Si Job Nagtuboy sa Ngalan ni Jehova
Si Job Nagtuboy sa Ngalan ni Jehova
“Padayong dayegon ang ngalan ni Jehova.”—JOB 1:21.
1. Kinsay lagmit nagsulat sa basahong Job, ug kanus-a?
MGA 40 anyos si Moises sa dihang siya mikalagiw sa Ehipto aron dili mapatay ni Paraon, ug siya mipuyo sa Midian. (Buh. 7:23) Samtang nanimuyo siya didto, lagmit nakadungog siya sa mga pagsulay kang Job nga nagpuyo sa duol rang yuta sa Uz. Sa paglabay sa daghang katuigan, sa dihang si Moises ug ang katawhan sa Israel nagkaduol sa Uz sa talitapos na ang ilang panaw sa kamingawan, lagmit nakadungog si Moises mahitungod sa ulahing bahin sa kinabuhi ni Job. Sumala sa tradisyon sa mga Hudiyo, si Moises ang nagsulat sa basahong Job pagkamatay ni Job.
2. Sa unsang mga paagi ang basahong Job makapalig-on sa pagtuo sa mga alagad ni Jehova karon?
2 Ang basahong Job makapalig-on sa pagtuo sa mga alagad sa Diyos karon. Sa unsang mga paagi? Ang asoy makatabang kanato sa pagsabot sa hinungdanong mga panghitabo sa langit ug nagpasiugda sa labing hinungdanong isyu mahitungod sa pagkasoberano sa Diyos sa uniberso. Tungod sa asoy sa Job, mas masabtan nato kon unsa pay nalangkit sa paghupot ug integridad ug kon nganong si Jehova motugot usahay nga ang iyang mga alagad mag-antos. Dugang pa, ang basahong Job nagpaila kang Satanas nga Yawa ingong pangunang Kaaway ni Jehova ug sa katawhan. Gipakita usab niini nga ang mga tawong dili-hingpit sama kang Job makapabiling matinumanon kang Jehova bisan pa sa grabeng pagsulay. Atong susihon ang pipila ka panghitabo nga gihubit diha sa basahong Job.
Si Job Gisulayan ni Satanas
3. Unsay atong nahibaloan bahin kang Job, ug nganong gipuntirya siya ni Satanas?
3 Si Job adunahan ug dakog-impluwensiya, usa ka patriarka nga maayog kinaiya. Dayag nga siya tinamod kaayong magtatambag ug matinabangon sa mga kabos. Labaw sa tanan, si Job may kahadlok sa Diyos. Siya gihubit ingong tawo nga “walay-ikasaway ug matul-id, ug mahadlokon sa Diyos ug naglikay sa daotan.” Si Job gipuntirya ni Satanas nga Yawa dili tungod sa iyang bahandi ug impluwensiya kondili tungod sa iyang diyosnong debosyon.—Job 1:1; 29:7-16; 31:1.
4. Unsay kahulogan sa integridad?
4 Ang pasiunang asoy sa basahong Job naghubit sa usa ka panagkatigom sa langit diin ang mga manulonda miatubang kang Jehova. Si Satanas presente usab, ug iyang giakusahan si Job. (Basaha ang Job 1:6-11.) Bisag gihisgotan ni Satanas ang mga kabtangan ni Job, ang iyang gikuwestiyon mao gayod ang integridad ni Job. Ang terminong “integridad” nagpasabot sa pagkatul-id, pagkadili-salawayon, pagkamatarong, ug pagkawalay-sayop. Segun sa pagkagamit sa Bibliya, ang tawong may integridad adunay bug-os nga debosyon kang Jehova.
