Kon Unsaon Pagkakaplag ug Kalipay sa Gasa sa Pagkatagsaanon

“UG SILA nagminyo ug nagmalipayon hangtod sa kahangtoran.” Ang mga pulong nga sama niini sagad mabasa diha sa kataposang bahin sa mga sugilanon nga pangbata. Ang mga sugilanon bahin sa gugma diha sa mga pelikula ug nobela kasagarang nagpasiugda ug susamang mensahe—nga kinahanglan kang magminyo aron ikaw magmalipayon gayod! Dugang pa, diha sa daghang kultura gipit-os pag-ayo ang mga ulitawo ug dalaga nga magminyo. “Ipabati kanimo sa mga tawo nga ang usa ka babaye kinahanglan gayong magminyo,” matod ni Debby sa dihang siya nag-edad ug 25 anyos. “Magsugod kono ang kinabuhi human sa kaminyoon.”

Ang usa ka espirituwal nga tawo wala magbaton nianang maong panglantaw. Bisan tuod komon sa mga Israelinhon ang pagminyo, ang Bibliya naghisgot ug tagsaanong mga lalaki ug babaye nga malipayon sa ilang kinabuhi. Karong adlawa, gipili sa pipila ka Kristohanon nga magpabiling tagsaanon, samtang ang uban wala maminyo tungod sa mga sirkumstansiya. Bisan unsa pay rason sa ilang pagpabiling tagsaanon, ang hinungdanong pangutana mao: Sa unsang paagi magmalipayon ang usa ka Kristohanon bisan pag siya tagsaanon?

Si Jesus mismo wala magminyo, nga haom lamang tungod sa iyang buluhaton. Siya miingon sa iyang mga tinun-an nga ang pipila usab sa iyang mga sumusunod “magahatag ug luna” alang sa pagkatagsaanon. (Mat. 19:10-12) Busa gipakita ni Jesus nga aron magmalipayon diha sa pagkatagsaanon, kinahanglan natong dawaton, o hatagag luna, kining maong paagi sa pagkinabuhi diha sa atong hunahuna ug kasingkasing.

Kini bang tambaga ni Jesus mapadapat lamang sa usa nga tinuyong mipili nga magpabiling tagsaanon sa tibuok kinabuhi aron makahatag ug bug-os nga pagtagad sa teokratikanhong mga kalihokan? (1 Cor. 7:34, 35) Dili sa ingon niana. Tagda ang kahimtang sa usa ka Kristohanon nga lagmit gustong magminyo apan wala pa makakitag angayan nga kapikas. “Di pa dugay, ang usa ka kauban sa trabaho nga dili-Saksi kalit lang mihangyo nga makigminyo nako,” matod ni Ana, usa ka dalaga nga lapas na sa 30 anyos. “Nalipay ko nga may nakagusto nako, apan gisumpo dayon nako kanang pagbatia kay ang gusto nakong minyoan mao lamang kadtong makapasuod nako kang Jehova.”

Ang tinguha nga magminyo “diha sa Ginoo” nakatabang sa daghang sister sama kang Ana sa paglikay nga maminyo sa dili-magtutuo. a (1 Cor. 7:39; 2 Cor. 6:14) Tungod kay ilang gitahod ang tambag sa Diyos, sila nagpabilin unang tagsaanon. Sa unsang paagi sila molampos sa paghimo niini?

Magmapositibo

Ang atong tinamdan makatabang kanato sa pagdawat sa usa ka kahimtang, bisan pag dili na maoy atong gusto. “Kontento na ko sa kon unsay naa nako, ug wala na ko mangandoy ug laing mga butang,” miingon si Carmen, usa ka dalaga nga lapas na sa 40 anyos. Tinuod, may mga panahon nga kita maguol o mahigawad. Apan ang pagkahibalo nga mao usab kanay gibati sa daghang igsoon sa tibuok kalibotan makadasig kanato sa pagpadayon sa pag-alagad nga masaligon. Si Jehova nagtabang  sa daghan aron magmalipayon sa ilang pagkatagsaanon ug makasagubang sa uban pang mga problema.—1 Ped. 5:9, 10.

