Magmalipayon sa Paghimog mga Tinun-an
Magmalipayon sa Paghimog mga Tinun-an
“Busa panglakaw kamo ug paghimog mga tinun-an.”—Mat. 28:19.
1-3. (a) Unsay gibati sa pipila bahin sa pribilehiyo sa pagdumalag mga pagtuon sa Bibliya? (b) Unsang mga pangutana ang atong hisgotan?
“A KONG gidumalahan ug pagtuon ang usa ka pamilya nga taga-Pakistan sa miaging 11 ka semana,” misulat ang usa ka sister nga nag-alagad sa usa ka grupo sa Amerika nga nagsultig Hindi nga pinulongan. “Siyempre kami nagkahigalaay,” siya miingon. “Naguol ko kay sila mamalik na sa Pakistan sa di madugay. Nakahilak ko dili lang tungod sa kamingaw, kondili sa kalipay usab nga akong nasinati samtang nagtudlo kanila bahin kang Jehova.”
2 Nasinati ba usab nimo ang kalipay nga gibati sa maong sister sa pagdumalag pagtuon sa Bibliya? Si Jesus ug ang iyang mga tinun-an sa unang siglo nalipay pag-ayo sa paghimog mga tinun-an. Sa dihang mibalik ang 70 ka tinun-an nga gibansay ni Jesus dala ang makalilipayng taho, siya “nalipay sa hilabihan diha sa balaang espiritu.” (Luc. 10:17-21) Sa samang paagi, daghan karon ang nalipay pag-ayo sa paghimog mga tinun-an. Gani, sa 2007, ang makugihon ug malipayong mga magmamantala nagdumalag pagtuon sa Bibliya sa aberids nga unom ka milyon ug tunga matag bulan!
3 Apan ang ubang magmamantala wala pa makasinati sa kalipay sa pagdumalag pagtuon sa Bibliya. Ang uban lagmit walay gidumalahag pagtuon sa miaging katuigan. Unsang mga babag ang lagmit atong masinati samtang maningkamot kita sa pagdumalag pagtuon sa Bibliya? Unsaon nato kana pagbuntog? Ug unsang mga ganti ang atong madawat kon atong himoon ang tanan natong maarangan sa pagsunod sa sugo ni Jesus: “Panglakaw kamo ug paghimog mga tinun-an”?—Mat. 28:19.
Mga Babag nga Makawala sa Atong Kalipay
4, 5. (a) Unsay pagsanong sa mga tawo sa ubang bahin sa kalibotan bahin sa pagsangyaw? (b) Unsang mga babag ang giatubang sa mga magmamantala sa ubang lugar?
4 Sa ubang mga bahin sa kalibotan, ang mga tawo mahinamong modawat sa atong mga basahon ug gustong magtuon sa Bibliya uban kanato. Usa ka magtiayon nga taga-Australia nga temporaryong nag-alagad sa Zambia misulat: “Tinuod ang mga estorya. Nindot kaayong sangyawan ang Zambia. Makapalipay gayod ang pagsangyaw diha sa kadalanan! Ang mga tawo maoy moduol namo, ug ang uban mangayo pa ganig partikular nga mga gula sa magasin.” Sa di pa dugayng tuig, ang mga igsoon sa Zambia nagdumalag kapin sa 200,000 ka pagtuon sa Bibliya. Miaberids kini ug kapin sa usa ka pagtuon sa Bibliya sa matag magmamantala.
5 Apan sa ubang mga lugar, ang mga magmamantala malisdan sa pagpahimutang ug mga basahon ug pagdumalag mga pagtuon sa Bibliya nga regular. Ngano? Kasagaran, ang mga tawo wala sa balay inigduaw sa mga magmamantala, ug ang uban maabtan nimo apan dili interesado sa relihiyon. Basin nagdako sila sa pamilyang dili relihiyoso o kaha naglagot sa pagkasalingkapaw sa bakak nga relihiyon. Daghang tawo daw pinanitan ug sinalikway sa mini nga mga lider sa relihiyon. (Mat. 9:36) Busa, masabot nato kon nganong sila magpanuko sa pagpakighisgot bahin sa Bibliya.