5. Unsay akusasyon ni Satanas batok kang Job?
5 Gibutangbutangan ni Satanas si Job nga nagsimba lang siya sa Diyos tungod sa hakog nga mga motibo, dili tungod sa iyang integridad. Matod pa ni Satanas, nagmaunongon lang kono si Job kang Jehova tungod kay Siya nagapanalangin ug nagapanalipod kaniya. Aron matubag ang akusasyon ni Satanas, gitugotan ni Jehova si Satanas sa pag-atake sa maong matinumanong tawo. Ingong resulta, sulod lang sa usa ka adlaw, nasayran ni Job nga ang iyang kahayopan gipangawat o nangamatay, ang iyang mga sulugoon gipamatay, ug ang iyang napulo ka anak nangamatay. (Job 1:13-19) Nabungkag ba ang integridad ni Job tungod sa pag-atake ni Satanas? Ang inspiradong sinulat naghubit sa reaksiyon ni Job bahin sa iyang kaalaotan: “Si Jehova mihatag, ug si Jehova mikuha. Padayong dayegon ang ngalan ni Jehova.”—Job 1:21.
6. (a) Unsay nahitabo panahon sa laing panagkatigom sa langit? (b) Kinsay gihunahuna ni Satanas sa dihang iyang gikuwestiyon ang integridad ni Job kang Jehova?
6 Sa ulahi, may laing panagkatigom sa langit. May akusasyon na usab si Satanas kang Job, nga miingon: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag. Ingon nga kausaban, palihog bakyawa ang imong kamot, ug tandoga hangtod ang iyang bukog ug ang iyang unod ug tan-awa kon dili ka ba niya tunglohon sa imong nawong mismo.” Matikdi nga may uban pang gilakip si Satanas sa iyang mga akusasyon. Sa pag-ingong, “Ang tanang butang nga anaa sa usa ka tawo iyang ihatag tungod sa iyang kalag,” gikuwestiyon ni Satanas dili lamang ang integridad ni Job kondili ang integridad usab ni bisan kinsang “tawo” nga nagsimba kang Jehova. Human niadto, gitugotan sa Diyos si Satanas sa paghampak kang Job pinaagig grabeng balatian. (Job 2:1-8) Apan dili pa kini ang kinutbanan sa mga pagsulay ni Job.
Kon Unsay Atong Makat-onan sa Tinamdan ni Job
7. Sa unsang mga paagi gipit-osan si Job sa iyang asawa ug sa mga miduaw kaniya?
7 Sa sinugdan sa mga pagsulay ni Job, ang iyang asawa mibati usab sa iyang mga kasakit. Ang asawa ni Job naguol pag-ayo sa pagkamatay sa ilang mga anak ug sa pagkahanaw sa ilang bahandi. Nasakitan kaayo siyang nagtan-aw sa iyang bana nga nag-antos sa usa ka masakit nga balatian. Siya miingon kang Job: “Nagahupot ka ba gihapon sa imong integridad? Tungloha ang Diyos ug magpakamatay!” Dayon, nangabot ang tulo ka lalaki—si Elipaz, Bildad, ug Zopar—aron hupayon konohay si Job. Apan malinglahon ang ilang pangatarongan ug nahimo na hinuon silang “samokan nga mga maghuhupay.” Pananglitan, si Bildad miingon nga ang mga anak ni Job daotan ug binuhatan mao nga takos sila sa katalagmang midangat kanila. Si Elipaz nagpasumbingay nga ang pag-antos ni Job maoy silot tungod sa nangagi niyang mga sala. Iya pang giduhaduhaan kon bililhon ba sa Diyos ang mga tawong naghupot ug integridad! (Job 2:9, 11; 4:8; 8:4; 16:2; 22:2, 3) Gihuptan gihapon ni Job ang iyang integridad bisan pa niadtong grabeng pagpit-os. Tinuod, siya nasayop sa dihang iyang ‘gipahayag ang iyang kalag nga matarong inay sa Diyos.’ (Job 32:2) Bisan pa niana, siya nagpabiling matinumanon.
