“Mao Kini ang Dalan. Lakaw Kamo Niini”

Sugilanon Ni Emilia Pederson

Sumala sa Giasoy ni Ruth E. Pappas

ANG akong inahan nga si Emilia Pederson natawo sa 1878. Bisan tuod nahimo siyang maestra, gusto gayod niyang gamiton ang iyang kinabuhi sa pagtabang sa mga tawo nga masuod sa Diyos. Ang ebidensiya niini mao ang usa ka dakong maleta nga atua sa among balay sa gamayng lungsod sa Jasper, sa Minnesota, U.S.A. Iya kadtong gipalit aron kasudlan sa iyang mga gamit paingon sa Tsina, diin siya gustong magmisyonarya. Apan, sa dihang namatay ang iyang inahan, wala madayon ang iyang mga plano kay kinahanglan na man niyang atimanon ang iyang mga manghod. Sa 1907 naminyo siya kang Theodore Holien. Natawo ako niadtong Disyembre 2, 1925—ang kamanghoran sa pito ka anak.

Si Mama adunay mga pangutana bahin sa Bibliya nga gusto gayod niyang matubag. Ang usa niana mao ang pagtulon-an bahin sa nagkalayong impiyerno diin didto kono sakiton ang mga daotan. Iyang gipangutana ang usa ka nagaduawng superbisor sa Lutheran Church kon asa makita sa Bibliya ang maong pagtulon-an. Ang superbisor miingon nga dili importante kon unsay giingon sa Bibliya—ang nagkalayong impiyerno sa pagsakit kinahanglang itudlo.

Natagbaw ang Iyang Espirituwal nga Kagutom

Wala madugay human sa 1900, ang igsoon ni Mama nga si Emma, miadto sa Northfield, Minnesota, aron sa pagtuon ug musika. Siya miestar sa balay sa iyang maestro nga si Milius Christianson, kansang asawa usa ka Estudyante sa Bibliya, nga maoy pagtawag kaniadto sa mga Saksi ni Jehova. Nahisgotan ni Emma nga may igsoon siyang himasa ug Bibliya. Wala madugay, gipadad-an ni Gng. Christianson si Mama ug sulat nga nagtubag sa iyang mga pangutana sa Bibliya.

Usa ka adlaw niana, usa ka Estudyante sa Bibliya nga ginganlag Lora Oathout ang miabot sa Jasper sakay sa tren nga gikan sa Sioux Falls, South Dakota, aron sa pagsangyaw didto. Gitun-an ni Mama ang mga basahon sa Bibliya nga iyang nadawat, ug sa 1915, iya nang gipaambit sa uban ang kamatuoran sa Bibliya, nga nanagtag sa mga literatura nga dala ni Lora.

Sa 1916, nakabalita si Mama nga moadto si Charles Taze Russell sa kombensiyon sa Sioux City, Iowa. Gusto niyang motambong. Niining panahona, lima na ang anak ni Mama, ug ang kamanghoran nga si Marvin nagpangedaron pa lag lima ka bulan. Bisan pa niana, uban sa tanan niyang mga anak, siya misakay sa tren ug mibiyaheg mga 160 ka kilometros paingon sa Sioux City aron motambong sa maong kombensiyon. Siya nakadungog sa mga pakigpulong ni Brader Russell, nakakita sa “Photo-Drama of Creation,” ug nabawtismohan. Pag-uli nila, misulat siyag usa ka artikulo mahitungod sa kombensiyon, nga gipatik sa Jasper Journal.

Sa 1922, apil si Mama sa mga 18,000 nga mitambong sa kombensiyon sa Cedar Point, Ohio. Human niadto nga kombensiyon, wala na gayod siya mohunong sa pag-anunsiyo sa Gingharian sa  Diyos. Ang iyang panig-ingnan nakadasig kanamo sa pagpamati sa tambag: “Mao kini ang dalan. Lakaw kamo niini.”—Isa. 30:21.

