Sila “Nagpadayon Pagsunod sa Kordero”
Sila “Nagpadayon Pagsunod sa Kordero”
“Mao kini sila ang nagpadayon pagsunod sa Kordero bisan asa siya moadto.”—Pin. 14:4.
1. Unsay tinamdan sa tinuod nga mga tinun-an ni Jesus labot sa pagsunod kaniya?
MGA duha ka tuig ug tunga sukad magsugod ang iyang ministeryo, si Jesus “nagtudlo sa publikong katigoman sa Capernaum.” Kay nakugang sa iyang gipamulong, “daghan sa iyang mga tinun-an ang namalik ngadto sa mga butang nga ilang gitalikdan ug wala na molakaw kauban niya.” Sa dihang gipangutana ni Jesus ang iyang 12 ka apostoles kon buot ba usab nilang mobiya, si Simon Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan; ug kami mituo ug nahibalo nga ikaw mao ang Balaang Usa sa Diyos.” (Juan 6:48, 59, 60, 66-69) Ang tinuod nga mga tinun-an ni Jesus wala gayod mohunong sa pagsunod kaniya. Human madihogi sa balaang espiritu, sila padayong nagpagiya kang Jesus.—Buh. 16:7-10.
2. (a) Kinsa “ang matinumanon ug maalamong ulipon,” o “ang matinumanong piniyalan”? (b) Giunsa pagpakita sa ulipon ang maayong panig-ingnan sa “pagsunod sa Kordero”?
2 Komosta ang bahin sa dinihogang mga Kristohanon sa modernong panahon? Sa iyang tagna maylabot sa “ilhanan sa [iyang] presensiya ug sa kataposan sa sistema sa mga butang,” si Jesus nagtawag sa grupo sa iyang dinihogan-sa-espiritu nga mga sumusunod dinhi sa yuta ingong “matinumanon ug maalamong ulipon,” o “matinumanong piniyalan.” (Mat. 24:3, 45; Luc. 12:42) Ingong grupo, gipakita sa ulipong matang ang maayong panig-ingnan sa “pagsunod sa Kordero bisan asa siya moadto.” (Basaha ang Pinadayag 14:4, 5.) Ang mga membro niini nagpabiling putli sa espirituwal nga diwa pinaagi sa dili paghugaw sa ilang kaugalingon sa mga pagtulon-an ug mga buhat sa “Dakong Babilonya,” ang tibuok-kalibotang imperyo sa bakak nga relihiyon. (Pin. 17:5) Walay bakak nga pagtulon-an ang “nakaplagan sa ilang mga baba,” ug sila “walay lama” gikan sa kalibotan ni Satanas. (Juan 15:19) Sa umaabot, ang mga dinihogan nga ania pa sa yuta “mosunod” sa Kordero ngadto sa langit.—Juan 13:36.
3. Nganong hinungdanon nga kita mosalig sa ulipon nga matang?
3 Si Jesus nagtudlo sa matinumanon ug maalamong ulipon “ibabaw sa iyang mga sulugoon sa panimalay,” sa ato pa, ang indibiduwal nga mga membro sa ulipon nga matang, “sa paghatag kanila sa ilang pagkaon sa hustong panahon.” Gitudlo usab niya ang ulipon “ibabaw sa tanan niyang mga kabtangan.” (Mat. 24:45-47) Kini nga “mga kabtangan” naglakip sa nagkadaghan nga “dakong panon” sa “ubang mga karnero.” (Pin. 7:9; Juan 10:16) Dili ba ang indibiduwal nga mga membro sa mga dinihogan ug sa “ubang mga karnero” angayng mosalig sa ulipon nga gitudlo ibabaw kanila? Adunay daghang rason kon nganong takos sa atong pagsalig ang ulipon nga matang. Ang duha ka dagkong rason mao: (1) Si Jehova nagsalig sa ulipon. (2) Si Jesus nagsalig usab sa ulipon. Atong susihon ang ebidensiya nga si Jehova nga Diyos ug si Jesu-Kristo adunay bug-os nga pagsalig sa matinumanon ug maalamong ulipon.
