“Panahon sa Paghilom”

“ANG pagsulti plata, ang paghilom bulawan.” Kini usa ka panultihon nga gituohang gikan sa Sidlakan. Sumala sa Brewer’s Dictionary of Phrase and Fable, kini mao ang Hebreohanong katumbas: “Kon usa ka siklo ang bili sa usa ka pulong, duha ka siklo ang bili sa paghilom.” Ug ang maalamong si Haring Solomon sa karaang Israel misulat: “Adunay tinudlong panahon alang sa tanang butang, bisan usa ka panahon alang sa matag kalihokan ilalom sa mga langit . . . panahon sa paghilom ug panahon sa pagsulti.”—Eccl. 3:1, 7.

Apan kanus-a angay ang paghilom imbes pagsulti? Ang pulong “hilom” ug “paghilom” makita kapin sa usa ka gatos ka beses diha sa Bibliya. Ang konteksto niining mga pulonga nagpakita nga adunay tulo ka natad sa kinabuhi nga angay ang paghilom. Susihon nato ang paghilom ingong usa ka ilhanan sa pagtahod, ingong pamatuod sa pagkamaalamon ug katakos sa pag-ila, ug ingong tabang sa pagpamalandong.

Usa ka Ilhanan sa Pagtahod

Ang paghilom maoy usa ka timailhan sa pagtahod o pagpasidungog. Ang manalagnang si Habacuc miingon: “Si Jehova anaa sa iyang balaang templo. Paghilom sa atubangan niya, tibuok nga yuta!” (Hab. 2:20) Ang matuod nga mga magsisimba angay nga “maghulat, nga mahilom gayod, alang sa kaluwasan ni Jehova.” (Lam. 3:26) Ang salmista miawit: “Magpakahilom ka sa atubangan ni Jehova ug maghulat ka nga mapangandoyon kaniya. Ug ayaw pagpanginit kang bisan kinsa nga nagmalamposon sa iyang dalan.”—Sal. 37:7.

Makadayeg ba kita kang Jehova bisag dili kita molitok ug mga pulong? May mga higayon nga inigkakita nato sa matahom nga kalalangan, kita walay pulong ikalitok tungod sa atong kahingangha. Ang paghunahuna bahin nianang katahoman maoy usa ka paagi sa pagdayeg sa Maglalalang diha sa atong kasingkasing. Gisugdan sa salmistang si David ang usa sa iyang mga awit: “Alang kanimo adunay pagdayeg—kahilom—, Oh Diyos, sa Zion; ug nganha kanimo pagabayran ang panaad.”—Sal. 65:1.

Si Jehova mismo takos sa atong pagtahod  ingon man usab ang iyang mga pulong. Pananglitan, sa dihang ang manalagnang si Moises nagpahayag sa iyang panamilit nga pakigpulong ngadto sa nasod sa Israel, siya ug ang mga saserdote nagtambag sa tanang presente: ‘Hilom . . . , ug mamati kamo sa tingog ni Jehova nga inyong Diyos.’ Gibaoran bisan ang mga batang Israelinhon sa pagpamati pag-ayo sa dihang ang mga anak sa Israel nagtigom alang sa pagbasa sa Balaod sa Diyos. “Tigoma ang katawhan,” miingon si Moises, “ang mga lalaki ug ang mga babaye ug ang mga bata . . . aron sila makakat-on.”—Deut. 27:9, 10; 31:11, 12.

Sa atong panahon, angay usab nga mamati nga matinahoron ang mga magsisimba ni Jehova sa mga instruksiyon nga ilang madungog sa Kristohanong mga panagkatigom, lakip sa dagkong mga kombensiyon! Kon dunay mga pakigpulong bahin sa mga kamatuoran sa Bibliya sa entablado, ang way-hinungdang estoryahay maoy pagpakitag kawalay-pagtahod sa Pulong sa Diyos ug sa iyang organisasyon. Ang panahon sa sesyon maoy panahon sa paghilom ug pagpamati.

Bisan sa pribadong mga estoryahay, ang pagpamati pag-ayo maoy pagpakitag pagkamatinahoron. Pananglitan, ang patriarkang si Job miingon sa mga nag-akusar kaniya: “Tudloi ako, ug ako, sa akong bahin, maghilom.” Si Job hilom nga namati sa dihang sila misulti. Ug sa dihang iya nang turno sa pagsulti, siya mihangyo: “Paghilom kamo sa akong atubangan, aron ako makasulti.”—Job 6:24; 13:13.

Pamatuod sa Pagkamaalamon ug Katakos sa Pag-ila

Ang Bibliya nag-ingon: “Siya nga nagapugong sa iyang mga ngabil nagalihok nga maalamon.” “Ang tawo nga halapad sa katakos sa pag-ila nagahilom.” (Prov. 10:19; 11:12) Tagda nga si Jesus nagpakitag pagkamaalamon ug katakos sa pag-ila pinaagi sa pagpakahilom. Sa dihang nasabtan ni Jesus nga ang pagpakigsulti ngadto sa iyang mga kaaway walay kapuslanan, “si Jesus nagpakahilom.” (Mat. 26:63) Sa dihang sa ulahi si Jesus gihusay atubangan ni Pilato, siya “wala motubag.” Siya nagmaalamon ug iyang gipalabi nga ang iyang mga buhat na lang ang mosulti puli kaniya.—Mat. 27:11-14.

