“Umari Ka, Mahimong Akong Sumusunod”

“Kon si bisan kinsa buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit sa adlaw-adlaw ug magpadayon sa pagsunod kanako.”—Luc. 9:23.

1, 2. (a) Unsang imbitasyon ang gitanyag ni Jesus? (b) Unsay imong sanong sa imbitasyon ni Jesus?

 SA KATAPOSANG bahin sa ministeryo ni Jesus, siya misangyaw sa Perea, usa ka dapit tabok sa Jordan, nga amihanan-sidlakan sa Judea. Ang usa ka batan-ong lalaki miduol kaniya ug nangutana kon unsay iyang buhaton aron makabaton ug kinabuhing walay kataposan. Sa dihang natino ni Jesus nga ang batan-ong lalaki nagsunod gayod sa Balaod ni Moises, iya siyang gitanyagan ug talagsaong imbitasyon. Siya miingon: “Lakaw, ibaligya ang unsa mang mga butang nga imong nabatonan ug ipanghatag sa mga kabos, ug makabaton ka ug bahandi sa langit, ug umari ka mahimong akong sumusunod.” (Mar. 10:21) Hunahunaa ra—usa ka imbitasyon sa pagsunod kang Jesus, ang bugtong Anak sa Labing Hataas nga Diyos!

² Ang maong batan-on wala modawat sa imbitasyon apan ang uban midawat niini. Nahauna pa niini, si Jesus miingon kang Felipe: “Mahimong akong sumusunod.” (Juan 1:43) Gidawat kini ni Felipe ug sa ulahi siya nahimong apostol. Gidapit usab ni Jesus si Mateo, ug siya midawat niini. (Mat. 9:9; 10:2-4) Sa pagkatinuod, gidapit ni Jesus ang tanang nahigugma sa pagkamatarong sa dihang siya miingon: “Kon si bisan kinsa buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit sa adlaw-adlaw ug magpadayon sa pagsunod kanako.” (Luc. 9:23) Busa, si bisan kinsa mahimong sumusunod ni Jesus kon buot niya. Gusto ka ba niana? Kadaghanan kanato midawat na sa malulotong imbitasyon ni Jesus, ug gitanyag usab nato ang maong imbitasyon ngadto sa uban diha sa kanataran.

3. Sa unsang paagi atong malikayan nga moundang sa pagsunod kang Jesus?

³ Apan ikasubo nga adunay mga interesado nga wala na mopadayon sa pagtuon sa Bibliya. Sa ngadtongadto, sila ‘naanod,’ o miundang sa pagsunod kang Jesus. (Heb. 2:1) Sa unsang paagi atong malikayan ang maong lit-ag? Makatabang gayod ang pagpangutana sa kaugalingon: ‘Unsay tinuod nga hinungdan sa akong pagsunod kang Jesus? Unsay nalangkit sa pagsunod kaniya?’ Kon atong isilsil sa hunahuna ang tubag niining duha ka pangutana, kita madasig gayod sa pagpabilin diha sa maayong dalan nga atong gipili. Kini makatabang usab kanato sa pagdasig sa uban sa pagsunod kang Jesus.

Nganong Mosunod Kita Kang Jesus?

4, 5. Nganong takos si Jesus ingong Pangulo?

⁴ Si manalagnang Jeremias miingon: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jer. 10:23) Ang kasaysayan nagpakita nga tinuod gayod ang mga pulong ni Jeremias. Sa paglabay sa panahon, nadayag nga ang tawo dili gayod molampos sa pagmando sa iyang kaugalingon. Atong gidawat ang imbitasyon nga mosunod kang Jesus tungod kay atong nakat-onan nga siya takos gayod nga mahimong atong Pangulo, sa paagi nga labaw kaayo kay ni bisan kinsang tawo. Tagda ang pipila ka hinungdan kon nganong takos niana si Jesus.