6. Unsang mga kababagan ang gisagubang sa ubang magmamantala?
6 Ang ubang matinumanong mga magmamantala nag-atubang ug laing kahimtang nga makawala sa ilang kalipay. Bisan pag kaniadto aktibo kaayo sila sa pagdumalag pagtuon sa Bibliya, sila karon masakiton o kaha tigulang na. Tagda usab ang pipila ka kababagan nga lagmit atong masinati. Pananglitan, mibati ka ba nga dili kuwalipikadong modumala ug pagtuon sa Bibliya? Gibati tingali nimo ang gibati ni Moises sa dihang siya gisugo ni Jehova nga makig-estorya kang Paraon. Si Moises miingon: “Pasayloa ako, Jehova, apan dili ako larinong mamumulong, ni sukad kaniadto ni sukad sa una pa niana.” (Ex. 4:10) Nalangkit pag-ayo niining pagbatia ang kahadlok nga dili ma-Saksi ang tawo nga imong dumalahan. Tingali mahadlok kita nga siya dili mahimong tinun-an tungod kay dili kita maayong motudlo. Basig tungod niana, dili na lang kita modumalag pagtuon sa Bibliya. Unsaon nato pagbuntog ang maong mga babag?
Andama ang Imong Kasingkasing
7. Nganong makugihon si Jesus sa iyang ministeryo?
7 Ang unang tikang mao ang pag-andam sa atong kasingkasing. Si Jesus miingon: ‘Gikan sa kadagaya sa kasingkasing ang baba nagasulti.’ (Luc. 6:45) Si Jesus nagkugi sa iyang ministeryo tungod sa tim-os nga kabalaka sa kaayohan sa uban. Pananglitan, sa dihang iyang nakita nga dili maayo ang kahimtang sa espirituwal sa iyang mga isigka-Hudiyo, “siya naluoy kanila.” Siya miingon sa iyang mga tinun-an: “Dako ang alanihon . . . Pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.”—Mat. 9:36-38.
8. (a) Unsay angay natong pamalandongon? (b) Unsay atong makat-onan sa komento sa usa nga gidumalahan ug pagtuon sa Bibliya?
8 Samtang kita makigbahin sa paghimog tinun-an, makaayo kon atong pamalandongon ang dakong kaayohan nga atong naangkon tungod sa usa nga naggahin ug panahon aron magtuon sa Bibliya uban kanato. Hunahunaa usab ang mga tawo nga atong ikahibalag diha sa ministeryo ug ang kaayohan nga ilang maangkon sa ilang pagpatalinghog sa mensahe nga atong gidala. Usa ka babaye misulat sa sangang buhatan sa nasod nga iyang gipuy-an: “Buot kong masayod mo sa kalipay nga akong gibati tungod sa mga Saksi nga nagtudlo kanako sa Bibliya sa balay. Nahibalo ko nga usahay kapuyan sila nako tungod kay daghan kog mga pangutana ug kanunay mi molapas sa gitakdang oras. Apan giantosan gyod ko nila, ug andam sila sa pagtudlo kanako. Mapasalamaton kaayo ko kang Jehova ug kang Jesus nga sila miabot sa akong kinabuhi.”
9. Sa unsa gisentro ni Jesus ang iyang pagtagad, ug sa unsang paagi masundog nato siya?
9 Siyempre, dili tanan ang misanong sa mga paningkamot ni Jesus sa pagtabang kanila. (Mat. 23:37) Ang uban misunod kaniya makadiyot apan sa ulahi misupak sa iyang pagtulon-an ug “wala na molakaw kauban niya.” (Juan 6:66) Apan, si Jesus wala mobati nga walay bili ang iyang mensahe tungod lamang sa maong negatibong sanong. Bisan tuod daghan sa mga binhi nga iyang gipugas wala mamunga, iyang gisentro ang iyang pagtagad sa maayo nga iyang nahimo. Iyang nakita nga daghan ang alanihon ug siya nalipay pag-ayo sa pagtabang sa pag-ani. (Basaha ang Juan 4:35, 36.) Sa samang paagi, inay hunahunaon nga dili interesado ang mga tawo, dili ba maayong hunahunaon nga posibleng dunay mga interesado sa atong teritoryo? Atong susihon kon unsaon nato pagmentinar ang positibong tinamdan.
