Mga Pangunang Punto sa Basahon sa Pinadayag—I
Ang Pulong ni Jehova Buhi
Mga Pangunang Punto sa Basahon sa Pinadayag—I
SAMTANG nabilanggo sa isla sa Patmos, ang tigulang nga si apostol Juan nakakita ug 16 ka sunodsunod nga panan-awon. Diha sa maong mga panan-awon iyang nakita kon unsay buhaton ni Jehova nga Diyos ug ni Jesu-Kristo sa adlaw sa Ginoo—ang yugto nga nagsugod gikan sa pagkatukod sa Gingharian sa Diyos niadtong 1914 hangtod sa kataposan sa Usa ka Libo ka Tuig nga Pagmando ni Kristo. Ang basahon sa Pinadayag, nga gisulat ni Juan sa mga tuig 96 K.P., maoy kulbahinam nga asoy niini nga mga panan-awon.
Atong tagdon karon ang mga pangunang punto sa Pinadayag 1:1–12:17, nga naghisgot sa unang pito ka panan-awon nga nakita ni Juan. Maikag kita niini sanglit nagtumong kini sa mga panghitabo sa kalibotan karon ug nagpakita kon unsay buhaton ni Jehova sa haduol nga umaabot. Kadtong nagbasa niini nga asoy uban ang pagtuo nahupayan ug nadasig gayod.—Heb. 4:12.
GIBUKSAN SA “KORDERO” ANG UNOM SA PITO KA TIMBRE
Una, nakita ni Juan ang hinimayang si Jesu-Kristo ug nadawat ang sunodsunod nga mensahe nga kinahanglan niyang ‘isulat sa usa ka linukot nga basahon ug ipadala ngadto sa pito ka kongregasyon.’ (Pin. 1:10, 11) Misunod ang panan-awon bahin sa usa ka trono nga nahimutang sa langit. Diha sa tuong kamot sa Usa nga naglingkod sa trono adunay linukot nga basahon nga may pito ka timbre. Ang usa nga “takos nga mobukas sa linukot nga basahon” mao “ang Leyon nga gikan sa tribo ni Juda,” o “usa ka kordero . . . nga may pito ka sungay ug pito ka mata.”—Pin. 4:2; 5:1, 2, 5, 6.
Ang ikatulong panan-awon nagpadayag kon unsay nahitabo sa dihang sunodsunod nga gibuksan sa “Kordero” ang unang unom ka timbre. Sa pagbukas sa ikaunom niini, nahitabo ang usa ka dakong linog ug miabot ang dakong adlaw sa kapungot. (Pin. 6:1, 12, 17) Apan ang sunod nga panan-awon nagpakita sa ‘upat ka manulonda nga hugot nga nagkupot sa upat ka hangin sa yuta’ hangtod nga nakompleto ang pagtimbre sa 144,000. “Usa ka dakong panon” nga walay timbre ang nakita “nga nagbarog atubangan sa trono ug atubangan sa Kordero.”—Pin. 7:1, 9.
Tubag sa mga Pangutana Bahin sa Kasulatan:
1:4; 3:1; 4:5; 5:6—Unsay gipasabot sa ekspresyong “pito ka espiritu”? Ang numero siyete nagsimbolo sa pagkakompleto sumala sa panglantaw sa Diyos. Busa, ang mensahe ngadto sa “pito ka kongregasyon” mapadapat sa tanang katawhan sa Diyos nga gitigom diha sa kapin sa 100,000 ka kongregasyon sa tibuok yuta. (Pin. 1:11, 20) Sanglit si Jehova nagahatag ug balaang espiritu sumala sa iyang kabubut-on, ang ekspresyong “pito ka espiritu” nagpasabot sa pagkabug-os sa paglihok niini sa paghatag ug kaalam ug pagpanalangin niadtong nagpatalinghog sa tagna. Ang basahon sa Pinadayag subsob nga naghisgot ug serye nga tinagpito. Ang numero siyete dinhi nagpasabot ug pagkakompleto, ug sa pagkatinuod, ang basahon naghisgot bahin sa ‘pagkatapos,’ o pagkakompleto, sa “sagradong tinago sa Diyos.”—Pin. 10:7.
