Ang Matinumanong Piniyalan ug ang Nagamandong Lawas Niini

“Kinsa sa pagkatinuod ang matinumanong piniyalan, ang usa nga maalamon, kinsa itudlo sa iyang agalon sa pagdumala sa iyang pundok sa mga tig-alagad aron sa pagpadayon paghatag kanila sa ilang taganang pagkaon sa hustong panahon?”—LUC. 12:42.

1, 2. Unsang hinungdanong pangutana ang gisukna ni Jesus samtang naghatag sa mga ilhanan sa kataposang mga adlaw?

 SA DIHANG gihatag ni Jesus ang mga ilhanan sa kataposang mga adlaw, siya nangutana: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon?” Dayon, si Jesus midugang nga kining maong ulipon igatudlo ibabaw sa tanang kabtangan sa iyang Agalon ingong ganti sa iyang pagkamatinumanon.—Mat. 24:45-47.

² Pipila ka bulan una pa niana, si Jesus misukna ug susamang pangutana. (Basaha ang Lucas 12:42-44.) Iyang gitawag ang ulipon ingong “piniyalan” ug gitawag ang “mga sulugoon sa panimalay” ingong “iyang pundok sa mga tig-alagad.” Ang usa ka piniyalan maoy tagdumala sa balay o administrador kinsa adunay awtoridad  ibabaw sa mga ulipon. Apan, ang piniyalan ulipon usab. Kinsa man kining ulipon, o piniyalan, ug sa unsang paagi siya nagtagana ug “pagkaon sa hustong panahon”? Hinungdanon nga atong ilhon ang instrumento nga gigamit sa pagtaganag espirituwal nga pagkaon.

3. (a) Giunsa pagpatin-aw sa mga komentarista sa Kakristiyanohan ang gipamulong ni Jesus bahin sa “ulipon”? (b) Kinsa ang “piniyalan,” o “ulipon,” ug kinsa ang “mga tig-alagad,” o “mga sulugoon sa panimalay”?

³ Ang mga komentarista sa Kakristiyanohan naghunahuna nga kining gipamulong ni Jesus nagtumong niadtong adunay responsibilidad taliwala sa nag-angkong mga Kristohanon. Apan si Jesus, ang “agalon” diha sa ilustrasyon, wala mag-ingon nga magtudlo siyag daghang ulipon diha sa lainlaing sekta sa Kakristiyanohan. Hinunoa, siya tatawng nag-ingon nga aduna lamay usa ka “piniyalan,” o “ulipon,” nga iyang itudlo ibabaw sa tanan niyang kabtangan. Busa ingon sa subsob nga gipatin-aw niining magasina, ang piniyalan kinahanglang maghawas sa “gamayng panon” sa dinihogang mga tinun-an ingong usa ka pundok. Sila gihisgotan ni Jesus diha sa konteksto sa Ebanghelyo ni Lucas. (Luc. 12:32) Ang “pundok sa mga tig-alagad,” o “mga sulugoon sa panimalay,” nagtumong gihapon sa maong pundok apan nagpasiugda sa ilang katungdanan ingong indibiduwal. Motungha ang makaiikag nga pangutana, Ang indibiduwal ba nga membro niining ulipon nga matang makigbahin sa pagtaganag espirituwal nga pagkaon sa hustong panahon? Atong mahibaloan ang tubag kon atong susihon pag-ayo ang giingon sa Kasulatan.

Alagad ni Jehova sa Karaang Panahon

4. Unsay pagtawag ni Jehova sa karaang nasod sa Israel, ug unsay angayng matikdan bahin nianang nasora?

⁴ Si Jehova nagtawag sa iyang katawhan, ang karaang nasod sa Israel, ingong iyang alagad. “‘Kamo mao ang akong mga saksi,’ mao ang giingon ni Jehova, ‘ang akong alagad nga akong gipili.’” (Isa. 43:10) Ang tanang sakop nianang nasora naapil nianang alagad nga matang. Apan, angayng matikdan nga ang mga saserdote lamang ug ang dili-saserdoteng matang nga mga Levihanon ang may responsibilidad sa pagtudlo sa nasod.—2 Cron. 35:3; Mal. 2:7.

