kon kinahanglanon man, kamo naguol sa nagkadaiyang mga pagsulay.” (1 Ped. 1:1-6) Matikdi ang pulong ‘nagkadaiya.’ Kini nagpasabot nga ang mga pagsulay nagkalainlain. Apan, wala magduhaduha ang mga isigkamagtutuo ni Pedro kon sila ba makalahutay niini tungod kay duna pa siyay laing gisulti. Iyang gihisgotan nga ang mga Kristohanon makasalig sa tabang ni Jehova aron sila makalahutay sa bisan unsang pagsulay nga ilang masinati. Ang maong pasalig makaplagan sa hinapos nga bahin sa sulat ni Pedro, diin iyang gisaysay ang mga butang maylabot sa “kataposan sa tanang butang.”—1 Ped. 4:7.

4. Nganong makapadasig kanato ang mga pulong sa 1 Pedro 4:10?

⁴ Si Pedro miingon: “Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga piniyalan sa dili-takos nga kalulot sa Diyos nga gipahayag sa nagkadaiyang paagi.” (1 Ped. 4:10) Gigamit na usab ni Pedro ang pulong ‘nagkadaiya.’ Siya samag nag-ingon nga, ‘Nagkalainlain ang pagsulay, apan nagkalainlain usab ang pagpasundayag sa dili-takos nga kalulot sa Diyos.’ Nganong makapadasig ang maong mga pulong? Tungod kay kini nagpasabot nga bisan unsang pagsulay ang atong masinati, adunay paagi ang Diyos sa pagpakita sa iyang dili-takos nga kalulot nga motabang kanato sa paglahutay. Imo bang namatikdan diha sa mga pulong ni Pedro kon sa unsang paagi ipakita ni Jehova kanato ang iyang dili-takos nga kalulot? Pinaagi kana sa atong mga isigka-Kristohanon.

 “Pag-alagad sa Usag Usa”

5. (a) Unsay angayng himoon sa matag Kristohanon? (b) Unsang mga pangutana ang motungha?

⁵ Sa tanang membro sa Kristohanong kongregasyon, si Pedro nag-ingon: “Labaw sa tanang butang, batoni ang mainit nga gugma alang sa usag usa.” Siya midugang: “Sumala sa nadawat nga gasa sa matag usa, gamita kini sa pag-alagad sa usag usa.” (1 Ped. 4:8, 10) Busa, responsabilidad sa matag usa diha sa kongregasyon nga dasigon ang iyang isigka-Kristohanon. Gipiyal kanato ni Jehova ang usa ka bililhong butang, ug kita adunay kaakohan sa pagpaambit niini ngadto sa uban. Nan, unsa kining gipiyal kanato? Si Pedro miingon nga kini usa ka “gasa.” Unsa kanang gasaha? Sa unsang paagi nato kana ‘magamit sa pag-alagad sa usag usa’?

6. Unsa ang pipila sa mga gasa nga gipiyal ngadto sa mga Kristohanon?

⁶ Ang Pulong sa Diyos nag-ingon: “Ang matag maayong gasa ug matag hingpit nga regalo naggikan sa itaas.” (Sant. 1:17) Sa pagkatinuod, ang tanang gasa nga gipiyal ni Jehova sa iyang mga alagad nagbanaag sa iyang dili-takos nga kalulot. Ang usa sa talagsaong gasa nga gihatag ni Jehova kanato mao ang balaang espiritu. Ang maong gasa nagtabang kanato sa pag-ugmad sa diyosnong mga hiyas sama sa gugma, pagkamaayo, ug kalumo. Sa baylo, ang maong mga hiyas magtukmod kanato sa pagpakitag kinasingkasing nga pagbati ug pagkaandam motabang sa atong mga isigkamagtutuo. Lakip usab sa maayong mga gasa nga atong nabatonan mao ang tinuod nga kaalam ug kahibalo sa tabang sa balaang espiritu. (1 Cor. 2:10-16; Gal. 5:22, 23) Sa pagkatinuod, ang atong tanang kusog, katakos, ug mga talento mahimong lantawon usab nga mga gasa nga magamit sa pagdayeg ug pagpasidungog sa atong langitnong Amahan. Gisugo kita sa Diyos sa paggamit sa atong mga katakos ug mga hiyas aron ipakita ang dili-takos nga kalulot sa Diyos ngadto sa atong mga isigkamagtutuo.