Daghan sa atong mga igsoon ang nakabatog kaayohan sa pagpabiling tagsaanon. “Para nako ang sekreto aron magmalipayon mao ang pagpahimulos sa positibong mga bahin sa bisan unsang kahimtang nga modangat kanimo,” matod ni Ester, usa ka dalagang nag-edad ug 35 anyos. “Maminyo man ko o dili, basta akong unahon ang intereses sa Gingharian, si Jehova dili gayod maghikaw kon unsay makaayo nako,” midugang si Carmen. (Sal. 84:11) “Bisag wala matuman ang tanan nakong gipangandoy sa akong kinabuhi, ako malipayon ug magpabiling malipayon.”

Mga Tagsaanon Diha sa Bibliya

Ang anak nga babaye ni Jepte wala magplano nga magpabiling tagsaanon. Apan tungod sa panaad sa iyang amahan, siya naobligar sa pag-alagad didto sa sangtuwaryo sukad sa iyang pagkabatan-on. Kining wala damhang asaynment sa walay duhaduha nakapausab sa iyang mga plano ug sukwahi sa iyang kinaiyanhong pagbati. Sa dihang iyang nahibaloan nga dili na siya puwedeng magminyo ug makabaton ug pamilya, siya nagbakho sulod sa duha ka bulan. Bisan pa niana, iyang gidawat ang iyang bag-ong kahimtang ug kinasingkasing siyang nag-alagad sa tibuok niyang kinabuhi. Tuigtuig, ang mga babaye sa Israel moduaw ug magpasidungog kaniya tungod sa iyang nagsakripisyo-sa-kaugalingon nga espiritu.—Maghu. 11:36-40.

Ang literal nga mga eunuko sa panahon ni Isaias lagmit naguol sa ilang kahimtang. Ang Bibliya wala magsulti kon nganong nahimo silang eunuko. Sa ilang kahimtang, sila dili mahimong membro sa kongregasyon sa Israel. Dili sab sila puwedeng magminyo ug makabatog mga anak. (Deut. 23:1) Bisan pa niana, si Jehova nakasabot sa ilang gibati, ug siya nagpabili sa ilang bug-os kalag nga pagkamasinugtanon sa iyang pakigsaad. Iya silang gisultihan nga sila makabaton ug “usa ka monyumento” ug “usa ka ngalan hangtod sa panahong walay tino” diha sa iyang balay. Sa ato pa, ang maong matinumanong mga eunuko adunay seguradong paglaom nga mabuhi sa walay kataposan ubos sa Mesiyanikong pagmando ni Jesus. Sila dili gayod kalimtan ni Jehova.—Isa. 56:3-5.

Lahi kaayo niana ang kahimtang ni Jeremias. Human siya itudlo ingong manalagna, ang Diyos nagsugo kaniya sa pagpabiling tagsaanon tungod sa makuyawng panahon nga iyang gikinabuhian ug tungod sa matang sa iyang asaynment. “Dili ka gayod mangasawa,” nag-ingon si Jehova, “ug dili ka gayod magbaton ug mga anak nga lalaki ug mga anak nga babaye niining dapita.” (Jer. 16:1-4) Wala ibutyag sa Bibliya kon unsay pagbati ni Jeremias niining sugoa, apan kini nagtug-an kanato nga siya nagakalipay sa pulong ni Jehova. (Jer. 15:16) Sa ulahing katuigan, sa dihang nasinatian ni Jeremias ang kapait sa 18 ka bulan nga paglikos sa Jerusalem, walay duhaduha nga iyang nakita nga maalamon gayod ang pagsugot sa sugo ni Jehova nga magpabiling tagsaanon.—Lam. 4:4, 10.