Si Jehova Nagsalig sa Ulipon
4. Nganong makasalig kita sa espirituwal nga pagkaon nga gitagana sa matinumanon ug maalamong ulipon?
4 Tagda kon sa unsang paagi nahimong posible alang sa matinumanon ug maalamong ulipon ang pagtagana sa nunot-sa-panahon ug sustansiyadong espirituwal nga pagkaon. “Ihatag ko kanimo ang hait nga salabotan ug tudloan ko ikaw sa dalan nga imong pagalaktan,” nag-ingon si Jehova. Siya midugang: “Ihatag ko ang tambag nga ang akong mata magatan-aw kanimo.” (Sal. 32:8) Oo, si Jehova nagagiya sa ulipon. Busa kita makasalig gayod sa Kasulatanhong pagsabot ug giya nga gipatin-aw kanato sa ulipon.
5. Unsay nagpakita nga ang espiritu sa Diyos nagalihok diha sa ulipon nga matang?
5 Gipanalanginan usab ni Jehova ang ulipon pinaagi sa iyang balaang espiritu. Bisan tuod ang espiritu ni Jehova dili makita, madayag ang epekto niana diha niadtong gipalihok niana. Hunahunaa kon unsay napalampos sa matinumanon ug maalamong ulipon sa paghatag ug tibuok-kalibotang pagpamatuod bahin kang Jehova nga Diyos, sa iyang Anak, ug sa Gingharian. Ang mga magsisimba ni Jehova aktibong nagmantala sa mensahe sa Gingharian diha sa kapin sa 230 ka kayutaan ug kaislahan. Dili ba pamatuod gayod kana nga ang espiritu sa Diyos nagalihok diha sa ulipon? (Basaha ang Buhat 1:8.) Sa pagtaganag nunot-sa-panahong espirituwal nga pagkaon ngadto sa katawhan ni Jehova sa tibuok yuta, ang ulipon nga matang kinahanglang mohimog hinungdanong mga desisyon. Sa dihang ang ulipon maghimo ug magpatuman niana, sila magpakitag gugma, kalumo, ug uban pang bahin sa bunga sa espiritu.—Gal. 5:22, 23.
6, 7. Unsa ka dako ang pagsalig ni Jehova sa matinumanong ulipon?
6 Aron atong masabtan kon unsa ka dako ang pagsalig ni Jehova sa matinumanong ulipon, palandonga ang iyang gisaad sa mga membro niini. “Ang trompeta motingog,” misulat si apostol Pablo, “ug ang mga patay pagabangonon nga dili-madunoton, ug kita mangausab. Kay kini nga madunot angay magsul-ob ug pagkadili-madunoton, ug kini nga may-kamatayon angay magsul-ob ug pagkawalay-kamatayon.” (1 Cor. 15:52, 53) Ang dinihogang mga sumusunod ni Kristo, nga matinumanong nag-alagad sa Diyos ug namatay diha sa tawhanong lawas nga madunoton, pagabanhawon dili lamang ingong espirituhanong mga linalang nga may kinabuhing walay kataposan. Sila mahimong imortal—mabuhi sa walay kataposan ug dili malaglag. Gawas pa niana, sila makadawat usab ug pagkadili-madunoton, mga lawas nga dili madugta ug dayag nga mabuhi sa kaugalingon. Ang Pinadayag 4:4 nag-ingon nga kining maong mga binanhaw nanglingkod sa mga trono ug nagsul-ob ug mga koronang bulawan. Ang dinihogang mga Kristohanon mahimong mahimayaong mga hari. Apan aduna pay dugang ebidensiya nga ang Diyos nagsalig gayod sa mga dinihogan.
7 “Ang kasal sa Kordero miabot na ug ang iyang asawa nakaandam na sa iyang kaugalingon. Oo, gitugotan siya nga magsul-ob ug magilakon, hinlo, pino nga lino, kay ang pino nga lino naghawas sa matarong nga mga buhat sa mga balaan,” nag-ingon ang Pinadayag 19:7, 8. Gipili ni Jehova ang dinihogang mga Kristohanon nga mahimong umaabot nga pangasaw-onon sa iyang Anak. Pagkadili-madunoton, imortalidad, pagkahalangdon, pangasaw-onon sa Kordero—makapahingangha gayod kana nga mga gasa! Pamatuod gayod kini sa pagsalig sa Diyos sa mga dinihogan, nga “nagpadayon pagsunod sa Kordero bisan asa siya moadto.”
