Si Jehova Takos sa Atong Hiniusang Pagdayeg

“Dayega ninyo si Jah!”—SAL. 111:1.

1, 2. Unsay kahulogan sa ekspresyong “Aleluya,” ug sa unsang paagi kini gigamit diha sa Kristohanon Gregong Kasulatan?

 “ALELUYA!” Kana nga ekspresyon sagad madunggan diha sa mga simbahan sa Kakristiyanohan. Ang pipila ka tawo sagad molitok nianang pulonga panahon sa ilang pag-estoryahanay. Hinunoa, diyutay ra ang nahibalo sa sagradong kahulogan niana, ug ang pagkinabuhi sa daghang tawo nga naggamit niana wala magpasidungog sa Diyos. (Tito 1:16) Sumala sa usa ka diksiyonaryo sa Bibliya, ang “Aleluya” maoy “pulong nga gigamit sa mga magsusulat sa pipila ka salmo sa pag-awhag sa tanan nga duyogan sila sa pagdayeg kang Jehova.” Gani, daghang eskolar sa Bibliya ang nag-ingon nga ang “Aleluya” nagkahulogang “‘Dayega ninyo si Jah,’ [nga mao] si Jehova.”

² Mao kanay hinungdan nga ang Bag-ong Kalibotang Hubad naghubad nianang ekspresyona diha sa Salmo 111:1 ingong “Dayega ninyo si Jah!” Ang Gregong pulong nga katumbas niana makita ug upat ka beses diha Pinadayag 19:1-6 ingong paghugyaw tungod sa pagkalaglag sa bakak nga relihiyon. Sa dihang mahitabo kana, ang matuod nga mga magsisimba aduna gayoy rason sa paggamit sa ekspresyong “Aleluya” sa matinahorong paagi.

Iyang Dagkong mga Buhat

3. Unsa ang pangunang katuyoan sa atong regular nga panagkatigom?

³ Ang nagsulat sa Salmo 111 naghatag ug daghang rason kon nganong takos gayod si Jehova sa atong hiniusang pagdayeg. Ang bersikulo 1 nag-ingon: “Pagadayegon ko si Jehova sa bug-os kong kasingkasing diha sa suod nga pundok sa mga matul-id ug sa katigoman.” Ginabuhat kana sa mga Saksi ni Jehova karon. Ang pangunang katuyoan sa atong regular nga panagkatigom, diha sa lokal nga mga kongregasyon ug sa dagkong mga kombensiyon, mao ang pagdayeg kang Jehova.

4. Unsaon pagpangita sa mga tawo ang mga buhat ni Jehova?

⁴ “Ang mga buhat ni Jehova dagko, nga gipangita sa tanan nga nagkalipay kanila.” (Sal. 111:2) Matikdi ang ekspresyong “gipangita.” Sumala sa usa ka reperensiya, kini nga bersikulo mapadapat sa mga tawo nga “maikagong nagtuon ug namalandong” sa mga buhat sa Diyos. Ang kalalangan ni Jehova aduna gayoy katuyoan. Iyang gipahiluna ang adlaw, yuta, ug bulan sa ilang eksaktong mga dapit, aron ang atong planeta makabaton ug kainit ug kahayag, adlaw ug gabii, pag-usab-usab sa panahon, ug pagtaob ug paghunas.

5. Unsay napadayag tungod sa pag-uswag sa kahibalo sa tawo bahin sa uniberso?

⁵ Nadiskobrehan sa mga siyentipiko nga dako kaayog kaayohan ang lokasyon sa yuta diha sa atong solar system maingon man ang haom kaayo nga pagkadisenyo sa orbito, gidak-on, ug gibug-aton sa atong dakong bulan. Ang pagkapahimutang sa maong mga butang sa kawanangan ug ang kalambigitan niini sa usag usa maoy nagpaposible  sa maanindot ug regular nga pag-usab-usab sa mga panahon diha sa pipila ka dapit sa yuta. Daghan usab kitag makat-onan bahin sa kinaiyanhong mga puwersa sa uniberso nga maayo kaayong pagkapasibo. Busa, diha sa artikulo nga nag-ulohang “Maayo Kaayong Pagkadisenyo nga Uniberso,” ang usa ka propesor sa mechanical engineering nag-ingon: “Masabot gayod kon nganong daghang siyentipiko ang nag-usab sa ilang panglantaw sa milabayng 30 ka tuig, nga miuyon nga dili gayod katuohan nga ang uniberso mitungha nga sulagma lamang. Samtang magkadako ang atong kahibalo bahin sa atong maanindot nga puy-anan, magkadaghan ang atong rason nga motuo nga aduna gayoy usa ka intelihenteng tigdisenyo.”

