Nganong Sundon “ang Kristo”?
Nganong Sundon “ang Kristo”?
“Kon si bisan kinsa buot mosunod kanako, padumilia siya sa iyang kaugalingon . . . ug magpadayon sa pagsunod kanako.”—LUCAS 9:23.
1, 2. Nganong hinungdanon nga atong hisgotan kon nganong angay natong sundon si Kristo?
NALIPAY gayod si Jehova nga makakita kaninyong mga bag-ong interesado ug mga batan-on taliwala sa iyang mga magsisimba sa yuta! Samtang kamo padayong nagtuon sa Bibliya, regular nga nagtambong sa Kristohanong mga tigom sa kongregasyon, ug nag-uswag sa inyong kahibalo bahin sa kamatuoran nga anaa sa Pulong sa Diyos nga makaluwas sa inyong kinabuhi, angay ninyong isipong seryoso ang pagdapit ni Jesus: “Kon si bisan kinsa buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit sa adlaw-adlaw ug magpadayon sa pagsunod kanako.” (Luc. 9:23) Si Jesus nag-ingon nga kinabubut-on gayod ninyong dumilian ang inyong kaugalingon ug mahimong iyang sumusunod. Busa hinungdanong atong hisgotan kon nganong angay natong sundon “ang Kristo.”—Mat. 16:13-16.
2 Komosta na man ang mga nagsunod na sa tunob ni Jesu-Kristo? Gitambagan kita nga “magpadayon sa paghimo niini nga mas bug-os pa.” (1 Tes. 4:1, 2) Bisan kon bag-ohan o dugay na sa kamatuoran, ang pagpamalandong kon nganong kita nagsunod kang Kristo makatabang kanato sa pagtuman sa tambag ni Pablo ug pagsunod Kaniya nga mas bug-os pa sa atong adlaw-adlaw nga pagkinabuhi. Atong hisgotan ang lima ka hinungdan nga buot natong sundon si Kristo.
Aron Mas Masuod Kang Jehova
3. Unsa ang duha ka paagi nga mailhan nato si Jehova?
3 Sa pagpakigsulti ni apostol Pablo sa mga taga-Atenas samtang ‘nagbarog taliwala sa Areopago,’ siya miingon: “Gilatid [sa Diyos] ang tinudlong mga panahon ug ang tinong mga utlanan sa mga puloy-anan sa mga tawo, aron sila mangita sa Diyos, kon sila man ugaling mangapkap man kaniya ug makakaplag gayod kaniya, bisan ug, sa pagkatinuod, siya dili halayo gikan sa matag usa kanato.” (Buh. 17:22, 26, 27) Makapangita kita sa Diyos ug ato gayod siyang mailhan. Pananglitan, kon motan-aw kita sa mga linalang sa Diyos ug mamalandong niana, daghan kitag makat-onan bahin sa iyang mga hiyas ug gahom. (Roma 1:20) Detalyado usab nga nagpadayag si Jehova sa iyang kaugalingon diha sa Bibliya. (2 Tim. 3:16, 17) Kon kita mas ‘mamalandong sa iyang kalihokan’ ug ‘mohatag ug mas dakong pagtagad sa iyang mga pakiglabot,’ mas mailhan nato si Jehova.—Sal. 77:12.