“Gamita Kini sa Pag-alagad”—Sa Unsang Paagi?

7. (a) Unsay gipaila sa pamulong nga “sumala sa nadawat nga gasa sa matag usa”? (b) Unsang mga pangutana ang angay natong isukna sa atong kaugalingon, ug ngano?

⁷ Bahin sa mga gasa nga atong nadawat, si Pedro usab miingon: “Sumala sa nadawat nga gasa sa matag usa, gamita kini.” Ang pamulong nga “sumala sa nadawat nga gasa sa matag usa,” nagpasabot nga ang matag usa kanato dunay lainlaing hiyas ug katakos ug lainlain usab ang sukod niini. Bisan unsa pa kana nga gasa, ang matag usa giawhag sa ‘paggamit niana sa pag-alagad sa usag usa.’ Dugang pa, ang pamulong “gamita kini . . . ingon nga maayong mga piniyalan” maoy usa ka sugo. Busa, angay natong suknaon ang atong kaugalingon: ‘Gigamit ba nako ang gasa nga gipiyal kanako sa pagpalig-on sa akong mga isigkamagtutuo?’  (Itandi ang 1 Timoteo 5:9, 10.) ‘O gigamit ba nako ang mga katakos nga gihatag ni Jehova alang sa akong kaugalingong kaayohan—lagmit aron madato o mainila?’ (1 Cor. 4:7) Kon atong gamiton ang atong mga gasa “sa pag-alagad sa usag usa,” atong mapahimut-an si Jehova.—Prov. 19:17; basaha ang Hebreohanon 13:16.

8, 9. (a) Unsa ang pipila ka paagi diin ang mga Kristohanon sa tibuok kalibotan nag-alagad sa ilang mga isigkamagtutuo? (b) Sa unsang paagi nagtinabangay ang mga igsoon sa inyong kongregasyon?

⁸ Ang Pulong sa Diyos naghisgot ug lainlaing paagi diin ang unang-siglong mga Kristohanon nag-alagad sa usag usa. (Basaha ang Roma 15:25, 26; 2 Timoteo 1:16-18.) Karon usab, ang matuod nga mga Kristohanon kinasingkasing nga nagtuman sa sugo nga gamiton ang maong mga gasa alang sa ilang mga isigkamagtutuo. Tagda ang pipila ka paagi sa paghimo niini.

⁹ Daghang igsoong lalaki ang naggugol ug daghang oras matag bulan sa pagpangandam sa ilang mga bahin sa panagkatigom. Diha sa mga tigom, ilang ipaambit sa uban ang pipila ka hinungdanong impormasyon nga ilang nakat-onan sa ilang pagtuon sa Bibliya, ug kini makatabang sa tanan diha sa kongregasyon aron makalahutay. (1 Tim. 5:17) Daghang igsoon ang nailhan nga mabination ug maluluy-on sa ubang mga igsoon. (Roma 12:15) Ang pipila regular nga nagduaw sa mga nagmagul-anon ug nag-ampo uban kanila. (1 Tes. 5:14) Ang uban nagkugi sa pagsulat ug makapadasig nga mensahe ngadto sa ilang mga isigkamagtutuo nga nakasinatig pagsulay. Ang uban usab nagtabang sa mga tigulang ug mga baldado aron makatambong sa panagkatigom. Linibo sa mga Saksi ang mitabang aron matukod pag-usab ang mga balay sa ilang mga isigkamagtutuo nga gihapak sa mga kalamidad. Ang malumong pagmahal ug praktikal nga tabang nga gipakita sa mga igsoon maoy pagpasundayag sa “dili-takos nga kalulot sa Diyos nga gipahayag sa nagkadaiyang paagi.”—Basaha ang 1 Pedro 4:11.

Unsa ang Mas Hinungdanon?

10. (a) Unsang duha ka bahin sa pag-alagad sa Diyos ang giila ni Pablo? (b) Sa unsang paagi atong masundog si Pablo?