8. Unsang maayong panig-ingnan ang gihatag ni Elihu sa mga magtatambag karon?
8 Dayon, atong mabasa ang bahin kang Elihu, nga miduaw usab kang Job. Siya namati una sa mga argumento nga gipahayag ni Job ug sa iyang tulo ka kauban. Bisan tuod si Elihu mas bata kay niining upat ka lalaki, siya nagpakitag labaw nga kaalam. Siya matinahorong nakigsulti kang Job. Iyang gidayeg si Job tungod sa iyang pagkamatarong. Apan miingon usab siya nga mas gitagad ni Job ang pagpamatuod sa iyang kaugalingon nga walay sala. Dayon, si Elihu nagpasalig kang Job nga ang iyang matinumanong pag-alagad sa Diyos mapuslanon gayod. (Basaha ang Job 36:1, 11.) Pagkamaayong panig-ingnan alang sa mga magtatambag karon! Si Elihu mapailobon, namati pag-ayo, mihatag ug nahiangayng pagdayeg ug makapalig-ong tambag.—Job 32:6; 33:32.
9. Sa unsang paagi gitabangan ni Jehova si Job?
9 Sa kataposan, nahingangha pag-ayo si Job sa dihang si Jehova nakigsulti kaniya! Ang Bibliya nag-ingon: “Si Jehova mitubag kang Job gikan sa unos.” Pinaagig sunodsunod nga mga pangutana, malulotong gitabangan ni Jehova si Job sa pagtul-id sa iyang kaisipan. Gidawat dayon ni Job ang pagbadlong, nga miingon: “Ako nahimong walay-bili . . . ako naghinulsol sa abog ug sa abo.” Human makigsulti si Jehova kang Job, Iyang gibadlong ang tulo ka kauban ni Job tungod kay sila wala “mosulti sa tinuod.” Kinahanglang iampo sila ni Job. Dayon, “si Jehova nagbali sa binihag nga kahimtang ni Job sa dihang siya nag-ampo alang sa iyang mga higala, ug si Jehova naghatag kang Job ug doble pa sa tanan niyang nabatonan sa miagi.”—Job 38:1; 40:4; 42:6-10.
Unsa ka Lalom ang Atong Gugma Kang Jehova?
10. Nganong wala na lang kalimti ni Jehova ang akusasyon ni Satanas o kaha gilaglag na lang siya?
10 Si Jehova mao ang Maglalalang sa uniberso, ang Soberano sa tanang kalalangan. Nganong wala na lang niya kalimti ang akusasyon sa Yawa? Nahibalo ang Diyos nga ang dili-pagpakabana sa akusasyon ni Satanas o ang paglaglag kaniya dili makahusay sa isyu nga gipatungha. Ang Yawa nangangkon nga ang matinumanong alagad ni Jehova nga si Job dili magpabiling maunongon kon mawad-an na siya sa iyang bahandi. Apan nagpabiling maunongon si Job bisan pa sa mga pagsulay. Dayon, si Satanas nangangkon nga si bisan kinsang tawo motalikod sa Diyos kon siya mag-antos sa pisikal. Tuod man, si Job nag-antos apan ang iyang integridad wala mabungkag. Busa si Satanas napamatud-ang bakakon sa kaso sa matinumanong si Job bisan pag siya dili hingpit. Komosta ang ubang mga magsisimba sa Diyos?
11. Sa unsang paagi hingpit nga natubag ni Jesus ang akusasyon ni Satanas?
11 Sa pagkatinuod, ang matag alagad sa Diyos nga naghupot sa iyang integridad bisan pag unsay ipahamtang ni Satanas kaniya nagpakita nga dili tinuod ang mga akusasyon sa maong way-puangod nga kaaway. Mianhi si Jesus sa yuta ug hingpit niyang natubag ang mga akusasyon ni Satanas. Si Jesus hingpit nga tawo, sama sa atong unang amahan, si Adan. Ang pagkamatinumanon ni Jesus hangtod sa kamatayon nagpamatuod gayod nga bakakon si Satanas ug bakak ang iyang mga akusasyon.—Pin. 12:10.
