Tugoti ang Pulong ni Jesus nga Mag-impluwensiya Kanimo
Tugoti ang Pulong ni Jesus nga Mag-impluwensiya Kanimo
“Ang usa nga gipadala sa Diyos magasulti sa mga pulong sa Diyos.”—JUAN 3:34.
1, 2. Sa unsa ikatandi ang gipamulong ni Jesus diha sa Wali sa Bukid, ug nganong makaingon kita nga kini gipasukad sa “mga pulong sa Diyos”?
ANG usa sa kinadak-ang mga brilyante nga nailhan karon mao ang 530-karat nga Star of Africa. Usa gayod kana ka bililhon nga mutya! Apan, labaw pa ka bililhon ang espirituwal nga mga mutya nga makita diha sa Wali sa Bukid ni Jesus. Dili kana ikatingala kay ang gipamulong ni Kristo naggikan man kang Jehova! Naghisgot bahin kang Jesus, ang Bibliya nag-ingon: “Ang usa nga gipadala sa Diyos magasulti sa mga pulong sa Diyos.”—Juan 3:34-36.
2 Bisan tuod ang Wali sa Bukid wala tingali dangtig tunga sa oras, kini adunay 21 ka pangutlo gikan sa walo ka basahon sa Hebreohanong Kasulatan. Busa kini lig-ong gipasukad sa “pulong sa Diyos.” Susihon nato karon kon sa unsang paagi atong ikapadapat ang pipila sa daghang bililhong mga pulong nga makita niining maanindot nga wali sa pinalanggang Anak sa Diyos.
“Pakigdait Una sa Imong Igsoon”
3. Human pasidan-i ang iyang mga tinun-an bahin sa mga epekto sa kayugot, unsang tambag ang gihatag ni Jesus?
3 Ingong mga Kristohanon, kita malipayon ug makigdaiton tungod kay atong nabatonan ang balaang espiritu sa Diyos, ug ang bunga niini naglakip sa kalipay ug pakigdait. (Gal. 5:22, 23) Dili buot ni Jesus nga ang iyang mga tinun-an mawad-ag kalinaw ug kalipay, busa gipasidan-an niya sila bahin sa makamatayng mga epekto sa paghambin ug kayugot. (Basaha ang Mateo 5:21, 22.) Dayon siya miingon: “Nan, kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa.”—Mat. 5:23, 24.
4, 5. (a) Unsa ang “gasa” nga gihisgotan ni Jesus diha sa Mateo 5:23, 24? (b) Unsa ka hinungdanon ang pagpakigdait sa nasilo nga igsoon?
4 Ang “gasa” nga gihisgotan ni Jesus nagtumong sa bisan unsang halad nga itanyag diha sa templo sa Jerusalem. Pananglitan, ang halad nga mga mananap hinungdanon tungod kay niadtong panahona bahin kana sa pagsimba kang Jehova. Apan, gipasiugda ni Jesus kon unsay mas hinungdanon—ang pagpakigdait sa nasilo nga igsoon sa dili pa itanyag ang gasa ngadto sa Diyos.
5 Ang ‘pagpakigdait’ nagpasabot ug ‘pagpakig-uli.’ Busa, unsay atong makat-onan sa gipamulong ni Jesus? Atong makat-onan dinhi nga ang atong pagpakiglabot sa uban makaapektar gayod sa atong relasyon kang Jehova. (1 Juan 4:20) Sa pagkatinuod, ang mga halad nga gitanyag ngadto sa Diyos sa karaang panahon kawang lamang kon ang naghalad wala magtratar sa iyang isigkatawo sa hustong paagi.—Basaha ang Miqueas 6:6-8.
Ang Pagpaubos Hinungdanon
6, 7. Nganong gikinahanglan ang pagpaubos sa dihang maningkamot sa pagpakig-uli sa igsoon nga nasilo kanato?