6. Unsay imong pagbati sa paagi nga kita gibuhat sa Diyos?

⁶ Ang lain pang dakong buhat sa kalalangan mao ang paagi nga kita gibuhat sa Diyos. (Sal. 139:14) Sa paglalang sa tawo, ang Diyos naghatag kaniyag hunahuna, lawas nga may kompletong mga organo, ug katakos sa pagtrabaho. Pananglitan, kahibulongan gayod ang hinatag-sa-Diyos nga mga katakos sa pagsulti ug pagpaminaw, maingon man sa pagsulat ug pagbasa. Daghan ang nakabaton nianang maong mga katakos. Katingalahan usab kaayo ang pagkahimo sa imong lawas—nga may katakos sa pagbarog nga matul-id. Sa pagkatinuod, makapahingangha gayod ang disenyo ug ang pagkabalanse sa imong lawas, ang katakos niini sa paglihok ug pagtrabaho, ug ang kemikal nga mga proseso niini. Gawas pa niana, ang katingalahang koneksiyon sa mga kaugatan nga maoy hinungdan nga moobra ang imong hunahuna ug mga sentido dili gayod matupngan sa bisan unsa nga nahimo sa mga siyentipiko. Sa pagkatinuod, ang mga tawo nakahimo lamag dagkong mga butang tungod sa hunahuna ug mga sentido nga gihatag sa Diyos kanila. Bisan ang nabansay pag-ayo ug labing hanas nga inhenyero dili gayod makaimbento ug bisan unsang butang nga sama kanindot ug kamapuslanon sa imong napulo ka katingalahang tudlo ug mga kumagko. Pangutan-a ang imong kaugalingon, ‘Makahimo kaha kita ug nindot nga mga buhat sa arte ug mga bilding kon dili nato gamiton ang mga tudlo nga gihatag sa Diyos kanato?’

Dagkong mga Buhat sa Diyos ug Iyang mga Hiyas

7. Nganong angay natong isipon ang Bibliya ingong usa sa dagkong mga buhat sa Diyos?

⁷ Ang dagkong mga buhat ni Jehova naglakip sa ubang kahibulongang mga butang nga iyang nahimo alang sa katawhan, ingon sa gipakita diha sa Bibliya. Ang Bibliya mismo maoy kahibulongang buhat ni Jehova ug ang mga bahin niini nagkaharmonya sa usag usa. Dili sama sa ubang mga basahon, kini sa pagkatinuod “inspirado sa Diyos ug mapuslanon sa pagpanudlo.” (2 Tim. 3:16) Pananglitan, ang unang basahon sa Bibliya, ang Genesis, nagsaysay kon sa unsang paagi ang Diyos nagwagtang sa pagkadaotan gikan sa yuta sa mga adlaw ni Noe. Ang ikaduhang basahon, ang Exodo, nagpakita kon sa unsang paagi gibayaw ni Jehova ang iyang pagka-Diyos pinaagi sa pagpagawas sa mga Israelinhon gikan sa pagkaulipon sa Ehipto. Lagmit mao kana ang gihunahuna sa salmista sa dihang siya miingon: “[Ang buhat ni Jehova] maoy dignidad ug kahalangdon, ug ang iyang pagkamatarong nagapadayon hangtod sa kahangtoran. Gihimo niya nga pagahandomon ang tanan niyang katingalahang mga buhat. Si Jehova mapuangoron ug maluluy-on.” (Sal. 111:3, 4) Dili ka ba mouyon nga ang mga buhat ni Jehova sa tibuok kasaysayan, lakip na sa mga butang nga iyang nahimo sa tibuok nimong kinabuhi, maoy pamatuod sa iyang “dignidad ug kahalangdon”?

8, 9. (a) Unsay kalainan sa mga buhat sa Diyos ug sa mga buhat sa tawo? (b) Unsang mga hiyas sa Diyos ang imong gipabilhan?