Si Jesus May Pagsalig sa Ulipon
8. Sa unsang paagi gipakita ni Jesus nga siya may pagsalig sa iyang dinihogan-sa-espiritu nga mga sumusunod?
8 Unsay nagpamatuod nga si Jesus may pagsalig gayod sa iyang dinihogan-sa-espiritu nga mga sumusunod? Sa iyang kataposang gabii dinhi sa yuta, si Jesus misaad sa iyang 11 ka matinumanong apostoles. “Kamo mao ang nagpabilin kanako diha sa akong mga pagsulay,” siya miingon kanila, “ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian, aron nga mangaon kamo ug manginom sa akong lamesa diha sa akong gingharian, ug magalingkod sa mga trono aron sa paghukom sa napulog-duha ka tribo sa Israel.” (Luc. 22:28-30) Ang maong pakigsaad nga gihimo ni Jesus uban sa 11 ka apostoles naglakip usab sa tanang membro sa 144,000 ka dinihogang mga Kristohanon. (Luc. 12:32; Pin. 5:9, 10; 14:1) Kon si Jesus walay pagsalig sa mga dinihogan, mohimo kaha siyag pakigsaad kanila nga sila magmando uban kaniya sa Gingharian?
9. Unsay nalakip sa ‘tanang kabtangan’ ni Kristo?
9 Dugang pa, si Jesu-Kristo nagtudlo sa matinumanon ug maalamong ulipon “ibabaw sa tanan niyang mga kabtangan”—ang tanang intereses sa Gingharian dinhi sa yuta. (Mat. 24:47) Kini nga mga kabtangan naglakip sa mga pasilidad sa tibuok-kalibotang hedkuwarter sa mga Saksi ni Jehova, mga sangang buhatan sa lainlaing kayutaan, ug sa mga Assembly Hall ug Kingdom Hall sa tibuok kalibotan. Kini naglakip usab sa buluhatong pagsangyaw sa Gingharian ug paghimog mga tinun-an. Ipiyal ug ipagamit kaha sa usa ang iyang bililhong mga butang ngadto sa usa ka tawo nga wala siyay pagsalig?
10. Unsay nagpakita nga si Jesu-Kristo nagauban sa iyang dinihogang mga sumusunod?
10 Sa dayon niyang saka sa langit, ang nabanhawng si Jesus nagpakita sa iyang matinumanong mga tinun-an ug nagsaad kanila, nga nag-ingon: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mat. 28:20) Gituman ba ni Jesus kining saara? Sa milabayng 15 ka tuig, ang gidaghanon sa mga kongregasyon sa mga Saksi ni Jehova sa tibuok kalibotan misaka gikan sa mga 70,000 ngadto sa kapin sa 100,000—kapig 40 porsiyento nga pag-uswag. Ug pila ka bag-ong mga tinun-an ang nadugang? Duolan sa 4.5 ka milyong tinun-an ang nabawtismohan sa milabayng 15 ka tuig—nga nagpasabot nga may aberids nga kapin sa 800 ang mabawtismohan kada adlaw. Kining kahibulongang pag-uswag klarong nagpamatuod nga si Kristo nagatultol sa iyang dinihogang mga sumusunod diha sa ilang mga tigom sa kongregasyon ug nagapaluyo sa ilang buluhatong paghimog tinun-an.
Ang Ulipon Matinumanon ug Maalamon
11, 12. Sa unsang paagi gipakita sa ulipon nga kini matinumanon ug maalamon?
11 Sanglit si Jehova nga Diyos ug si Jesu-Kristo bug-os nga nagasalig sa matinumanon ug maalamong ulipon, dili ba angay usab kitang mosalig kanila? Sa pagkatinuod, napamatud-an na sa ulipon nga siya kasaligan sa mga buluhaton nga gipiyal kaniya. Pananglitan, mga 130 ka tuig na ang milabay sukad gipatik ang magasing Ang Bantayanang Torre. Ang mga panagkatigom, asembliya, ug mga kombensiyon sa mga Saksi ni Jehova padayong nagpalig-on kanato sa espirituwal nga paagi.