6 Ang pagpakigdait sa nasilo nga igsoon lagmit magsulay sa atong pagkamapaubsanon. Ang mga tawong mapaubsanon dili makiglalis o makig-away sa ilang isigkamagtutuo aron lang pamatud-an ang ila konohayng katungod. Makapatungha kana ug dili maayong kahimtang—susama niadtong naglungtad taliwala sa mga Kristohanon sa karaang Corinto. Mahitungod niana, si apostol Pablo miingon: “Kini nagkahulogan ug bug-os nga kaparotan alang kaninyo nga kamo nagkinihaay sa usag usa. Nganong dili hinuon ninyo tugotan nga kamo mabuhatan ug sayop? Nganong dili hinuon ninyo pasagdan nga kamo matikasan?”—1 Cor. 6:7.
7 Wala mag-ingon si Jesus nga moadto kita sa atong igsoon aron lang kombinsihon siya nga kita husto ug siya sayop. Angay nga ang atong tumong mao ang pagpakig-uli. Aron motunhay ang pakigdait, kinahanglang matinud-anon natong ipahayag ang atong gibati. Kinahanglan usab nga atong ilhon nga nahiubos ang maong igsoon. Ug kon nasayop kita, buot gayod nato nga mangayog pasaylo sa mapaubsanong paagi.
‘Kon ang Imong Tuong Mata Makapandol Nimo’
8. Isulti ang diwa sa giingon ni Jesus sa Mateo 5:29, 30.
8 Sa iyang Wali sa Bukid, si Jesus naghatag ug maayong tambag bahin sa moralidad. Nahibalo siya nga ang atong dili-hingpit nga mga sangkap sa lawas hayan makadaot kanato. Busa si Jesus miingon: “Karon, kon kanang imong tuo nga mata nagapapandol kanimo, lusoka kini ug isalibay kini gikan kanimo. Kay mas makaayo pa kanimo nga mawad-an sa usa sa imong mga sangkap kay sa itambog ang imong tibuok nga lawas ngadto sa Gehenna. Mao man usab, kon ang imong tuong kamot nagapapandol kanimo, putla kini ug isalibay kini gikan kanimo. Kay mas makaayo kanimo nga mawad-an sa usa sa imong mga sangkap kay sa mahidangat ang imong tibuok nga lawas sa Gehenna.”—Mat. 5:29, 30.
9. Sa unsang paagi ang atong “mata” o “kamot” ‘makapandol’ kanato?
9 Ang “mata” nga gihisgotan ni Jesus naghawas sa gahom o katakos sa pagsentro sa atong pagtagad sa usa ka butang, ug ang “kamot” nalangkit sa kon unsay atong mahimo pinaagi sa atong mga kamot. Kon dili kita magbantay, kini nga mga sangkap mahimong ‘makapandol’ kanato ug makapugong kanato sa ‘paglakaw uban sa Diyos.’ (Gen. 5:22; 6:9) Nan, sa dihang tentalon sa pagsupak kang Jehova, kita kinahanglang mohimog puwersadong aksiyon, nga sa mahulagwayon maglusok sa atong mata o magputol sa atong kamot.
10, 11. Unsay makatabang kanato sa paglikay sa seksuwal nga imoralidad?
10 Sa unsang paagi atong mapugngan ang atong mata sa pagtan-aw sa imoral nga mga butang? “Ako mihimog pakigsaad sa akong mga mata,” miingon ang mahinadlokon-sa-Diyos nga si Job. “Nan unsaon ko man pagtan-aw nga maibogon sa usa ka ulay?” (Job 31:1) Si Job usa ka minyong tawo nga determinadong dili molapas sa moral nga mga balaod sa Diyos. Angay nga mao kanay atong tinamdan, kita man minyo o dili. Aron malikayan ang seksuwal nga imoralidad, kinahanglang magiyahan kita sa balaang espiritu sa Diyos, nga magpatunghag pagpugong-sa-kaugalingon niadtong nahigugma sa Diyos.—Gal. 5:22-25.
