Kon sa Unsang Paagi ang Pulong ni Jesus Makapalipay
Kon sa Unsang Paagi ang Pulong ni Jesus Makapalipay
“Mitungas [si Jesus] sa bukid; ug . . . ang iyang mga tinun-an miduol kaniya; ug siya . . . misugod sa pagtudlo kanila.”—Mat. 5:1, 2.
1, 2. (a) Ubos sa unsang mga kahimtang nga gihimo ni Jesus ang Wali sa Bukid? (b) Sa unsang paagi gisugdan ni Jesus ang iyang wali?
TUIG 31 K.P. kadto. Gihunong una ni Jesus sa makadiyot ang iyang pagsangyaw sa Galilea aron saulogon ang Paskuwa sa Jerusalem. (Juan 5:1) Pagbalik niya sa Galilea, siya nag-ampo sa tibuok gabii aron mangayog giya sa Diyos sa pagpilig 12 ka apostoles. Pagkaugma nagtigom ang panon sa katawhan samtang si Jesus nag-ayo sa mga masakiton. Kauban sa iyang mga tinun-an ug sa uban pa, siya milingkod sa usa ka bakilid ug misugod sa pagpanudlo.—Mat. 4:23–5:2; Luc. 6:12-19.
2 Gisugdan ni Jesus ang iyang Wali sa Bukid pinaagi sa pagpatin-aw nga atong maangkon ang kalipay pinaagi sa pagbaton ug maayong relasyon sa Diyos. (Basaha ang Mateo 5:1-12.) Ang kalipay maoy ‘usa ka maayong pagbati nga naglakip sa pagkakontento ug hilabihang pagmaya.’ Ang siyam ka kalipay nga gihisgotan ni Jesus nagpasiugda kon nganong malipayon ang mga Kristohanon, ug kini mapuslanon karon sama ra nga mapuslanon kini duolan sa 2,000 ka tuig kanhi. Atong hisgotan ang matag usa niini.
“Kadtong Mahunahunaon sa Ilang Espirituwal nga Panginahanglan”
3. Unsay kahulogan sa pagkahimong mahunahunaon sa atong espirituwal nga panginahanglan?
3 “Malipayon kadtong mahunahunaon sa ilang espirituwal nga panginahanglan, sanglit ila ang gingharian sa mga langit.” (Mat. 5:3) “Kadtong mahunahunaon sa ilang espirituwal nga panginahanglan” nakaamgo nga sila kabos sa espirituwal ug nagkinahanglan sa kaluoy sa Diyos.
4, 5. (a) Nganong malipayon kadtong mahunahunaon sa ilang espirituwal nga panginahanglan? (b) Sa unsang paagi matagbaw ang atong espirituwal nga panginahanglan?
4 Malipayon kadtong mahunahunaon sa ilang espirituwal nga panginahanglan, “sanglit ila ang gingharian sa mga langit.” Ang pagdawat sa unang mga tinun-an ni Jesus kaniya ingong Mesiyas naghatag kanilag kahigayonan nga magmando uban kaniya sa langitnong Gingharian. (Luc. 22:28-30) Kita man naglaom nga mahimong kaubang manununod ni Kristo sa langit o nagpaabot sa kinabuhing walay kataposan sa paraisong yuta ilalom sa pagmando sa Gingharian, kita magmalipayon kon kita mahunahunaon gayod sa atong espirituwal nga panginahanglan ug bug-os nga nagasalig sa Diyos.
5 Dili tanan ang mahunahunaon sa ilang espirituwal nga panginahanglan, kay daghan ang kulag pagtuo ug walay pagpabili sa sagradong mga butang. (2 Tes. 3:1, 2; Heb. 12:16) Ang mga paagi sa pagtagbaw sa atong espirituwal nga panginahanglan angayng maglakip sa makugihong pagtuon sa Bibliya, masibotong pagpakigbahin sa paghimog mga tinun-an, ug regular nga pagtambong sa Kristohanong mga tigom.—Mat. 28:19, 20; Heb. 10:23-25.
