Mga Batan-on—Ipadayag ang Inyong Pag-uswag

“Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.”—1 TIM. 4:15.

1. Unsay gusto sa Diyos nga masinati sa mga batan-on?

“PAGSADYA, batan-ong lalaki, sa imong kabatan-on; maglipay unta nimo ang imong kasingkasing samtang batan-on ka pa.” (Eccl. 11:9, Biblia sa Kristohanong Katilingban) Kana ang gisulat sa makinaadmanong si Haring Solomon sa karaang Israel. Gusto sa Tagmugna nianang mensahea nga si Jehova nga Diyos nga kamong mga batan-on magmalipayon. Labaw pa niana, buot ni Jehova nga malipay mo dili lang panahon sa inyong pagkabatan-on kondili sa tibuok ninyong kinabuhi. Ugaling, ang mga batan-on kasagarang makahimog mga sayop nga makaapekto sa ilang kalipay sa umaabot. Bisan ang tawong matinumanon nga si Job nagbasol kay iyang nasinati “ang mga sangpotanan sa kasaypanan sa [iyang] pagkabatan-on.” (Job 13:26) Ang tin-edyer ug batan-ong Kristohanon kasagarang mohimog bug-at nga mga desisyon. Ang sayop nga mga desisyon makabilin ug grabeng mga kadaot sa emosyon ug makamugnag mga suliran nga  makaapekto sa ulahing bahin sa iyang kinabuhi.—Eccl. 11:10.

2. Unsang tambag sa Bibliya ang ipadapat sa mga batan-on aron dili makahimog seryosong mga sayop?

² Kinahanglang mohimog maayong mga desisyon ang mga batan-on. Tagda ang gitambag ni apostol Pablo sa mga taga-Corinto. Misulat siya: “Ayaw kamo pagpakabata sa mga gahom sa pagsabot . . . Magpakahingkod sa mga gahom sa pagsabot.” (1 Cor. 14:20) Ang pagsunod sa tambag sa pagbatog katakos sa paghunahuna ug pagpangatarongan nga samag hingkod nang tawo makatabang sa mga batan-on nga dili makahimog seryosong mga sayop.

3. Unsay imong mahimo aron mahamtong?

³ Kon ikaw batan-on, hinumdomi nga kinahanglan kang maningkamot aron mahamtong. Si Pablo miingon kang Timoteo: “Ayaw gayod tugoting may tawo nga magtamay sa imong pagkabatan-on. Sa kasukwahi, himoa ang imong kaugalingon nga panig-ingnan sa mga matinumanon sa sinultihan, sa panggawi, sa gugma, sa pagtuo, sa kaputli. . . . Magmakugihon diha sa publikong pagbasa, sa pagpanambag, sa pagpanudlo. . . . Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” (1 Tim. 4:12-15) Ang Kristohanong mga batan-on kinahanglang mouswag ug angay kanang madayag sa uban.

Unsay Kahulogan sa Pag-uswag?

4. Unsay nalangkit sa pag-uswag ingong Kristohanon?

⁴ Ang pag-uswag maoy “pagkahimong mas maayo.” Giawhag ni Pablo si Timoteo nga magmakugihon aron mouswag siya sa sinultihan, panggawi, gugma, pagtuo, ug kaputli, ingon man sa iyang pagbuhat sa iyang ministeryo. Kinahanglang manlimbasog siya aron mahimong sulondan ang iyang pagkinabuhi. Busa si Timoteo kinahanglang mopadayon sa pag-uswag ingong Kristohanon.

5, 6. (a) Kanus-a nagsugod pagkadayag ang pag-uswag ni Timoteo? (b) Sa unsang paagi masundog sa mga batan-on karon ang pag-uswag ni Timoteo?