Pagpugas sa Tumong nga Makaani
10, 11. Unsay imong mahimo aron mamentinar ang imong kalipay?
10 Ang mag-uuma magpugas sa tumong nga makaani. Sa samang paagi, kita mosangyaw sa tumong nga makasugod ug mga pagtuon sa Bibliya. Apan komosta kon regular kang nagasangyaw apan pipila ra ka tawo ang imong makaplagan diha sa balay o kaha dili na nimo sila ikahibalag sa dihang ikaw magbalikduaw. Makapaluya kini. Mohunong ka na lang ba sa pagbalaybalay? Dili gayod! Daghan pa gihapong tawo ang unang napakig-estoryahan nianang paagiha.
11 Apan, aron mamentinar ang imong kalipay, mapalapad ba nimo ang imong mga paagi sa pagsangyaw pinaagig laing mga metodo? Pananglitan, nakasulay ka na ba sa pagsangyaw diha sa kadalanan o sa trabahoan sa mga tawo? Makontak ba nimo ang mga tawo pinaagig telepono o makuha ang mga numero sa mga tawong imo nang nasangyawan aron imo silang matawgan? Pinaagi sa pagkamalahutayon ug pagkamapailin-ilinon, ikaw malipay sa pagkaplag ug mga tawo nga mosanong sa mensahe sa Gingharian.
Pagsagubang sa Kawalay-Interes
12. Unsay atong mahimo kon ang mga tawo sa atong teritoryo walay interes?
12 Komosta kon daghan sa mga tawo sa inyong teritoryo walay interes sa relihiyon? Ikapasibo ba nimo ang imong pagpakig-estorya aron sila mainteres? Si apostol Pablo misulat sa mga isigkamagtutuo sa Corinto: “Ngadto sa mga Hudiyo ako nahimong ingon sa usa ka Hudiyo . . . Ngadto nilang walay balaod ako nahimong ingon sa walay balaod, bisan tuod ako dili kay walay balaod sa Diyos.” Unsay motibo ni Pablo? Siya miingon: “Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila.” (1 Cor. 9:20-22) Kita ba usab makapakig-estoryag mga ulohan nga makapainteres sa mga tawo sa atong teritoryo? Buot sa mga tawong dili relihiyoso nga mouswag ang ilang relasyon sa pamilya. Basin buot usab nilang masayran ang tinuod nga katuyoan sa kinabuhi. Ikapresentar ba nato ang mensahe sa Gingharian sa paagi nga sila mainteres?
13, 14. Sa unsang paagi mahimong mouswag ang atong kalipay sa paghimog-tinun-an nga buluhaton?
13 Nagkadaghan ang mga magmamantala nga nakakaplag ug dakong kalipay sa pagdumalag pagtuon sa Bibliya, bisan diha sa mga lugar nga daghag dili interesado. Sa unsang paagi? Pinaagi sa pagtuon ug langyaw nga pinulongan. Usa ka magtiayon nga anaa sa mga edad nga 60 nakamatikod nga dunay daghan kaayong estudyanteng Insek uban sa ilang pamilya nga nagpuyo sa ilang teritoryo. “Tungod niini, nadasig mi sa pagtuon ug Ininsek,” matod sa bana. “Bisan pag mogahin kamig panahon matag adlaw sa pagtuon niini nga pinulongan,” siya nagkanayon, “kini miresultag daghang pagtuon sa Bibliya uban sa mga Insek sa among lugar.”