Nagbangotan nga “Malipayon”
6. Kinsa “kadtong nagbangotan,” ug nganong sila “malipayon”?
6 “Malipayon kadtong nagbangotan, sanglit sila pagahupayon.” (Mat. 5:4) “Kadtong nagbangotan” susama niadtong “mahunahunaon sa ilang espirituwal nga panginahanglan.” Sila wala magbangotan sa diwa nga nagreklamo sila sa ilang kahimtang sa kinabuhi. Sila nagbangotan kay naguol sila sa ilang pagkamakasasala ug sa kahimtang nga naglungtad tungod sa pagkadili-hingpit sa tawo. Nganong “malipayon” man ang maong nagbangotan? Tungod kay sila nagpasundayag ug pagtuo sa Diyos ug kang Kristo ug nahupayan sa pagbaton ug maayong relasyon kang Jehova.—Juan 3:36.
7. Unsay angay natong bation maylabot sa kalibotan ni Satanas?
7 Kita ba nagbangotan tungod sa pagkadili-matarong nga kaylap sa kalibotan ni Satanas? Unsa man gayoy atong pagbati sa mga butang niining kalibotana? Si apostol Juan misulat: “Ang tanan nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—wala magagikan sa Amahan.” (1 Juan 2:16) Apan komosta kon atong namatikdan nga ang atong espirituwalidad inanayng naimpluwensiyahan sa “espiritu sa kalibotan,” ang nagatukmod nga puwersa nga nagdominar sa mga tawo nga nahimulag sa Diyos? Nan, kinasingkasing kitang mag-ampo, magtuon sa Pulong sa Diyos, ug mangayog tabang sa mga ansiyano. Samtang makigsuod kita kang Jehova, kita ‘mahupayan’ bisan unsa pay nakapaguol kanato.—1 Cor. 2:12; Sal. 119:52; Sant. 5:14, 15.
Malipayon Gayod ang “mga Malumog-Buot”!
8, 9. Unsay kahulogan sa pagkahimong malumog-buot, ug nganong malipayon ang mga malumog-buot?
8 “Malipayon ang mga malumog-buot, sanglit sila magapanunod sa yuta.” (Mat. 5:5) Ang “kalumo sa buot,” o kaaghop, wala magpasabot ug kahuyang o pagpakaaron-ingnong buotan. (1 Tim. 6:11) Kon kita malumog-buot, atong ipakita ang kaaghop pinaagi sa pagbuhat sa kabubut-on ni Jehova ug pagdawat sa iyang giya. Ang kalumo sa buot madayag usab diha sa atong pagpakiglabot sa mga isigkamagtutuo ug sa uban. Ang maong kaaghop nahiuyon sa tambag ni apostol Pablo.—Basaha ang Roma 12:17-19.
9 Nganong malipayon ang mga malumog-buot? Tungod kay “sila magapanunod sa yuta,” miingon ang malumo nga si Jesus. Siya ang pangunang Manununod sa yuta. (Sal. 2:8; Mat. 11:29; Heb. 2:8, 9) Apan, ang malumo nga “kaubang mga manununod ni Kristo” makapanunod usab sa yuta. (Roma 8:16, 17) Sa yutan-ong dominyo sa Gingharian ni Jesus, daghan pang maaghop ang makatagamtam ug walay-kataposang kinabuhi.—Sal. 37:10, 11.
10. Unsay epekto sa kakulag kalumo diha sa atong mga responsibilidad sa kongregasyon ug sa atong relasyon sa uban?
10 Sama kang Jesus, kita kinahanglang magmalumo. Apan komosta kon kita nailhan ingong makiawayon? Kon mao kanay atong kinaiya, likayan kita sa mga tawo. Ang mga brader nga nagtinguha nga makahupot ug responsibilidad sa kongregasyon dili mahimong kuwalipikado kon sila palaaway. (1 Tim. 3:1, 3) Giingnan ni Pablo si Tito nga kanunayng pahinumdoman ang mga Kristohanon sa Creta nga sila kinahanglang “dili palaaway, makataronganon, magpasundayag ug bug-os nga kalumo sa tanang tawo.” (Tito 3:1, 2) Pagkadakong panalangin ang kalumo alang sa uban!