12 Ang matinumanong ulipon maalamon usab sa diwa nga kini wala molihok sa dili-makasaranganong paagi—wala magbuotbuot sa paghimog desisyon ug nagsunod sa pagtultol ni Jehova. Pananglitan, samtang ang mga lider sa bakak nga relihiyon hilom nga nagtugot o dayag nga nagkonsentir sa kahakog ug pagkadili-diyosnon sa mga tawo, ang ulipon naghatag ug mga pasidaan batok sa mga lit-ag sa daotang sistema ni Satanas. Ang ulipon nakahimo sa paghatag ug maalamon ug nunot-sa-panahon nga mga pasidaan tungod kay kini gipanalanginan ni Jehova nga Diyos ug ni Jesu-Kristo. Busa ang ulipon takos gayod sa atong bug-os nga pagsalig. Apan, sa unsang paagi atong ikapakita ang atong pagsalig sa matinumanon ug maalamong ulipon?
‘Uban’ sa Dinihogan Samtang Sila Nagsunod sa Kordero
13. Sumala sa tagna ni Zacarias, sa unsang paagi atong ikapakita ang pagsalig sa matinumanon ug maalamong ulipon?
13 Ang basahon sa Bibliya ni Zacarias naghisgot ug “napulo ka tawo” nga miduol “sa tawo nga usa ka Hudiyo” ug miingon: “Mouban kami kaninyo.” (Basaha ang Zacarias 8:23.) Sanglit ang “tawo nga usa ka Hudiyo” gihisgotan man nga “kaninyo,” kini nagtumong sa usa ka grupo sa mga tawo. Sa atong panahon, kini naghawas sa nanghibilin sa dinihogan-sa-espiritu nga mga Kristohanon—nga bahin sa “Israel sa Diyos.” (Gal. 6:16) Ang “napulo ka tawo gikan sa tanang pinulongan sa mga nasod” naghawas sa dakong panon sa ubang mga karnero. Maingon nga ang dinihogang mga Kristohanon nagsunod kang Jesus bisan asa siya moadto, ang dakong panon usab “mouban,” o mokuyog, sa matinumanon ug maalamong ulipon. Ang mga membro sa dakong panon dili gayod angayng maulaw sa pagpaila sa ilang kaugalingon ingong kauban sa “mga mag-aambit sa langitnong pagtawag.” (Heb. 3:1) Wala ikaulaw ni Jesus ang pagtawag sa mga dinihogan nga “mga igsoon.”—Heb. 2:11.
14. Sa unsang paagi maunongon natong mapaluyohan ang mga igsoon ni Kristo?
14 Si Jesu-Kristo nag-isip sa atong maunongong pagpaluyo sa iyang mga igsoon ingong atong pagpaluyo kaniya. (Basaha ang Mateo 25:40.) Nan, sa unsang paagi mapaluyohan niadtong may yutan-ong paglaom ang dinihogan-sa-espiritu nga mga igsoon ni Kristo? Ang pangunang paagi mao ang pagtabang kanila sa pagsangyaw sa Gingharian. (Mat. 24:14; Juan 14:12) Samtang nagkadiyutay ang mga dinihogan sa yuta sa milabayng mga dekada, ang ubang mga karnero nagkadaghan. Kon kadtong adunay yutan-ong paglaom makigbahin sa buluhatong pagsangyaw, nga mag-alagad ingong bug-os-panahong mga ebanghelisador kon posible, ilang mapaluyohan ang mga dinihogan sa pagtuman sa ilang asaynment nga paghimog tinun-an. (Mat. 28:19, 20) Dili usab nato palabyon ang mga kahigayonan nga mapaluyohan kining buluhatona pinaagi sa paghatag ug mga amot sa lainlaing paagi.
15. Unsay angayng panglantaw sa matag Kristohanon sa nunot-sa-panahon nga espirituwal nga pagkaon gikan sa ulipon ug sa mga desisyon maylabot sa organisasyon nga gihimo niana?
15 Ingong indibiduwal nga mga Kristohanon, giunsa nato paglantaw ang nunot-sa-panahon nga espirituwal nga pagkaon nga gitagana sa matinumanong ulipon pinaagi sa gibase-sa-Bibliya nga mga publikasyon ug pinaagi sa atong mga panagkatigom? Kita ba mapasalamatong nagpahimulos niana ug nagpadapat dayon sa atong nakat-onan gikan niana? Unsay atong panglantaw sa mga desisyon nga gihimo sa ulipon maylabot sa organisasyon? Ang atong pagkaandam mosunod sa ilang direksiyon magpamatuod nga kita adunay pagsalig sa kahikayan ni Jehova.—Sant. 3:17.
