Mga Pangutana Gikan sa mga Magbabasa

Kanus-a gitambog si Satanas gikan sa langit?—Pin. 12:1-9.

Bisag ang basahong Pinadayag wala maghisgot sa eksaktong panahon sa pagtambog kang Satanas, kini naghisgot ug sunodsunod nga mga hitabo nga makatabang kanato sa pagbanabana kon kanus-a siya gitambog gikan sa langit. Ang una niini nga mga hitabo mao ang pagkatukod sa Mesiyanikong Gingharian. Human niana, “miulbo ang gubat sa langit,” diin napildi si Satanas ug sa kataposan siya gitambog sa yuta.

Ang Kasulatan klarong nagpaila nga niadtong 1914, “ang tinudlong mga panahon sa mga nasod” natapos ug ang Gingharian natukod. * (Luc. 21:24) Human niana, kanus-a miulbo ang gubat sa langit nga miresulta sa pagtambog kang Satanas?

Ang Pinadayag 12:4 nagkanayon: “Ang dragon [si Satanas] nagpadayon pagbarog atubangan sa babaye nga hapit nang manganak, aron nga, sa makapanganak na siya, tukbon niini ang iyang anak.” Kini nagpakita nga gustong pukanon dihadiha ni Satanas ang bag-ong Gingharian, kon posible sa pagkatukod gayod niini. Bisan tuod napakyas ang daotang tuyo ni Satanas tungod sa pagpangilabot ni Jehova, si Satanas determinado ug way-puas nga naningkamot sa pagwagtang sa bag-ong natukod nga Gingharian. Busa, makataronganong “si Miguel ug ang iyang mga manulonda” wala maglangan sa pagpapha sa ‘dragon ug sa mga manulonda niini’ gikan sa langit aron walay daotang mahitabo sa Gingharian. Kini nagpasabot nga si Satanas napildi ug gitambog wala madugay human matukod ang Gingharian niadtong 1914.

Lain pa nga angayng tagdon mao ang pagkabanhaw sa dinihogang mga Kristohanon nga sumala sa pamatuod sa Kasulatan, nagsugod wala madugay human matukod ang Gingharian. * (Pin. 20:6) Sanglit wala hisgoti nga may dinihogang mga igsoon ni Kristo nga miuban sa iyang pagpakiggubat batok sa dragon ug sa mga manulonda niini, natapos na ang gubat sa langit ug natambog na si Satanas ug ang iyang mga demonyo sa dihang nagsugod ang pagbanhaw sa mga igsoon ni Kristo.

Busa wala ipahayag sa Bibliya ang eksaktong panahon nga gitambog sa yuta si Satanas ug ang iyang mga demonyo. Bisan pa niana, dayag nga nahitabo kini wala madugay human maentrono si Jesu-Kristo sa langit niadtong 1914.

[Mga footnote]