Sila Gigutom sa “Pagkamatarong”
11-13. (a) Unsay kahulogan sa pagkahimong gutom ug uhaw sa pagkamatarong? (b) Sa unsang paagi kadtong gigutom ug giuhaw sa pagkamatarong “pagabusgon”?
11 “Malipayon kadtong gigutom ug giuhaw sa pagkamatarong, sanglit sila pagabusgon.” (Mat. 5:6) Ang “pagkamatarong” nga gipasabot ni Jesus mao ang paghimo kon unsay husto pinaagi sa pagtuman sa kabubut-on sa Diyos ug pagsugot sa iyang mga sugo. Ang salmista miingon nga ‘nagun-ob ang iyang kalag sa pagpangandoy’ sa matarong nga hudisyal nga mga hukom sa Diyos. (Sal. 119:20) Ato ba gayong gipabilhan ang pagkamatarong nga kita gutomon ug uhawon niana?
12 Si Jesus miingon nga kadtong gigutom ug giuhaw sa pagkamatarong malipay tungod kay sila “pagabusgon,” o pagatagbawon sa bug-os. Nahimo kining posible human sa Pentekostes 33 K.P., kay nianang panahona ang balaang espiritu ni Jehova ‘naghatag sa kalibotan ug makapatuo nga ebidensiya mahitungod sa pagkamatarong.’ (Juan 16:8) Pinaagi sa balaang espiritu, giinspirar sa Diyos ang mga tawo sa pagsulat sa Kristohanon Gregong Kasulatan, nga mapuslanon kaayo “sa pagdisiplina diha sa pagkamatarong.” (2 Tim. 3:16) Ang espiritu sa Diyos motabang usab kanato sa ‘pagsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong.’ (Efe. 4:24) Dili ba makapahupay ang pagkahibalo nga kadtong mahinulsolong nangayog pasaylo sa ilang mga sala pinasukad sa halad lukat ni Jesus makabaton ug matarong nga baroganan atubangan sa Diyos?—Basaha ang Roma 3:23, 24.
13 Kon kita naglaom nga mabuhi sa yuta, matagbaw sa bug-os ang atong kagutom ug kauhaw sa pagkamatarong sa dihang atong madawat ang walay-kataposang kinabuhi ilalom sa matarong nga mga kahimtang. Sa kasamtangan, magmadeterminado kita nga magkinabuhi sumala sa mga sukdanan ni Jehova. Si Jesus miingon: “Magpadayon sa pagpangita pag-una sa gingharian ug sa iyang pagkamatarong.” (Mat. 6:33) Kon ato kanang buhaton, kita mahimong puliki sa diyosnong mga buhat ug magmalipayon.—1 Cor. 15:58.
Kon Nganong Malipayon ang “mga Maluluy-on”
14, 15. Sa unsang paagi kita makapakitag kaluoy, ug nganong malipayon ang “mga maluluy-on”?
14 “Malipayon ang mga maluluy-on, sanglit sila pakitaan ug kaluoy.” (Mat. 5:7) “Ang mga maluluy-on” mapalihok sa ilang kahingawa ug kaluoy sa uban. Sa milagrosong paagi gihupay ni Jesus ang pag-antos sa daghan tungod kay siya naluoy kanila. (Mat. 14:14) Ang kaluoy mapasundayag sa dihang ang mga tawo magpasaylo niadtong nakasala kanila, sama ra nga si Jehova maluluy-ong nagapasaylo sa mga mahinulsolon. (Ex. 34:6, 7; Sal. 103:10) Atong ikapakita ang kaluoy nianang paagiha ug pinaagi sa atong malulotong mga pulong ug buhat nga makahatag ug kahupayan sa mga timawa. Ang usa ka maayong paagi sa pagpakitag kaluoy mao ang pagpaambit sa kamatuoran sa Bibliya ngadto sa uban. Kay naluoy sa panon, si Jesus “misugod sa pagtudlo kanila ug daghang butang.”—Mar. 6:34.