14 Bisag dili ka makamaong mosulti ug langyawng pinulongan, imong magamit ang pulyetong Good News for People of All Nations sa dihang ikaw makahimamat ug mga tawo nga lahig pinulongan. Sagad makakuha ka usab ug mga literatura sa maong mga pinulongan. Tinuod, nagkinahanglag ekstrang panahon ug paningkamot aron makasangyaw sa mga tawong lahig pinulongan ug kultura. Apan hinumdomi ang prinsipyo sa Pulong sa Diyos: “Siya nga nagapugas nga madagayaon magaani usab nga madagayaon.”—2 Cor. 9:6.
Nalangkit ang Tibuok Kongregasyon
15, 16. (a) Nganong nalangkit ang tibuok kongregasyon sa paghimog-tinun-an nga buluhaton? (b) Unsang tabang ang mahimo sa mga edaran?
15 Bisan pa niana, ang paghimog mga tinun-an wala mag-agad sa mga paningkamot sa usa lamang ka magmamantala, kondili kini naglangkit sa tibuok kongregasyon. Ngano? Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ug tinuod man, inigtambong sa mga estudyante sa mga tigom, makadayeg gayod sila sa mahigugmaong tinagdan sa mga igsoon. Usa ka estudyante sa Bibliya misulat: “Malipay gyod ko sa pagtambong sa mga tigom. Maabiabihon kaayo ang mga tawo!” Si Jesus miingon nga si bisan kinsa nga buot mahimong iyang sumusunod lagmit supakon sa iyang pamilya. (Basaha ang Mateo 10:35-37.) Apan siya nagsaad nga diha sa kongregasyon, sila makabatog daghang espirituwal nga “mga igsoong lalaki ug mga igsoong babaye ug mga inahan ug mga anak.”—Mar. 10:30.
16 Ang atong edarang mga igsoon dakog tabang sa pag-uswag sa mga estudyante sa Bibliya. Sa unsang paagi? Bisan pag ang pipila kanila dili na makadumalag pagtuon sa Bibliya, ang ilang makapalig-ong mga komento sa mga tigom makapadasig sa tanang maminaw. Ang ilang rekord sa paglakaw diha “sa dalan sa pagkamatarong” makatampo sa katahom sa kongregasyon ug makapadani sa matinud-anog kasingkasing nga mga tawo sa pagsulod sa organisasyon sa Diyos.—Prov. 16:31.
Buntoga ang mga Kahadlok
17. Unsay atong mahimo aron mabuntog ang pagbati nga dili takos modumalag pagtuon sa Bibliya?
17 Komosta kon imong gibati nga dili ka takos modumala ug pagtuon sa Bibliya? Hinumdomi nga si Jehova nagtabang kang Moises pinaagig paghatag kaniya ug balaang espiritu, ug usa ka kauban, ang iyang igsoon nga si Aaron. (Ex. 4:10-17) Si Jesus nagsaad nga ang espiritu sa Diyos magpaluyo sa atong pagsangyaw. (Buh. 1:8) Dugang pa, gipadala ni Jesus ang mga magsasangyaw nga tinagurha. (Luc. 10:1) Busa, kon malisdan ka sa pagdumalag pagtuon sa Bibliya, iampo nga ang espiritu sa Diyos maghatag kanimog kaalam ug dayon pakig-uban sa usa ka igsoon nga may kasinatian aron makatabang kanimo. Makapalig-on sa pagtuo ang paghinumdom nga gipili ni Jehova ang ordinaryong mga tawo—“ang mahuyang nga mga butang sa kalibotan”—aron palamposon kining talagsaong buluhaton.—1 Cor. 1:26-29.