⁵ Una, si Jehova mismo ang mipili kang Jesus ingong Mesiyas nga Pangulo. Aduna pa bay labaw nga nahibalo kay sa Maglalalang kon kinsay itudlo ingong atong Pangulo? Ikaduha, si Jesus adunay dalayegong mga hiyas nga mahimo natong sundogon. (Basaha ang Isaias 11:2, 3.) Siya ang hingpit nga sulondan. (1 Ped. 2:21) Ikatulo, si Jesus nahigugma gayod sa iyang mga sumusunod, ug iya kining gipamatud-an sa dihang iyang gihatag ang iyang kinabuhi alang kanila. (Basaha ang Juan 10:14, 15.) Gipamatud-an usab niya nga siya usa ka mahigugmaong magbalantay tungod kay iya  kitang gigiyahan aron makabatog malipayong kinabuhi karon ug kinabuhing walay kataposan sa umaabot. (Juan 10:10, 11; Pin. 7:16, 17) Tungod niini ug sa uban pang hinungdan, maalamon gayod ang atong desisyon nga mosunod kaniya. Apan unsay nalangkit sa pagsunod kang Jesus?

6. Unsay nalangkit sa pagsunod kang Jesus?

⁶ Ang pagkahimong sumusunod ni Kristo naglangkit ug labaw pa kay sa pag-angkon lamang nga kita mga Kristohanon. Karon, mga duha ka bilyong tawo ang nangangkon nga sila mga Kristohanon, apan ang ilang mga buhat nagpaila nga sila “mga mamumuhat sa kalapasan.” (Basaha ang Mateo 7:21-23.) Sa dihang ang mga tawo magpakitag interes sa imbitasyon nga mosunod kang Jesus, atong ipatin-aw kanila nga ang matuod nga mga Kristohanon magsunod gayod sa mga pagtulon-an ug panig-ingnan ni Jesus—nga magbuhat niana sa adlaw-adlaw. Sa pag-ilustrar kon unsay kahulogan niini, tagda ang pipila ka butang nga atong nahibaloan bahin kang Jesus.

Sundoga ang Kaalam ni Jesus

7, 8. (a) Unsa ang kaalam, ug nganong si Jesus dagaya niini? (b) Sa unsang paagi gipakita ni Jesus ang kaalam, ug sa unsang paagi atong masundog siya?

⁷ Si Jesus nagpakitag daghang maayong hiyas, apan maghisgot lamang kitag upat: ang iyang kaalam, pagkamapaubsanon, kasibot, ug ang iyang gugma. Una, tagda ang iyang kaalam, nga mao ang katakos sa pagpadapat sa kahibalo ug pagsabot sa praktikal nga paagi. Si apostol Pablo misulat: “Maampingong natago diha [kang Jesus] ang tanang bahandi sa kaalam ug kahibalo.” (Col. 2:3) Diin gikan ang kaalam ni Jesus? Siya mismo miingon: “Sumala sa gitudlo kanako sa Amahan gisulti ko kining mga butanga.” (Juan 8:28) Ang iyang kaalam naggikan kang Jehova, busa dili ikatingala nga maalamon kaayo ang iyang mga desisyon.

⁸ Pananglitan, gipakita ni Jesus ang kaalam sa paghimog desisyon kon unsay buhaton sa iyang kinabuhi. Iya kining gipasimple, nga nagsentro sa iyang pagtagad sa usa lamang ka butang: ang pagbuhat sa kabubut-on sa Diyos. Maalamon niyang gigugol ang iyang panahon ug kusog sa pagpauswag sa intereses sa Gingharian. Atong masunod ang panig-ingnan ni Jesus pinaagi sa pagbatog ‘yanong mata’ ug pinaagi niana dili kita mabug-atan sa dili-hinungdanong mga butang nga makahurot sa atong panahon ug kusog. (Mat. 6:22) Gipasimple sa daghang Kristohanon ang ilang kinabuhi aron sila makagugol ug mas daghang panahon sa ministeryo. Ang uban misulod sa payunir nga pag-alagad. Kon ikaw usa kanila, dalayegon ang imong gibuhat. Ang “pagpangita pag-una sa gingharian” maghatag ug dakong kalipay ug katagbawan.—Mat. 6:33.

Magmapaubsanon Sama Kang Jesus

9, 10. Giunsa pagpakita ni Jesus ang iyang pagkamapaubsanon?