15 May katarongan kita nga mouyon sa gipamulong ni Jesus: “Malipayon ang mga maluluy-on, sanglit sila pakitaan ug kaluoy.” Kon kita magmaluluy-on sa uban, sila lagmit magmaluluy-on usab kanato. Ug sa dihang kita pagahukman sa Diyos, mahimong mapagaan ang iyang paghukom kanato kon kita nagpakitag kaluoy sa uban. (Sant. 2:13) Ang mga maluluy-on lamang ang pasayloon sa ilang mga sala ug hatagag kinabuhing dayon.—Mat. 6:15.
Kon Nganong Malipayon “ang mga Putli sa Kasingkasing”
16. Unsay kahulogan sa pagkahimong “putli sa kasingkasing,” ug sa unsang paagi kadtong nakabaton nianang hiyasa “makakita sa Diyos”?
16 “Malipayon ang mga putli sa kasingkasing, sanglit sila makakita sa Diyos.” (Mat. 5:8) Kon kita “putli sa kasingkasing,” ang kaputli madayag diha sa atong mga tinguha, motibo, ug pagpakiglabot sa uban. Kita magpasundayag ug “gugma gikan sa hinlong kasingkasing.” (1 Tim. 1:5) Kay hinlo kita sa sulod, kita “makakita sa Diyos.” Wala kini magpasabot nga literal natong makita si Jehova, kay “walay tawo nga makakita [sa Diyos] ug mabuhi pa.” (Ex. 33:20) Apan, kay hingpit man niyang gibanaag ang personalidad sa Diyos, si Jesus nakaingon: “Siya nga nakakita kanako nakakita usab sa Amahan.” (Juan 14:7-9) Ingong mga magsisimba ni Jehova sa yuta, kita “makakita sa Diyos” pinaagi sa pag-obserbar sa mga butang nga iyang nahimo alang kanato. (Job 42:5) Ang dinihogang mga Kristohanon aktuwal nga makakita sa ilang langitnong Amahan sa dihang sila banhawon na ngadto sa espirituhanong kinabuhi.—1 Juan 3:2.
17. Unsay epekto kanato kon kita putli sa kasingkasing?
17 Tungod kay ang putli nga kasingkasing hinlo sa moral ug espirituwal, kini dili maghunahuna sa mga butang nga hugaw sa panan-aw ni Jehova. (1 Cron. 28:9; Isa. 52:11) Kon kita putli sa kasingkasing, ang atong mga pulong ug panggawi maoy putli, ug walay pagkasalingkapaw ang atong pag-alagad kang Jehova.
Ang “mga Makigdaiton” Mahimong mga Anak sa Diyos
18, 19. Sa unsang paagi nagagawi ang “mga makigdaiton”?
18 “Malipayon ang mga makigdaiton, sanglit sila pagatawgon nga ‘mga anak sa Diyos.’” (Mat. 5:9) Ang “mga makigdaiton” maila pinaagi sa mga butang nga ilang buhaton ug dili buhaton. Kon kita ang matang sa mga tawo nga anaa sa hunahuna ni Jesus, kita makigdaiton ug ‘dili mobalos ug kadaot sa kadaot kang bisan kinsa.’ Hinunoa, kita ‘kanunayng magtinguha ug maayo sa usag usa ug sa tanan.’—1 Tes. 5:15.
19 Ang Gregong pulong nga gihubad ug “makigdaiton” diha sa Mateo 5:9 sa literal nagpasabot ug “tigpatunhay sa kalinaw.” Aron mahilakip sa mga makigdaiton, kita kinahanglang aktibo sa pagpatunhay sa kalinaw. Ang mga tigpatunhay sa kalinaw dili mobuhat ug bisan unsa nga ‘makapabulag niadtong suod sa usag usa.’ (Prov. 16:28) Ingong mga makigdaiton, kita mohimog positibong mga lakang sa ‘pagtinguha sa pagpakigdait uban sa tanang tawo.’—Heb. 12:14.