Kon sa Unsang Paagi Ikaw Magmalipayon

Ang mga karakter sa Bibliya nga gihisgotan ganina maoy mga tagsaanon, apan sila nagmalipayon sa tabang ni Jehova ug bug-os nga nag-alagad kaniya. Sa samang paagi, ang mapuslanong mga kalihokan dako usab ug mahimo aron kita magmalipayon. Ang Bibliya nagtagna nga ang mga babaye nga nagapahayag sa maayong balita mahimong usa ka dakong panon. (Sal. 68:11) Lakip kanila mao ang daghang dalaga nga mga sister. Samtang sila nagmabungahon diha sa ilang  ministeryo, sila gipanalanginag espirituwal nga mga anak.—Mar. 10:29, 30; 1 Tes. 2:7, 8.

“Ang pagpayunir naghatag ug direksiyon sa akong kinabuhi,” matod ni Loli human makapayunir sulod sa 14 ka tuig. “Ingong dalaga, ako puliki kaayo, ug kini nakatabang nako nga dili maguol. Mobati kog katagbawan matag adlaw tungod kay akong nakita nga nakatabang gayod sa mga tawo ang akong ministeryo. Kini nakahatag kanakog dakong kalipay.”

Daghang sister ang nakakat-on ug bag-ong pinulongan ug nagpauswag sa ilang ministeryo pinaagi sa pagsangyaw ngadto sa mga tawo nga langyawg pinulongan. “Sa siyudad nga akong gipuy-an, adunay daghang langyaw,” miingon si Ana, nga gihisgotan ganina. Siya malipayong nagsangyaw ngadto sa mga tawo nga nagsultig Pranses. “Ang pagkakat-on sa ilang pinulongan naghatag ug kahigayonan nga makasangyaw kanila ug naghimo sa akong ministeryo nga makaiikag kaayo.”

Sanglit kasagaran sa mga tagsaanon gamay rag obligasyon, gipahimuslan sa pipila ang ilang kahimtang aron moalagad sa mga dapit diin mas dako ang panginahanglan. “Kombinsido gayod ako nga kon mas puliki ka sa pag-alagad kang Jehova, mas dali kang makakita ug suod nga mga higala ug mobating gihigugma,” matod ni Lidiana, usa ka dalaga nga nag-edad ug 35 anyos kinsa nag-alagad sa mga nasod diin mas dako ang panginahanglan. “Nakabaton akog daghang suod nga mga higala nga lainlaig kagikan ug nasyonalidad, ug kini nakapalipay gayod kanako.”

Ang Bibliya naghisgot bahin kang Felipe nga tig-ebanghelyo kinsa adunay upat ka anak nga dalaga nga nanagna. (Buh. 21:8, 9) Dayag nga masiboton usab sila sama sa ilang amahan. Lagmit ilang gigamit ang ilang gasa sa pagpanagna alang sa kaayohan sa ilang mga isigka-Kristohanon sa Cesarea. (1 Cor. 14:1, 3) Karong adlawa, daghang tagsaanong mga sister usab ang nagpalig-on sa uban pinaagi sa ilang kanunayng pagtambong ug pagpakig-ambit sa Kristohanong mga tigom.

Si Lydia, sa laing bahin, maoy usa sa unang mga Kristohanon sa Filipos nga gidayeg sa Bibliya tungod sa iyang pagkamaabiabihon. (Buh. 16:14, 15, 40) Si Lydia—nga posibleng dalaga o balo—manggihatagon kaayo mao nga iyang natagamtam ang kalipay sa pagpakig-uban sa nagapanawng mga magtatan-aw, sama kang Pablo, Silas, ug Lucas. Kon kita magmanggihatagon, kita panalanginan usab.