4. Sa unsang paagi ang pagsunod kang Kristo makatabang kanato nga mas masuod kang Jehova?
4 Ang usa ka maayong paagi nga mas masuod kang Jehova mao ang pagsunod kang Kristo. Pagkamahimayaon ni Jesus sa dihang kauban siya sa iyang Amahan “sa wala pa ang kalibotan”! (Juan 17:5) Siya mao “ang sinugdan sa kalalangan sa Diyos.” (Pin. 3:14) Isip “ang panganay sa tanang kalalangan,” siya dugay na kaayong nagkinabuhi sa langit uban sa iyang Amahan, si Jehova. Sa didto pa siya sa langit, dili lang kay basta migugol siyag panahon uban sa iyang Amahan. Siya ang personal nga kauban sa Diyos ug sila malipayong nag-uban sa pagbuhat, mao nga suod kaayo sila. Si Jesus wala lang makakita sa paagi sa pagbuhat sa iyang Amahan, nga nagmatikod sa Iyang pagbati ug mga hiyas, kondili iyang gitun-an ug gipadapat ang tanan niyang nakat-onan bahin sa iyang Amahan. Tungod niini, kining masinugtanong Anak nahisama gayod sa iyang Amahan mao nga ang Bibliya nagtawag kaniya nga “ang larawan sa dili-makita nga Diyos.” (Col. 1:15) Pinaagi sa pagsunod pag-ayo kang Kristo, kita mas masuod kang Jehova.
Aron Masundog si Jehova nga Mas Bug-os Pa
5. Unsay makatabang kanato sa pagsundog kang Jehova nga mas bug-os pa, ug ngano?
5 Kita ‘gibuhat sumala sa larawan sa Diyos, sumala sa iyang dagway,’ busa kita may katakos sa pagpasundayag sa iyang mga hiyas. (Gen. 1:26) Giawhag ni apostol Pablo ang mga Kristohanon nga “mahimong mga tigsundog sa Diyos, ingon nga hinigugmang mga anak.” (Efe. 5:1) Ang pagsunod kang Kristo makatabang kanato sa pagsundog sa atong langitnong Amahan. Tungod kini kay si Jesus labaw nga nagpasundayag sa panghunahuna, mga pagbati, ug personalidad sa Diyos ug siya nagtudlo nga mas bug-os pa bahin Kaniya kay ni bisan kinsa. Sa dinhi si Jesus sa yuta, siya nagpaila sa ngalan ni Jehova ug nagpadayag usab sa Iyang personalidad. (Basaha ang Mateo 11:27.) Kini gihimo ni Jesus pinaagi sa iyang mga pulong ug mga buhat, sa iyang mga pagpanudlo ug panig-ingnan.
6. Unsay gipadayag sa mga pagpanudlo ni Jesus bahin kang Jehova?
6 Pinaagi sa iyang mga pagpanudlo, gipakita ni Jesus kon unsay gikinahanglan sa Diyos gikan kanato ug ang iyang pagbati sa iyang mga magsisimba. (Mat. 22:36-40; Luc. 12:6, 7; 15:4-7) Pananglitan, human kutloa ang usa sa Napulo ka Sugo—“dili ka manapaw”—gipatin-aw ni Jesus kon unsay pag-isip sa Diyos bahin sa nagakahitabo sulod sa kasingkasing sa usa ka tawo sa dili pa siya makapanapaw. Siya miingon: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Ex. 20:14; Mat. 5:27, 28) Human ipahayag ang interpretasyon sa mga Pariseo bahin sa usa ka pamulong diha sa Balaod—“higugmaon mo ang imong silingan ug dumtan ang imong kaaway”—gipahayag ni Jesus ang panghunahuna ni Jehova, nga miingon: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo.” (Mat. 5:43, 44; Ex. 23:4; Lev. 19:18) Ang pagkahibalo sa panghunahuna ug pagbati sa Diyos ug kon unsay iyang gikinahanglan gikan kanato makatabang kanato sa pagsundog kaniya nga mas bug-os pa.
7, 8. Unsay atong makat-onan bahin kang Jehova gikan sa panig-ingnan ni Jesus?