⁵ Sa gisulat ni Pablo ang maong tambag tali sa 61 ug 64 K.P., si Timoteo maoy eksperyensiyado na nga ansiyano. Siya miuswag na ingong Kristohanon. Niadtong 49 o 50 K.P. sa dihang malagmit si Timoteo hapit nang mag-20 anyos, “ang mga igsoon sa Listra ug Iconio may maayong panghimatuod” kaniya, kay sila nakapaniid man sa iyang espirituwal nga pag-uswag. (Buh. 16:1-5) Gikuyog ni Pablo niadtong panahona si Timoteo sa iyang misyonaryong panaw. Human makapaniid sa dugang nga pag-uswag ni Timoteo sulod sa pipila ka bulan, siya gisugo ni Pablo nga moadto sa Tesalonica aron sa paghupay ug pagpalig-on sa mga Kristohanon sa maong siyudad. (Basaha ang 1 Tesalonica 3:1-3, 6.) Tin-aw nga ang pag-uswag ni Timoteo nadayag sa uban samtang siya batan-on pa.

⁶ Kamong mga batan-on sa kongregasyon, paningkamoti ninyo ang pag-ugmad sa kinahanglanong mga hiyas karon aron madayag ang inyong pag-uswag diha sa Kristohanong pagkinabuhi ug sa inyong katakos sa pagtudlo sa mga kamatuoran sa Bibliya. Sukad sa edad nga 12 anyos, si Jesus “nagpadayon sa pag-uswag sa kaalam.” (Luc. 2:52) Ato karong susihon kon sa unsang paagi mapadayag ninyo ang inyong pag-uswag diha sa tulo ka natad sa inyong kinabuhi: (1) sa dihang makasinatig mga suliran, (2) samtang mag-andam alang sa kaminyoon, ug (3) samtang manlimbasog nga mahimong usa ka “maayo nga ministro.”—1 Tim. 4:6.

Atubanga ang mga Suliran Uban ang “Maayong Panghunahuna”

7. Sa unsang paagi ang mga batan-on maapektohan sa makapasubo kaayong mga kahimtang?

⁷ Ang 17-anyos nga Kristohanong si Carol miingon, “Usahay ako masulub-on kaayo, luya sa panglawas ug sa hunahuna hangtod sa punto nga di na ko gustong momata pagkabuntag.” * Nganong siya magul-anon man? Sa dihang diyes anyos pa si Carol, nagdiborsiyo ang iyang ginikanan, ug siya miipon pagpuyo sa iyang inahan nga wala magsunod sa mga sukdanan sa Bibliya sa moralidad. Sama kang Carol, mahimong nagsagubang kag makapasubo kaayong mga kahimtang nga morag dili na mausab.

8. Unsang mga suliran ang gipakigbisogan ni Timoteo?

⁸ Si Timoteo usab nakigbisog ug lisod nga mga kahimtang samtang nag-uswag sa espirituwal. Pananglitan,  ‘subsob nga nagsakit’ ang iyang tiyan. (1 Tim. 5:23) Sa gisugo siya ni Pablo ngadto sa Corinto aron paghusay sa pipila ka suliran nga gipahinabo sa mga tawo nga nagkuwestiyon sa awtoridad sa apostol, giawhag ni Pablo ang kongregasyon sa pagkooperar aron si Timoteo “dili mahadlok” samtang kauban nila. (1 Cor. 4:17; 16:10, 11) Lagmit maulawon si Timoteo.

9. Unsa ang maayong panghunahuna, ug sa unsang paagi lahi kini sa espiritu sa katalaw?

⁹ Aron tabangan si Timoteo, si Pablo sa ulahi nagpahinumdom kaniya: “Kita wala hatagi sa Diyos ug espiritu sa katalaw, kondili sa gahom ug sa gugma ug sa maayong panghunahuna.” (2 Tim. 1:7) Ang “maayong panghunahuna” naglangkit sa katakos sa paghunahuna ug pagpangatarongan sa maalamong paagi. Naglakip kana sa katakos nga makaantos sa bisan unsang kahimtang. Ang pipila ka batan-on nga dili pa hamtong sa espirituwal nagpadayag sa espiritu sa katalaw ug naningkamot sa pag-ikyas sa mga suliran pinaagi sa sobrang pagkatulog ug pagtan-awg TV, pag-abuso sa droga o alkoholikong ilimnon, kanunayng pagparti, o seksuwal nga imoralidad. Ang mga Kristohanon gitambagan sa “pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.”—Tito 2:12.

