Mga Bana, Sundoga Ninyo ang Gugma ni Kristo!

SA KATAPOSANG gabii sa kinabuhi ni Jesus sa yuta, siya miingon ngadto sa iyang matinumanong mga apostoles: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.” (Juan 13:34, 35) Sa pagkatinuod, ang matuod nga mga Kristohanon angayng maghigugmaay sa usag usa.

Gitumong ni apostol Pablo ang mga bana taliwala sa mga sumusunod ni Kristo sa misulat siya: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efe. 5:25) Sa unsang paagi ikapadapat sa Kristohanong bana kini nga tambag sa Kasulatan diha sa iyang panimalay, ilabina kon ang iyang asawa usa ka dedikadong alagad ni Jehova?

Gipangga ni Kristo ang Kongregasyon

“Ang mga bana angay nga maghigugma sa ilang mga asawa sama sa ilang kaugalingong mga lawas,” nag-ingon ang Bibliya. “Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon.” (Efe. 5:28, 29) Si Jesus may pagbati sa iyang mga tinun-an ug iyang gimahal sila. Iyang gipangga sila. Bisag dili sila hingpit, si Jesus malumo ug maluloton kanila. Aron “ikatanyag ang kongregasyon ngadto sa iyang kaugalingon diha sa kahalangdon niini,” iyang gihatagan ug pagtagad ang maayong mga hiyas sa iyang mga tinun-an.—Efe. 5:27.

Ingon nga si Kristo nagpahayag ug gugma sa kongregasyon, ang bana kinahanglang magpakitag gugma sa iyang asawa sa pulong ug buhat. Ang asawa mobati nga pinangga ug malipayon sa dihang ang iyang bana kanunayng mopahayag sa iyang paghigugma kaniya. Sa laing bahin, bisan pag ang asawa adunay nindot nga balay nga punog kasangkapan apan siya gipasagdan sa iyang bana ug dili kaayo matinagdanon kaniya, siya dili magmalipayon.

Sa unsang paagi ipakita sa bana nga iyang gipangga ang iyang asawa? Sa publiko, ipailaila sa bana ang iyang asawa ngadto sa uban sa ligdong nga paagi ug dayegon siya tungod sa iyang pagpakigtambayayong. Kon ang iyang asawa may nahimo nga hinungdanon alang sa pamilya, ang bana dili magpanuko sa pagpahibalo niana sa uban. Sa pribado, mabati sa asawa ang iyang pagmahal. Ang paghikap, pahiyom, gakos, ug pagdayeg tingali gagmay rang mga butang, apan dako kanag kahulogan sa usa ka asawa.

“Wala Niya Ikaulaw ang Pagtawag Kanila nga ‘mga Igsoon’”

Wala ikaulaw ni Kristo Jesus ang pagtawag sa iyang dinihogang mga sumusunod nga “mga igsoon.” (Heb. 2:11, 12, 17) Kon ikaw Kristohanong bana, hinumdomi nga ang imong asawa imong Kristohanong igsoon usab. Ang iyang pagpahinungod kang Jehova labaw kay sa iyang panaad sa kaminyoon, bisan kon siya nabawtismohan una pa o human maminyo. Kon ang imong asawa mokomento sa tigom, ang brader nga nagdumala sa tigom sa kongregasyon angayng motawag kaniya nga “Sister.” Ang imong asawa imong igsoon usab, dili lang sa Kingdom Hall kondili diha usab sa balay. Hinungdanon nga magmaluloton ug magmatinahoron kaniya diha sa balay ingon man diha sa Kingdom Hall.