Pagtagbaw sa Panginahanglan nga Higugmaon

Gawas pa sa paghimog mapuslanong mga buluhaton, kitang tanan nanginahanglag gugma ug pagmahal. Sa unsang paagi kana mabatonan sa usa ka tagsaanon? Una, si Jehova anaa kanunay sa paghigugma, paglig-on, ug pagpaminaw kanato. May mga panahon nga si Haring David mibating “nag-inusara ug sinakit,” apan siya nahibalo nga kanunay siyang makapangayog tabang kang Jehova. (Sal. 25:16; 55:22) “Kon ugaling biyaan ako sa akong amahan ug sa akong inahan, si Jehova mismo magsagop kanako,” siya misulat. (Sal. 27:10) Ang Diyos nagdapit sa tanan niyang alagad sa pagduol kaniya aron sila mahimo niyang suod nga higala.—Sal. 25:14; Sant. 2:23; 4:8.

Dugang pa, diha sa atong tibuok-kalibotang panag-igsoonay, kita makakaplag usab ug espirituwal nga mga amahan, inahan, ug mga igsoon kansang gugma makapatugob sa atong kinabuhi. (Mat. 19:29; 1 Ped. 2:17) Daghang tagsaanon nga mga Kristohanon ang nalipay gayod sa pagsundog sa panig-ingnan ni Dorcas, kinsa “daghag maayong mga buhat ug mga gasa sa kaluoy.” (Buh. 9:36, 39) “Bisan asa ko moadto, ako mangitag tinuod nga mga higala diha sa kongregasyon nga mahigugma ug motabang kanako sa dihang  ako magmagul-anon,” matod ni Loli. “Aron molig-on ang maong mga panaghigalaay, ako maningkamot sa pagpakitag gugma ug kahangawa sa uban. Nakaalagad na ko ug walo ka kongregasyon, ug kanunay akong makakaplag ug tinuod nga mga higala. Kadaghanan kanila dili sama nakog pangedaron—ang pipila kanila morag ako nang lola ug ang uban mga tin-edyer pa.” Sa matag kongregasyon, adunay mga igsoon nga nanginahanglag mga higala ug pagmahal. Ang pagpakitag tiunayng interes sa maong mga igsoon makatabang gayod kanila ug makatagbaw sa atong tinguha nga mahigugma ug higugmaon.—Luc. 6:38.

Ang Diyos Dili Malimot

Gipakita sa Bibliya nga ang tanang Kristohanon kinahanglang mohimo ug mga sakripisyo tungod sa malisod nga panahon nga atong gikinabuhian. (1 Cor. 7:29-31) Kadtong nagpabiling tagsaanon tungod sa ilang determinasyon nga mosunod sa sugo sa Diyos nga magminyo diha lamang sa Ginoo takos gayod sa atong halalom nga pagtahod ug konsiderasyon. (Mat. 19:12) Apan, kining maong dalayegon nga sakripisyo wala magpasabot nga dili sila bug-os nga magmalipayon.

“Ako nagmalipayon tungod sa akong relasyon kang Jehova ug sa akong pag-alagad kaniya,” matod ni Lidiana. “Aduna koy nailhang mga minyo nga nagmalipayon ug mga minyo nga wala magmalipayon. Tungod niini, ako nakahinapos nga ako magmalipayon gihapon, maminyo man ko o dili.” Sama sa giingon ni Jesus, ang kalipay ilabinang magdepende sa paghatag ug sa pag-alagad, mga butang nga mahimo sa tanang Kristohanon.—Juan 13:14-17; Buh. 20:35.

Sa walay duhaduha, ang pangunang hinungdan sa atong kalipay mao ang pagkahibalo nga si Jehova magapanalangin kanato tungod sa mga sakripisyo nga atong gihimo sa pagtuman sa iyang kabubut-on. Ang Bibliya nagpasalig kanato: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”—Heb. 6:10.

[Footnote]

[Blurb sa panid 25]

“Kontento na ko sa kon unsay naa nako, ug wala na ko mangandoy ug laing mga butang.”—Carmen

[Hulagway sa panid 26]

Si Loli ug Lidiana nalipay sa pag-alagad diin mas dako ang panginahanglan

[Hulagway sa panid 27]

Ang Diyos nagdapit sa tanan niyang mga alagad sa pagduol kaniya