Maalamon usab nga magpakahilom ilabina kon pasuk-on ka. “Siya nga mahinay sa kasuko dagaya sa katakos sa pag-ila,” matod sa usa ka proverbio, “apan ang walay pailob nagabayaw sa kabuangan.” (Prov. 14:29) Ang pagdalidali sa pagtubag ilawom sa makapasuko nga kahimtang moresulta sa sakit nga mga pulong nga tingali basolan sa ulahi. Nianang mga kahimtanga, ang atong mga pulong morag kabuangan, ug mahimong matugaw ang atong hunahuna ingong resulta niana.

Maalamong bantayan nato ang atong sinultihan atubangan sa mga tawong daotan. Kon makaatubang kitag mga mabiaybiayon sa atong pagsangyaw, dili nato sila angay tubagon. Dugang pa, maalamon ang paghilom usahay sa dihang ang mga eskolmet o kauban sa trabaho moestoryag bastos nga mga komedya o mosultig hilas nga mga pulong aron dili sila makaingon nga uyon ra kita niana. (Efe. 5:3) “Taoran ko ug busal ingon nga bantay ang akong baba,”  misulat ang salmista, “samtang may tawong daotan sa akong atubangan.”—Sal. 39:1.

Ang tawo nga “halapad sa katakos sa pag-ila” dili mobutyag ug sekreto. (Prov. 11:12) Ug dili gayod ibutyag sa matuod nga Kristohanon ang mga sekreto. Ang mga ansiyano ilabinang magbantay aron ang mga membro sa kongregasyon dili mawad-ag pagsalig kanila.

Bisag ang paghilom walay mga pulong, kini dunay kaayohan. Ang Ingles nga tagsulat sa ika-19ng siglo nga si Sydney Smith misulat bahin sa usa niya ka katalirongan: “Ang iyang paghilom panagsa nakapahimo kaniya nga maayo kaayong ikaestorya.” Sa pagkatinuod, sa dihang mag-estorya ang managhigala, kinahanglang dili ra usa ang magsigeg sulti. Ang maayong ikaestorya angayng maantigo usab nga maminaw.

“Sa daghang mga pulong tino nga adunay kalapasan,” nagpasidaan si Solomon, “apan siya nga nagapugong sa iyang mga ngabil nagalihok nga maalamon.” (Prov. 10:19) Busa, kon diyutay ray isulti, lagmit diyutay ra ang sayop. Sa pagkatinuod, “bisan ang usa ka buangbuang, kon magapakahilom, pagaisipon nga maalamon; si bisan kinsa nga nagatak-om sa iyang mga ngabil, ingon nga may pagsabot.” (Prov. 17:28) Busa, atong iampo kang Jehova nga ‘butangan niya ug bantay ang pultahan sa atong mga ngabil.’—Sal. 141:3.

Makatabang sa Pagpamalandong

Mahitungod sa tawo nga nagsubay sa dalan sa pagkamatarong, ang Kasulatan nagsulti kanato nga ‘sa balaod [sa Diyos] siya nagabasa sa hinayng tingog sa adlaw ug gabii.’ (Sal. 1:2) Ang The Amplified Bible mabasa: “Sa Iyang balaod . . . siya nagbatasan sa pagpamalandong . . . sa adlaw ug sa gabii.” Kanus-a maayong mamalandong?

Si Isaac, ang anak sa patriarkang si Abraham, “naglakawlakaw aron mamalandong didto sa kapatagan sa hapit na mogabii.” (Gen. 24:63) Iyang gipili ang panahon ug dapit nga hilom aron mamalandong. Si Haring David namalandong sa hilom nga panahon sa mga pagbantay sa gabii. (Sal. 63:6) Ang hingpit nga tawong si Jesus nangita gayod ug higayon nga makainusara aron makapamalandong didto sa hilit nga kabukiran, mga desyerto, ug ubang awaaw nga mga dapit.—Mat. 14:23; Luc. 4:42; 5:16.

Ang kahilom makaayo kanato. Makatabang kini kanato sa pagsusi sa atong kaugalingon, nga usa ka kinahanglanon aron kita mouswag. Makabaton kitag dugang kalinaw sa kaisipan. Kon kita mamalandong sa hilom nga mga panahon, mahimo kitang mas makasaranganon ug mapainubsanon ug mas maapresyar nato ang hinungdanong mga butang sa kinabuhi.

Bisan pag ang paghilom mahimong usa ka maayong hiyas, may panahon usab alang sa pagsulti. (Eccl. 3:7) Ang matuod nga mga magsisimba karon puliking nagsangyaw sa maayong balita sa Gingharian sa Diyos “sa tibuok gipuy-ang yuta.” (Mat. 24:14) Samtang nagkadaghan ang mga magsisimba, nagkadaghan usab ang makadungog kanila. (Miq. 2:12) Busa, makig-uban ta sa madasigong mga magsasangyaw sa maayong balita sa Gingharian nga nagmantala sa kahibulongang mga buhat sa Diyos. Samtang kita nagpakig-ambit niining hinungdanong buluhaton, hinaot atong ipasundayag diha sa atong paagi sa pagkinabuhi nga atong giila nga adunay mga higayon nga angay ang paghilom.

[Hulagway sa panid 3]

Angay kitang mamati ug makakat-on panahon sa atong Kristohanong mga tigom

[Hulagway sa panid 4]

Angay nga dili nato tubagon ang mga mabiaybiayon samtang kita nagsangyaw

[Hulagway sa panid 5]

Ang paghilom makatabang sa pagpamalandong