⁸ Matikdi nga gipasiugda usab sa salmista ang talagsaong mga hiyas ni Jehova, sama sa pagkamatarong, pagkamapuangoron, ug pagkamaluluy-on. Dili kinaiyanhon sa makasasalang tawo nga mobuhat ug matarong. Ang ilang mga buhat kasagarang gipasukad sa kahakog, kasina, ug kamapahitas-on. Nadayag kana sa makalilisang nga mga armas nga ilang gihimo alang sa mga gubat nga ilang gimaniobra ug alang sa materyal nga bentaha. Kini nagpahinabog dili-matukib nga kagul-anan ug pag-antos sa milyonmilyong inosenteng mga biktima. Dugang pa, daghang buhat sa tawo ang miresulta sa pag-antos sa mga kabos. Ang usa ka buhat nga kasagarang mosantop sa hunahuna sa daghan mao ang paggamit ug mga ulipon sa pagtukod sa mga piramide, nga maoy lubnganan lamang sa  mapahitas-ong mga Paraon. Gawas pa niana, daghan sa mga buhat sa tawo karon ang “nagalaglag [usab] sa yuta.”—Basaha ang Pinadayag 11:18.

⁹ Sukwahi gayod kana sa mga buhat ni Jehova, nga kanunayng gipasukad sa kon unsay matarong! Ang iyang mga buhat naglakip sa maluluy-ong tagana alang sa kaluwasan sa makasasalang katawhan. Pinaagi sa pagtagana sa lukat, ang Diyos ‘nagpasundayag sa iyang kaugalingong pagkamatarong.’ (Roma 3:25, 26) Sa pagkatinuod, “ang iyang pagkamatarong nagapadayon hangtod sa kahangtoran”! Sa laing bahin, gipakita sa Diyos ang pagkamapuangoron pinaagi sa iyang mapailobong pagpakiglabot sa makasasalang katawhan. Usahay, mogamit pa gani siyag pulong nga “palihog” sa dihang iyang awhagon sila sa pagbiya sa ilang daotang dalan ug sa pagbuhat sa matarong.—Basaha ang Ezequiel 18:25.

Motuman sa Iyang mga Saad

10. Unsang panig-ingnan ang gihatag ni Jehova maylabot sa iyang pakigsaad kang Abraham?

¹⁰ “Siya naghatag ug pagkaon ngadto sa mga nahadlok kaniya. Hangtod sa panahong walay tino mahinumdom siya sa iyang pakigsaad.” (Sal. 111:5) Lagmit ang gitumong sa salmista dinhi mao ang pakigsaad kang Abraham. Si Jehova nagsaad nga iyang panalanginan ang binhi ni Abraham ug sila manag-iya sa ganghaan sa ilang mga kaaway. (Gen. 22:17, 18; Sal. 105:8, 9) Sa unang katumanan sa maong mga saad, ang binhi ni Abraham nahimong nasod sa Israel. Ang maong nasod dugayng naulipon sa Ehipto, apan “nahinumdom ang Diyos sa iyang pakigsaad kang Abraham” ug siya nagluwas kanila. (Ex. 2:24) Ang pagpakiglabot ni Jehova kanila nagpakita nga siya manggihatagon gayod. Siya naghatag kanilag pisikal ug espirituwal nga pagkaon. (Deut. 6:1-3; 8:4; Neh. 9:21) Sa misunod nga mga siglo, ang nasod sagad mobiya sa Diyos, apan siya nagpadala ug mga manalagna aron awhagon sila nga mobalik kaniya. Kapig 1,500 ka tuig human niya luwasa ang mga Israelinhon gikan sa Ehipto, ang Diyos nagpadala sa iyang bugtong Anak dinhi sa yuta. Ang kadaghanan sa mga Hudiyo nagsalikway kang Jesus ug nagpapatay kaniya. Dayon nagtukod si Jehova ug usa ka bag-ong nasod, usa ka espirituwal nga nasod, ang “Israel sa Diyos.” Uban ni Kristo, kana nga nasod mao ang naglangkob sa simbolikong binhi ni Abraham, nga gitagna ni Jehova nga iyang gamiton sa pagpanalangin sa katawhan.—Gal. 3:16, 29; 6:16.

11. Sa unsang paagi si Jehova padayong ‘nahinumdom sa iyang pakigsaad’ kang Abraham?

¹¹ Si Jehova padayong ‘nahinumdom sa iyang pakigsaad’ ug sa mga panalangin nga iyang gisaad pinaagi niana. Karon, siya nagtagana ug dagayang suplay sa espirituwal nga pagkaon diha sa kapin sa 400 ka pinulongan. Gawas pa niana, padayon niyang gitubag ang atong mga pag-ampo maylabot sa atong pisikal nga mga panginahanglan, nga kaharmonya sa mga pulong: “Hatagi kami sa among tinapay alang niining adlawa sumala sa gikinahanglan niining adlawa.”—Luc. 11:3; Sal. 72:16, 17; Isa. 25:6-8.

