Angay ba Nimong Ipugos ang Imong Gusto?

DUHA ka gagmayng bata ang nagdula. Giilog sa usa ka bata ang iyang paboritong dulaan gikan sa iyang kadula ug misinggit, “Akoa ni!” Sukad sa pagkabata, makita na diha sa dili-hingpit nga mga tawo ang kiling nga magmahakogon. (Gen. 8:21; Roma 3:23) Dugang pa, ang kalibotan sa katibuk-an nagpasiugda sa ako-una nga tinamdan. Kon dili nato buot maimpluwensiyahan niana nga espiritu, kinahanglang makigbisog kita batok sa hakog nga mga kiling. Kay kon dili, kita dali rang makapandol sa uban ug makapahuyang kini sa atong relasyon kang Jehova.—Roma 7:21-23.

Si apostol Pablo nag-awhag kanato sa pagbantay sa epekto sa atong mga lihok diha sa uban, sa dihang siya miingon: “Ang tanang butang subay sa balaod; apan dili ang tanang butang may kaayohan. Ang tanang butang subay sa balaod; apan dili ang tanang butang makapalig-on.” Si Pablo miingon usab: “Likayi nga mahimong hinungdan sa pagkapandol.” (1 Cor. 10:23, 32) Nan, maylabot sa atong gusto, maalamon nga pangutan-on nato ang atong kaugalingon: ‘Andam ba akong mosakripisyo sa akong katungod kon mameligro ang kalinaw sa kongregasyon? Andam ba akong mopahiuyon sa mga prinsipyo sa Bibliya, bisan pag lisod kanang buhaton?’

Sa Pagpilig Trabaho

Giisip sa kadaghanan nga ang pagpilig trabaho maoy personal nga desisyon nga dili ra kaayo  makaapektar o wala gayoy epekto sa uban. Apan tagda ang kasinatian sa usa ka negosyanteng lalaki nga nagpuyo sa usa ka gamayng lungsod sa Amerika del Sur. Siya nailhan nga sugarol ug palahubog. Apan, tungod sa iyang pagtuon sa Bibliya uban sa mga Saksi ni Jehova, siya miuswag sa espirituwal ug nag-usab sa iyang paagi sa pagkinabuhi. (2 Cor. 7:1) Sa dihang siya mihangyo nga mouban ug sangyaw sa kongregasyon, mataktikanhon siyang gidasig sa usa ka ansiyano nga palandongon una ang matang sa iyang trabaho. Sa taastaas nga panahon, siya ang pangunang tigbaligya sa lungsod ug puro nga alkohol gikan sa tubo—usa ka produkto nga mapuslanon kaayo apan sa ilang dapit kasagarang isagol kini sa soft drink ug imnon aron mahubog.

Nasabtan sa maong lalaki nga kon siya magsangyaw sa publiko apan magbaligya gihapon sa maong produkto, kini makadaot sa dungog sa kongregasyon ug sa iyang relasyon sa Diyos. Bisan tuod aduna siyay dakong pamilya nga kinahanglang sustentohan, siya miundang sa pagbaligyag alkohol. Karon siya nagsuportar sa iyang pamilya pinaagi sa pagpamaligyag papel. Kining tawhana, ang iyang asawa, ug duha sa ilang lima ka anak bawtismado na. Sila masibotong nagsangyaw sa maayong balita nga may kagawasan sa pagsulti.

Sa Pagpilig Kauban

Ang pagpakighugoyhugoy ba sa mga dili-magtutuo maoy butang nga nagdepende lang sa atong personal nga gusto, o nalangkit niini ang mga prinsipyo sa Bibliya? Usa ka sister ang gustong motambong ug parti kauban sa usa ka batan-ong lalaki nga dili Kristohanon. Bisag gipasidan-an na sa mga kapeligrohan, siya nagtuman gihapon sa iyang gusto mao nga miadto siya sa parti. Wala madugay human sa iyang pag-abot, gihatagan siyag ilimnon nga gisagolag isog nga substansiya nga pangpakatulog. Nakamata siya pipila ka oras sa ulahi ug iyang nasayran nga gilugos diay siya sa iyang giingong higala.—Itandi ang Genesis 34:2.

Bisan tuod ang pagpakig-uban sa mga dili-magtutuo dili kanunayng mosangpot sa katalagman sama sa gihisgotan sa ibabaw, ang Bibliya nagpasidaan: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Prov. 13:20) Walay duhaduha nga ang pagpilig daotang mga kauban magpameligro kanato! “Maalamon ang tawo nga nakakita sa katalagman ug nagtago sa iyang kaugalingon,” matod sa Proverbio 22:3, “apan ang walay kasinatian moagi ug magaantos sa silot.” Ang atong mga kauban makaapektar kanato ug sa atong relasyon sa Diyos.—1 Cor. 15:33; Sant. 4:4.

