Ika-125 nga Graduwasyon sa Gilead

Ang mga Misyonaryo Giawhag sa Pagsundog Kang Jeremias

“KINI nga klase sa Gilead maoy makasaysayanhon,” miingon si Geoffrey Jackson sa Nagamandong Lawas. Siya nagpakigpulong sa 6,156 nga nanambong sa graduwasyon sa ika-125 nga klase sa Watchtower Bible School of Gilead niadtong Septiyembre 13, 2008. Ang Tunghaan sa Gilead nakapadala nag kapin sa 8,000 ka misyonaryo ngadto sa “kinalay-ang dapit sa yuta,” lakip na ang 56 nga migraduwar niini nga klase.—Buh. 1:8.

Ang tsirman sa programa sa graduwasyon nga si Brader Jackson nangutana, “Ang kredibilidad ba makapalambo sa imong ministeryo?” Dayon siya naghisgot ug upat ka butang aron makabaton ug kredibilidad: pagbaton ug hustong tinamdan, pagpakitag maayong panig-ingnan, pagpasukad sa pagtudlo diha sa Pulong sa Diyos, ug paghatag ug pangunang pagtagad sa pagpahibalo sa ngalan ni Jehova.

Si David Schafer, nga nag-alagad sa Komite sa Pagpanudlo, naghisgot sa ulohang “Imo Bang Masabtan ang Tanan?” Iyang gipasaligan ang mga estudyante sa Gilead nga ilang ‘masabtan ang tanan’ nga gikinahanglan sa pag-alagad ingong mga misyonaryo kon sila padayong mangita kang Jehova ug mapainubsanong magpasakop sa “matinumanon ug maalamong ulipon.”—Prov. 28:5; Mat. 24:45.

Human niana, si John E. Barr sa Nagamandong Lawas nagpahayag sa temang “Ayawg tugoti ang Bisan Unsa nga Magbulag Kanimo sa Gugma sa Diyos.” Ang inamahan nga tambag ni Brader Barr nakahupay sa mga graduwado ug sa ilang mga ginikanan sa mga kabalaka nga ila tingaling gihunahuna nga maatubang sa bag-ong mga misyonaryo. Siya nag-ingon nga “ang pagkaanaa diha sa gugma sa Diyos maoy usa gayod ka luwas, maayong dapit diha sa atong kinabuhi.” Walay makabulag sa mga misyonaryo gikan sa gugma sa Diyos gawas kon sila mismo ang mobulag sa Diyos.

Si Sam Roberson sa Theocratic Schools Department nag-awhag sa mamiminaw sa pagsul-ob sa “kinamaayohang besti.” Pinaagi sa pagtuon sa gibuhat ni Jesus ug sa pagpadapat niini sa ilang kaugalingon, ang mga graduwado ‘makasul-ob sa Ginoong Jesu-Kristo.’ (Roma 13:14) Human niana, si William Samuelson, ang magtatan-aw sa Theocratic Schools Department, nagpasiugda kon unsay makapahimong dungganon sa usa ka tawo. Iyang gipakita nga dili ang panglantaw sa tawo kondili ang panglantaw sa Diyos ang makapahimo sa usa nga dungganon.

Ang usa sa mga instruktor nga si Michael Burnett miinterbiyo sa mga estudyante maylabot sa ilang mga kasinatian sa pagsangyaw sa kanataran. Bisan pag kadaghanan kanila naasayn sa teritoryo nga kanunay nang masangyawan samtang nagtungha sa Gilead sa Patterson, New York, sila nakakaplag gihapog mga interesado. Si Gerald Grizzle sa Convention Office miinterbiyo ug tulo ka brader nga nag-eskuyla sa Tunghaan Alang sa mga Membro sa Komite sa Sanga. Ang ilang mga komento nakatabang sa mga graduwado sa pag-andam kon unsay nagpaabot kanila sa ilang langyawng mga asaynment.

 Ang pakigpulong nga “Sundoga si Jeremias” gihatag ni David Splane sa Nagamandong Lawas, nga migraduwar sa ika-42 nga klase. Bisan pag si Jeremias sa sinugdan nahadlok sa iyang asaynment, siya gipalig-on ni Jehova. (Jer. 1:7, 8) Mao usab kanay himoon sa Diyos sa mga bag-ong misyonaryo. “Kon may tawo nga imong gikabangi,” matod ni Brader Splane, “lingkod ug pagsulat ug napulo ka hiyas nga imong nagustohan kaniya. Ug kon wala ka makaabot ug napulo, kana nagpasabot nga kinahanglan pa nimong ilhon ang maong tawo.”

Si Jeremias masakripisyohon sa kaugalingon. Sa dihang gusto na niyang moundang sa iyang buluhaton, siya miampo, ug si Jehova nag-uban kaniya. (Jer. 20:11) “Kon kamo maluya,” si Brader Splane mitambag, “isulti kana kang Jehova. Mahingangha kamo kon sa unsang paagi kamo tabangan ni Jehova.”

Sa kataposang bahin sa programa sa graduwasyon, gipahinumdoman sa tsirman ang mamiminaw nga ang mga graduwado nakakat-on ug daghang paagi sa pag-ugmad sa ilang kredibilidad. Sa dihang makita sa mga tawo nga kasaligan ang mga misyonaryo, mahimong mas puwersado ang ilang mensahe.—Isa. 43:8-12.

[Kahon sa panid 22]

ESTADISTIKA SA KLASE

Gidaghanon sa mga nasod nga gihawasan: 6

Gidaghanon sa mga nasod nga gipadalhan: 21

Gidaghanon sa mga estudyante: 56

Aberids nga edad: 32.9

Aberids nga katuigan sa kamatuoran: 17.4

Aberids nga katuigan sa bug-os-panahong pag-alagad: 13

[Hulagway sa panid 23]

Ika-125 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.