Tan-awa! Ang Alagad nga Giuyonan ni Jehova

“Tan-awa! Ang akong alagad, . . . nga giuyonan sa akong kalag!”—Isa. 42:1.

1. Unsay gidasig nga buhaton sa katawhan ni Jehova, ilabina nga nagkaduol na ang Memoryal, ug ngano?

 SAMTANG nagkaduol ang paghandom sa kamatayon ni Kristo, ang katawhan sa Diyos gidasig sa pagsunod sa tambag ni apostol Pablo nga “tutokan ang Pangulong Ahente ug Maghihingpit sa atong pagtuo, si Jesus.” Si Pablo midugang: “Busa, tagda pag-ayo ang usa nga nakaantos sa mga pagsupak sa mga makasasala batok sa ilang kaayohan, aron dili kamo kapoyon ug mangaluya ang inyong mga kalag.” (Heb. 12:2, 3) Ang paghatag ug pagtagad sa pagkamatinumanon ni Kristo, nga misangko sa paghalad niya sa iyang kinabuhi, motabang sa dinihogang mga Kristohanon ug sa ilang kauban nga ubang mga karnero sa pagpadayon sa pag-alagad kang Jehova nga matinumanon ug ‘dili mangaluya sa ilang kalag.’—Itandi ang Galacia 6:9.

2. Unsay atong makat-onan sa mga tagna ni Isaias nga nalangkit sa Anak sa Diyos?

² Pinaagi kang manalagnang Isaias, nagpasulat si Jehova ug daghang tagna nga direktang nalangkit sa iyang Anak. Kining mga tagnaa motabang kanato sa ‘pagtutok sa Pangulong Ahente ug Maghihingpit sa atong pagtuo,’ si Kristo Jesus. a Kini maghatag kanatog mga detalye bahin sa iyang kinaiya, mga pag-antos, ug pagbayaw kaniya ingong atong Hari ug Manunubos. Pinaagi niini mas masabtan nato ang Memoryal, nga atong saulogon niining tuiga sa Huwebes, Abril 9, human sa pagsalop sa adlaw.

Gipaila ang Alagad

3, 4. (a) Sa basahon ni Isaias, unsay gitumong sa pulong “alagad”? (b) Sa unsang paagi gipaila sa Bibliya ang Alagad nga gihisgotan sa Isaias kapitulo 42, 49, 50, 52, ug 53?

³ Ang pulong “alagad” kadaghan makita diha sa basahon ni Isaias. Dunay higayon nga mapadapat kini sa manalagna mismo. (Isa. 20:3; 44:26) Usahay mapadapat kini sa tibuok nasod sa Israel, o kang Jacob. (Isa. 41:8, 9; 44:1, 2, 21) Apan komosta ang bahin sa talagsaong mga tagna mahitungod sa Alagad nga nasulat sa Isaias kapitulo 42, 49, 50, 52, ug 53? Ang Kristohanon Gregong Kasulatan tatawng nagpaila sa Alagad ni Jehova nga gihubit sa maong mga kapitulo. Makaiikag nga ang Etiopianhong eunuko nga gihisgotan sa basahon sa Buhat nagbasa sa usa niining mga tagnaa sa dihang si Felipe nga tig-ebanghelyo gisugo sa espiritu sa pagduol kaniya. Kay nabasa na sa opisyal ang teksto nga karon atong makaplagan sa Isaias 53:7, 8, siya nangutana kang Felipe: “Palihog sultihi ako, Bahin kang kinsa nagsulti ang manalagna niini? Bahin ba sa iyang kaugalingon o bahin sa lain pang tawo?” Wala maglangan si Felipe sa pagpatin-aw nga si Isaias naghisgot bahin sa Mesiyas, si Jesus.—Buh. 8:26-35.