10, 11. Sa unsang paagi ang maayong panghunahuna makatabang kanato nga mahimong lig-ong Kristohanon?

¹⁰ Ang Bibliya nagtambag sa “batan-ong mga lalaki sa pagbaton ug maayong panghunahuna.” (Tito 2:6) Aron masunod kining tambaga, kinahanglang mag-ampo ka ug mosalig sa kusog nga ihatag sa Diyos sa dihang makaatubang ug mga suliran. (Basaha ang 1 Pedro 4:7.) Sa ingon niana imong maugmad ang kinasingkasing nga pagsalig sa ‘kusog nga ihatag sa Diyos.’—1 Ped. 4:11.

¹¹ Ang maayong panghunahuna ug pag-ampo maoy nakatabang kang Carol. “Usa sa kinalisdang mga butang nga akong gihimo mao ang pagbarog batok sa imoral nga pagkinabuhi sa akong inahan,” siya miingon. “Apan ang pag-ampo nakatabang gayod kanako. Nasayod ko nga si Jehova nag-uban kanako, busa dili na ako mahadlok.” Hinumdomi, ang kalisod makapahimo kanimo nga mas maayong tawo ug makapalig-on kanimo. (Sal. 105:17-19; Lam. 3:27) Bisag unsay imong atubangon, ang Diyos dili gayod mobiya kanimo. Siya ‘sa pagkatinuod motabang kanimo.’—Isa. 41:10.

Pagpangandam Alang sa Malamposong Kaminyoon

12. Nganong angayng ipadapat sa usa ka Kristohanon nga buot magminyo ang prinsipyo sa Proverbio 20:25?

¹² Ang pipila ka batan-on nagdali sa pagminyo, kay sila nagtuo nga kini ang sulbad sa kasub-anan, kamingaw, kalaay, ug mga suliran sa panimalay. Apan, ang mga panaad sa kaminyoon seryosong butang. Ang pipila sa kapanahonan sa Bibliya nagdali sa paghimog sagradong panaad nga wala susiha pag-ayo kon unsay nalangkit niana. (Basaha ang Proverbio 20:25.) Usahay, ang mga batan-on dili maghunahuna kon unsay gikinahanglan aron molampos ang kaminyoon. Sa ulahi ilang nasayran nga daghan diay kaayo ang nalangkit kay sa ilang naamgohan.

13. Unsang mga pangutana ang angayng isukna niadtong nagplanong manarato, ug unsang mapuslanong tambag ang ilang mabatonan?

 ¹³ Busa sa dili pa manarato, suknaa ang imong kaugalingon: ‘Nganong buot kong magminyo? Unsay mga gilaoman ko sa kaminyoon? Siya na ba ang angay kanako? Andam na ba ko sa kinabuhing minyo?’ Sa pagtabang kanimo sa pagsusi gayod niini, ang “matinumanon ug maalamong ulipon” nagpatik ug detalyadong mga artikulo bahin sa kaminyoon. * (Mat. 24:45-47) Isipa nga tambag ni Jehova ang maong mga artikulo. Timbanga pag-ayo ang gipamulong niana ug ipadapat kana. Ayaw gayod “pagpanig-ingon sa usa ka kabayo o sa mula nga walay pagsabot.” (Sal. 32:8, 9) Magpakahingkod sa pagsabot bahin sa mga kinahanglanon sa kaminyoon. Kon naghunahuna kang andam ka nang manarato, hinumdomi kanunay nga mahimong “panig-ingnan . . . sa kaputli.”—1 Tim. 4:12.