11 Aron malikayan ang seksuwal nga imoralidad, maayong pangutan-on nato ang atong kaugalingon, ‘Ako bang gitugotan ang akong mga mata nga mopukaw sa akong gana alang sa imoral nga mga butang nga daling makita diha sa mga basahon, telebisyon, o sa Internet?’ Hinumdoman usab nato ang giingon sa tinun-an nga si Santiago: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha. Unya ang tinguha, sa dihang kini makapanamkon na, manganak ug sala; unya, ang sala, sa dihang kini mahingpit na, manganak ug kamatayon.” (Sant. 1:14, 15) Sa pagkatinuod, kon si bisan kinsa nga napahinungod ngadto sa Diyos “magpadayon sa pagtan-aw” sa usa ka kaatbang sa sekso uban ang imoral nga motibo, kinahanglang mohimo siyag kusganong aksiyon nga daw iyang gilusok ang iyang mata ug gisalibay kana.—Basaha ang Mateo 5:27, 28.
12. Unsang tambag ni Pablo ang makatabang kanato sa pagpakigbugno batok sa imoral nga mga tinguha?
12 Tungod kay ang dili hustong paggamit sa atong mga kamot mahimong moresulta sa grabeng paglapas sa moral nga mga sukdanan ni Jehova, kinahanglang determinado gayod kita nga magpabiling hinlo sa moral. Busa, angay natong patalinghogan ang tambag ni Pablo: “Patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog, nga maoy idolatriya.” (Col. 3:5) Ang pulong “patya” nagpasiugda kon unsa ka kusganon ang aksiyon nga angay natong himoon aron makapakigbugno batok sa imoral nga unodnong mga tinguha.
13, 14. Nganong hinungdanon ang paglikay sa imoral nga mga hunahuna ug buhat?
13 Aron maluwas ang iyang kinabuhi, ang usa ka tawo lagmit andam nga magpaputol sa iyang tiil o bukton. Ang mahulagwayong ‘pagsalibay’ sa mata ug kamot hinungdanon aron malikayan ang imoral nga hunahuna ug mga buhat nga makadaot sa atong espirituwalidad. Ang pagpabiling hinlo sa mental, moral, ug espirituwal mao lamang ang paagi nga makaikyas sa walay-kataposang kalaglagan nga gisimbolohan sa Gehenna.
14 Tungod sa napanunod nga sala ug pagkadili-hingpit, gikinahanglan ang pagpanglimbasog aron makapabiling hinlo sa moral. “Ako nagmakmak sa akong lawas ug naghimo niini nga samag ulipon,” miingon si Pablo, “aron, human ako makawali sa uban, ako dili sa unsa mang paagi mahimong dili-inuyonan.” (1 Cor. 9:27) Busa magmadeterminado kita sa pagpadapat sa tambag ni Jesus bahin sa moralidad, nga dili gayod tugotan ang atong kaugalingon nga mogawi sa mga paagi nga nagpakitag pagkaingrato sa iyang halad lukat.—Mat. 20:28; Heb. 6:4-6.
“Batasana ang Paghatag”
15, 16. (a) Sa unsang paagi si Jesus nagpakitag panig-ingnan sa paghatag? (b) Unsay gipasabot sa giingon ni Jesus sa Lucas 6:38?
15 Ang pulong ni Jesus ug ang iyang maa yo kaayong ehemplo magpalambo sa espiritu sa pagkamanggihatagon. Siya nagpasundayag ug talagsaong pagkamanggihatagon sa pag-anhi sa yuta alang sa kaayohan sa dili-hingpit nga katawhan. (Basaha ang 2 Corinto 8:9.) Si Jesus kinabubut-ong mibiya sa iyang langitnong himaya aron mahimong tawo ug ihatag ang iyang kinabuhi alang sa makasasalang katawhan, nga ang uban kanila makabaton ug bahandi didto sa langit ingong iyang kaubang mga manununod sa Gingharian. (Roma 8:16, 17) Ug si Jesus nag-awhag gayod nga magmanggihatagon sa dihang siya miingon:
16 “Batasana ang paghatag, ug pagahatagan kamo sa mga tawo. Ibubo nila sa inyong sabakan ang usa ka maayong takos, dinasok, tinantan ug nagaawas. Kay sa sukod nga inyong ginasukod, sila magasukod nganha kaninyo ingong balos.” (Luc. 6:38) Ang ‘pagbubo diha sa sabakan’ nagtumong sa kostumbre sa pipila ka tigbaligya sa pagpuno sa gipormag-puyo nga pang-ibabaw nga besti sa namalit. Ang atong kinabubut-ong paghatag mahimong moresulta sa atong pagdawat ug maayong balos, tingali sa dihang kita manginahanglan.—Eccl. 11:2.