 ⁴ Sa masuso pa si Jesus, ang usa ka matarong nga tawo nga ginganlag Simeon namulong ilalom sa pagtultol sa balaang espiritu nga “ang batang si Jesus” mahimong ‘usa ka kahayag nga magkuha sa tabil gikan sa kanasoran,’ sumala sa gitagna sa Isaias 42:6 ug 49:6. (Luc. 2:25-32) Dugang pa, ang makauulaw nga pagtratar kang Jesus sa gabii sa paghusay kaniya gitagna sa Isaias 50:6-9. (Mat. 26:67; Luc. 22:63) Human sa Pentekostes 33 K.P., tatawng gipaila ni Pedro si Jesus ingong “Alagad” ni Jehova. (Isa. 52:13; 53:11; basaha ang Buhat 3:13, 26.) Unsay atong makat-onan gikan niining mga tagna bahin sa Mesiyas?

Si Jehova Nagbansay sa Iyang Alagad

5. Unsang pagbansay ang nadawat sa Alagad?

⁵ Usa sa mga tagna ni Isaias bahin sa Alagad sa Diyos naghatag ug katin-awan bahin sa suod nga relasyon tali kang Jehova ug sa iyang panganayng Anak sa wala pa kini moanhi sa yuta. (Basaha ang Isaias 50:4-9.) Ang Alagad mismo nagpadayag nga si Jehova padayong nagbansay kaniya, nga nag-ingon: “Siya nagapukaw sa akong igdulungog aron makadungog sama sa mga tinudloan.” (Isa. 50:4) Ang Alagad ni Jehova namati sa iyang Amahan ug nakakat-on gikan kaniya, nga nahimong mapinasakopong tinun-an. Pagkatalagsaong pribilehiyo nga matudloan sa Maglalalang sa uniberso!

6. Sa unsang paagi gipakita sa Alagad ang iyang bug-os nga pagpasakop sa iyang Amahan?

⁶ Niini nga tagna, ang Alagad nagtawag sa iyang Amahan ingong “Soberanong Ginoong Jehova.” Nagpakita kini nga ang Alagad nakakat-on sa lintunganayng kamatuoran nga si Jehova ang Soberano sa tibuok uniberso. Nagpakita sa iyang bug-os nga pagpasakop sa iyang Amahan, siya miingon: “Ang Soberanong Ginoong Jehova nagbukas sa akong igdulungog, ug ako, sa akong bahin, dili masuklanon. Wala ako moliko sa sukwahing direksiyon.” (Isa. 50:5) Siya ‘didto sa tupad ni Jehova ingong batid nga magbubuhat’ sa paglalang sa uniberso ug sa tawo. Kining “batid nga magbubuhat” ‘nagakalipay sa atubangan ni Jehova sa tanang panahon, nga nagakalipay sa mabungahong yuta, ug ang mga butang nga gikahinangpan sa Anak sa Diyos maoy uban sa mga anak sa mga tawo.’—Prov. 8:22-31.

7. Unsay nagpakita nga ang Alagad masaligon sa pagpaluyo sa iyang Amahan panahon sa mga pagsulay nga iyang naagoman?

⁷ Ang pagbansay nga nadawat sa Alagad ug ang iyang kahinangop sa katawhan nag-andam kaniya sa iyang pag-anhi sa yuta ug pag-atubang ug grabeng paglutos. Nagpadayon siya sa pagkalipay sa pagbuhat sa kabubut-on sa iyang Amahan, bisan sa mapait nga paglutos. (Sal. 40:8; Mat. 26:42; Juan 6:38) Sa tanang pagsulay nga naagoman ni Jesus sa yuta, masaligon siya sa pag-uyon ug pagpaluyo sa iyang Amahan. Ingon sa gitagna ni Isaias, si Jesus nakaingon: “Ang Usa nga nagpahayag kanako nga matarong ania sa haduol. Kinsay makigsangka kanako? . . . Tan-awa! Ang Soberanong Ginoong Jehova motabang kanako.” (Isa. 50:8, 9) Gitabangan gayod ni Jehova ang iyang matinumanong Alagad sa iyang ministeryo dinhi sa yuta, ingon sa gipakita sa laing tagna ni Isaias.