7 Si Jesus nagpasundayag sa personalidad sa iyang Amahan pinaagi sa iyang pagkinabuhi. Sa dihang mabasa nato sa Ebanghelyo nga si Jesus nahingawa sa mga kabos, misimpatiya sa mga nag-antos, nasuko sa iyang mga tinun-an nga nagbadlong sa mga bata, dili ba kita makahinapos nga kana usab ang gibati sa Amahan? (Mar. 1:40-42; 10:13, 14; Juan 11:32-35) Matikdi kon sa unsang paagi ang mga gihimo ni Jesus nagpaila sa mga hiyas sa Diyos. Dili ba ang mga milagro ni Kristo nagpasundayag sa iyang talagsaong gahom? Apan kana nga gahom wala gayod niya gamita alang sa personal nga kaayohan o sa pagdaot sa uban. (Luc. 4:1-4) Ang pagpalayas niya sa hakog nga mga magpapatigayon gikan sa templo tin-awng nagpakita sa iyang pagkamatarong. (Mar. 11:15-17; Juan 2:13-16) Ang iyang mga pagpanudlo ug madanihong mga pulong nga nakatandog sa kasingkasing sa mga tawo nagpaila nga ang iyang kaalam “labaw pa kay kang Solomon.” (Mat. 12:42) Ug ang gugma nga gipasundayag ni Jesus pinaagi sa paghalad sa iyang kinabuhi alang sa uban maayong pagkahubit sa Bibliya sa dihang kini nag-ingon: “Walay usa nga may gugmang labaw pa kay niini.”—Juan 15:13.
8 Ang Anak sa Diyos hingpit nga nagpadayag kang Jehova diha sa tanan niyang gisulti ug gibuhat mao nga siya nakaingon: “Siya nga nakakita kanako nakakita usab sa Amahan.” (Basaha ang Juan 14:9-11.) Ang pagsunod kang Kristo sama ra sa pagsundog kang Jehova.
Si Jesus Mao ang Usa nga Dinihogan ni Jehova
9. Kanus-a ug sa unsang paagi si Jesus nahimong Usa nga Dinihogan sa Diyos?
9 Tagda ang nahitabo sa tinghunlak sa 29 K.P. sa dihang ang 30-anyos nga si Jesus miduol kang Juan Bawtista. “Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug iyang nakita nga mikunsad diha kaniya ang espiritu sa Diyos ingon sa usa ka salampati.” Niadtong panahona siya nahimong ang Kristo o Mesiyas ug gipaila ni Jehova nga si Jesus mao ang iyang Usa nga Dinihogan, nga nag-ingon: “Kini mao ang akong Anak, ang hinigugma, nga akong giuyonan.” (Mat. 3:13-17) Pagkamaayong katarongan nga kita mosundog kang Kristo!
10, 11. (a) Unsang mga paagi gigamit ang titulong Kristo may kalabotan kang Jesus? (b) Nganong kinahanglan natong sundon si Jesu-Kristo?
10 Sa Bibliya, ang titulo nga “Kristo” gigamit sa lainlaing paagi may kalabotan kang Jesus, sama sa Jesu-Kristo, Kristo Jesus, ug ang Kristo. Si Jesus mismo ang unang migamit sa terminong “Jesu-Kristo”—ang ngalan gisundan sa titulo. Diha sa iyang pag-ampo sa iyang Amahan, siya miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Kini nga paggamit nagpaila sa usa nga gipadala sa Diyos ug nahimong iyang Usa nga Dinihogan. Sa dihang ang titulo nag-una sa ngalan sama diha sa “Kristo Jesus,” ang gipasiugda mao ang posisyon o katungdanan nga iyang gihuptan. (2 Cor. 4:5) Ang paggamit sa ekspresyong “ang Kristo,” nga may definite article nga nag-una sa titulo maoy laing paagi sa pagpasiugda sa katungdanan ni Jesus ingong ang Mesiyas.—Buh. 5:42.
11 Bisag giunsa paggamit ang titulong “Kristo” may kalabotan kang Jesus, kini nagpasiugda niining hinungdanong kamatuoran: Bisan tuod ang Anak sa Diyos mianhi sa yuta ingong tawo ug nagpahibalo sa kabubut-on sa iyang Amahan, siya dili ordinaryong tawo ni usa lang ka manalagna; siya mianhi aron mahimong ang Usa nga Dinihogan ni Jehova. Kinahanglan nato Siyang sundon.