1:8, 17—Kang kinsa mapadapat ang mga titulong “ang Alfa ug ang Omega” ug “ang Una ug ang Ulahi”? Ang titulong “ang Alfa ug ang Omega” mapadapat kang Jehova, nga nagpasiugda nga walay laing labing gamhanang Diyos nga nauna o mosunod pa kaniya. Siya “ang sinugdan ug ang kataposan.” (Pin. 21:6; 22:13) Hinunoa, bisan tuod si Jehova ang gitumong ingong “ang una ug ang ulahi” sa Pinadayag 22:13, ug nga walay nauna o mosunod pa kaniya, ang konteksto sa unang kapitulo sa Pinadayag nagpakita nga ang titulong “ang Una ug ang Ulahi” nagtumong kang Jesu-Kristo. Siya ang kinaunhan ug kinaulahiang tawo nga gibanhaw mismo ni Jehova ngadto sa imortal nga espirituhanong kinabuhi.—Col. 1:18.
2:7—Unsa ang “paraiso sa Diyos”? Sanglit kining mga pulonga gitumong man sa dinihogang mga Kristohanon, ang paraiso dinhi lagmit nagpasabot sa samag paraiso nga kahimtang sa langit—ang presensiya mismo sa Diyos. Ang matinumanong dinihogan makapribilehiyo sa pagkaon sa “kahoy sa kinabuhi.” Sila makadawat sa pagkawalay-kamatayon.—1 Cor. 15:53.
3:7—Kanus-a nadawat ni Jesus ang “yawi ni David,” ug sa unsang paagi niya kini gigamit? Sa iyang bawtismo sa 29 K.P., si Jesus gitudlo ingong Hari sa linya ni David. Hinunoa, nadawat lamang ni Jesus ang maong yawi pagka 33 K.P. sa dihang gibayaw siya ngadto sa tuong kamot sa Diyos. Didto iyang napanunod ang tanang katungod sa Davidikong Gingharian. Sukad niadto, gigamit ni Jesus ang yawi sa pagbukas sa mga kahigayonan ug pribilehiyo sa pag-alagad maylabot sa Gingharian. Sa 1919, gitugyan ni Jesus “ang yawi sa balay ni David” ngadto sa “matinumanon ug maalamong ulipon” pinaagi sa pagtudlo nianang ulipon nga matang “ibabaw sa tanan niyang mga kabtangan.”—Isa. 22:22; Mat. 24:45, 47.
3:12—Unsa ang “bag-ong ngalan” ni Jesus? Kini may kalambigitan sa bag-ong katungdanan ug mga pribilehiyo ni Jesus. (Filip. 2:9-11) Bisan tuod walay makaarang sa pagkahibalo nianang ngalana sama kang Jesus, iya kining gisulat diha sa iyang matinumanong mga igsoon sa langit, nga nagdala kanila ngadto sa usa ka suod nga relasyon uban kaniya. (Pin. 19:12) Gipaambit pa gani ni Jesus ang iyang mga pribilehiyo ngadto kanila.
Mga Leksiyon Alang Kanato:
1:3. Sanglit “ang tinudlong panahon [sa pagpahamtang sa Diyos sa mga paghukom batok sa kalibotan ni Satanas] haduol na,” kinahanglan gayod nga masabtan ang mensahe sa basahon sa Pinadayag ug molihok uyon niana.
3:17, 18. Aron mahimong dato sa espirituwal, kinahanglang mopalit kita kang Jesus ug “bulawan nga dinalisay sa kalayo.” Sa ato pa, ang pagpaningkamot nga mahimong dato sa maayong mga buhat. (1 Tim. 6:17-19) Kinahanglan usab nga atong isul-ob ang “maputing panggawas nga mga besti,” nga magpaila kanato ingong mga sumusunod ni Kristo, ug gamiton ang “banyos-sa-mata,” sama sa tambag nga gipatik sa magasing Bantayanang Torre, aron makabaton kitag espirituwal nga pagsabot.—Pin. 19:8.
