Ang Pulong ni Jehova Buhi

Mga Pangunang Punto sa Basahon sa Pinadayag—II

UNSAY dangatan niadtong nagsimba kang Jehova nga Diyos ug niadtong wala magsimba kaniya? Unsa unyay mahitabo kang Satanas ug sa iyang mga demonyo? Unsang mga panalangin ang mapahimuslan sa masinugtanong katawhan sulod sa Usa ka Libo ka Tuig nga Pagmando ni Kristo? Ang mga tubag niini ug sa ubang hinungdanong mga pangutana makita diha sa Pinadayag 13:1–22:21. a Kining mga kapituloha naundan sa kataposang 9 sa 16 ka panan-awon nga nadawat ni apostol Juan sa hinapos sa unang siglo K.P.

“Malipayon siya nga nagabasa sa makusog ug kadtong nagapatalinghog sa mga pulong niini nga tagna,” misulat si Juan, “ug kinsa nagatuman sa mga butang nga nahisulat niini.” (Pin. 1:3; 22:7) Ang pagbasa ug pagpadapat sa atong nakat-onan sa basahon sa Pinadayag makaapektar sa atong motibo sa pag-alagad sa Diyos, makapalig-on sa atong pagtuo Kaniya ug sa iyang Anak nga si Jesu-Kristo, ug makahatag kanatog masanag nga paglaom sa umaabot. b—Heb. 4:12.

GIBUBO ANG PITO KA PANAKSAN SA KASUKO SA DIYOS

(Pin. 13:1–16:21)

“Ang kanasoran nangapungot,” nag-ingon ang Pinadayag 11:18, “ug miabot ang . . . kapungot [sa Diyos], ug ang tinudlong panahon . . . sa paglaglag sa mga nagalaglag sa yuta.” Sa pagpadayag kon nganong ang Diyos napungot, gipakita sa ikawalong panan-awon ang kalihokan sa “usa ka mapintas nga mananap . . . nga may napulo ka sungay ug pito ka ulo.”—Pin. 13:1.

Sa ikasiyam nga panan-awon, nakita ni Juan “ang Kordero nga nagbarog diha sa Bukid sa Zion” ug uban kaniya “ang usa ka gatos ug kap-atag-upat ka libo.” Sila “gipalit gikan sa katawhan.” (Pin. 14:1, 4) Gisundan kana sa mga pahibalo nga gipahayag sa mga manulonda. Sa sunod nga panan-awon, nakita ni Juan ang “pito ka manulonda nga may pito ka hampak.” Dayag nga si Jehova maoy nagsugo niining maong mga manulonda sa pagbubo sa “pito ka panaksan sa kasuko sa Diyos” ngadto sa lainlaing bahin sa kalibotan ni Satanas. Ang mga panaksan nasudlan sa mga pahayag ug pasidaan mahitungod sa mga paghukom nga ipahamtang sa Diyos. (Pin. 15:1; 16:1) Kining duha ka panan-awon naghatag ug mga detalye sa dugang nga mga paghukom sa Gingharian nga may kalabotan sa ikatulong kaalaotan ug sa paghuyop sa ikapitong trompeta.—Pin. 11:14, 15.

Tubag sa mga Pangutana Bahin sa Kasulatan:

13:8—Unsa ang “linukot nga basahon sa kinabuhi nga iya sa Kordero”? Usa kini ka simbolikong linukot nga basahon nga naundan lamang sa mga ngalan niadtong magmando uban ni Jesu-Kristo sa iyang langitnong Gingharian. Naglakip kini sa mga ngalan sa dinihogang mga Kristohanon nga ania pa sa yuta, nga may paglaom nga mabuhi sa langit.

13:11-13—Sa unsang paagi ang mapintas nga mananap nga may duha ka sungay misulti sama sa usa ka dragon ug nagpakanaog ug kalayo gikan sa langit? Ang kamatuoran nga ang duhag-sungay nga mapintas nga mananap—ang Anglo-Amerikanhong Gahom sa Kalibotan—nagsulti sama sa usa ka dragon nagpakita nga kini naggamit ug mga panghulga, pagpit-os, ug kapintasan aron pugson ang mga tawo sa pagpasakop sa iyang pagmando. Kini nagpakanaog ug kalayo gikan sa langit sa pagkaagi nga kini nagpakaaron-ingnong nagdula sa papel sa matuod nga manalagna pinaagi sa pag-ingon nga napildi niini ang mga puwersa sa daotan panahon sa duha ka gubat sa kalibotan sa ika-20ng siglo ug nagmadaogon kono kini batok sa Komunismo.

16:17—Unsa ang “hangin” diin gibubo ang  ikapitong panaksan? Ang “hangin” nagsimbolo sa panghunahuna ni Satanas, “ang espiritu [kiling sa hunahuna] nga nagalihok karon diha sa mga anak sa pagkadili-masinugtanon.” Kining simbolikong makahilo nga hangin nahanggab sa tanan nga bahin sa daotang sistema ni Satanas.—Efe. 2:2.