18. Unsaon nato pagbuntog ang kahadlok nga basig dili molampos ang atong pagdumalag pagtuon?
18 Unsaon nato pagbuntog ang kahadlok nga basig dili molampos ang atong pagdumalag pagtuon? Hinumdomi nga ang paghimog tinun-an dili sama sa paglutog sud-an nga ang kalami ug kalas-ay nag-agad lang sa tigluto. Kini wala lamang mag-agad sa atong kaugalingong paningkamot. Si Jehova ang naghimo sa labing hinungdanong bahin, ang pagkabig sa maong tawo ngadto kaniya. (Juan 6:44) Kita ug ang mga igsoon sa kongregasyon maningkamot sa paggamit sa arte sa pagpanudlo aron matabangan nga mouswag ang estudyante. (Basaha ang 2 Timoteo 2:15.) Ug ang estudyante angayng molihok sumala sa iyang nakat-onan. (Mat. 7:24-27) Kon ang usa mohunong sa pagtuon sa Bibliya, kini mahimong makapaluya sa atong buot. Kita naglaom nga ang mga estudyante sa Bibliya mopili sa husto nga paagi, apan ang matag usa kinahanglang “manubag alang sa iyang kaugalingon ngadto sa Diyos.”—Roma 14:12.
Unsa ang mga Ganti?
19-21. (a) Unsang mga kaayohan ang atong madawat tungod sa pagdumalag mga pagtuon sa Bibliya? (b) Unsay panglantaw ni Jehova sa tanang nakigbahin sa pagsangyaw nga buluhaton?
19 Ang atong pagdumalag mga pagtuon sa Bibliya motabang kanato sa pagpangita pag-una sa intereses sa Gingharian. Itisok usab niini ang mga kamatuoran sa Pulong sa Diyos diha sa atong hunahuna ug kasingkasing. Sa unsang paagi? Ang payunir nga si Barak misaysay: “Ang pagdumalag pagtuon sa Bibliya magtabang kanimo nga mahimong maayong estudyante sa Pulong sa Diyos. Akong nasabtan nga kinahanglang palig-onon una nako ang akong pagtuo sa dili pa ko motudlo sa uban.”
20 Kon ikaw walay gidumalahan ug pagtuon sa Bibliya, nagpasabot ba kana nga ang imong pag-alagad walay kapuslanan sa Diyos? Dili gayod! Si Jehova dulot nga nagpabili sa atong mga paningkamot sa pagdayeg kaniya. Ang tanang nakigbahin sa pagsangyaw maoy “mga isigkamagbubuhat sa Diyos.” Bisan pa niana, ang pagdumalag pagtuon sa Bibliya makadugang sa atong kalipay samtang atong makita nga gipatubo sa Diyos ang binhi nga atong napugas. (1 Cor. 3:6, 9) “Samtang imong makita nga mouswag ang estudyante sa Bibliya,” matod pa sa usa ka payunir nga si Amy, “mobati kag dakong kalipay tungod kay si Jehova naggamit kanimo sa paghatag sa maong tawo ug usa ka kahibulongang gasa—ang kahigayonan nga makaila kang Jehova ug makadawat sa kinabuhing dayon.”
21 Ang pagbuhat sa atong maarangan nga makasugod ug makadumalag mga pagtuon sa Bibliya motabang kanato nga masentro ang atong pagtagad sa pag-alagad sa Diyos karon ug maglig-on sa atong paglaom nga makalabang-buhi ngadto sa bag-ong kalibotan. Uban sa pagpaluyo ni Jehova, kita makatabang usab nga maluwas kadtong maminaw kanato. (Basaha ang 1 Timoteo 4:16.) Pagkamakapalipay unya niana!
Nahinumdom Ka Ba?
• Unsang mga babag ang lagmit nakapugong sa uban sa pagdumalag mga pagtuon sa Bibliya?
• Unsay atong buhaton kon daghang tawo sa atong teritoryo ang dili interesado?
• Unsang mga ganti ang atong mabatonan tungod sa pagdumalag pagtuon sa Bibliya?
[Mga Pangutana sa Pagtuon]
[Mga hulagway sa panid 9]
Gipalapad ba nimo ang imong mga paagi sa pagsangyaw aron makaplagan ang matinud-anog-kasingkasing nga mga tawo?