¹⁰ Ang mga alagad sa Diyos gipiyalan dili lamang sa gasa nga ilang magamit sa pagtabang sa ilang mga isigkamagtutuo, kondili sa mensahe usab nga ilang ikapaambit ngadto sa uban. Giila ni apostol Pablo ang maong duha ka bahin sa iyang pag-alagad kang Jehova. Siya misulat ngadto sa kongregasyon sa Efeso bahin sa iyang “pagkapiniyalan sa dili-takos nga kalulot sa Diyos” alang sa ilang kaayohan. (Efe. 3:2) Apan, siya usab miingon: “Kami napamatud-an sa Diyos nga angayang piyalan sa maayong balita.” (1 Tes. 2:4) Sama kang Pablo, giila nato ang atong pagkapiniyalan sa buluhaton nga pagsangyaw sa Gingharian sa Diyos. Pinaagi sa pagsangyaw nga masiboton, kita naningkamot sa pagsundog sa ehemplo nga gipakita ni Pablo ingong malahutayong magsasangyaw sa maayong balita. (Buh. 20:20, 21; 1 Cor. 11:1) Nasayod kita nga ang pagsangyaw sa mensahe sa Gingharian makaluwas ug kinabuhi. Apan sa samang higayon, kita naningkamot usab sa pagsundog kang Pablo pinaagi sa pagpangitag kahigayonan nga ‘makahatag ug espirituwal nga gasa’ sa atong mga isigkamagtutuo.—Basaha ang Roma 1:11, 12; 10:13-15.

11. Unsay angay natong panglantaw sa atong kaakohan nga mosangyaw ug motabang sa atong mga igsoon?

¹¹ Hain niining duha ka Kristohanong buluhaton ang mas hinungdanon? Ang pagpangutana niana nahisama ra sa pagpangutana bahin sa usa ka langgam: Hain sa iyang duha ka pako ang mas hinungdanon? Tataw gayod ang tubag niana. Ang langgam nagkinahanglan sa duha ka pako aron makalupad. Sa susama, kinahanglan kitang makig-ambit niining duha ka bahin sa atong pag-alagad sa Diyos aron atong matuman ang tanang gikinahanglan sa Diyos kanato ingong mga Kristohanon. Busa, imbes maghunahuna kita nga ang pagsangyaw sa maayong balita lahi sa pagtabang sa atong mga isigkamagtutuo, ato kining gilantaw nga nalangkit sa usag usa sama sa panglantaw niini ni apostol Pedro ug Pablo. Sa unsang paagi?

12. Sa unsang paagi kita magamit ni Jehova ingong iyang instrumento?

¹² Ingong mga magwawali, atong gamiton ang atong mga katakos sa pagpanudlo aron maabot ang kasingkasing sa mga tawo uban sa makapadasig nga mensahe sa Gingharian sa Diyos. Nianang paagiha, kita naglaom nga ato silang matabangan  nga mahimong tinun-an ni Kristo. Apan, angay usab nga atong gamiton ang atong mga katakos o mga gasa sa pagdasig sa atong mga isigkamagtutuo uban ang makapalig-ong mga pulong ug buhat, nga maoy pagpasundayag sa dili-takos nga kalulot sa Diyos. (Prov. 3:27; 12:25) Nianang paagiha, kita nanghinaot nga sila makapabilin ingong mga tinun-an ni Kristo. Sa duha ka buluhaton—ang pagsangyaw sa publiko ug “pag-alagad sa usag usa”—kita adunay talagsaong pribilehiyo nga magamit ni Jehova ingong iyang instrumento.—Gal. 6:10.

“Batoni ang Malumong Pagmahal Alang sa Usag Usa”

13. Unsay mahitabo kon kita mohunong sa “pag-alagad sa usag usa”?

¹³ Gidasig ni Pablo ang iyang mga isigkamagtutuo: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Sa pagkatinuod, ang pagbaton ug malumong pagmahal alang sa atong mga igsoon magtukmod kanato nga moalagad nga bug-os kasingkasing ingong mga piniyalan sa dili-takos nga kalulot sa Diyos. Nahibalo kita nga kon molampos si Satanas sa pagpahunong kanato sa “pag-alagad sa usag usa,” maapektohan ang atong panaghiusa. (Col. 3:14) Sa baylo, ang kakulang ug panaghiusa makapaluya kanato sa pagsangyaw. Nahibalo gayod si Satanas nga kinahanglan lamang niyang paluyahon ang usa ka bahin sa atong pag-alagad, samag pagdaot sa usa lamang ka pako sa langgam aron kini dili na makalupad.

