Sa Unsang Paagi Ikaw Makalahutay Diha sa Ministeryo?

MIBATI ka na ba sukad ug hilabihang kakapoy ug kahigawad nga gusto na nimong mohunong sa pagsangyaw? Ang grabeng pagsupak, kabalaka, dili-maayong panglawas, pagpit-os sa mga higala, o ang kakulang sa pagsanong sa atong gisangyawan mahimong magsulay sa atong pagkamalahutayon. Apan, hunahunaa ang panig-ingnan ni Jesus. Siya nakalahutay sa kinagrabehang mga pagsulay “tungod sa kalipay nga gibutang sa iyang atubangan.” (Heb. 12:2) Nahibalo siya nga pinaagi sa pagpamatuod nga bakak gayod ang mga sumbong batok sa Diyos, iyang mapalipay ang kasingkasing ni Jehova.—Prov. 27:11.

Pinaagi sa paglahutay diha sa ministeryo, mapalipay usab nimo ang kasingkasing ni Jehova. Apan, komosta na man kon morag wala ka nay kusog sa pagsangyaw tungod sa mga kababagan? Si Krystyna, kinsa tigulang na ug masakiton, nag-ingon: “Kasagaran mobati kog kakapoy ug kaguoI. Ang akong mga suliran nga dala sa pagkatigulang, sama sa dili-maayong panglawas ug mga kabalaka bahin sa adlaw-adlawng pagkinabuhi, usahay makawala sa akong kadasig.” Sa unsang paagi ikaw makalahutay sa ministeryo bisan pa sa maong mga kababagan?

Sundoga ang mga Manalagna

Aron makalahutay diha sa buluhatong pagsangyaw, mahimong paningkamotan sa matinumanong mga magmamantala sa Gingharian nga sundogon ang tinamdan sa karaang mga manalagna. Pananglitan, tagda si Jeremias. Sa dihang gitawag aron moalagad ingong manalagna, siya nagduhaduha sa sinugdan. Bisan pa niana, si Jeremias nakalahutay sa iyang malisod nga asaynment sulod sa kapig 40 ka tuig tungod kay siya bug-os nga misalig sa Diyos.—Jer. 1:6; 20:7-11.

Si Henryk nadasig sa panig-ingnan ni Jeremias. Siya miingon: “Sulod sa kapin sa 70 ka tuig diha sa ministeryo, usahay maluya ako tungod sa reaksiyon sa mga tawo—ang ilang pagsupak o kawalay-interes. Nianang mga panahona, akong pahinumdoman ang akong kaugalingon sa panig-ingnan ni Jeremias. Ang iyang gugma alang kang Jehova ug ang iyang lig-ong espirituwalidad nagpalig-on kaniya sa pagpadayon ingong manalagna.” (Jer. 1:17) Si Rafał usab nadasig sa panig-ingnan ni Jeremias. Siya miingon: “Inay maghunahuna lamang sa iyang kaugalingon ug sa iyang pagbati, si Jeremias misalig sa Diyos. Siya maisogong nagpadayon bisan pag daghan ang nasuko kaniya. Kanunay nako kanang hinumdoman.”

Ang laing manalagna kansang panig-ingnan nakatabang sa daghan sa paglahutay diha sa ministeryo mao si Isaias. Gisultihan siya sa Diyos nga ang iyang mga tagilungsod dili mamati kaniya. “Himoa nga dili-madinawaton ang kasingkasing niini nga katawhan, ug himoa nga dili makadungog ang ilang mga dalunggan,” nag-ingon si Jehova. Mapakyas ba si Isaias? Sa panglantaw sa Diyos, dili gayod siya mapakyas! Sa dihang siya gitudlo ingong manalagna, siya miingon: “Ania ako! Ipadala ako.” (Isa. 6:8-10) Si Isaias wala mohunong sa iyang buluhaton. Mao ba usab kana ang imong sanong sa sugo nga magsangyaw?

Aron makalahutay diha sa ministeryo bisan pa sa kawalay-interes sa mga tawo, sama sa gihimo ni Isaias, kinahanglang dili ra kaayo nato hunahunaon ang negatibong reaksiyon sa mga tawo sa atong mensahe. Si Rafal nakasagubang sa kahigawad niining paagiha: “Akong gipaningkamotan nga dili kanunayng hunahunaon ang masakit nga mga komento. Ang mga tawo diha sa akong teritoryo may katungod sa pagsulti sa bisan unsa nga ilang gusto.” Si Anna midugang: “Ako naningkamot nga dili magsigeg hunahuna sa mga butang nga masakit o makapahigawad. Ang nakatabang kanako sa pagbuhat niana mao ang pag-ampo ug ang pagkonsiderar sa inadlawng teksto una ako mosangyaw. Kana makawagtang dayon sa negatibong mga hunahuna.”

