Sundoga ang Pagkamaunongon ni Itai

“DAKO ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari nga walay kataposan. Kinsa bay dili mahadlok kanimo, Jehova, ug dili maghimaya sa imong ngalan, tungod kay ikaw lamang ang maunongon?” Kini nga awit nga giawit sa langit “niadtong nagmadaogon batok sa mapintas nga mananap ug sa iyang larawan” nagpatugbaw gayod sa pagkamaunongon sa Diyos. (Pin. 15:2-4) Buot ni Jehova nga kining iyang tilinguhaong hiyas ipakita usab sa iyang mga magsisimba.—Efe. 4:24.

Sa laing bahin, naningkamot gayod si Satanas nga Yawa nga ipahilayo ang yutan-ong mga alagad ni Jehova gikan sa gugma sa Diyos nga ilang gisimba. Apan daghan gihapon ang nagmaunongon sa Diyos bisan pa sa grabeng mga kalisdanan. Pagkamapasalamaton nato nga kini gipabilhan ni Jehova! Sa pagkatinuod kita gipasaligan: “Si Jehova mahigugmaon sa hustisya, ug dili niya pagabiyaan ang mga maunongon  kaniya.” (Sal. 37:28) Aron kita matabangan nga magmaunongon, girekord niya sa Bibliya ang mga buhat sa iyang maunongong mga alagad. Usa niini mao ang asoy ni Itai nga Gitihanon.

‘Usa ka Langyaw ug Destiyero’

Lagmit si Itai maoy usa ka lumad sa iladong siyudad sa Gat sa Palestina, ang lugar sa higanteng si Goliat ug sa ubang gibantog nga mga kaaway sa Israel. Sa Bibliya, una natong nailhan ang hanas nga manggugubat nga si Itai sa dihang si Absalom mialsa batok kang Haring David. Si Itai ug ang 600 ka Pilistihanon nga misunod kaniya maoy mga destiyero sa kasilinganan sa Jerusalem.

Ang kahimtang ni Itai ug sa iyang mga tawo lagmit nagpahinumdom kang David sa dihang siya mismo nagtagotago isip destiyero kaniadto. Siya ug ang iyang 600 ka Israelinhong mga manggugubat namalhin sa teritoryo sa Palestina nga sakop ni Akis, ang hari sa Gat. (1 Sam. 27:2, 3) Unsay gihimo ni Itai ug sa iyang mga tawo sa dihang si Absalom mialsa batok kang David? Sila ba midapig kang Absalom, way gidapigan, o midapig ba hinuon kang David?

Handurawa nga si David mikalagiw gikan sa Jerusalem ug mihunong sa Bet-merhak, nga nagkahulogang “Ang Halayong Balay.” Tingali mao kadto ang kataposang balay sa Jerusalem paingon sa Bukid sa mga Olibo sa dili pa motabok sa Walog sa Kidron. (2 Sam. 15:17) Dinhi gisusi ni David ang iyang mga manggugubat samtang sila nangagi sa iyang atubangan. Dayon iyang nakita dili lamang ang iyang maunongong mga katagilungsod kondili didto usab ang tanang Keretnon ug mga Peletnon. Didto usab ang tanang Gitihanon, si Itai ug ang iyang 600 ka manggugubat.—2 Sam. 15:18.

Kay gitukmod sa tim-os nga pagbati, si David miingon kang Itai: “Nganong mouban ka man usab kanamo? Bumalik ka ug puyo uban sa hari [buot niyang ipasabot si Absalom]; kay ikaw usa ka langyaw ug, gawas pa, ikaw usa ka destiyero gikan sa imong dapit. Kagahapon ka lang nahiabot ug karon palatagawon ko ba ikaw uban kanamo, aron molakaw sa dihang ako molakaw bisan asa nga ako moadto? Bumalik ka ug dad-a pagbalik ang imong mga igsoon uban kanimo, ug hinaot si Jehova magpakita kanimo ug mahigugmaong-kalulot ug pagkakasaligan!”—2 Sam. 15:19, 20.