Si Jesus ang Bugtong Dalan sa Kaluwasan
12. Unsay gisulti ni Jesus kang apostol Tomas nga hinungdanon alang kanato?
12 Ang lain pang hinungdanong katarongan sa padayong pagsunod sa Mesiyas makita sa mga pulong ni Jesus ngadto sa iyang matinumanong mga apostoles, nga gisulti pipila ka oras una siya mamatay. Agig tubag sa pangutana ni Tomas bahin sa pagbiya ug pag-andam ug usa ka dapit alang kanila, si Jesus miingon: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:1-6) Si Jesus nakigsulti niadto sa 11 ka matinumanong mga apostoles. Iya silang gisaaran ug usa ka dapit sa langit, apan ang iyang mga pulong hinungdanon usab alang niadtong naglaom nga makabaton ug kinabuhing walay kataposan sa yuta. (Pin. 7:9, 10; 21:1-4) Ngano man?
13. Sa unsang diwa nga si Jesus mao “ang dalan”?
13 Si Jesu-Kristo mao “ang dalan.” Ang buot ipasabot mao nga pinaagi lamang kaniya nga kita makaduol sa Diyos. Tinuod kini may kalabotan sa pag-ampo, kay sa pag-ampo pinaagi kang Jesus makasalig kita nga ihatag sa Amahan ang bisan unsa nga atong pangayoon nga nahiuyon sa Iyang kabubut-on. (Juan 15:16) Apan si Jesus mao “ang dalan” sa lain pang diwa. Tungod sa sala ang katawhan nahimulag sa Diyos. (Isa. 59:2) Gihatag ni Jesus ang “iyang kalag nga usa ka lukat baylo sa daghan.” (Mat. 20:28) Ingong resulta, ang Bibliya nagpatin-aw: “Ang dugo ni Jesus . . . nagahinlo kanato gikan sa tanang sala.” (1 Juan 1:7) Sa ingon ang Anak nag-abli sa dalan aron ang tawo mapasig-uli ngadto sa Diyos. (Roma 5:8-10) Pinaagi sa pagtuo kang Jesus ug pagsugot kaniya nga kita makabatog inuyonang relasyon uban sa Diyos.—Juan 3:36.
14. Sa unsang paagi si Jesus “ang kamatuoran”?
14 Si Jesus mao “ang kamatuoran” dili lamang kay siya kanunayng nagsulti ug nagkinabuhi sumala sa kamatuoran kondili natuman usab kaniya ang tanang tagna nga nahisulat bahin sa Mesiyas. “Bisag unsa pa ka daghan ang mga saad sa Diyos,” misulat si apostol Pablo, “sila nahimong Oo pinaagi kaniya.” (2 Cor. 1:20) Bisan ang ‘landong sa maayong mga butang nga moabot’ nga diha sa Moisesnong Balaod natuman kang Kristo Jesus. (Heb. 10:1; Col. 2:17) Si Jesus mao ang sentro sa tanang tagna, ug pinaagi sa maong mga tagna atong masabtan ang iyang pangunang papel sa pagkatuman sa katuyoan ni Jehova. (Pin. 19:10) Aron makapahimulos sa katumanan sa katuyoan sa Diyos alang kanato, kinahanglang sundon nato ang Mesiyas.
15. Sa unsang diwa si Jesus mao “ang kinabuhi”?
15 Si Jesus mao “ang kinabuhi” tungod kay iyang gipalit ang tawhanong banay pinaagi sa iyang dugo, ug ang kinabuhing walay kataposan maoy gasa nga gihatag sa Diyos “pinaagi ni Kristo Jesus nga atong Ginoo.” (Roma 6:23) Si Jesus mao usab “ang kinabuhi” alang niadtong nangamatay. (Juan 5:28, 29) Hunahunaa usab kon unsay iyang buhaton ingong Hataas nga Saserdote sulod sa iyang Usa ka Libo ka Tuig nga Pagmando. Iyang ipahinabo nga ang iyang mga ginsakpan sa yuta maluwas hangtod sa hangtod gikan sa sala ug kamatayon!—Heb. 9:11, 12, 28.