7:13, 14. Ang 24 ka ansiyano naghawas sa 144,000 sa ilang langitnong himaya, diin sila nag-alagad ingong mga hari ug mga saserdote. Kini sila gihulagwayan sa mga saserdote sa Israel kaniadto, nga gibahinbahin ni Haring David ngadto sa 24 ka dibisyon. Ang usa sa mga ansiyano nagpadayag kang Juan kon kinsa ang dakong panon. Busa, ang pagkabanhaw sa dinihogang mga Kristohanon lagmit nagsugod una pa ang tuig 1935. Ngano? Tungod kay nianang tuiga gipadayag ngadto sa dinihogang mga alagad sa Diyos dinhi sa yuta kon kinsa ang dakong panon.—Luc. 22:28-30; Pin. 4:4; 7:9.
ANG PAGBUKAS SA IKAPITONG TIMBRE MISANGPOT SA PAGHUYOP SA PITO KA TROMPETA
Gibuksan sa Kordero ang ikapitong timbre. Pito ka manulonda ang nakadawat ug pito ka trompeta. Unom kanila ang mihuyop niana, nga nagmantala sa mga mensahe sa paghukom batok sa “ikatulo ka bahin” sa mga tawo—ang Kakristiyanohan. (Pin. 8:1, 2, 7-12; 9:15, 18) Mao kini ang nakita ni Juan sa ikalimang panan-awon. Ingong bahin sa mosunod nga panan-awon, gikaon ni Juan ang gamay nga linukot nga basahon ug gisukod ang sangtuwaryo sa templo. Human sa paghuyop sa ikapitong trompeta, dihay makusog nga mga tingog nga nagpahibalo: “Ang gingharian sa kalibotan nahimo nang gingharian sa atong Ginoo ug sa iyang Kristo.”—Pin. 10:10; 11:1, 15.
Ang ikapitong panan-awon naghatag ug dugang katin-awan sa giingon sa Pinadayag 11:15, 17. Usa ka dakong ilhanan ang nakita diha sa langit. Ang langitnong babaye nanganak ug usa ka anak, usa ka lalaki. Ang Yawa gipalagpot gikan sa langit. Kay napungot sa langitnong babaye, siya “nakiggubat sa mga nahibilin sa iyang binhi.”—Pin. 12:1, 5, 9, 17.
Tubag sa mga Pangutana Bahin sa Kasulatan:
8:1-5—Nganong nahitabo man ang kahilom sa langit, ug unsay gitambog dinhi sa yuta human niana? Nahitabo ang masambingayong kahilom sa langit aron madungog ang “pag-ampo sa mga balaan” dinhi sa yuta. Nahitabo kini pagkahuman sa unang gubat sa kalibotan. Ang dinihogang mga Kristohanon wala mosaka sa langit pagkatapos sa Panahon sa mga Hentil, sama sa gidahom sa kadaghanan. Sila nakasinatig kalisdanan panahon sa gubat. Busa nianang tungora tim-os silang nag-ampo alang sa giya. Ingong tubag niana, gitambog sa manulonda dinhi sa yuta ang usa ka masambingayong kalayo nga maoy nagpalihok sa dinihogang mga Kristohanon nga magmadasigon pag-usab sa ilang buluhaton. Bisag diyutay ra sila, ilang gisugdan ang tibuok-kalibotang kampanya sa pagsangyaw nga tungod niana ang Gingharian sa Diyos nahimong init kaayo nga isyu ilabina taliwala sa Kakristiyanohan. Gipalanog ang samag dalugdog nga mga pasidaan sa Bibliya, gipadayag ang mga kidlap sa kamatuoran sa Kasulatan, ug gitay-og ang patukoranan sa bakak nga relihiyon, sama ra nga ang mga tinukod gitay-og sa usa ka linog.