16. Nganong angayng patalinghogan sa tanang Kristohanon ang mga igsoon ni Kristo?
16 “Ang akong mga karnero magapatalinghog sa akong tingog,” matod ni Jesus, “ug ako nakaila kanila, ug sila magasunod kanako.” (Juan 10:27) Mao kana ang gihimo sa dinihogang mga Kristohanon. Komosta kadtong “mouban” kanila? Sila kinahanglang magpatalinghog kang Jesus. Kinahanglan usab silang magpatalinghog sa mga igsoon ni Jesus. Kon buot hunahunaon, ang ulipon nga matang mao ang gipiyalan sa pag-atiman sa espirituwal nga kaayohan sa katawhan sa Diyos. Unsay nalangkit sa pagpatalinghog sa tingog sa mga igsoon ni Kristo?
17. Unsay nalangkit sa pagpatalinghog sa ulipon nga matang?
17 Ang matinumanon ug maalamong ulipon karon gihawasan sa Nagamandong Lawas, nga maoy nanguna ug nagdumala sa buluhatong pagsangyaw sa Gingharian sa tibuok yuta. Ang mga membro sa Nagamandong Lawas maoy mga eksperyensiyado, dinihogan-sa-espiritu nga mga ansiyano. Sila ang pangunang gihubit ingong “nagapanguna” kanato. (Heb. 13:7) Sa pag-atiman sa kapig 7,000,000 ka magmamantala sa Gingharian sa tibuok kalibotan diha sa kapin sa 100,000 ka kongregasyon, kining dinihogan nga mga magtatan-aw “puliki . . . sa buluhaton sa Ginoo.” (1 Cor. 15:58) Ang pagpatalinghog sa ulipon nga matang nagpasabot nga kita bug-os makigkooperar sa Nagamandong Lawas niini.
Ang Nagapatalinghog sa Ulipon Panalanginan
18, 19. (a) Sa unsang paagi gipanalanginan kadtong nagapatalinghog sa matinumanon ug maalamong ulipon? (b) Unsay atong determinadong himoon?
18 Sukad sa pagkatudlo niini, ang matinumanon ug maalamong ulipon “nagpadangat sa daghan ngadto sa pagkamatarong.” (Dan. 12:3) Kini naglakip niadtong adunay paglaom nga makalabang buhi sa kalaglagan niining daotang sistema sa mga butang. Talagsaon gayong panalangin ang pagkabaton ug maayong baroganan atubangan sa Diyos!
19 Sa umaabot, sa dihang ‘ang balaang siyudad, ang Bag-ong Jerusalem [nga gilangkoban ug 144,000] manaog gikan sa langit gikan sa Diyos, nga giandam ingong usa ka pangasaw-onon nga gidayandayanan alang sa iyang bana,’ unsay matagamtaman niadtong nagpatalinghog sa tingog sa ulipon? “Ang Diyos makig-uban kanila,” nag-ingon ang Bibliya. “Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pin. 21:2-4) Busa, magpatalinghog gayod kita kang Kristo ug sa iyang kasaligan ug dinihogan-sa-espiritu nga mga igsoon.
Unsay Imong Nakat-onan?
• Unsay nagpamatuod nga si Jehova may pagsalig sa matinumanon ug maalamong ulipon?
• Unsay nagpakita nga bug-os ang pagsalig ni Jesu-Kristo sa ulipon nga matang?
• Nganong takos sa atong pagsalig ang matinumanong piniyalan?
• Sa unsang paagi atong ipakita ang atong pagsalig sa ulipon?
[Mga Pangutana sa Pagtuon]
[Hulagway sa panid 25]
Nahibalo ka ba kon kinsay gipili ni Jehova nga mahimong umaabot nga pangasaw-onon sa iyang Anak?
[Mga hulagway sa panid 26]
Gipiyal ni Jesu-Kristo sa matinumanon ug maalamong ulipon ang iyang “mga kabtangan”
[Hulagway sa panid 27]
Kon kita makigbahin sa buluhatong pagsangyaw, kita nagpaluyo sa mga dinihogan