5. Sumala kang Jesus, unsang dakong kausaban ang mahitabo?

⁵ Ang nasod ba sa Israel mao ang ulipon nga gitumong ni Jesus? Dili. Nahibalo kita niana tungod sa giingon ni Jesus sa mga Hudiyo sa iyang adlaw: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” (Mat. 21:43) Tataw nga adunay mahitabo nga kausaban. Gamiton ni Jehova ang usa ka bag-ong nasod. Bisan pa niana, maylabot sa paghatag ug espirituwal nga instruksiyon, ang buluhaton sa ulipon diha sa ilustrasyon ni Jesus susama nianang sa “alagad” sa Diyos sa karaang Israel.

Mitungha ang Matinumanong Ulipon

6. Unsang bag-ong nasod ang natukod niadtong Pentekostes 33 K.P., ug kinsay nahimong bahin niana?

⁶ Ang bag-ong nasod, ang “Israel sa Diyos,” gilangkoban sa espirituwal nga mga Israelinhon. (Gal. 6:16; Roma 2:28, 29; 9:6) Kini natukod sa dihang gibubo ang espiritu sa Diyos niadtong Pentekostes 33 K.P. Human niana, ang tanang dinihogan-sa-espiritu nga mga Kristohanon nahimong bahin sa nasod nga nag-alagad karon ingong ulipon nga matang nga gitudlo sa Agalon, si Jesu-Kristo. Ang matag membro nianang nasora gisugo sa pagsangyaw sa maayong balita ug sa paghimog mga tinun-an. (Mat. 28:19, 20) Apan ang matag membro ba nianang pundoka malangkit sa pagtaganag espirituwal nga pagkaon sa tukmang panahon? Tan-awon nato kon sa unsang paagi gitubag sa Kasulatan kining pangutanaha.

7. Sa sinugdan, unsa ang pangunang buluhaton sa mga apostoles, ug unsang dugang responsibilidad ang ilang nadawat?

⁷ Sa dihang gitudlo ni Jesus ang iyang 12 ka apostoles, ang ilang pangunang buluhaton mao ang pagsangyaw sa maayong balita ngadto sa uban. (Basaha ang Marcos 3:13-15.) Kini nga buluhaton nahiuyon sa paninugdang kahulogan sa Gregong pulong apostolos, nga gikuha sa berbo nga nagkahulogang “ipadala.” Apan, paglabay sa panahon ug sa dihang hapit nang matukod ang  Kristohanong kongregasyon, ang papel sa usa ka apostoles nahimong “katungdanan sa pagkamagtatan-aw.”—Buh. 1:20-26.

8, 9. (a) Unsa ang pangunang buluhaton sa 12 ka apostoles? (b) Kinsa pay gihatagan ug dugang responsibilidad, nga giaprobahan sa nagamandong lawas?

⁸ Unsa ang pangunang buluhaton sa 12 ka apostoles? Ang tubag makita diha sa mga hitabo human sa adlaw sa Pentekostes. Sa dihang mitungha ang panaglalis bahin sa adlaw-adlaw nga pag-apod-apod ug pagkaon ngadto sa mga babayeng balo, gitigom sa 12 ka apostoles ang mga tinun-an ug sila miingon: “Dili makapahimuot alang kanamo nga biyaan ang pulong sa Diyos aron sa pag-apod-apod ug pagkaon nganha sa mga lamesa.” (Basaha ang Buhat 6:1-6.) Dayon ang mga apostoles nagtudlo ug ubang kuwalipikadong mga igsoon sa pagdumala niining “hinungdanong atimanonon” aron ang mga apostoles makahatag ug dakong pagtagad “sa pagministeryo sa pulong.” Kini nga kahikayan gipanalanginan ni Jehova kay “ang pulong sa Diyos padayong mikaylap, ug ang mga tinun-an sa Jerusalem padayong nagkadaghan sa hilabihan gayod.” (Buh. 6:7) Busa ang mga apostoles ang dunay pangunang responsibilidad sa pagtaganag espirituwal nga pagkaon.—Buh. 2:42.