8:6-12; 9:1, 13; 11:15—Kanus-a nangandam ang pito ka manulonda sa paghuyop sa ilang mga trompeta, ug kanus-a ug sa unsang paagi kana gipalanog? Ang pag-andam sa paghuyop sa pito ka trompeta naglakip sa pagtaganag pagtultol sa naaktibo pag-usab nga mga membro sa Juan nga matang dinhi sa yuta sukad sa 1919 hangtod sa 1922. Ang maong mga dinihogan puliki na kaayo sa paghikay pag-usab sa pagsangyaw ug pagtukod ug mga pasilidad sa pagpatik. (Pin. 12:13, 14) Ang pagpalanog sa mga trompeta naghulagway sa walay-kokahadlok nga pagmantala sa mga paghukom ni Jehova batok sa kalibotan ni Satanas nga gihimo sa katawhan sa Diyos sa tabang sa mga manulonda. Makaiikag, gisugdan kini pinaagi sa kombensiyon sa Cedar Point, Ohio, niadtong 1922 ug matapos sa dakong kasakitan.
8:13; 9:12; 11:14—Sa unsang paagi ang kataposang tulo ka budyong sa trompeta nagpahayag ug “kaalaotan”? Samtang ang unang upat ka budyong sa trompeta nagyagyag sa patay sa espirituwal nga kahimtang sa Kakristiyanohan, ang kataposang tulo maoy mga kaalaotan nga nalangkit sa espesipikong mga panghitabo. Ang ikalima nga budyong adunay kalabotan sa pagpahigawas sa katawhan sa Diyos gikan sa “kahiladman” sa pagkawalay kalihokan niadtong 1919 ug sa ilang walay-hunong nga buluhatong pagpamatuod, nga nahimong samag hampak nga nagsakit sa Kakristiyanohan. (Pin. 9:1) Ang ikaunom maoy bahin sa labing dakong pag-asdang sa mga magkakabayo sukad masukad ug sa tibuok-kalibotang pagsangyaw nga nagsugod niadtong 1922. Ang kataposang budyong may kalabotan sa pagkahimugso sa Mesiyanikong Gingharian.
Mga Leksiyon Alang Kanato:
9:10, 19. Ang kasaligan nga mga pahayag sa binase-sa-Bibliya nga mga publikasyon sa “matinumanon ug maalamong ulipon” naundan sa bug-at, o masakit, nga mensahe. (Mat. 24:45) Kini maoy katumbas sa ikog sa mga dulon nga may “mga ikot sama sa mga tanga” ug sa mga kabayo sa magkakabayo, nga ang “mga ikog samag mga halas.” Ngano? Tungod kay kini nga mga publikasyon nagpasidaan labot sa “adlaw sa panimalos [ni Jehova].” (Isa. 61:2) Hinaot nga magmaisogon ug magmasiboton kita sa pagpanagtag niini.
9:20, 21. Daghang maaghop nga mga tawo kinsa nagpuyo sa dili kono Kristohanong mga nasod ang midawat sa mensahe nga atong gisangyaw. Apan, dili kita magdahom nga daghan niadtong dili sakop sa Kakristiyanohan ang mahimong Kristohanon, kinsa gitumong ingong “nahibilin sa mga tawo.” Bisan pa niana, magpadayon gihapon kita sa atong buluhatong pagsangyaw.
12:15, 16. “Ang yuta”—mga elemento sa sistema ni Satanas, o ang mga magmamando sa daghang nasod—nagtuboy sa kagawasan sa pagsimba. Sugod sa mga tuig sa 1940, ang maong mga magmamando ‘naglamoy sa suba [sa paglutos] nga gibugwak sa dragon gikan sa baba niini.’ Sa pagkatinuod, kon buot ni Jehova, mahimo niyang palihokon ang kagamhanan sa pagtuman sa iyang kabubut-on. Busa, haom gayod ang giingon sa Proverbio 21:1: “Ang kasingkasing sa usa ka hari sama sa mga sapa sa tubig diha sa kamot ni Jehova. Iyang iliso kini sa bisan diin nga iyang kahimut-an.” Angay kining maglig-on sa atong pagtuo sa Diyos.