Mga Leksiyon Alang Kanato:

13:1-4, 18. “Usa ka mapintas nga mananap” nga nagsimbolo sa tawhanong mga kagamhanan ang “migimaw sa dagat,” nga mao ang gubot nga pundok sa katawhan. (Isa. 17:12, 13; Dan. 7:2-8, 17) Kini nga mananap, nga gimugna ug gihatagag gahom ni Satanas, adunay numero nga 666, nga nagpasiugda sa hilabihan nga pagkadili-hingpit niini. Ang atong pagkaila sa mapintas nga mananap motabang kanato sa paglikay nga himayaon o simbahon kini sama sa gihimo sa kadaghanan.—Juan 12:31; 15:19.

13:16, 17. Bisan pa sa kalisdanan nga atong maatubang diha sa adlaw-adlawng mga kalihokan, sama sa ‘pagpamalit o pagpamaligya,’ dili gayod nato tugotan ang mapintas nga mananap sa pagmando kanato. Ang pagdawat ‘sa marka sa mapintas nga mananap diha sa atong kamot o sa atong agtang’ nagpasabot ug pagtugot niana sa pagkontrolar sa atong mga lihok o pag-impluwensiya sa atong panghunahuna.

14:6, 7. Ang pagmantala sa manulonda nagtudlo kanato nga kinahanglan natong isangyaw nga dinalian ang maayong balita sa natukod na nga Gingharian sa Diyos. Kinahanglang tabangan nato ang atong ginatun-an sa Bibliya sa pag-ugmad sa maayong matang sa kahadlok sa Diyos ug sa paghimaya kaniya.

14:14-20. Sa dihang makompleto na “ang alanihon sa yuta,” nga mao ang pagpanigom niadtong pagaluwason, panahon na kini nga iitsa sa manulonda “ngadto sa dakong pug-anan sa bino sa kasuko sa Diyos” ang natigom nga “paras sa yuta.” Ang maong paras—ang dunot nga makitang sistema sa mga kagamhanan ni Satanas uban ang “mga bulig” sa daotang mga bunga niini—pagalaglagon sa walay kataposan. Kita angayng magmadeterminado nga dili gayod maimpluwensiyahan sa paras sa yuta.

16:13-16. Ang “mahugawng inspirado nga mga pahayag” nagsimbolo sa demonyohanong mga propaganda. Gihimo kini aron matino nga ang mga hari sa yuta dili maimpluwensiyahan sa pagbubo sa pito ka panaksan sa kasuko sa Diyos kondili maaghat hinuon sila sa pagpakig-away kang Jehova.—Mat. 24:42, 44.

16:21. Samtang nagkaduol ang kataposan niining kalibotana, ang pagmantala sa mga paghukom ni Jehova batok sa daotang sistema ni Satanas mahimong maglakip sa masakit nga pagpahayag sa mga paghukom sa Diyos, nga lagmit maoy gihulagwayan sa yelo. Bisan pa niana, ang kadaghanan sa katawhan magpadayon sa pagpasipala sa Diyos.

NAGMANDO NA ANG MADAOGONG HARI

(Pin. 17:1–22:21)

Ang “Dakong Babilonya,” ang tibuok-kalibotang imperyo sa bakak nga relihiyon, maoy usa ka dulumtanang bahin sa daotang kalibotan ni Satanas. Siya gipaila sa ika-11 nga panan-awon ingong “dakong bigaon”—usa ka imoral nga babaye—nga “nagsakay sa usa ka sanag-pulang bulok nga mapintas nga mananap.” Siya bug-os nga pagalaglagon sa “napulo ka sungay” sa mananap nga iya mismong gisakyan. (Pin. 17:1, 3, 5, 16) Sa pagtandi sa bigaon ngadto sa usa ka “dakong siyudad,” ang sunod nga panan-awon nagpahibalo sa iyang pagkahugno ug nag-awhag sa katawhan sa Diyos nga dili maglangan sa ‘paggula kaniya.’ Daghan ang nanghilak sa pagkahugno sa dakong siyudad. Apan, didto sa langit adunay pagmaya tungod sa “kasal sa Kordero.” (Pin. 18:4, 9, 10, 15-19; 19:7) Sa ika-13 nga panan-awon, ang nagsakay sa “usa ka puting kabayo” nakiggubat sa mga nasod. Iyang laglagon ang daotang kalibotan ni Satanas.—Pin. 19:11-16.

Komosta ang bahin sa “orihinal nga halas, nga mao ang Yawa ug Satanas”? Kanus-a siya ‘itambog ngadto sa linaw nga kalayo’? Apil kana sa gihisgotan sa ika-14 nga panan-awon. (Pin. 20:2, 10) Ang kataposang duha ka panan-awon naghatag ug mubo nga kahubitan sa kinabuhi panahon sa Milenyo. Sa hinapos nga bahin sa “pinadayag,” si Juan nakakita ug ‘usa ka suba sa tubig sa kinabuhi nga nagaagos latas sa taliwala sa halapad nga dalan niini,’ ug usa ka talagsaong imbitasyon ang gipaabot ngadto ni “bisan kinsa nga giuhaw.”—Pin. 1:1; 22:1, 2, 17.