⁹ Sa ngadtongadto, ang uban gihatagan ug bug-at nga responsibilidad. Ilalom sa pagtultol sa balaang espiritu, ang kongregasyon sa Antioquia nagpadala kang Pablo ug Bernabe ingong mga misyonaryo. Sila nailhan usab ingong mga apostoles, bisag dili sila apil sa 12. (Buh. 13:1-3; 14:14; Gal. 1:19) Sa ulahi, ang pagtudlo kanila giaprobahan sa nagamandong lawas sa Jerusalem. (Gal. 2:7-10) Wala madugay human niana, si Pablo nakigbahin sa pag-apod-apod ug espirituwal nga pagkaon. Iyang gisulat ang iyang unang inspiradong sulat.

10. Sa unang siglo, ang tanan bang dinihogan-sa-espiritu nga mga Kristohanon nalangkit sa pag-andam ug espirituwal nga pagkaon? Ipatin-aw.

¹⁰ Apan, ang tanan bang dinihogan-sa-espiritu nga mga Kristohanon nalangkit sa pagdumala sa buluhatong pagsangyaw ug sa pag-andam ug espirituwal nga pagkaon? Wala. Si apostol Pablo miingon: “Dili tanan mga apostoles, dili ba? Dili tanan mga manalagna, dili ba? Dili tanan mga magtutudlo, dili ba? Dili tanan nagapanghimog gamhanang mga buhat, dili ba?” (1 Cor. 12:29) Bisan tuod ang tanang inanak-sa-espiritu nga mga Kristohanon nakigbahin sa buluhatong pagsangyaw, pipila lamang—walo ka lalaki—ang gigamit sa pagsulat sa 27 ka basahon sa Kristohanon Gregong Kasulatan.

Ang Matinumanong Ulipon sa Modernong Panahon

11. Ang ulipon gitudlo sa pag-atiman sa unsang “mga kabtangan”?

¹¹ Ang mga pulong ni Jesus nga nasulat sa Mateo 24:45 klarong nagpaila nga aduna gihapoy matinumanon ug maalamong ulipon nga matang nga magkinabuhi sa yuta panahon sa kataposan. Ang Pinadayag 12:17 nagtumong kanila ingong “mga nahibilin” sa binhi sa babaye. Ingong usa ka grupo, ang nanghibilin gitudlo ibabaw sa tanang kabtangan ni Kristo dinhi sa yuta. Ang “mga kabtangan” nga angayng atimanon sa matinumanong piniyalan mao ang intereses sa Agalon dinhi sa yuta, nga naglakip sa yutan-ong mga sakop sa Gingharian ug sa mga pasilidad nga gigamit sa pagsangyaw sa maayong balita.

12, 13. Unsaon pagkahibalo sa usa ka Kristohanon nga siya dunay langitnong pagtawag?

¹² Unsaon pagkahibalo sa usa ka Kristohanon nga siya dunay langitnong paglaom ug naapil niining nanghibilin sa espirituwal nga mga Israelinhon? Ang tubag makita diha sa gipamulong ni Pablo ngadto sa kauban niyang umalambit nianang langitnong paglaom: “Ang tanan nga gitultolan sa espiritu sa Diyos, kini sila mga anak sa Diyos. Kay kamo wala makadawat ug espiritu sa pagkaulipon nga nagpahinabog kahadlok pag-usab, apan kamo nakadawat ug espiritu sa pagsagop ingong mga anak, nga pinaagi niining espirituha kita nagatuaw: ‘Abba, Amahan!’ Ang espiritu mismo nagpamatuod uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo, basta duyog kita nga magaantos aron kita usab duyog nga pagahimayaon.”—Roma 8:14-17.