14. Sa unsang paagi ang pag-ugmad ug personalidad nga sama kang Kristo makatabang kanimo sa dihang magminyo ka?

¹⁴ Ang espirituwal nga pagkahamtong adunay mga kaayohan usab pagkahuman sa kasal. Ang hingkod nang Kristohanon maningkamot nga makadangat sa “gidak-on nga iya sa kabug-osan ni Kristo.” (Efe. 4:11-14) Paningkamotan niya ang pag-ugmad sa personalidad nga sama kang Kristo. Ingong atong Panig-ingnan, “si Kristo wala magpahimuot sa iyang kaugalingon.” (Roma 15:3) Sa dihang ang bana ug asawa magpadayon sa pagpangita, dili sa ilang kaugalingong kaayohan, kondili nianang sa iyang kapikas, ang ilang panagtiayon mahimong malinawon ug malig-on. (1 Cor. 10:24) Ang bana magpakitag nagsakripisyo-sa-kaugalingong gugma, ug ang asawa matinguhaong magpasakop sa iyang bana sama nga si Jesus nagpasakop sa iyang Ulo.—1 Cor. 11:3; Efe. 5:25.

“Tumana sa Bug-os ang Imong Ministeryo”

15, 16. Sa unsang paagi nimo ikapadayag ang imong pag-uswag diha sa ministeryo?

¹⁵ Aron ipaila ang hinungdanong buluhaton ni Timoteo, si Pablo misulat: “Ako ugdang nga magsugo kanimo atubangan sa Diyos ug kang Kristo Jesus, . . . iwali ang pulong, magmadali diha niini.” Midugang pa siya pag-ingon: “Himoa ang buluhaton sa usa ka tig-ebanghelyo, tumana sa bug-os ang imong ministeryo.” (2 Tim. 4:1, 2, 5) Aron matuman ang maong buluhaton, si Timoteo kinahanglang “inamoma sa mga pulong sa pagtuo.”—Basaha ang 1 Timoteo 4:6.

¹⁶ Sa unsang paagi ikaw mahimong “inamoma sa mga pulong sa pagtuo”? Si Pablo misulat: “Magmakugihon diha sa publikong pagbasa, sa pagpanambag, sa pagpanudlo. Palandonga kining mga butanga; hatagi kinig bug-os nga pagtagad.” (1 Tim. 4:13, 15) Kinahanglang magmakugihon ka  sa personal nga pagtuon aron mouswag. Ang mga pulong “hatagi kinig bug-os nga pagtagad” nagkahulogan nga magmapuliki sa usa ka kalihokan. Komosta man ang imong mga batasan sa pagtuon? Gihatagan mo bag bug-os nga pagtagad “ang lawom nga mga butang sa Diyos”? (1 Cor. 2:10) O ang imong pagtuon maoy hapawhapaw lamang? Ang pagpamalandong sa imong gitun-an makatabang aron matandog ang imong kasingkasing.—Basaha ang Proverbio 2:1-5.

17, 18. (a) Unsang mga katakos ang angay nimong ugmaron? (b) Sa unsang paagi ang pag-ugmad sa tinamdan nga sama kang Timoteo makatabang kanimo sa ministeryo?

¹⁷ Usa ka batan-ong payunir nga ginganlag Michelle miingon: “Aron maepektibo sa ministeryo, duna koy maayong eskedyul sa personal nga pagtuon ug regular kong nagtambong sa mga tigom. Tungod niini, nagpadayon ang akong pag-uswag ingong Kristohanon.” Ang pagpayunir makatabang gayod kanimo aron mouswag ang imong katakos sa paggamit sa Bibliya diha sa ministeryo ug ingong Kristohanon. Paningkamot nga mahimong maayong magbabasa ug makahatag ug undanong mga komento panahon sa Kristohanong mga tigom. Ingong batan-on nga hamtong sa espirituwal, buot nimong mangandam aron matulon-anon ang imong bahin diha sa Teokratikanhong Tunghaan sa Ministeryo, nga sundon ang giasayn nga materyal.