⁹ Ang ikaduhang bahin sa personalidad ni Jesus nga atong hisgotan mao ang iyang pagkamapaubsanon. Kon ang dili-hingpit nga mga tawo hatagan ug awtoridad, sagad nga sila magmapahitas-on. Apan lahi kaayo si Jesus! Bisag dako siyag papel sa katumanan sa katuyoan sa Diyos, siya wala magpakita ug bisan gamayng pagkamapahitas-on. Ug kita gidasig sa pagsundog sa iyang mapaubsanong tinamdan. Si apostol Pablo misulat: “Hupti kini nga tinamdan sa pangisip diha kaninyo nga diha usab kang Kristo Jesus, kinsa, bisan tuod siya naglungtad diha sa dagway sa Diyos, wala maghunahuna sa pagpangilog, nga mao, nga siya mahimong katumbas sa Diyos. Wala, apan iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo.” (Filip. 2:5-7) Unsay nalangkit niini?

¹⁰ Dako kaayo ang pribilehiyo ni Jesus nga magpuyo  sa langitnong presensiya sa iyang Amahan, apan sa kinabubut-on iyang “gihaw-asan ang iyang kaugalingon.” Ang iyang kinabuhi gibalhin diha sa tagoangkan sa usa ka Hudiyang ulay, ug gisamkon sulod sa siyam ka bulan hangtod nga siya gihimugso ingong usa ka walay-mahimo nga masuso diha sa panimalay sa usa ka ubos nga panday. Sa balay ni Jose, si Jesus mitubo hangtod nga siya natin-edyer. Siya walay sala. Apan panahon sa iyang pagkabatan-on, siya nagpasakop sa iyang dili hingpit nga mga ginikanan. (Luc. 2:51, 52) Talagsaon gayod ang iyang pagkamapaubsanon!

11. Sa unsang mga paagi atong masundog ang pagkamapaubsanon ni Jesus?

¹¹ Atong masundog ang pagkamapaubsanon ni Jesus kon andam kitang modawat ug mga buluhaton nga giisip sa uban nga ubos. Pananglitan, tagda ang pagsangyaw sa maayong balita. Daw ubos ang maong buluhaton, ilabina sa dihang ang mga tawo dili maminaw, mobiaybiay, o mosupak kanato. Apan pinaagi sa pagpadayon sa pagsangyaw, atong matabangan ang uban sa pagsanong sa imbitasyon ni Jesus nga mosunod kaniya. Nianang paagiha, kita makatabang nga maluwas ang uban. (Basaha ang 2 Timoteo 4:1-5.) Ang laing pananglitan mao ang pagmentinar sa atong Kingdom Hall. Kana naglakip sa paglabay sa mga basura, paglimpiyo sa salog, ug paghinlo sa kasilyas—ubos gayod nga mga buluhaton! Apan, kita nahibalo nga ang pagmentinar sa atong Kingdom Hall—ang sentro sa matuod nga pagsimba sa atong dapit—maoy bahin sa atong sagradong pagsimba. Pinaagi sa kinabubut-ong pagtuman sa maong ubos nga mga buluhaton, atong ikapakita nga kita mapaubsanon ug nagsunod sa mga tunob ni Kristo.

Magmasiboton Sama Kang Jesus

12, 13. (a) Giunsa pagpakita ni Jesus ang iyang kasibot, ug unsay nagtukmod kaniya sa pagbuhat niana? (b) Unsay magtukmod kanato nga magmasiboton usab sa ministeryo?

¹² Tagda ang kasibot ni Jesus sa ministeryo. Si Jesus mihimog daghang butang sa dinhi pa siya sa yuta. Sa batan-on pa, siya lagmit namanday kauban sa iyang amaama nga si Jose. Panahon sa iyang ministeryo, si Jesus naghimog mga milagro, lakip na sa pag-ayo sa mga masakiton ug pagbanhaw sa mga patay. Apan ang iyang pangunang buluhaton mao ang pagsangyaw sa maayong balita ug pagtudlo sa mga tawo nga andam maminaw. (Mat. 4:23) Ingong iyang mga sumusunod, kita kinahanglan usab nga mobuhat nianang buluhatona. Sa unsang paagi atong masundog ang iyang panig-ingnan? Ang usa ka paagi mao ang pagsundog sa motibo ni Jesus.