17. Sa unsang paagi si Jehova nagpakita sa labing-maayong panig-ingnan sa paghatag, ug unsang matanga sa paghatag ang makapalipay kanato?
17 Si Jehova nahigugma ug nagaganti niadtong malipayong nagahatag. Siya mismo nagpakita sa labing-maayong panig-ingnan, nga naghatag sa iyang bugtong Anak “aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Si Pablo misulat: “Siya nga nagapugas nga madagayaon magaani usab nga madagayaon. Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Cor. 9:6, 7) Ang paghatag sa atong panahon, kusog, ug materyal nga kahinguhaan aron sa pagpalambo sa matuod nga pagsimba seguradong maghatag kanatog kalipay ug dagayang mga ganti.—Basaha ang Proverbio 19:17; Lucas 16:9.
“Ayaw Paghuyop ug Trompeta sa Imong Unahan”
18. Ubos sa unsang mga sirkumstansiya nga kita “walay ganti” gikan sa atong langitnong Amahan?
18 “Pag-amping nga dili buhaton ang inyong pagkamatarong atubangan sa mga tawo aron makita nila; kay sa ingon niana kamo walay ganti gikan sa inyong Amahan nga anaa sa mga langit.” (Mat. 6:1) Ang gitumong ni Jesus sa pulong “pagkamatarong” mao ang panggawi nga nahiuyon sa kabubut-on sa Diyos. Wala kana magpasabot nga ang diyosnong mga buhat dili gayod angayng himoon sa publiko, kay giingnan ni Jesus ang iyang mga tinun-an nga ‘palamdagon ang ilang kahayag atubangan sa mga tawo.’ (Mat. 5:14-16) Apan kon atong buhaton ang mga butang “aron makita” ug dayegon, nga sama kitag mga artista diha sa entablado sa teatro, kita “walay ganti” gikan sa atong langitnong Amahan. Kon mao kanay atong motibo, dili nato mabatonan ang suod nga relasyon sa Diyos o ang walay-kataposang mga panalangin ubos sa pagmando sa Gingharian.
19, 20. (a) Unsay gipasabot ni Jesus sa dihang gisaway niya ang ‘paghuyop ug trompeta’ sa dihang naghimog “mga gasa sa kaluoy”? (b) Sa unsang paagi dili nato pahibaloon ang wala nga kamot sa gibuhat sa tuo nga kamot?