Makapahinganghang Gahom ni Jehova

12. Sa unsang paagi ang karaang Israel gihatagan sa “panulondon sa mga nasod”?

¹² “Iyang gisugilon sa iyang katawhan ang gahom sa iyang mga buhat, sa paghatag kanila sa panulondon sa mga nasod.” (Sal. 111:6) Ang usa sa talagsaong hitabo sa kasaysayan sa Israel nga lagmit mao ang anaa sa hunahuna sa salmista mao ang ilang milagrosong paggawas gikan sa Ehipto. Sa dihang si Jehova nagtugot sa mga Israelinhon sa pagsulod sa Yutang Saad, sila nakahimo sa pagsakop sa mga gingharian sa silangan ug kasadpang mga bahin sa Suba sa Jordan. (Basaha ang Nehemias 9:22-25.) Oo, si Jehova naghatag sa Israel sa “panulondon sa mga nasod.” Pagkadakong pasundayag sa gahom sa Diyos!

13, 14. (a) Unsang pagpasundayag sa gahom sa Diyos maylabot sa Babilonya ang lagmit anaa sa hunahuna sa salmista? (b) Unsang dugang mga buhat sa pagluwas ang gihimo ni Jehova?

¹³ Apan kita nahibalo gayod nga bisan pa sa tanang gihimo ni Jehova alang sa Israel, sila wala magpakitag pagtahod kaniya ni sa ilang mga katigulangan nga si Abraham, Isaac, ug Jacob. Sila nagmasinupakon hangtod nga gigamit sa Diyos ang mga Babilonyanhon sa pagbihag kanila. (2 Cron. 36:15-17; Neh. 9:28-30) Kon ang tigkomposo sa Salmo 111 nagkinabuhi human makabalik ang mga Israelinhon gikan sa Babilonya, sama sa giingon sa pipila ka iskolar sa Bibliya, siya adunay dugang rason sa pagdayeg kang Jehova tungod sa Iyang pagkamaunongon ug pagkagamhanan. Gipakita kana  sa Diyos pinaagi sa pagpagawas sa mga Hudiyo gikan sa Babilonya—usa ka imperyo nga adunay balaod sa dili pagpagawas sa ilang mga binihag.—Isa. 14:4, 17.

¹⁴ Mga lima ka siglo sa ulahi, gigamit ni Jehova ang iyang gahom sa mas dako pa ganing paagi pinaagi sa pagluwas sa mahinulsolong mga tawo gikan sa pagkaulipon sa sala ug kamatayon. (Roma 5:12) Kana naghatag ug kahigayonan sa 144,000 ka tawo nga mahimong dinihogan-sa-espiritu nga mga sumusunod ni Kristo. Sa 1919, gigamit ni Jehova ang iyang gahom sa pagluwas sa diyutayng nanghibilin niining maong mga dinihogan gikan sa pagkaulipon sa bakak nga relihiyon. Ang ilang napalampos niining panahon sa kataposan maoy tungod sa espiritu sa Diyos. Kon sila magmatinumanon hangtod sa kamatayon, sila magamando sa langit uban ni Jesu-Kristo ibabaw sa yuta alang sa kaayohan sa mahinulsolong mga tawo. (Pin. 2:26, 27; 5:9, 10) Sila magapanunod sa yuta sa mas masangkarong paagi kay sa nasinati sa karaang Israel.—Mat. 5:5.

Dumalayon ug Kasaligan nga mga Prinsipyo

15, 16. (a) Unsay nalakip sa mga buhat sa mga kamot sa Diyos? (b) Unsa nga mga sugo ang gihatag sa Diyos ngadto sa karaang Israel?

¹⁵ “Ang mga buhat sa iyang mga kamot mao ang kamatuoran ug paghukom; ang tanang mando nga iyang ihatag kasaligan, gipalig-on pag-ayo hangtod sa kahangtoran, hangtod sa panahong walay tino, gibuhat diha sa kamatuoran ug sa katul-id.” (Sal. 111:7, 8) Lakip sa ‘mga buhat sa mga kamot’ ni Jehova mao ang duha ka papan nga bato, diin gikulit ang napulo ka hinungdanong mga balaod alang sa Israel. (Ex. 31:18) Kini nga mga balaod, lakip na sa tanang regulasyon nga nahimong bahin sa pakigsaad sa Moisesnong Balaod, gipasukad sa dumalayon ug kasaligan nga mga prinsipyo.