Ang Ministeryo sa Alagad Dinhi sa Yuta

8. Unsay nagpamatuod nga si Jesus mao ang “pinili” ni Jehova, sumala sa gitagna sa Isaias 42:1?

⁸ Ang Bibliya naghisgot kon unsay nahitabo sa dihang nabawtismohan si Jesus niadtong 29 K.P.: “Ang balaang espiritu . . . mikunsad diha kaniya, ug usa ka tingog migula gikan sa langit: ‘Ikaw mao ang akong Anak, ang hinigugma; giuyonan ko ikaw.’” (Luc. 3:21, 22) Busa, klarong gipaila ni Jehova ang iyang “pinili,” nga gihisgotan sa tagna ni Isaias. (Basaha ang Isaias 42:1-7.) Panahon sa iyang ministeryo sa yuta, gituman ni Jesus kining tagnaa sa talagsaong paagi. Sa iyang Ebanghelyo, si Mateo mikutlo sa mga pulong sa Isaias 42:1-4 ug gipadapat kana kang Jesus.—Mat. 12:15-21.

9, 10. (a) Sa unsang paagi gituman ni Jesus ang Isaias 42:3 panahon sa iyang ministeryo? (b) Sa unsang paagi si Kristo ‘nagdalag hustisya’ samtang dinhi sa yuta, ug kanus-a niya ‘ipahimutang ang hustisya sa yuta’?

⁹ Ang Hudiyong relihiyosong mga lider nagtamay sa ordinaryong mga tawo sa ilang taliwala. (Juan 7:47-49) Ang mga tawo dinaogdaog ug ikatandi sa “gupok nga tangbo” o “pabilong lino” nga nag-awop na. Apan, si Jesus naluoy sa mga  kabos ug sinakit. (Mat. 9:35, 36) Maluloton niyang gidapit ang maong mga tawo, pinaagi sa pag-ingon: “Umari kanako, kamong tanang nabudlayan ug nabug-atan, ug ako magapalagsik kaninyo.” (Mat. 11:28) Dugang pa, si Jesus ‘nagdalag hustisya’ pinaagi sa pagtudlo bahin sa mga sukdanan ni Jehova sa husto ug sayop. (Isa. 42:3) Gipakita usab niya nga ang Balaod sa Diyos kinahanglang ipadapat sa makataronganong paagi ug uban ang kaluoy. (Mat. 23:23) Nagpasundayag usab si Jesus ug hustisya pinaagi sa dili-mapihigong pagwali ngadto sa mga adunahan ug kabos.—Mat. 11:5; Luc. 18:18-23.

¹⁰ Ang tagna ni Isaias nag-ingon usab nga ang “pinili” ni Jehova ‘magpahimutang ug hustisya sa yuta.’ (Isa. 42:4) Iya kining buhaton sa dili madugay sa dihang ingong Hari sa Mesiyanikong Gingharian, iyang laglagon ang tanang politikal nga mga gingharian ug pulihan kana sa iyang matarong nga pagmando. Iyang ipahinabo ang usa ka bag-ong kalibotan, diin “magpuyo ang pagkamatarong.”—2 Ped. 3:13; Dan. 2:44.

Usa ka “Kahayag” ug “Usa ka Pakigsaad”

11. Sa unsang diwa nga si Jesus mao ang “kahayag sa kanasoran” sa unang siglo, ug sa unsang paagi tinuod usab kana karon?

¹¹ Agig katumanan sa Isaias 42:6, si Jesus napamatud-an ingong “kahayag sa kanasoran.” Panahon sa iyang pagministeryo sa yuta, siya nagdalag espirituwal nga kahayag ilabina ngadto sa mga Hudiyo. (Mat. 15:24; Buh. 3:26) Apan si Jesus miingon: “Ako mao ang kahayag sa kalibotan.” (Juan 8:12) Siya nahimong kahayag alang sa mga Hudiyo ug sa kanasoran pinaagi sa paglamdag kanila sa espirituwal ug pagtanyag sa iyang hingpit nga tawhanong kinabuhi ingong lukat alang sa katawhan. (Mat. 20:28) Human sa iyang pagkabanhaw, iyang gisugo ang iyang mga tinun-an nga mahimong iyang mga saksi “hangtod sa kinalay-ang dapit sa yuta.” (Buh. 1:8) Panahon sa ilang ministeryo, si Pablo ug Bernabe mikutlo sa ekspresyong “kahayag sa kanasoran” ug gipadapat kana sa buluhatong pagsangyaw nga ilang gibuhat taliwala sa mga dili-Hudiyo. (Buh. 13:46-48; itandi ang Isaias 49:6.) Ang maong buluhaton ginahimo gihapon samtang ang dinihogang mga igsoon ni Jesus sa yuta ug ang ilang mga kauban nagpakaylap ug espirituwal nga kahayag ug nagtabang sa mga tawo nga makabaton ug pagtuo kang Jesus, ang “kahayag sa kanasoran.”