 Tubag sa mga Pangutana Bahin sa Kasulatan:

17:16; 18:9, 10—Nganong “ang mga hari sa yuta” nasubo human nila laglaga ang bakak nga relihiyon? Ang hinungdan sa ilang kasub-anan mao ang kahakog. Human malaglag ang Dakong Babilonya, dayag nga maamgohan sa mga hari sa yuta kon unsa siya ka mapuslanon kanila. Tungod kaniya, daw nahimong dinawat ang pagpanglupig sa mga hari sa yuta. Mitabang usab kanila ang Dakong Babilonya sa pagrekluta ug mga batan-on alang sa panggubatan. Gawas pa niana, ang relihiyon dakog natabang sa paghimo sa mga tawo nga mapinasakopon.

19:12—Sa unsang diwa nga walay laing nahibalo sa wala isulti nga ngalan ni Jesus gawas kaniya? Kining ngalana morag naghawas sa katungdanan ug mga pribilehiyo, sama nianang mabasa sa Isaias 9:6, nga nahuptan ni Jesus sulod sa adlaw sa Ginoo. Walay laing nahibalo nianang ngalana gawas kaniya tungod kay talagsaon ang iyang mga pribilehiyo ug siya lamang ang makasabot kon unsay kahulogan sa paghupot nianang hataas nga katungdanan. Bisan pa niana, ang pipila niining mga pribilehiyoa gipaambit ni Jesus ngadto sa mga membro sa iyang pangasaw-onon, nga sa diwa ‘nagsulat diha kanila sa iyang bag-ong ngalan.’—Pin. 3:12.

19:14—Kinsa ang mga magkakabayo nga kauban ni Jesus sa Armagedon? Lakip sa ‘mga panon sa langit’ nga moduyog kang Jesus sa gubat sa Diyos mao ang mga manulonda ug dinihogang mga mananaog nga nakadawat na sa ilang langitnong ganti.—Mat. 25:31, 32; Pin. 2:26, 27.

20:11-15—Kansang mga ngalan ang nahisulat diha sa “linukot nga basahon sa kinabuhi”? Kini ang basahon nga gisulatan sa mga ngalan niadtong makadawat ug kinabuhing walay kataposan—ang dinihogang mga Kristohanon, mga membro sa dakong panon, ug ang matinumanong mga alagad sa Diyos nga mahilakip sa “pagkabanhaw sa mga matarong.” (Buh. 24:15; Pin. 2:10; 7:9) Ang mga ngalan niadtong mahilakip sa ‘pagkabanhaw sa mga dili-matarong’ mahisulat lamang diha sa “linukot nga basahon sa kinabuhi” kon sila molihok uyon sa “mga butang nga nahisulat sa mga linukot nga basahon” sa mga instruksiyon nga pagabuksan sa Milenyo. Apan, dili tinta nga permanente ang gigamit sa pagsulat sa mga ngalan. Permanente lamang masulat ang ngalan sa mga dinihogan kon sila magpabiling matinumanon hangtod sa kamatayon. (Pin. 3:5) Ang mga ngalan niadtong makadawat ug kinabuhi sa yuta permanente lamang masulat kon sila makapasar sa pangataposang pagsulay sa kataposan sa usa ka libo ka tuig.—Pin. 20:7, 8.

Mga Leksiyon Alang Kanato:

17:3, 5, 7, 16. “Ang kaalam nga gikan sa itaas” motabang kanato sa pagsabot sa “misteryo sa babaye ug sa [sanag-pulang bulok] mapintas nga mananap nga iyang gisakyan.” (Sant. 3:17) Kining simbolikong mapintas nga mananap nagsugod ingong Liga sa Kanasoran ug sa ulahi nabuhi pag-usab ingong Hiniusang Kanasoran. Dili ba ang pagbutyag niini nga misteryo angayng magtukmod kanato nga magmasiboton sa pagsangyaw sa maayong balita sa Gingharian sa Diyos ug sa pagpahibalo bahin sa adlaw sa paghukom ni Jehova?

21:1-6. Kita makaseguro nga ang gitagnang mga panalangin ilalom sa pagmando sa Gingharian matuman gayod. Ngano? Tungod kay bahin niana, ang Bibliya nag-ingon: “Nahitabo na kini!”

22:1, 17. Ang “suba sa tubig sa kinabuhi” naghawas sa mga tagana ni Jehova aron mapasig-uli ang masinugtanong katawhan gikan sa sala ug kamatayon. Ang pipila niini mabatonan na karon. Hinaot nga dili lamang kita mapasalamatong modawat sa pagdapit nga ‘moinom sa tubig sa kinabuhi nga walay bayad’ kondili maikagong magpaambit usab niana ngadto sa uban!

[Mga footnote]

[Hulagway sa panid 5]

Kahibulongan gayod ang mga panalangin nga matagamtaman sa masinugtanong katawhan ubos sa pagmando sa Gingharian!