 ¹³ Sa yanong pagkasulti, kini nga mga indibiduwal gidihogan sa balaang espiritu sa Diyos ug nakadawat ug langitnong “pagtawag,” o “imbitasyon.” (Heb. 3:1) Kini nga imbitasyon naggikan sa Diyos. Sila, sa baylo, mosanong dayon nga walay pagduhaduha o kahadlok sa pagdawat sa pribilehiyo nga mahimong mga anak sa Diyos. (Basaha ang 1 Juan 2:20, 21.) Busa, dili sila ang nagpili niini nga paglaom, kondili si Jehova ang nagbutang sa iyang timbre, o balaang espiritu, nganha kanila.—2 Cor. 1:21, 22; 1 Ped. 1:3, 4.

Hustong Panglantaw

14. Unsaon paglantaw sa mga dinihogan ang pagtawag kanila?

¹⁴ Unsaon paglantaw sa mga dinihogan ang ilang kaugalingon samtang sila nagpaabot sa ilang langitnong ganti? Ilang naamgohan nga bisan tuod sila nakadawat ug talagsaong imbitasyon, kana maoy imbitasyon lamang. Kinahanglang magpabilin silang matinumanon hangtod sa kamatayon aron mabatonan ang ganti. Sa kamapaubsanon, sila mibati sama kang Pablo, kinsa miingon: “Mga igsoon, wala ko pa isipa ang akong kaugalingon nga nakahupot na niini; apan may usa ka butang bahin niini: Ginakalimtan ang mga butang sa luyo ug nagapangab-ot sa mga butang sa unahan, ako nagapangagpas sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus.” (Filip. 3:13, 14) Ang dinihogang nanghibilin kinahanglang maningkamot pag-ayo ‘sa paglakaw nga takos sa pagtawag nga alang niana sila gipanagtawag, uban ang bug-os nga pagpaubos sa hunahuna,’ nga nagbuhat niana “uban ang kahadlok ug pagpangurog.”—Efe. 4:1, 2; Filip. 2:12; 1 Tes. 2:12.

15. Unsaon paglantaw sa mga Kristohanon kadtong nakig-ambit sa mga emblema sa Memoryal, ug unsaon paglantaw sa mga dinihogan ang ilang kaugalingon?

¹⁵ Sa laing bahin, unsaon paglantaw sa ubang mga Kristohanon ang usa ka tawo nga nag-angkong nakadawat niini nga pagtawag ug nakig-ambit sa mga emblema sa Memoryal? Dili siya angayng hukman. Kini maoy tali kaniya ug kang Jehova. (Roma 14:12) Apan, ang mga Kristohanon nga tinuod nga nakadawat niini nga pagtawag dili mangayog linaing pagtagad. Sila wala magtuo nga ang ilang pagkadinihogan naghatag kanilag linaing pagsabot nga labaw sa nabatonan sa eksperyensiyado nang mga membro sa “dakong panon.” (Pin. 7:9) Sila wala magtuo nga sila adunay mas labaw nga balaang espiritu kay sa ilang mga kauban sa “ubang mga karnero.” (Juan 10:16) Sila dili magdahom ug espesyal nga pagtagad; ni mangangkon sila nga  ang ilang pagpakig-ambit sa mga emblema naghimo kanilang labaw kay sa tinudlong mga ansiyano sa kongregasyon.

16-18. (a) Ang tanan bang dinihogan nalangkit sa pagpadayag ug bag-ong pagsabot sa Bibliya? Iilustrar. (b) Nganong ang Nagamandong Lawas dili na kinahanglang mokonsulta sa tanang nag-angkon nga dinihogan?

¹⁶ Ang tanan bang dinihogan sa tibuok yuta adunay komunikasyon sa usag usa aron sa pagpadayag ug bag-ong pagsabot sa Bibliya? Wala. Ingong usa ka pundok, ang ulipong matang maoy responsable sa pagpakaon sa dinihogang mga sumusunod ni Kristo, apan ang indibiduwal nga membro niining ulipong matang dili managsamag responsibilidad o buluhaton. (Basaha ang 1 Corinto 12:14-18.) Sumala sa nahisgotan na, sa unang siglo, ang tanan nalangkit sa hinungdanong buluhaton nga pagsangyaw. Apan pipila lamang kanila ang gigamit sa pagsulat sa mga basahon sa Bibliya ug sa pagdumala sa Kristohanong kongregasyon.