¹³ Ang gugma ni Jesus sa Diyos mao gayod ang nagtukmod kaniya sa pagsangyaw ug pagtudlo sa mga tawo. Apan gimahal usab ni Jesus ang kamatuoran nga iyang gitudlo. Para kaniya, ang maong  kamatuoran maoy bililhong bahandi, ug gusto gayod niya nga ipaambit kana sa uban. Kita, ingong mga “magtutudlo sa publiko,” susama kaniyag panglantaw. Hunahunaa ra ang pipila sa bililhong kamatuoran nga atong nakat-onan gikan sa Pulong sa Diyos! Kita nahibalo sa isyu bahin sa unibersohanong pagkasoberano ug kon sa unsang paagi masulbad kana. Kita bug-os nakasabot sa kon unsay gitudlo sa Kasulatan bahin sa kahimtang sa mga patay ug sa mga panalangin nga ipahinabo sa Diyos sa bag-ong kalibotan. Ang maong kamatuoran, bisag dugay na o bag-o pa natong nakat-onan, maoy bililhong mga bahandi. (Basaha ang Mateo 13:52.) Pinaagi sa pagsangyaw nga masiboton, atong ikapaambit sa uban ang atong gugma sa mga butang nga gitudlo kanato ni Jehova.

14. Sa unsang paagi atong masundog ang paagi ni Jesus sa pagpanudlo?

¹⁴ Matikdi usab ang paagi sa pagtudlo ni Jesus. Kanunay niyang gigamit ang Kasulatan. Sagad nga iyang sugdan ang usa ka hinungdanong punto sa pag-ingon: “Kini nahisulat.” (Mat. 4:4; 21:13) Diha sa iyang mga pulong nga narekord sa Bibliya, siya nagkutlo nga direkta o dili direkta sa kapin sa katunga sa mga basahon sa Hebreohanong Kasulatan. Sama kang Jesus, kanunay natong ipasukad sa Bibliya ang atong ginatudlo ug maningkamot nga mobasag mga teksto kon kana posible. Nianang paagiha, atong ikapakita ngadto sa matarong-ug-kasingkasing nga mga tawo nga ang atong gitudlo gikan sa Diyos, dili sa atong kaugalingon. Malipay gayod kita kon mosugot ang usa ka tawo nga basahon ang Bibliya ug hisgotan ang kahulogan niini. Mosamot pa ang atong kalipay kon ilang dawaton ang imbitasyon nga mosunod kang Jesus.

Ang Pagsunod Kang Jesus Nagpasabot sa Paghigugma sa Uban

15. Unsa ang talagsaong hiyas ni Jesus, ug sa unsang paagi makaapektar kanato ang pagpalandong niini?

¹⁵ Ang kataposang bahin sa personalidad ni Jesus nga atong hisgotan mao ang labing makapadasig—ang iyang gugma sa isigkatawo. Si apostol Pablo misulat: “Ang gugma nga iya ni Kristo nagatukmod kanamo.” (2 Cor. 5:14) Kon atong palandongon ang gugma ni Jesus sa tanang katawhan ug sa matag usa kanato, kita matandog gayod ug matukmod nga mosunod sa iyang panig-ingnan.

16, 17. Sa unsang mga paagi gipakita ni Jesus ang iyang gugma sa uban?

¹⁶ Giunsa pagpakita ni Jesus ang iyang gugma sa uban? Ang iyang kinabubut-ong paghatag sa iyang kinabuhi alang sa tanang tawo mao ang kinalabwang pagpasundayag sa iyang gugma. (Juan 15:13) Apan diha sa ministeryo, si Jesus nagpakita sa iyang gugma sa lain pang mga paagi. Pananglitan, siya naluoy sa mga tawo nga nag-antos. Sa dihang iyang nakita si Maria ug ang mga kauban niini nga naghilak tungod sa kamatayon ni Lazaro, siya natandog sa ilang kaguol. Bisag hapit na niyang banhawon si Lazaro nianang higayona, sa gihapon siya natandog ug “mihilak.”—Juan 11:32-35.

¹⁷ Sa sayong bahin sa ministeryo ni Jesus, ang usa ka sanlahon miduol kang Jesus ug miingon: “Kon buot mo lamang, ikaw makahinlo kanako.”  Unsay gibuhat ni Jesus? Ang Bibliya nag-ingon: “Siya giabot ug kaluoy.” Dayon, siya mihimog usa ka talagsaong butang. “Iyang gituy-od ang iyang kamot ug gihikap siya, ug miingon kaniya: ‘Buot ko. Mamahinlo ka.’ Ug dihadiha nahanaw ang sanla gikan [sa maong tawo], ug siya nahinlo.” Ubos sa Balaod ni Moises, ang mga sanlahon mahugaw, ug si Jesus makaayo kaniya bisag dili na niya hikapon ang maong tawo. Apan sa dihang giayo ni Jesus ang sanlahon, iyang gihikap siya. Lagmit si Jesus lamang ang mihimo niana sulod sa daghang katuigan. Talagsaon gayod ang iyang gipakitang kaluoy!—Mar. 1:40-42.