16. Nganong atong sundon si Jesus?
16 Busa ang tubag ni Jesus kang Tomas hinungdanon gayod alang kanato. Si Jesus mao ang dalan ug ang kamatuoran ug ang kinabuhi. Siya mao ang gipadala sa Diyos sa kalibotan aron ang kalibotan maluwas pinaagi kaniya. (Juan 3:17) Walay makaadto sa Amahan gawas nga pinaagi kaniya. Ang Bibliya tin-awng nagaingon: “Walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.” (Buh. 4:12) Busa bisan kon unsay atong kagikan, kita magmaalamon kon kita motuo kang Jesus, mosunod kaniya, ug sa ingon magiyahan ngadto sa kinabuhi.—Juan 20:31.
Gisugo Kita sa Pagpatalinghog Kang Kristo
17. Nganong hinungdanon nga kita magpatalinghog sa Anak?
17 Si Pedro, Juan, ug si Santiago nakakita sa pagkausab sa panagway ni Jesus. Ug niadtong higayona nakadungog sila ug tingog gikan sa langit nga nag-ingon: “Kini mao ang akong Anak, ang usa nga pinili. Patalinghog kamo kaniya.” (Luc. 9:28, 29, 35) Hinungdanon nga atong sundon ang sugo nga magpatalinghog sa Mesiyas.—Basaha ang Buhat 3:22, 23.
18. Sa unsang paagi makapatalinghog kita kang Jesu-Kristo?
18 Ang pagpatalinghog kang Jesus naglakip sa ‘pagtutok kaniya, nga tagdon pag-ayo ang iyang panig-ingnan.’ (Heb. 12:2, 3) Busa, maayo nga kita “mohatag ug labaw pa kay sa kasagarang pagtagad sa mga butang” nga atong nabasa diha sa Bibliya ug sa mga basahon sa “matinumanon ug maalamong ulipon,” ingon man sa atong nadungog bahin kaniya panahon sa Kristohanong mga tigom. (Heb. 2:1; Mat. 24:45) Ingong iyang mga karnero, magmaikagon kita sa pagpatalinghog ug sa pagsunod kang Jesus.—Juan 10:27.
19. Unsay makatabang kanato aron padayon kitang mosunod kang Kristo?
19 Makapadayon ba kita sa pagsunod kang Kristo bisan pa sa mga suliran? Oo, makahimo kita basta ‘padayon natong huptan ang sumbanan sa makapahimsog nga mga pulong’ pinaagi sa pagpadapat sa atong nakat-onan “uban sa pagtuo ug gugma maylabot kang Kristo Jesus.”—2 Tim. 1:13.
Unsay Imong Nakat-onan?
• Nganong ang pagsunod kang Kristo mas makapasuod kanato kang Jehova?
• Nganong ang pagsundog kang Jesus sama ra sa pagsundog kang Jehova?
• Sa unsang paagi si Jesus mao “ang dalan ug ang kamatuoran ug ang kinabuhi”?
• Nganong kinahanglan kitang magpatalinghog sa Usa nga Dinihogan ni Jehova?
[Mga Pangutana sa Pagtuon]
[Hulagway sa panid 29]
Ang mga pagpanudlo ni Jesus nagpasundayag sa halangdong mga panghunahuna ni Jehova
[Hulagway sa panid 30]
Kinahanglang sundon nato nga matinumanon ang Usa nga Dinihogan ni Jehova
[Hulagway sa panid 32]
Si Jehova nagpahayag: “Kini mao ang akong Anak . . . patalinghog kamo kaniya”