¹⁷ Sa pag-ilustrar: Usahay ang Kasulatan maghisgot nga giatiman sa “kongregasyon” ang hudisyal nga mga butang. (Mat. 18:17) Apan, sa pagkatinuod ang mga ansiyano lamang ang nag-atiman niini ingong mga hawas sa kongregasyon. Dili kontakon sa mga ansiyano ang tanang membro sa kongregasyon aron sa pagpangayog opinyon kanila sa dili pa mohimog desisyon. Sumala sa teokratikanhong kahikayan, sila nagtuman sa ilang katungdanan; sila naghawas sa tibuok kongregasyon.

¹⁸ Sa atong adlaw usab, pipila lamang ka membro sa mga dinihogan ang dunay responsibilidad nga maghawas sa ulipong matang. Sila maoy naglangkob sa Nagamandong Lawas sa mga Saksi ni Jehova. Kining dinihogan-sa-espiritu nga mga lalaki nagdumala sa buluhaton sa Gingharian ug sa pagtaganag espirituwal nga pagkaon. Apan, sama sa unang siglo, ang Nagamandong Lawas dili mokonsulta sa matag membro sa ulipong matang sa dili pa mohimog mga desisyon. (Basaha ang Buhat 16:4, 5.) Hinunoa, ang tanang dinihogang mga Saksi puliki kaayo diha sa hinungdanong buluhaton nga pagpangani karon. Ingong usa ka matang, “ang matinumanon ug maalamong ulipon” maoy usa ka pundok, apan ingong indibiduwal, sila adunay lainlaing buluhaton.—1 Cor. 12:19-26.

19, 20. Unsang timbang nga panglantaw ang nabatonan sa dakong panon maylabot sa “matinumanon ug maalamong ulipon” ug sa Nagamandong Lawas niini?

¹⁹ Unsay angayng epekto nianang maong impormasyon diha sa nagkadaghan nga membro sa dakong panon kinsa naglaom nga mabuhi sa yuta sa walay kataposan? Ingong bahin sa mga kabtangan sa Hari, sila malipay nga makigkooperar sa mga kahikayan sa Nagamandong Lawas, nga naghawas sa “matinumanon ug maalamong ulipon.” Ang mga membro sa dakong panon nagpabili sa espirituwal nga pagkaon nga gitagana ilalom sa pagdumala sa Nagamandong Lawas. Apan sa samang panahon, bisag ilang gitahod ang ulipon ingong usa ka matang, ang mga membro sa dakong panon mag-amping nga dili ituboy ang si bisan kinsa nga nag-angkong sakop niana. Walay Kristohanon nga tinuod nga gidihogan sa balaang espiritu ang gusto o magdahom sa maong pagtagad.—Buh. 10:25, 26; 14:14, 15.

²⁰ Kita man “mga sulugoon sa panimalay,” kinsa bahin sa dinihogang nanghibilin, o kita man mga membro sa dakong panon, magmadeterminado kita nga makigkooperar sa matinumanong piniyalan ug sa Nagamandong Lawas niini. Hinaot nga ang matag usa kanato “magpadayon sa pagbantay” ug sa pagpabiling matinumanon hangtod sa kataposan.—Mat. 24:13, 42.

Nahinumdom Ka Ba?

• Kinsa “ang matinumanon ug maalamong ulipon,” ug kinsa ang mga sulugoon sa panimalay?

• Unsaon pagkahibalo sa usa ka tawo nga siya adunay langitnong pagtawag?

• Kinsa ang dunay pangunang responsibilidad sa pag-andam ug bag-ong espirituwal nga pagkaon?

• Unsaon paglantaw sa usa ka dinihogan ang iyang kaugalingon?

[Mga Pangutana sa Pagtuon]

[Hulagway sa panid 23]

Sa atong adlaw, ang Nagamandong Lawas naghawas sa matinumanon ug maalamong ulipon. Susama kini sa kahikayan sa unang siglo