20. Kinsa karon ang “mga anak sa Diyos,” ug kinsa pa ang mahimo unyang mga anak sa Diyos?
20 Malipayon ang mga makigdaiton tungod kay “sila pagatawgon nga ‘mga anak sa Diyos.’” Ang matinumanon nga dinihogang mga Kristohanon gisagop ni Jehova ug maoy “mga anak sa Diyos.” Sila aduna nay suod nga relasyon kang Jehova ingong iyang mga anak tungod kay sila nagpasundayag ug pagtuo kang Kristo ug tibuok-kasingkasing nga nagsimba sa “Diyos sa gugma ug sa kalinaw.” (2 Cor. 13:11; Juan 1:12) Komosta ang makigdaiton nga “ubang mga karnero” ni Jesus? Si Jesus mahimong ilang “Amahang Walay Kataposan” panahon sa iyang Milenyong Pagmando, apan pagkatapos niana siya magpasakop mismo kang Jehova ug sila mahimong mga anak sa Diyos sa bug-os nga diwa.—Juan 10:16; Isa. 9:6; Roma 8:21; 1 Cor. 15:27, 28.
21. Sa unsang paagi kita mogawi kon kita “nagkinabuhi pinaagi sa espiritu”?
21 Kon kita “nagkinabuhi pinaagi sa espiritu,” ang pagkamakigdaiton maoy usa sa atong mga hiyas nga daling makita sa uban. Kita dili “mag-aghat ug pag-indigay sa usag usa” o “manghagit . . . sa usag usa.” (Gal. 5:22-26; New International Version) Hinunoa, kita maningkamot nga “makigdinaitay sa tanang tawo.”—Roma 12:18.
Malipayon Bisag Ginalutos!
22-24. (a) Nganong malipayon kadtong ginalutos tungod sa pagkamatarong? (b) Unsay atong hisgotan sa sunod nga duha ka tun-anang artikulo?
22 “Malipayon kadtong ginalutos tungod sa pagkamatarong, sanglit ila ang gingharian sa mga langit.” (Mat. 5:10) Sa pagpatin-aw niini, si Jesus midugang: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.”—Mat. 5:11, 12.
23 Sama sa mga manalagna sa Diyos kaniadto, ang mga Kristohanon nagdahom nga pakaulawan, lutoson, ug butangbutangan—ang tanan “tungod sa pagkamatarong.” Apan, pinaagi sa matinumanong paglahutay sa maong mga pagsulay atong bation ang katagbawan nga kita nakapahimuot ug nakapasidungog kang Jehova. (1 Ped. 2:19-21) Ang atong pag-antos dili makapamenos sa atong kalipay sa pag-alagad kang Jehova karon o sa umaabot. Dili usab kini makapamenos sa kalipay nga magmando uban kang Kristo sa langitnong Gingharian o sa kalipay nga makabaton ug kinabuhing walay kataposan ingong usa sa yutan-ong mga sakop niana nga kagamhanan. Ang maong mga panalangin maoy ebidensiya sa pag-uyon, pagkamaluloton, ug pagkamanggihatagon sa Diyos.
24 Daghan pa kitag makat-onan sa Wali sa Bukid. Lainlaing pagtulon-an ang konsiderahon sa sunod nga duha ka tun-anang artikulo. Atong tan-awon kon sa unsang paagi atong mapadapat ang mga pulong ni Jesu-Kristo.
Unsay Imong Tubag?
• Nganong malipayon “kadtong mahunahunaon sa ilang espirituwal nga panginahanglan”?
• Nganong malipayon ang “mga malumog-buot”?
• Nganong ang mga Kristohanon malipayon bisan pag sila ginalutos?
• Sa mga kalipay nga gihisgotan ni Jesus, unsay ilabinang nagustoan nimo?
[Mga Pangutana sa Pagtuon]
[Hulagway sa panid 7]
Ang siyam ka kalipay nga gipasiugda ni Jesus mapuslanon usab karon
[Hulagway sa panid 8]
Ang usa ka maayong paagi sa pagpakitag kaluoy mao ang pagpaambit sa kamatuoran sa Bibliya ngadto sa uban