18. Sa unsang paagi atong ikapasundayag ang “pagbati alang sa isigkaingon”?

¹⁸ Ingong mga sumusunod ni Kristo, kita gisugo sa pagpasundayag ug gugma pinaagi sa pagpakitag “pagbati alang sa isigkaingon.” (1 Ped. 3:8) Lisod tingaling sabton kon unsay gibati sa usa ka igsoon nga nag-antos sa laygay nga sakit o grabeng depresyon—ilabina kon kita wala makasinati niana. Apan, si Jesus mabination sa mga tawo nga masakiton bisag siya wala makasinati niana. Sa unsang paagi atong maugmad ang maong hiyas? Pinaagi sa pagpaminaw pag-ayo kon ang uban mosugid sa ilang gibati. Mahimo usab nga atong pangutan-on ang atong kaugalingon, ‘Kon akoy anaa sa iyang kahimtang, unsa kahay akong bation?’ Kon kita sensitibo sa pagbati sa uban, mas makahimo kita sa ‘paghupay sa magul-anong mga kalag.’ (1 Tes. 5:14) Nianang paagiha atong masundog si Jesus.

19. Sa unsang mga paagi ang panig-ingnan ni Jesus nag-apektar kanato?

¹⁹ Pagkamakapadasig ang pagkat-on sa mga pulong ug buhat ni Jesu-Kristo! Mas molalom ang atong tinguha nga sundogon siya samtang magkalawom ang atong kahibalo bahin kaniya—ug molalom usab ang atong tinguha sa pagtabang sa uban nga mosundog kang Jesus. Busa, batoni ang kalipay sa pagsunod sa Mesiyanikong Hari—karon ug sa walay kataposan!

Makapatin-aw Ka Ba?

• Sa unsang paagi kita makapakitag kaalam sama ni Jesus?

• Sa unsang mga paagi atong ikapakita ang pagkamapaubsanon?

• Sa unsang paagi atong maugmad ang kasibot sa ministeryo?

• Sa unsang mga paagi atong masundog si Jesus sa pagpakitag gugma sa uban?

[Mga Pangutana sa Pagtuon]

[Kahon/Hulagway sa panid 5]

USA KA PUBLIKASYON NGA MOTABANG KANATO SA PAGSUNDOG KANG JESUS

Sa 2007 nga distritong kombensiyon, giluwatan ang 192-panid nga librong “Umari Ka, Mahimong Akong Sumusunod.” Kining libroha gidisenyo sa pagtabang sa mga Kristohanon nga makakat-on bahin kang Jesus, ilabina sa iyang mga hiyas ug mga buhat. Human sa duha ka pasiunang kapitulo, ang unang seksiyon naghisgot sa talagsaong mga hiyas ni Jesus—ang iyang pagkamapaubsanon, kaisog, kaalam, pagkamasinugtanon, ug pagkamalahutayon.

Ang laing mga seksiyon naghisgot sa mga buluhaton ni Jesus ingong magtutudlo ug magwawali sa maayong balita ug sa pipila ka paagi nga iyang gipasundayag ang iyang dakong gugma. Kining libroha naghatag ug impormasyon nga makatabang sa usa ka Kristohanon sa pagsundog kang Jesus.

Kami masaligon nga kining publikasyona magdasig kanato sa pagsusi sa atong kaugalingon: ‘Nagsunod ba gayod ako kang Jesus? Sa unsang paagi ako makasunod pag-ayo kaniya?’ Kini magtabang usab sa “tanan nga hustong nakiling alang sa kinabuhing walay kataposan” aron mahimong mga sumusunod ni Kristo.—Buh. 13:48.

[Hulagway sa panid 4]

Si Jesus misugot nga moanhi sa yuta ug ipahimugso ingong usa ka masuso. Unsang hiyas ang iyang gipakita?

[Hulagway sa panid 6]

Unsay magtukmod kanato nga magmasiboton sa ministeryo?