Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Sulayi kon makatubag ka ba sa mosunod nga mga pangutana:

• Nganong hinungdanon kaayo nga atong huptan ang atong integridad ingong Kristohanon?

Ang atong paghupot sa atong integridad nagpakita nga kita dapig sa pagkasoberano ni Jehova ug ato kining gihimo tungod sa atong gugma kaniya ug kini nagpamatuod nga bakakon si Satanas. Dugang pa, ang paghupot sa atong integridad maoy basehanan sa Diyos sa paghukom kanato ug hinungdanon gayod sa atong paglaom sa umaabot.—12/15, panid 4-6.

• Unsa ang pipila ka titulo nga nagpaila sa papel ni Jesus diha sa katuyoan sa Diyos?

Bugtong Anak. Ang Pulong. Ang Amen. Ang Tigpataliwala sa bag-ong pakigsaad. Ang Hataas nga Saserdote. Ang sinaad nga Binhi.—12/15, panid 15.

• Nganong gipatan-aw man ni Elias ang iyang alagad didto sa dagat samtang ang manalagna nag-ampo nga moulan? (1 Hari 18:43-45)

Gipakita ni Elias nga siya nahibalo sa siklo sa tubig. Ang panganod nga maporma ibabaw sa dagat mapadpad sa mamala, diin kini mahulog ingong ulan.—1/1, panid 15-16.

• Sa unsang paagi kita magmalipayon sa atong ministeryo?

Angay natong andamon ang atong kasingkasing ug bug-oson ang atong hunahuna kon unsaon pagtabang sa uban. Sa dihang kita mosangyaw, ang atong tumong mao ang pagsugod ug mga pagtuon sa Bibliya. Kon dili interesado ang mga tawo diha sa atong teritoryo, mahimong usbon nato ang atong presentasyon ug hisgotan ang mga butang nga makapainteres kanila.—1/15, panid 8-10.

• Ang sanla ba nga gihisgotan sa Bibliya parehas ra sa sakit nga sanla karon?

Ang sanla, nga usa ka impeksiyon tungod sa bakterya, naglungtad na panahon sa Bibliya. (Lev. 13:4, 5) Naghisgot usab ang Bibliya ug sanla nga mitapot diha sa mga besti ug mga balay. Kana nga “sanla” mahimong nagtumong sa usa ka matang sa agup-op. (Lev. 13:47-52)—2/1, panid 19.

• Sa unsang paagi ang mga pagtulon-an sa Bibliya makaapektar sa Kristohanong tinamdan ug mga tradisyon bahin sa paglubong?

Bisan tuod magbangotan ang usa ka Kristohanon tungod sa kamatayon sa iyang mga minahal, siya nahibalo nga ang patay wala nay kalibotan. Bisan pag sawayon siya sa mga dili-magtutuo, iyang likayan ang mga tradisyon nga nalangkit sa pagtuo nga ang mga patay may impluwensiya sa mga buhi. Aron malikayan ang mga suliran, isulat sa ubang mga Kristohanon ang ilang mga tugon bahin sa mga kahikayan sa paglubong.—2/15, panid 29-31.

• Sumala sa Salmo 1:1, unsa ang tulo ka butang nga kinahanglan natong likayan aron kita magmalipayon?

Ang bersikulo naghisgot bahin sa “tambag sa mga daotan,” “dalan sa mga makasasala,” ug “lingkoranan sa mga mabiaybiayon.” Aron magmalipayon, kinahanglan natong likayan kadtong nagbiaybiay o nagsalikway sa mga balaod sa Diyos. Ato hinuong kalipayan ang balaod ni Jehova.—3/1, panid 17.

• Ang “basahon ni Jasar” ba ug ang “basahon sa mga Gubat ni Jehova” maoy nangawalang mga basahon sa Bibliya? (Jos. 10:13; Num. 21:14)

Dili. Lagmit dili kini inspiradong mga sinulat nga naglungtad sa panahon sa Bibliya ug gihisgotan sa mga magsusulat sa Bibliya.—3/15, panid 32.

• Unsang dakong kausaban ang gihimo diha sa usa ka modernong hubad sa Bibliya sa Latin?

Giaprobahan ni Papa Juan Paulo II niadtong 1979 ang Nova Vulgata, usa ka bag-ong hubad sa pinulongang Latin. Ang ngalan sa Diyos nga Iahveh makita diha sa pipila ka teksto sa unang edisyon. (Ex. 3:15; 6:3) Apan sa dihang gipatik ang ikaduhang edisyon niadtong 1986, ang Iahveh gipulihag Dominus [Ginoo].—4/1, panid 22.