Sa Pamiste ug Panghindik

Ang mga estilo ug moda kanunayng mag-usab-usab. Apan, ang mga prinsipyo sa Bibliya bahin sa pamiste ug panghindik wala mausab. Si Pablo nag-awhag sa Kristohanong mga babaye sa ‘pagdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna’—usa ka prinsipyo nga mapadapat  usab sa mga lalaki. (1 Tim. 2:9) Si Pablo wala magsugyot ug simple kaayo nga estilo sa sinina, ni mag-ingon nga usa ra ka moda sa sinina ang kinahanglang isul-ob sa tanang Kristohanon. Apan komosta ang bahin sa pagkamakasaranganon? Ang usa ka diksiyonaryo naghubad niini ingong “pagkadili-mapasigarbohon o mapagawalon . . . kaligdong sa pamesti, pagpanulti, o panggawi.”

Kinahanglan natong pangutan-on ang atong kaugalingon: ‘Makasaranganon ba gayod ako kon akong ipugos ang akong katungod sa pagsul-ob ug sinina nga makakuha sa atensiyon sa mga tawo? Ang ako bang pamesti magpatunghag negatibong hunahuna bahin sa akong pagkatawo ug sa akong moralidad?’ Atong malikayan ang ‘paghatag ug bisan unsa nga hinungdan sa pagkapandol’ niining bahina pinaagi sa ‘pagtan-aw, dili lamang sa personal nga interes sa mga butang labot sa atong kaugalingon, kondili sa personal nga interes usab sa uban.’—2 Cor. 6:3; Filip. 2:4.

Sa Negosyo

Sa dihang mitungha ang mga problema bahin sa pagpanikas didto sa kongregasyon sa Corinto, si Pablo misulat: “Nganong dili hinuon ninyo tugotan nga kamo mabuhatan ug sayop? Nganong dili hinuon ninyo pasagdan nga kamo matikasan?” Si Pablo nagtambag sa mga Kristohanon nga magmaandam sa pagsakripisyo inay nga ikiha ang usa ka igsoon. (1 Cor. 6:1-7) Gipadapat kini sa usa ka brader sa Tinipong Bansa. Siya ug ang iyang Kristohanong amo wala magkasinabot bahin suweldo nga kinahanglan pang ibayad kaniya. Pinaagi sa pagsunod sa mga lagda sa Kasulatan, ang duha ka igsoon balikbalik nga nagkita apan wala gihapon masulbad ang problema. Sa kataposan, ila kining gidala ngadto “sa kongregasyon,” nga gihawasan sa Kristohanong mga ansiyano.—Mat. 18:15-17.

Ikasubo, wala gihapon masulbad ang problema. Human mag-ampo sa makadaghan, nakadesisyon ang empleyado nga dili na lang kobrahon ang dakong kantidad nga iyang gibati nga utang kaniya sa iyang amo. Ngano? Matod pa niya sa ulahi, “Kining problemaha nagwagtang sa akong kalipay ug naghurot sa bililhong panahon nga magamit unta sa Kristohanong kalihokan.” Human niana, gibati sa maong brader nga mibalik ang iyang kalipay, ug gibati usab niya nga gipanalanginan ni Jehova ang iyang pag-alagad.

Bisan sa Gagmayng mga Butang

Ang dili pagpugos sa atong gusto magpatungha usab ug mga panalangin bisan sa gagmayng mga butang. Sa unang adlaw sa usa ka distritong kombensiyon, dihay magtiayong payunir nga miabot ug sayo ug sila milingkod sa puwesto nga ilang gusto. Sa pagsugod sa programa, usa ka dakong pamilya ang nagdali pagsulod sa estadyum. Kay nakamatikod nga nagpangitag igong malingkoran ang maong pamilya, gitanyag sa magtiayong payunir ang ilang lingkoranan. Tungod niana, ang tibuok pamilya nagkatapad paglingkod. Pipila ka adlaw human sa kombensiyon, ang magtiayon nakadawat ug sulat-pasalamat gikan sa maong pamilya. Gipatin-aw sa sulat nga nahigawad gayod sila dihang nadelatar sila pag-abot sa kombensiyon. Sa wala madugay ang maong pagbati napulihag kalipay tungod sa kaayo sa magtiayon.

Kon kita adunay kahigayonan sa pagsakripisyo sa atong gusto, magmaandam kita sa pagbuhat niana. Pinaagi sa pagpakitag gugma nga “dili mangita sa kaugalingong kaayohan niini,” kita makatabang nga mahuptan ang kalinaw diha sa kongregasyon ug sa atong mga silingan. (1 Cor. 13:5) Apan labaw sa tanan, atong mapreserbar ang atong pakighigala kang Jehova.

[Hulagway sa panid 20]

Andam ka bang mosakripisyo sa imong gusto diha sa imong pagpilig estilo sa sinina?

[Hulagway sa panid 20, 21]

Andam ka bang mohatag sa imong lingkoranan ngadto sa imong mga igsoon?