Kon aduna kay dugang nga mga responsabilidad sa kongregasyon, basin malisdan ka sa pagbalanse sa mga responsabilidad sa kongregasyon ug sa pamilya. Kon adunay maayong kooperasyon sa mga ansiyano ug ministeryal nga alagad ug kon  ang uban mabansay sa pag-atiman sa pipila ka responsabilidad sa kongregasyon, mas dako kag panahon alang sa igsoon nga labing nagkinahanglan kanimo—ang imong asawa. Hinumdomi, adunay ubang igsoong lalaki nga makahimo sa mga buluhaton sa kongregasyon nga giasayn kanimo, apan ikaw lang ang igsoong lalaki nga naminyo sa imong asawa.

Dugang pa, ikaw mao ang ulo sa imong asawa. Ang Bibliya nag-ingon: “Ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.” (1 Cor. 11:3) Sa unsang paagi ipakita nimo ang maong pagkaulo? Sa mahigugmaong paagi, ug dili pinaagig balikbalik nga pagkutlo nianang bersikuloha ug pagbaod kaniya sa pagtahod kanimo. Ang yawi sa tukmang pagtuman sa pagkaulo mao ang pagsundog kang Jesu-Kristo diha sa imong pagtratar sa imong asawa.—1 Ped. 2:21.

“Kamo Akong mga Higala”

Gitawag ni Jesus ang iyang mga tinun-an nga iyang mga higala. Iya silang giingnan: “Dili ko na kamo tawgon nga mga ulipon, tungod kay ang ulipon wala mahibalo kon unsay ginabuhat sa iyang agalon. Apan gitawag ko kamong mga higala, tungod kay ang tanang butang nga akong nadungog gikan sa akong Amahan gipahibalo ko kaninyo.” (Juan 15:14, 15) Kanunayng nagsultihanay si Jesus ug ang iyang mga tinun-an ug nagkasinabtanay sila. Nag-uban usab sila sa pagbuhat sa mga buluhaton. “Si Jesus ug ang iyang mga tinun-an” gidapit sa kombira sa kasal sa Cana. (Juan 2:2) Sila may paboritong mga dapit nga adtoan, sama sa Tanaman sa Getsemane. Ang Bibliya nag-ingon nga ‘si Jesus sa makadaghan nakigtagbo didto sa iyang mga tinun-an.’—Juan 18:2.

Ang usa ka asawa angayng mobati nga siya ang kinasuorang higala sa iyang bana. Hinungdanon gayod nga kamong mga bana ug asawa mag-uban sa paglingawlingaw! Mag-uban sa pag-alagad sa Diyos. Magkalipay sa pag-uban sa pagtuon sa Bibliya. Mag-uban kanunay—sa paglakaw, pag-estoryahay, pagpangaon. Kinahanglan kamo dili lang magtiayon kondili suod usab nga managhigala.

Iyang ‘Gihigugma Sila Hangtod sa Kataposan’

‘Gihigugma ni Jesus ang iyang mga tinun-an hangtod sa kataposan.’ (Juan 13:1) Ang pipila ka bana napakyas sa pagsundog kang Kristo niining bahina. Mahimong magluib pa sila ‘sa asawa sa ilang pagkabatan-on,’ ug ilisan siyag babaye nga mas bata.—Mal. 2:14, 15.

Ang uban, sama kang Willi, nagsundog kang Kristo. Tungod sa dili-maayong panglawas, ang asawa ni Willi nagkinahanglag kanunay nga pag-atiman sa daghang katuigan. Unsay pagbati ni Willi bahin niini? Siya miingon: “Kanunay kong giisip ang akong asawa ingong gasa gikan sa Diyos ug ako siyang gipabilhan. Gawas pa, 60 ka tuig kanhi gisaad ko nga atimanon siya bisan unsa pay mahitabo. Dili ko gayod hikalimtan ang maong saad.”

Kristohanong mga bana, sundoga ang gugma ni Kristo. Mahala ang imong mahinadlokon-sa-Diyos nga asawa—ang imong igsoong babaye ug higala.

[Hulagway sa panid 20]

Ang imong asawa mao ba ang imong kinasuorang higala?

[Hulagway sa panid 20]

‘Padayong higugmaa ang imong asawa’