Si manalagnang Ezequiel nag-alagad taliwala sa  masukihong mga Hudiyo nga nabihag sa Babilonya. (Ezeq. 2:6) Kon ang manalagna wala mosulti sa pulong sa Diyos ngadto sa mga tawo ug unya dihay namatay nga daotan nga wala makadungog sa maong pasidaan, si Ezequiel maoy manubag sa kamatayon sa maong tawo. Giingnan ni Jehova si Ezequiel: “Ang iyang dugo paninglon ko gikan sa imong kamot.”—Ezeq. 3:17, 18.

Naningkamot si Henryk nga mabatonan ang panglantaw ni Ezequiel: “Buot kong mahimong hinlo gikan sa dugo sa tanang tawo. Nagdepende niini ang bililhong kinabuhi sa mga tawo.” (Buh. 20:26, 27) Mao usab kanay pagbati ni Zbigniew: “Si Ezequiel kinahanglang magpadayon bisag unsa pay gihunahuna sa uban. Kini nagtabang kanako sa paglantaw sa buluhatong pagsangyaw sama sa panglantaw sa Maglalalang.”

Wala Ka Mag-inusara

Wala ka mag-inusara sa dihang ikaw magsangyaw. Sama kang apostol Pablo, kita makaingon: “Kami mga isigkamagbubuhat sa Diyos.” (1 Cor. 3:9) Si Krystyna, kinsa miangkon nga may panahong mobati siyag kaguol, nag-ingon: “Kanay hinungdan nga kanunay akong mohangyo kang Jehova nga unta iya kong lig-onon. Wala gayod siya magpakyas kanako.” Oo, gikinahanglan nato ang espiritu sa Diyos sa pagtabang kanato diha sa atong ministeryo!—Zac. 4:6.

Sa dihang kita nagasangyaw, ang balaang espiritu nagatabang usab kanato sa pagpasundayag sa mga hiyas nga naglangkob sa “bunga sa espiritu.” (Gal. 5:22, 23) Kana, sa baylo, makatabang kanato sa paglahutay sa pagsangyaw, bisan unsa pay mahitabo. Si Henryk nakaobserbar: “Ang pagsangyaw diha sa kanataran nakatabang kanako sa pagpauswag sa akong personalidad. Nakakat-on ako sa pagpailob ug pagpakitag konsiderasyon ug sa paglahutay.” Ang paglahutay diha sa ministeryo bisan pa sa lainlaing kababagan makatabang kanimo nga mas maugmad ang bunga sa espiritu.

Sa pagtultol niining talagsaong buluhaton, gigamit ni Jehova ang iyang mga manulonda. (Pin. 14:6) Gipakita sa Bibliya nga adunay “tinagpulo ka libo ka tinagpulo ka libo ug linibo ka libo” ka manulonda. (Pin. 5:11) Ubos sa pagtultol ni Jesus, ang mga manulonda nagatabang sa mga alagad sa Diyos sa yuta. Imo ba kanang ginahunahuna sa dihang ikaw magsangyaw?

“Ang pagpamalandong sa kamatuoran nga ang mga manulonda nagauban kanato diha sa ministeryo nakapadasig gayod kanako,” matod ni Anna. “Akong gipabilhan ang tabang nga ilang gitagana ubos sa pagtultol ni Jehova ug ni Jesus.” Pagkadakong pribilehiyo nga makauban sa buluhaton ang matinumanong mga manulonda!

Sa unsang paagi makatabang kanato ang atong mga isigkamagmamantala? Kita gipanalanginan nga makauban ang dakong panon sa matinumanong mga Saksi. Walay duhaduha nga imong naeksperyensiyahan nga tinuod ang giingon sa usa ka sanglitanan sa Bibliya: “Pinaagi sa puthaw, ang puthaw mapahait. Mao man usab ang usa ka tawo makapahait sa nawong sa laing tawo.”—Prov. 27:17.