Ang bug-os nga pagkamaunongon ni Itai makita sa dihang siya mitubag: “Ingon nga si Jehova buhi ug ingon nga ang akong ginoo nga hari buhi, sa dapit diin moadto ang akong ginoo nga hari, alang man sa kamatayon o sa kinabuhi, didto usab moadto ang imong sulugoon!” (2 Sam. 15:21) Kining mga pulonga lagmit nagpahinumdom kang David sa gisulti sa iyang apohan sa tuhod nga si Ruth. (Ruth 1:16, 17) Natandog ang kasingkasing ni David sa gisulti ni Itai, busa siya miingon: “Lakaw ug tabok” sa Walog sa Kidron. Busa “si Itai nga Gitihanon mitabok, ug ang tanan usab niyang mga tawo ug ang tanang kabataan nga uban kaniya.”—2 Sam. 15:22.

“Alang sa Pagtudlo Kanato”

“Ang tanang butang nga gisulat kanhi gisulat alang sa pagtudlo kanato,” miingon ang Roma 15:4. Busa makapangutana kita, Unsay atong makat-onan sa panig-ingnan ni Itai? Matikdi kon unsay nakadasig kang Itai nga magmaunongon kang David. Bisan pag siya langyaw ug destiyero gikan sa Palestina, giila ni Itai si Jehova ingong buhi nga Diyos ug si David mao ang dinihogan sa Diyos. Wala tagda ni Itai ang panagbangi sa mga Israelinhon ug mga Pilistihanon. Iyang gitamod si David dili lamang ingong usa nga nakapatay sa Pilistihanong si Goliat ug sa iyang daghang katagilungsod. (1 Sam. 18:6, 7) Nakita usab niya nga si David mahigugmaon kang Jehova ug namatikdan niya ang talagsaong mga hiyas ni David. Sa baylo, dako usab ang pagtamod ni David kang Itai. Ngani, gibutang ni David ang ikatulong bahin sa iyang kasundalohan “ubos sa pagmando ni Itai” sa pangataposan nilang pagpakig-away batok sa kasundalohan ni Absalom!—2 Sam. 18:2.

Kita usab maningkamot nga dili magmapihigon sa mga tawo nga lahi ug kultura, rasa, o padayong mobatig kayugot kanila, kondili atong  ilhon ang ilang maayong mga hiyas. Ang kasuod ni David ug ni Itai nagpakita nga kon atong nailhan ug gihigugma si Jehova, atong mabuntog ang maong mga babag.

Samtang atong palandongon ang panig-ingnan ni Itai, kita makapangutana: ‘Ako ba usab magmaunongon sa Mas Dakong David, si Kristo Jesus? Ako ba magmaunongon pinaagig madasigong pagsangyaw sa maayong balita sa Gingharian ug paghimog tinun-an?’ (Mat. 24:14; 28:19, 20) ‘Magmaunongon ba gihapon ako bisan pa sa mga kalisdanan sa kinabuhi?’

Makapahimulos usab ang mga ulo sa pamilya kon ilang palandongon ang panig-ingnan ni Itai. Ang iyang pagsuportar ug pag-unong sa dinihogang hari sa Diyos nga si David nakaapektar sa iyang mga tawo. Sa samang paagi, ang mga desisyon sa ulo sa pamilya nga mosuportar sa matuod nga pagsimba makaapektar sa ilang pamilya ug mahimong magdalag temporaryong mga kalisdanan. Apan kita gipasaligan: “Sa maunongon [si Jehova] magmaunongon.”—Sal. 18:25.

Human sa pagpakiggubat ni David kang Absalom, wala nay gisulti ang Bibliya bahin kang Itai. Apan ang mubong asoy bahin kaniya naghatag kanatog talagsaong pagsabot sa iyang pagkatawo niadtong malisod nga yugto sa kinabuhi ni David. Ang paglakip niini diha sa Kasulatan nagpamatuod nga si Jehova moila ug moganti gayod sa mga maunongon.—Heb. 6:10.