Mga Bunga sa Pagsangyaw sa Gingharian

Sa sayong bahin sa katuigan sa 1920, mibalhin ug puyo ang akong mga ginikanan sa gawas sa Jasper. Dihay malamposong negosyo si Papa ug usa ka dakong pamilya nga kinahanglang suportahan. Dili sama ni Mama, si Papa dili kaayo masiboton sa pagtuon sa Bibliya niadtong panahona. Apan bug-os kasingkasing siyang nagpaluyo sa buluhatong pagsangyaw ug nagbukas sa among balay alang sa nagapanawng mga ministro, nga gitawag kaniadto ug mga pilgrim. Kasagaran, sa dihang mohatag ug pakigpulong diha sa among balay ang usa sa nagapanawng mga igsoon, mga usa ka gatos o kapin pa ang manambong—nga magdasok diha sa among sala, kan-anan, ug kuwarto.

Sa dihang nagpangedaron kog mga pito ka tuig, mitawag ang akong iyaan nga si Lettie ug nagpahibalo kanamo nga gustong magtuon ug Bibliya ang iyang mga silingan nga si Ed Larson ug ang iyang asawa. Ila dayong gidawat ang kamatuoran sa Bibliya ug sa ulahi nagdapit sa laing silingan nga si Martha Van Daalen, nga may walo ka anak, nga moapil sa pagtuon. Si Martha ug ang iyang tibuok pamilya nahimo usab nga mga Estudyante sa Bibliya. a

Nianang panahona, si Gordon Kammerud, usa ka batan-ong lalaki nga nagpuyo pipila ka kilometros gikan sa among balay, nanarbaho sa akong amahan. Gipasidan-an si Gordon sa uban: “Pagbantay sa mga anak nga dalaga sa imong amo. Lain na silag relihiyon.” Apan, si Gordon nagsugod pagtuon sa Bibliya ug wala madugay nakombinsir nga iya nang nakaplagan ang kamatuoran. Tulo ka bulan sa ulahi, siya nabawtismohan. Nahimong mga magtutuo usab ang iyang mga ginikanan, ug ang among mga pamilya—ang mga Holien, Kammerud, ug ang mga Van Daalen—nahimong suod kaayong managhigala.

Nadasig sa mga Kombensiyon

Nadasig kaayo si Mama sa kombensiyon sa Cedar Point mao nga dili gayod niya gustong paltahan sa pagtambong ang mga kombensiyon. Busa ang akong mahinumdoman sa akong pagkabata mo ang lagyong mga pagbiyahe aron sa pagtambong ug mga kombensiyon. Makasaysayanhon gayod ang kombensiyon sa Columbus, Ohio, niadtong 1931 tungod kay nianang higayona gisagop ang ngalang mga Saksi ni Jehova. (Isa. 43:10-12) Dili usab nako makalimtan ang kombensiyon sa Washington, D.C., niadtong 1935, diin gipaila sa usa ka makasaysayanhong pakigpulong ang “dakong pundok,” o ang “dakong panon,” nga gihisgotan sa Pinadayag. (Pin. 7:9; King James Version) Ang akong mga igsoon nga si Lilian ug Eunice apil sa kapig 800 nga nabawtismohan didto.

Mibiyahe ang among pamilya alang sa mga kombensiyon sa Columbus, Ohio, sa 1937; sa Seattle, Washington, sa 1938; ug sa New York City sa 1939. Miuban kanamo ang mga pamilyang Van Daalen, Kammerud ug uban pa, ug kami nagkampo  sa among pagbiyahe. Si Eunice naminyo kang Leo Van Daalen sa 1940, ug sila nagpayunir. Sa mao ra gihapong tuiga, naminyo si Lilian kang Gordon Kammerud, ug sila nagpayunir usab.

Espesyal gayod ang kombensiyon niadtong 1941 nga gipahigayon sa St. Louis, Missouri. Didto, libolibo ka batan-on ang nakadawat sa librong Children. Kadto nga kombensiyon maoy hinungdanong yugto alang kanako. Wala madugay human niadto, sa Septiyembre 1, 1941, kauban sa akong igsoon nga si Marvin ug sa iyang asawa nga si Joyce, ako nagpayunir. Kinse anyos ako niadto.