12. Unsa ang kahigayonan ug responsibilidad sa matag alagad ni Jehova?
12 Bisan pa niana, si Satanas padayong nagsulay sa mga magsisimba ni Jehova. Ang matag usa kanato adunay kahigayonan ug responsibilidad sa pagpasundayag sa atong personal nga integridad ug nga kita nag-alagad kang Jehova tungod kay kita nahigugma kaniya—dili tungod sa hakog nga mga motibo. Unsay atong panglantaw sa maong responsibilidad? Atong isipon nga pribilehiyo ang pagpabiling maunongon kang Jehova. Makapahupay usab kanato ang pagkahibalo nga si Jehova mohatag kanatog kalig-on aron kita makalahutay ug, sama sa kahimtang ni Job, Iyang limitahan ang mga pagsulay nga atong atubangon.—1 Cor. 10:13.
Si Satanas—Lampingasang Kaaway ug Apostata
13. Unsang mga detalye ang gipadayag sa basahong Job bahin kang Satanas?
13 Ang Hebreohanong Kasulatan naghatag ug mga detalye bahin sa makauulaw nga papel ni Satanas sa paghagit kang Jehova ug sa pagpasalaag sa katawhan. Ang Kristohanon Gregong Kasulatan adunay dugang impormasyon mahitungod sa pagsupak ni Satanas kang Jehova, ug diha sa basahon sa Pinadayag atong nasayran nga hapit nang mabindikar ang pagkasoberano ni Jehova ug malaglag si Satanas. Ang basahong Job naghatag ug dugang kasayoran bahin sa pagrebelde ni Satanas. Sa pagtambong ni Satanas sa mga panagkatigom sa langit, dili niya tuyo nga dayegon si Jehova. Si Satanas madumtanon ug may daotang tumong. Human sa iyang pag-akusar kang Job ug human tugoti sa pagsulay kang Job, “mipahawa si Satanas gikan sa atubangan ni Jehova.”—Job 1:12; 2:7.
14. Unsay tinamdan ni Satanas kang Job?
14 Busa, ang basahong Job nagpaila kang Satanas ingong way-puangod nga kaaway sa katawhan. Tali sa panagkatigom sa langit nga gihisgotan sa Job 1:6 ug nianang gihubit sa Job 2:1, milabay ang dili-tinong yugto sa panahon, diin grabeng gisulayan si Job. Tungod sa pagkamatinumanon ni Job, si Jehova nakaarang sa pag-ingon kang Satanas: ‘Sa gihapon ginahuptan [ni Job] ang iyang integridad, bisan pag imo akong giaghat batok kaniya sa paglamoy kaniya sa walay hinungdan.’ Apan si Satanas wala moangkon nga bakak ang iyang mga akusasyon kang Job. Hinunoa, gusto niya nga si Job makaagom ug lain pang grabeng pagsulay. Busa, ang Yawa nagsulay kang Job sa panahon nga siya adunahan ug sa panahon nga siya kabos. Tataw, si Satanas walay kaluoy sa mga kabos o sa naalaot tungod sa katalagman. Gidumtan niya ang mga tawong naghupot sa ilang integridad. (Job 2:3-5) Bisan pa niana, ang pagkamatinumanon ni Job nagpakita nga bakakon si Satanas.
15. Sa unsang paagi managsama si Satanas ug ang mga apostata?
15 Si Satanas ang unang linalang nga nahimong apostata. Ang mga apostata karon nagpakitag mga kinaiya nga susama nianang sa Yawa. Ang ilang kaisipan tingali nadaot tungod sa ilang pagkahinawayon sa mga igsoon diha sa mga kongregasyon, sa mga ansiyano, o sa Nagamandong Lawas. Gani, ang ubang apostata supak sa paggamit sa balaang ngalan nga Jehova. Sila dili interesado sa pagkat-on bahin kang Jehova o sa pag-alagad kaniya. Sama kang Satanas nga ilang amahan, ang puntirya sa mga apostata mao ang mga tawong naghupot sa ilang integridad. (Juan 8:44) Kini ang hinungdan nga ang mga alagad ni Jehova molikay gayod kanila!—2 Juan 10, 11.