12. Sa unsang paagi gihatag ni Jehova ang iyang Alagad “ingong usa ka pakigsaad sa katawhan”?

¹² Sa mao gihapong tagna, giingnan ni Jehova ang iyang piniling Alagad: “Ako magpanalipod kanimo ug maghatag kanimo ingong usa ka pakigsaad sa katawhan.” (Isa. 42:6) Si Satanas naningkamot pag-ayo sa pagpahinabog kadaot kang Jesus ug sa pagpugong kaniya sa pagtapos sa iyang ministeryo dinhi sa yuta, apan gipanalipdan siya ni Jehova hangtod sa tinudlong panahon nga siya mamatay. (Mat. 2:13; Juan 7:30) Dayon gibanhaw ni Jehova si Jesus ug gihatag siya ingong “usa ka pakigsaad,” o garantiya, alang sa mga tawo. Kanang sinserong panaad nagpasalig nga ang matinumanong Alagad sa Diyos magpadayon sa pagkahimong “kahayag sa kanasoran,” nga magpahigawas niadtong anaa sa espirituwal nga kangitngit.—Basaha ang Isaias 49:8, 9. b

13. Sa unsang paagi giluwas ni Jesus “kadtong mga naglingkod sa kangitngit” panahon sa iyang pagministeryo dinhi sa yuta, ug sa unsang paagi nagpadayon siya sa paghimo niana?

 ¹³ Nahiuyon niini nga garantiya, ang pinili nga Alagad ni Jehova ‘magbuka sa mga mata nga buta,’ ‘magpagula sa binilanggo gikan sa atob,’ ug magluwas niadtong “naglingkod sa kangitngit.” (Isa. 42:7) Panahon sa iyang ministeryo sa yuta, gihimo kini ni Jesus pinaagi sa pagyagyag sa bakak nga relihiyosong mga tradisyon ug pagsangyaw sa maayong balita sa Gingharian. (Mat. 15:3; Luc. 8:1) Busa iyang giluwas gikan sa espirituwal nga pagkaulipon ang mga Hudiyo nga nahimong iyang mga tinun-an. (Juan 8:31, 32) Sa samang paagi, si Jesus naghatag ug espirituwal nga kagawasan sa milyonmilyon nga mga dili-Hudiyo. Iyang gisugo ang iyang mga sumusunod sa ‘pagpanglakaw ug paghimog mga tinun-an sa katawhan sa tanang kanasoran,’ nga nagsaad nga siya magauban sa iyang mga sumusunod “hangtod sa kataposan sa sistema sa mga butang.” (Mat. 28:19, 20) Gikan sa langit, si Kristo Jesus nagdumala sa tibuok-yutang buluhaton nga pagsangyaw.

Gituboy ni Jehova ang “Alagad”

14, 15. Ngano ug sa unsang paagi gituboy ni Jehova ang iyang Alagad?

¹⁴ Sa lain pang tagna mahitungod sa iyang Mesiyanikong Alagad, si Jehova nag-ingon: “Tan-awa! Ang akong alagad molihok uban ang hait nga salabotan. Siya mahimutang sa hataas nga katungdanan ug tinong igatuboy ug igabayaw pag-ayo.” (Isa. 52:13) Tungod sa maunongong pagpasakop sa iyang Anak sa Iyang pagkasoberano ug sa iyang pagkamatinumanon ilalom sa grabe kaayong pagsulay, si Jehova nagtuboy kaniya.