¹⁶ Pananglitan, ang usa sa mga sugo, o mga balaod, nga nakulit sa maong mga papan nag-ingon: “Ako si Jehova nga imong Diyos maoy Diyos nga nagapangayo ug bug-os nga pagkamahinalaron.” Kini nag-ingon usab nga si Jehova nagpasundayag ug “mahigugmaong-kalulot ngadto sa ikausa ka libo nga kaliwatan kanilang nahigugma [kaniya] ug nagatuman sa [iyang] mga sugo.” Nasulat usab diha sa maong mga papan nga bato ang mga prinsipyo nga mapadapat sa tanang panahon sama sa “pasidunggi ang imong amahan ug ang imong inahan” ug “dili ka mangawat,” maingon man ang mapuslanong balaod batok sa hinakog nga pagkaibog sa mga butang nga gipanag-iya sa uban.—Ex. 20:5, 6, 12, 15, 17.

Ang Atong Balaan ug Makalilisang nga Manunubos

17. Nganong angayng isipon sa mga Israelinhon nga balaan ang ngalan sa Diyos?

¹⁷ “Siya nagpadala sa pangtubos sa iyang katawhan. Siya nagsugo sa iyang pakigsaad hangtod sa panahong walay tino. Ang iyang ngalan balaan ug  makalilisang.” (Sal. 111:9) Sa makausa pa, ang salmista dinhi lagmit naghunahuna sa pagkamaunongon ni Jehova sa iyang pakigsaad kang Abraham. Tungod niana wala pasagdi ni Jehova ang iyang katawhan sa dihang sila naulipon sa karaang Ehipto ug sa dihang sila nabihag sa Babilonya sa ulahi. Sa maong mga kahimtang, gitubos sa Diyos ang iyang katawhan. Bisan sa maong duha lang ka rason, angay untang isipon sa mga Israelinhon nga balaan ang ngalan sa Diyos.—Basaha ang Exodo 20:7; Roma 2:23, 24.

18. Nganong imong gibati nga usa ka pribilehiyo ang pagdala sa ngalan sa Diyos?

¹⁸ Tinuod usab kana alang sa mga Kristohanon karon, kinsa gitubos gikan sa pagkaulipon sa sala ug kamatayon. Angay gayod natong buhaton ang atong maarangan nga magkinabuhi nga kaharmonya nianang unang pangamuyo diha sa modelong pag-ampo: “Pagabalaanon unta ang imong ngalan.” (Mat. 6:9) Ang pagpamalandong nianang mahimayaong ngalan angayng mopalihok kanato sa pagkahadlok sa Diyos. Ang magsusulat sa Salmo 111 adunay hustong panglantaw bahin sa diyosnong kahadlok: “Ang pagkahadlok kang Jehova mao ang sinugdanan sa kaalam. Kadtong tanan nga nagatuman niini [iyang mga sugo] adunay hait nga salabotan.”—Sal. 111:10.

19. Unsay atong hisgotan sa sunod nga artikulo?

¹⁹ Ang hustong matang sa pagkahadlok sa Diyos motabang kanato sa pagdumot sa kon unsay daotan. Motabang usab kini kanato sa pagsundog sa talagsaong mga hiyas sa Diyos sama sa gipakita diha sa Salmo 112, nga maoy atong hisgotan sa sunod nga artikulo. Ang maong salmo naghisgot kon sa unsang paagi mahimo kitang kuwalipikado nga mahilakip sa milyonmilyong tawo nga magdayeg sa Diyos sa walay kataposan. Siya takos gayong dayegon. “Ang iyang pagdayeg nagapadayon hangtod sa kahangtoran.”—Sal. 111:10.

Mga Pangutana nga Palandongon

• Nganong takos si Jehova sa atong hiniusang pagdayeg?

• Unsang mga hiyas ni Jehova ang gipadayag diha sa iyang mga buhat?

• Unsay imong panglantaw sa pribilehiyo sa pagdala sa ngalan sa Diyos?

[Mga Pangutana sa Pagtuon]

[Hulagway sa panid 20]

Ang pangunang katuyoan sa atong regular nga panagkatigom mao ang pagdayeg kang Jehova

[Hulagway sa panid 23]

Ang tanang balaod ni Jehova gipasukad sa dumalayon ug kasaligang mga prinsipyo