Ang pagsangyaw uban sa mga igsoon maghatag kanatog talagsaong kahigayonan sa pagpaniid sa epektibong mga pamaagi nga lagmit bag-o alang kanato. Si Elżbieta nag-ingon: “Ang pagsangyaw uban sa lainlaing mga igsoon naghatag kanakog kahigayonan sa pagpakitag gugma sa akong mga isigkamagtutuo ug sa mga tawo nga among mahimamat.” Sulayi ang pagsangyaw uban sa lainlaing magmamantala. Kini makatabang kanimo nga magmalipayon sa imong ministeryo.

Atimana ang Imong Kaugalingon

Aron dili mawala ang atong kadasig sa ministeryo, kita kinahanglang mohimog maayong plano, magbaton ug maayong rutina sa personal nga pagtuon, ug maggahin ug igong panahon sa pagpahulay. Sa laing pagkasulti, atong atimanon ang atong espirituwalidad ug ang atong panglawas.

Ang Bibliya nag-ingon: “Ang mga plano sa kugihan mosangpot gayod sa kaayohan.” (Prov. 21:5) Si Zygmunt, nga 88 anyos na, miingon: “Ang pagbaton ug maayong eskedyul nakatabang kanako nga makab-ot ang akong mga tumong. Giayo nako pag-organisar ang akong eskedyul aron aduna akoy igong panahon diha sa ministeryo.”

Ang tukma ug lalom nga kahibalo sa Kasulatan maglig-on ug magsangkap kanato diha sa ministeryo. Maingon nga kinahanglan kitang mokaon aron mabuhi, kita usab kinahanglang regular nga mokaon sa espirituwal nga pagkaon aron makapadayon kita sa pagsangyaw. Ang adlaw-adlaw nga pagbasa sa Pulong sa Diyos ug pagpahimulos sa “pagkaon sa hustong panahon” makahatag kanatog kusog diha sa ministeryo.—Mat. 24:45-47.

 Si Elżbieta mihimog dagkong kausaban sa iyang paagi sa kinabuhi aron mouswag ang iyang ministeryo. Siya miingon: “Akong gimenosan ang panahon sa pagtan-awg telebisyon aron mas daghan akog panahon sa pag-andam sa ministeryo. Sa dihang akong basahon ang Bibliya kada gabii, akong hunahunaon ang mga tawo nga akong nahimamat diha sa teritoryo. Mangita akog mga teksto ug mga artikulo nga makatabang kanila.”

Ang igong pahulay makatabang kanimo nga dili daling maluya ug bug-os nga makaambit diha sa ministeryo. Sa laing bahin, ang paggugol ug dakong panahon sa paglulinghayaw adunay negatibong epekto sa kalidad sa imong buluhaton. Si Andrzej, nga usa ka masibotong magmamantala, nag-ingon: “Ang kakulag pahulay moresulta sa hilabihang kakapoy, ug sa dili madugay kana mosangpot sa kahigawad. Naningkamot gayod ako nga malikayan kana.”—Eccl. 4:6.

Bisan pa sa atong tim-os nga mga paningkamot, pipila ra ang modawat sa maayong balita. Apan, dili gayod kalimtan ni Jehova ang atong nahimo. (Heb. 6:10) Bisan pag daghan ang dili buot makig-estorya kanato, sila mahimong maghisgot bahin sa atong pagduaw human kita makabiya sa ilang balay. Ang epekto mahimong sama sa atong mabasa bahin kang Ezequiel: Ang katawhan “mahibalo gayod . . . nga may manalagna diha sa ilang taliwala.” (Ezeq. 2:5) Sa pagkatinuod, dili sayon ang atong ministeryo, apan kita makabenepisyo gikan niini ug mao man usab ang mga tawo nga mamati kanato.

“Ang pagpakig-ambit sa ministeryo magtabang kanato sa pagsul-ob sa bag-ong personalidad ug sa pagpakita sa atong gugma sa Diyos ug sa atong mga silingan,” nag-ingon si Zygmunt. “Usa gayod ka pribilehiyo nga makigbahin niining nagaluwas-ug-kinabuhi nga buluhaton. Kini dili na mahitabo sa samang gidak-on o kahimtang,” midugang si Andrzej. Ikaw usab makabaton ug dagayang panalangin kon ikaw molahutay diha sa ministeryo.—2 Cor. 4:1, 2.

[Mga hulagway sa panid 31]

Ang pag-atiman sa atong espirituwal ug pisikal nga panginahanglan motabang kanato sa paglahutay diha sa ministeryo