Si Job Nagtuboy sa Ngalan ni Jehova
16. Unsang tinamdan ang gipakita ni Job bahin kang Jehova?
16 Gigamit ug gidayeg ni Job ang ngalan ni Jehova. Bisan pag si Job naguol pag-ayo tungod sa balita nga ang iyang mga anak nangamatay, siya wala magpasangil ug bisan unsang butang nga dili angay batok sa Diyos. Bisan tuod si Job nasayop sa dihang gipasangil niya ang iyang kaalaotan sa Diyos, siya nagtuboy gihapon sa ngalan ni Jehova. Sa usa sa iyang mga sanglitanan, si Job mipahayag: “Tan-awa! Ang pagkahadlok kang Jehova—mao kana ang kaalam, ug ang pagpahilayo gikan sa daotan mao ang pagsabot.”—Job 28:28.
17. Unsay nakatabang kang Job sa paghupot sa iyang integridad?
17 Unsay nakatabang kang Job sa paghupot sa iyang integridad? Tataw nga sa wala pa mahitabo ang mga katalagman, nakaugmad na siyag suod nga relasyon kang Jehova. Bisan tuod wala kitay ebidensiya nga siya nahibalo nga gibutangbutangan ni Satanas si Jehova, si Job determinado nga magpabiling maunongon. Siya miingon: “Hangtod nga ako mamatay dili ko wad-on ang akong integridad gikan kanako!” (Job 27:5) Sa unsang paagi naugmad ni Job kining suod nga relasyon? Sa walay duhaduha, iyang gipabilhan ang iyang nadunggan bahin sa mga pagpakiglabot sa Diyos kang Abraham, Isaac, ug Jacob, nga lagyo na niyang mga paryente. Ug pinaagi sa pagpaniid ni Job sa kalalangan, iyang nasayran ang daghang hiyas ni Jehova.—Basaha ang Job 12:7-9, 13, 16.
18. (a) Sa unsang paagi si Job nagpakita sa iyang debosyon kang Jehova? (b) Sa unsang mga paagi atong masundog ang maayong panig-ingnan ni Job?
18 Ang nakat-onan ni Job mitukmod kaniya sa pagpahimuot kang Jehova. Siya kanunayng nagtanyag ug mga halad alang sa mga membro sa iyang pamilya kay basig nakapasuko sila sa Diyos o “nagtunglo sa Diyos diha sa ilang kasingkasing.” (Job 1:5) Bisag ilalom sa grabeng pagsulay, si Job nagsulti gihapon ug makapalig-ong mga butang bahin kang Jehova. (Job 10:12) Pagkamaayong panig-ingnan si Job! Kita angay usab nga kanunayng magtuon bahin kang Jehova ug sa iyang mga katuyoan. Aron magpabiling lig-on ang atong relasyon kang Jehova, kinahanglang aduna kitay maayong batasan sa pagtuon, pagtambong sa mga tigom, pag-ampo, ug pagsangyaw sa maayong balita. Dugang pa, kutob sa mahimo atong ipaila ang ngalan ni Jehova. Ug ingon nga ang integridad ni Job nakapahimuot kang Jehova, ang integridad sa mga alagad sa Diyos karon makalipay usab sa kasingkasing ni Jehova. Kini ang atong hisgotan sa sunod artikulo.
Nahinumdom Ka Ba?
• Nganong si Job nakadani sa pagtagad ni Satanas nga Yawa?
• Unsang mga pagsulay ang giantos ni Job ug unsay iyang reaksiyon?
• Unsay makatabang kanato aron mahuptan ang atong integridad sama kang Job?
• Unsay atong masayran bahin kang Satanas gikan sa basahong Job?
[Mga Pangutana sa Pagtuon]
[Hulagway sa panid 4]
Ang asoy bahin kang Job makapaigmat kanato bahin sa labing hinungdanong isyu sa pagkasoberano sa Diyos sa uniberso
[Hulagway sa panid 6]
Sa unsang mga kahimtang ang imong integridad masulayan?