Sanglit nagpuyo man kami sa uma, ang pipila ka igsoon malisdan sa pagtambong sa mga kombensiyon kay sagad maatol man kini sa ting-ani. Busa human sa mga kombensiyon, diha mi gihimong mga repaso niini sa likod sa among balay aron makabenepisyo kadtong wala makatambong. Malipayon kadto nga mga panagtapok.

Gilead ug Langyawng mga Asaynment

Niadtong Pebrero 1943, ang Tunghaang Gilead gisugdan aron bansayon ang mga payunir alang sa misyonaryong pag-alagad. Apil sa unang klase ang unom ka membro sa pamilyang Van Daalen—ang magsoong Emil, Arthur, Homer, ug Leo; ang ilang ig-agaw nga si Donald; ug ang asawa ni Leo nga si Eunice, nga akong igsoon. Kami nanamilit uban ang nagsagol nga pagbati kay wala kami mahibalo kon kanus-a namo sila makita pag-usab. Human sa graduwasyon, silang unom giasayn sa Puerto Rico, diin wala pay napulo ang mga Saksi niadtong panahona.

Paglabay sa usa ka tuig, si Lilian ug Gordon mao man usab si Marvin ug Joyce mitambong sa ikatulong klase sa Gilead. Sila usab gipadala ngadto sa Puerto Rico. Dayon, sa Septiyembre 1944, sa edad nga 18, ako mitambong sa ikaupat nga klase sa Gilead. Human makagraduwar sa Pebrero 1945, miduyog ako sa akong mga igsoon sa Puerto Rico. Usa gayod kadto ka bag-ong eksperyensiya kanako! Bisag lisod ang pagtuon ug Kinatsila, wala madugay ang pipila kanamo nagdumala nag kapin sa 20 ka pagtuon sa Bibliya matag usa. Gipanalanginan ni Jehova ang among buluhaton. Karon, mga 25,000 na ang mga Saksi sa Puerto Rico!

Mga Trahedya nga Nahitabo sa Among Pamilya

Si Leo ug Eunice nagpabilin sa Puerto Rico human makabaton ug anak nga lalaki, si Mark, sa 1950. Sa 1952 nagplano sila nga mobakasyon aron moduaw sa mga paryente. Sa Abril 11, sila misakay ug ayroplano. Apan wala madugay human makalupad ang ayroplano, kini nahagsa sa dagat. Namatay si Leo ug Eunice. Apan ang duha ka tuig nga si Mark nakit-ang naglutawlutaw sa dagat. Giitsa siya sa usa sa naluwas nga mga pasahero ngadto sa usa ka bote ug gitabang—ug siya nabuhi. b

Lima ka tuig human niana, sa Marso 7, 1957, samtang nagpaingon sa Kingdom Hall, nahiyosag ligid ang sakyanan ni Mama ug Papa. Samtang nag-ilis ug ligid sa daplin sa dalan, nabanggaan si Papa sa usa ka sakyanan ug namatay dihadiha. Kapig 600 ang mitambong sa pakigpulong sa serbisyo sa paglubong, ug kini nakahatag ug maayong pamatuod sa komunidad, diin si Papa respetado kaayo.

Bag-ong mga Asaynment

Sa wala pa mamatay si Papa, nakadawat akog asaynment nga mag-alagad sa Argentina. Sa Agosto 1957, miabot ko sa siyudad sa Mendoza sa tiilan sa Kabukiran sa Andes. Sa 1958, si George Pappas, nga migraduwar sa ika-30ng klase sa Gilead, naasayn sa Argentina. Nagkasuod mi ni George, ug kami gikasal niadtong Abril 1960. Sa 1961, namatay si Mama sa  edad nga 83. Siya naglakaw nga matinumanon diha sa dalan sa pagkamatarong ug daghan gayod siyag natabangan nga mosundog sa iyang panig-ingnan.