¹⁵ Si apostol Pedro misulat bahin kang Jesus: “Siya anaa sa tuong kamot sa Diyos, kay siya miadto sa langit; ug ang mga manulonda ug ang mga awtoridad ug ang mga gahom gipailalom kaniya.” (1 Ped. 3:22) Sa samang paagi si apostol Pablo misulat: “Siya nagpaubos ug nagmasinugtanon hangtod sa kamatayon, oo, kamatayon sa estaka sa pagsakit. Tungod niini mismo usab ang Diyos nagbayaw kaniya ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan, aron nga sa ngalan ni Jesus moluhod ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.”—Filip. 2:8-11.

16. Sa unsang paagi si Jesus ‘gibayaw pag-ayo’ niadtong 1914, ug unsay iyang nahimo sukad niadto?

¹⁶ Niadtong 1914, gituboy pa gayod ni Jehova si Jesus. Siya ‘gibayaw pag-ayo’ sa dihang gientrono siya ni Jehova ingong Hari sa Mesiyanikong Gingharian.  (Sal. 2:6; Dan. 7:13, 14) Sukad niadto, si Kristo ‘nagapangdaog taliwala sa iyang mga kaaway.’ (Sal. 110:2) Una, iyang giparot si Satanas ug ang iyang mga demonyo, nga nagtambog kanila sa silinganan sa yuta. (Pin. 12:7-12) Dayon, ingong Dakong Ciro, giluwas ni Kristo ang nahibilin sa iyang dinihogang mga igsoon sa yuta gikan sa pagkabihag sa “Dakong Babilonya.” (Pin. 18:2; Isa. 44:28) Siya nanguna sa tibuok-kalibotang pagsangyaw nga miresulta sa pagkatigom sa “mga nahibilin” sa iyang espirituwal nga mga igsoon ug dayon sa milyonmilyong “ubang mga karnero,” ang maunongong mga kauban sa “gamayng panon.”—Pin. 12:17; Juan 10:16; Luc. 12:32.

17. Unsay atong nakat-onan sa pagtuon sa mga tagna ni Isaias mahitungod sa “alagad”?

¹⁷ Ang pagtuon niining talagsaong mga tagna sa basahon ni Isaias nagpadako gayod sa atong apresasyon sa atong Hari ug Manunubos, si Kristo Jesus. Ang iyang pagpasakop ingong anak panahon sa iyang ministeryo sa yuta nagbanaag sa pagbansay nga iyang nadawat gikan sa iyang Amahan sa wala pa siya moanhi sa yuta. Iyang gipamatud-an nga siya ang “kahayag sa kanasoran” pinaagi sa iyang ministeryo ug sa buluhatong pagsangyaw nga iyang gidumala hangtod sa atong adlaw. Sa atong makita sa sunod nga artikulo, ang laing tagna mahitungod sa Mesiyanikong Alagad nagpadayag nga siya mag-antos ug maghalad sa iyang kinabuhi alang sa atong kaayohan, mga butang nga angay natong ‘tagdon pag-ayo’ samtang nagsingabot ang Memoryal sa iyang kamatayon.—Heb. 12:2, 3.

[Mga footnote]

Agig Pagsubli

• Kinsa ang “alagad” nga gihisgotan sa mga tagna ni Isaias, ug giunsa nato pagkahibalo niana?

• Unsang pagbansay ang nadawat sa Alagad gikan kang Jehova?

• Sa unsang paagi si Jesus usa ka “kahayag sa kanasoran”?

• Sa unsang paagi gituboy ang Alagad?

[Mga Pangutana sa Pagtuon]

[Hulagway sa panid 21]

Tataw nga gipaila ni Felipe ang “alagad” nga gihisgotan ni Isaias ingong si Jesus, ang Mesiyas

[Hulagway sa panid 23]

Ingong pinili nga Alagad ni Jehova, si Jesus nagpakitag kaluoy sa mga kabos ug sinakit

[Hulagway sa panid 24]

Si Jesus gibayaw sa iyang Amahan ug gientrono ingong Hari sa Mesiyanikong Gingharian