19 Kon kita adunay hustong tinamdan, atong sundon ang tambag ni Jesus: “Busa sa dihang ikaw magahimog mga gasa sa kaluoy, ayaw paghuyop ug trompeta sa imong unahan, ingon sa ginabuhat sa mga salingkapaw diha sa mga sinagoga ug sa kadalanan, aron himayaon sila sa mga tawo. Sa pagkatinuod ako magaingon kaninyo, Sila nakabaton na sa ilang bug-os nga ganti.” (Mat. 6:2) Ang “mga gasa sa kaluoy” maoy mga donasyon nga gihimo aron sa pagtabang sa mga kabos. (Basaha ang Isaias 58:6, 7.) Si Jesus ug ang iyang mga apostoles may pondong salapi nga magamit sa pagtabang sa mga kabos. (Juan 12:5-8; 13:29) Sanglit ang pagpanghatag ngadto sa mga kabos dili literal nga ipahibalo pinaagi sa paghuyop ug trompeta, dayag nga gigamit ni Jesus ang pagpasobra o hyperbole, sa dihang siya miingon nga kita dili angayng ‘maghuyop ug trompeta’ sa dihang manghatag ug “mga gasa sa kaluoy.” Dili nato angayng ibandilyo ang maong pagpanghatag, sama sa gibuhat sa Hudiyong mga Pariseo. Gitawag sila ni Jesus ug mga salingkapaw tungod kay ilang gianunsiyo ang ilang mga donasyon “diha sa mga sinagoga ug sa kadalanan.” Ang maong mga salingkapaw “nakabaton na sa ilang bug-os nga ganti.” Ang pagdayeg kanila sa mga tawo ug lagmit ang paglingkod sa atubangan sa sinagoga kauban sa inilang mga rabbi mao lang ang ganti nga ilang madawat, kay walay ihatag si Jehova kanila. (Mat. 23:6) Apan, sa unsang paagi angayng molihok ang mga tinun-an ni Kristo? Giingnan sila ni Jesus—maingon man usab kita:
20 “Apan ikaw, sa dihang magahimog mga gasa sa kaluoy, ayaw pahibaloa ang imong wala nga kamot kon unsay ginabuhat sa imong tuo, aron matago ang imong mga gasa sa kaluoy; unya ang imong Amahan nga nagatan-aw sa tago magabalos kanimo.” (Mat. 6:3, 4) Ang atong duha ka kamot sagad magtinabangay. Busa, ang dili pagpahibalo sa wala nga kamot kon unsay ginabuhat sa tuo nagpasabot nga dili nato ianunsiyo ang atong pagpanghatag sa mga kabos, bisan ngadto sa mga suod kanato maingon nga ang wala nga kamot duol ra sa tuo.
21. Unsay nalakip sa balos nga ihatag sa Usa nga “nagatan-aw sa tago”?
21 Kon dili nato ipasigarbo ang atong pagpanghatag sa uban, ang atong “mga gasa sa kaluoy” gihimo sa tago. Nan ang atong Amahan, “nga nagatan-aw sa tago,” magabalos kanato. Ang atong langitnong Amahan nga nagpuyo sa mga langit ug dili makita sa mga tawo, nagpabilin “sa tago” gikan sa mga tawo. (Juan 1:18) Ang balos gikan sa usa nga “nagatan-aw sa tago” naglakip sa pagdala ni Jehova kanato ngadto sa suod nga relasyon kaniya, pagpasaylo sa atong mga sala, ug paghatag kanato ug kinabuhing dayon. (Prov. 3:32; Juan 17:3; Efe. 1:7) Mas maayo gayod kana kay sa pagdayeg gikan sa mga tawo!
Bililhong mga Pulong nga Angayng Pakamahalon
22, 23. Nganong angay natong pakamahalon ang pulong ni Jesus?
22 Ang Wali sa Bukid tugob gayod sa espirituwal nga mga mutya nga daghag maanindot nga bahin. Sa walay duhaduha naundan kini ug bililhong mga pulong nga makahatag kanatog kalipay niining gubot nga kalibotan. Oo, magmalipayon kita kon atong pakamahalon ang pulong ni Jesus ug tugotan kana nga mag-impluwensiya sa atong tinamdan ug paagi sa pagkinabuhi.
23 Pagapanalanginan ang tanan nga “magapatalinghog” ug “magabuhat” sa gitudlo ni Jesus. (Basaha ang Mateo 7:24, 25.) Busa magmadeterminado kita sa pagsunod sa tambag ni Jesus. Ang uban pa niyang gipamulong sa Wali sa Bukid pagahisgotan sa kataposang artikulo niining seryeha.
Unsay Imong Tubag?
• Nganong hinungdanon nga makigdait kita sa igsoon nga nasilo?
• Sa unsang paagi nato malikayan nga mapandol sa atong “tuo nga mata”?
• Unsay angay natong tinamdan sa pagpanghatag?
[Mga Pangutana sa Pagtuon]
[Hulagway sa panid 11]
Pagkamaayo nga ‘makigdait’ sa usa ka isigkamagtutuo nga nasilo!
[Mga hulagway sa panid 12, 13]
Si Jehova nagapanalangin niadtong malipayong nagahatag