Sulod sa napulo ka tuig kami ni George nag-alagad uban sa pipila ka misyonaryo sa lainlaing puy-anan sa mga misyonaryo. Dayon kami migugol ug pito ka tuig diha sa sirkitong buluhaton. Sa 1975 kami mibalik sa Tinipong Bansa aron sa pag-atiman sa mga membro sa pamilya nga nasakit. Sa 1980, ang akong bana gidapit nga mag-alagad sa sirkito nga nagsultig Kinatsila. Diha pa lamay mga 600 ka kongregasyon sa Tinipong Bansa nga nagsulti sa maong pinulongan niadtong panahona. Sulod sa 26 ka tuig, daghan sa maong mga kongregasyon ang among naduaw ug among nakita nga kini miuswag ngadto sa kapig 3,000.

Sila Naglakaw Diha sa “Dalan”

Nalipay usab si Mama sa pagkakita sa bata pang mga membro sa iyang pamilya nga nagpayunir. Pananglitan, si Carol, nga anak sa among kamagulangang igsoong babaye, nga si Ester, nagsugod sa pagpayunir niadtong 1953. Siya naminyo kang Dennis Trumbore, ug sila nag-alagad nga bug-os panahon sukad niadto. Ang laing anak babaye ni Ester, si Lois, naminyo kang Wendell Jensen. Sila migraduwar sa ika-41 nga klase sa Gilead ug nag-alagad sa Nigeria ingong mga misyonaryo sulod sa 15 ka tuig. Si Mark, kansang mga ginikanan namatay sa pagkahagsa sa ayroplano, gisagop sa iyang iyaan nga si Ruth La Londe, ug sa bana niini nga si Curtiss. Si Mark kauban sa iyang asawa, nga si Lavonne, nagpayunir sa daghang tuig ug nagmatuto sa ilang upat ka anak diha sa “dalan.”—Isa. 30:21.

Si Orlen, ang nahibiling buhi nako nga igsoon, nagpangedaron nag kapin sa 90 anyos. Siya maunongon gihapong nag-alagad kang Jehova. Kami ni George malipayon nga nagpadayon diha sa bug-os-panahong pag-alagad.

Ang Kabilin ni Mama

Anaa kanako ang usa sa mga bililhong kabtangan ni Mama—ang iyang lamesa. Regalo kadto ni Papa kaniya sa ilang kasal. Naa sa usa sa mga hunos ang iyang karaang scrapbook, nga dunay daghang sulat ug mga artikulo sa mantalaan nga iyang gisulat diin nakahatag siyag maayong pamatuod sa Gingharian. Ang pipila niini gisulat sa sayong bahin sa katuigan sa 1900. Anaa usab sa maong lamesa ang gitipigang mga sulat gikan sa misyonaryong mga anak ni Mama. Malipay gyod ko nga balik-balikon kinig basa! Ug ang iyang mga sulat kanamo makapadasig gayod, nga napuno sa positibong mga pulong. Wala matuman ni Mama ang iyang pangandoy nga mahimong misyonarya. Bisan pa niana, siya adunay kasibot sa misyonaryong pag-alagad nga maoy nakadasig sa uban nga nagkinabuhi ulahi kaniya. Ako naghinamhinam gayod sa panahon nga magkatapok kami pag-usab ingong usa ka dakong pamilya uban ni Mama ug Papa sa paraisong yuta!—Pin. 21:3, 4.

[Mga footnote]

[Hulagway sa panid 17]

Si Emilia Pederson

[Hulagway sa panid 18]

1916: Si Mama ug Papa (nagkugos ni Marvin); sa ubos, wala ngadto sa tuo: si Orlen, Ester, Lilian, Mildred

[Hulagway sa panid 19]

Si Leo ug Eunice, dili pa dugay una sila mamatay

[Hulagway sa panid 20]

1950: Wala ngadto sa tuo, ibabaw: si Ester, Mildred, Lilian, Eunice, Ruth; ubos: si Orlen, Mama, Papa, ug Marvin

[Hulagway sa panid 20]

Si George ug Ruth Pappas sa sirkitong buluhaton, 2001