14. Kinsay makabenepisyo sa atong “pag-alagad sa usag usa”? Paghatag ug pananglitan.

¹⁴ Ang “pag-alagad sa usag usa” makatabang dili lamang niadtong nakadawat sa dili-takos nga kalulot sa Diyos kondili niadtong nagpaambit usab niini. (Prov. 11:25) Tagda pananglitan ang magtiayon nga si Ryan ug Roni, nga taga-Illinois, sa Amerika. Sa dihang ilang nahibaloan nga nangaguba ang ginatos ka balay sa mga igsoon tungod sa Bagyong Katrina, sila miresayn sa ilang trabaho, mihawa sa ilang apartment, mipalit ug segunda-mano nga treyler aron puy-an ug mibiyahe paingon sa Louisiana, nga 1,400 kilometros ang gilay-on. Ila kining gihimo tungod sa ilang gugma sa mga igsoon. Nagpuyo sila didto ug kapin sa usa ka tuig samtang ilang gigamit ang ilang panahon, kusog, ug mga kahinguhaan sa pagtabang sa ilang mga igsoon. “Ang among pagpakigbahin niining buluhatona mas nakapasuod kanamo ngadto sa Diyos,” miingon si Ryan, nga nag-edad ug 29. “Akong nakita kon giunsa pag-atiman ni Jehova ang iyang katawhan.” Si Ryan midugang: “Ang  akong pagpakig-uban sa edarang mga igsoong lalaki nagtudlo kanako kon unsaon pag-atiman ang mga igsoon. Akong nakat-onan usab nga kaming mga batan-on daghag mahimo diha sa organisasyon ni Jehova.” Si Roni, nga nag-edad ug 25, misulat: “Mapasalamaton gayod ako nga nakatabang sa uban, ug mas malipayon ako karon kay sukad masukad. Nahibalo ko nga sa umaabot, padayon nakong anihon ang kaayohan niining talagsaong kasinatian.”

15. Nganong angay kitang mopadayon sa pag-alagad ingong mga piniyalan sa dili-takos nga kalulot sa Diyos?

¹⁵ Sa pagkatinuod, ang pagsunod sa mga sugo sa Diyos nga iwali ang maayong balita ug dasigon ang atong mga isigkamagtutuo magdalag panalangin sa tanan. Ang usa nga atong gitabangan molig-on sa espirituwal, samtang kita usab makasinatig tim-os nga kalipay tungod sa atong pagkamanggihatagon. (Buh. 20:35) Kon ang matag usa diha sa kongregasyon magpakitag mahigugmaong interes sa uban, ang tibuok kongregasyon mouswag. Dugang pa, ang gugma ug tiunay nga pagbati nga atong gipakita sa usag usa nagpaila nga kita matuod nga mga Kristohanon. Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Labaw sa tanan, madayeg ang atong mahigugmaong Amahan, si Jehova, tungod kay ang gihimo sa iyang mga alagad nagpakita sa iyang tinguha nga palig-onon ang mga nanginahanglan. Busa, angay gayod natong gamiton ang atong gasa sa “pag-alagad sa usag usa ingon nga maayong mga piniyalan sa dili-takos nga kalulot sa Diyos”! Magpadayon ka ba sa paghimo niana?—Basaha ang Hebreohanon 6:10.

Nahinumdom Ka Ba?

• Sa unsang mga paagi gipalig-on ni Jehova ang iyang mga alagad?

• Unsay gipiyal kanato?

• Unsay pipila ka paagi nga kita makaalagad alang sa atong mga isigkamagtutuo?

• Unsay magpalihok kanato sa pagpadayon sa paggamit sa atong gasa “sa pag-alagad sa usag usa”?

[Mga Pangutana sa Pagtuon]

[Mga hulagway sa panid 13]

Imo bang gigamit ang imong “gasa” sa pag-alagad sa uban o sa pagpahimuot sa imong kaugalingon?

[Mga hulagway sa panid 15]

Kita nagsangyaw sa uban ug nagtabang usab sa atong mga isigka-Kristohanon

[Hulagway sa panid 16]

Angayng komendahan ang pagsakripisyo nga gihimo sa pipila aron tabangan ang ilang mga isigka-Kristohanon