¹⁸ Ang ‘paghimo sa buluhaton sa usa ka tig-ebanghelyo’ nagkahulogan sa paghimo sa imong ministeryo nga mas epektibo ug sa pagtabang sa uban aron sila maluwas. Gikinahanglan ang pag-ugmad ug “arte sa pagpanudlo.” (2 Tim. 4:2) Pakig-uban niadtong eksperyensiyado niining buluhatona aron imong makat-onan ang ilang mga paagi sa pagtudlo, ingon nga si Timoteo nakakat-on tungod sa pagpakig-uban kang Pablo. (1 Cor. 4:17) Sa paghisgot bahin niadtong iyang natabangan, si Pablo miingon nga iyang gipakig-ambit kanila dili lang ang maayong balita kondili iyang gihatag usab ang iyang ‘kalag mismo,’ o gigamit ang iyang kinabuhi mismo sa pagtabang kanila, tungod kay sila nahimong iyang minahal. (1 Tes. 2:8) Aron imong masunod ang panig-ingnan ni Pablo sa ministeryo, ang imong tinamdan kinahanglang sama kang Timoteo, nga matinagdanon gayod sa uban ug ‘nagpaulipon sa pagpauswag sa maayong balita.’ (Basaha ang Filipos 2:19-23.) Imo bang gipakita kining nagsakripisyo-sa-kaugalingong espiritu diha sa imong ministeryo?

Ang Pag-uswag Mohatag ug Tinuod nga Katagbawan

19, 20. Nganong makapalipay ang pag-uswag sa espirituwal?

¹⁹ Kinahanglan kang maningkamot aron mouswag sa espirituwal. Apan pinaagi sa mapailobong pag-ugmad sa imong mga kahanas sa pagtudlo, ngadtongadto makapribilehiyo ka sa ‘pagpadato sa daghan’ sa espirituwal nga paagi, ug sila mahimong imong “kalipay o purongpurong sa kasadya.” (2 Cor. 6:10; 1 Tes. 2:19) “Mas daghan akog panahon nga gigugol karon sa pagtabang sa uban,” saysay ni Fred, usa ka bug-os-panahong ministro. “Tinuod gayod nga adunay mas dakong kalipay sa paghatag kay sa pagdawat.”

²⁰ Bahin sa kalipay ug katagbawan nga iyang gibati tungod sa pag-uswag sa espirituwal, usa ka batan-ong payunir nga si Daphne miingon: “Mas nasuod ako kang Jehova kay mas nailhan nako siya. Kon pahimut-an mo si Jehova kutob sa imong maarangan, maayo kaayo ang imong bation—magmatagbawon ka gayod!” Bisan pag ang espirituwal nga pag-uswag dili kanunayng dayag sa mga tawo, si Jehova makakita kanunay ug nagpabili niini. (Heb. 4:13) Sa walay duhaduha, kamong batan-ong mga Kristohanon makahimaya ug makadayeg sa atong langitnong Amahan. Ipadayon ninyo ang paglipay sa iyang kasingkasing samtang inyong ipadayag ang inyong pag-uswag.—Prov. 27:11.

[Mga footnote]

Unsay Imong Nakat-onan?

• Unsay nalangkit sa pag-uswag ingong Kristohanon?

• Sa unsang paagi imong ikapadayag ang imong pag-uswag . . .

sa dihang makasinatig mga suliran?

sa pagpangandam alang sa kaminyoon?

sa ministeryo?

[Mga Pangutana sa Pagtuon]

[Hulagway sa panid 15]

Ang pag-ampo makatabang kanimo sa pagsagubang sa mga suliran

[Hulagway sa panid 16]

Sa unsang paagi maugmad sa batan-ong mga magmamantala ang epektibong mga paagi sa pagtudlo?