Mga Pangutana Gikan sa mga Magbabasa

Sanglit nalukop ni Jesus ug sangyaw ang tibuok Israel, nganong nakaingon man si apostol Pedro nga ang mga Hudiyo ug ang ilang mga magmamando “milihok sa kawalay-alamag” dihang ilang gipapatay si Jesus?—Buh. 3:17.

Sa dihang nakigsulti sa usa ka grupo sa mga Hudiyo bahin sa ilang papel sa kamatayon sa Mesiyas, si apostol Pedro miingon: “Ako nahibalo nga kamo milihok sa kawalay-alamag, ingon sa gihimo usab sa inyong mga magmamando.” (Buh. 3:14-17) Ang pipila ka Hudiyo lagmit wala mahibalo nga si Jesus mao ang Mesiyas o wala makasabot sa iyang pagtulon-an. Ang uban walay alamag sa espirituwal tungod sa ilang pagkawalay tinguha nga pahimut-an ang Diyos, pagkamapihigon, pagkamasinahon, ug pagkamadumtanon.

Tagda kon sa unsang paagi ang pagkawalay tinguha nga pahimut-an si Jehova nakaapektar sa panglantaw sa daghang tawo sa pagtulon-an ni Jesus. Si Jesus kasagarang nagtudlo pinaagig mga ilustrasyon, nga nagpatin-aw niana ngadto sa tanan nga gustong makakat-on pag dugang. Apan, ang pipila nga nakadungog kang Jesus mibiya lamang, nga wala na maningkamot aron makasabot sa iyang gisulti. Dihay higayon nga bisan ang pipila sa mga tinun-an nangasuko tungod sa usa ka pasumbingay nga gigamit ni Jesus. (Juan 6:52-66) Wala nila maamgohi nga ang mga ilustrasyon ni Jesus nagsulay sa ilang kaandam mohimog kausaban sa ilang panghunahuna ug binuhatan. (Isa. 6:9, 10; 44:18; Mat. 13:10-15) Wala usab nila panumbalinga ang tagna bahin sa paggamit sa Mesiyas ug mga ilustrasyon diha sa iyang pagpanudlo.—Sal. 78:2.

Tungod sa pagkamapihigon, gisalikway sa uban ang mga pagtulon-an ni Jesus. Sa dihang nagtudlo siya sa sinagoga sa iyang lungsod, sa Nasaret, ang mga tawo “nahingangha.” Apan imbes dawaton si Jesus ingong Mesiyas, ila hinuong gikuwestiyon ang iyang kagikan: “Diin kuhaa niining tawhana kining mga butanga? . . . Kini ang panday nga anak ni Maria ug ang igsoon ni Santiago ug ni Jose ug ni Judas ug ni Simon, dili ba? Ug ang iyang mga igsoong babaye ania kauban nato, dili ba?” (Mar. 6:1-3) Alang sa mga taga-Nasaret, walay pulos ang gitudlo ni Jesus tungod lang kay siya naggikan sa usa ka kabos nga pamilya.

Komosta ang mga lider sa relihiyon? Kadaghanan kanila wala magpatalinghog kang Jesus tungod usab sa pagkamapihigon. (Juan 7:47-52) Gisalikway usab nila ang iyang mga pagtulon-an tungod kay sila nasina kang Jesus, kinsa gidayeg pag-ayo sa mga tawo. (Mar. 15:10) Ug lagmit nga daghan sa prominenteng mga tawo ang nasuko pag-ayo sa dihang iyang giyagyag ang ilang pagkasalingkapaw ug pagkamalimbongon. (Mat. 23:13-36) Haom lamang nga si Jesus nagsaway sa ilang kawalay-alamag, nga miingon: “Alaot kamong mga batid sa Balaod, tungod kay gikuha ninyo ang yawi sa kahibalo; kamo mismo wala mosulod [sa Gingharian], ug kadtong nagasulod inyong gibabagan!”—Luc. 11:37-52.

Sulod sa tulo ka tuig ug tunga, si Jesus nagsangyaw sa maayong balita didto sa Israel. Daghan usab ang iyang gibansay alang nianang buluhatona. (Luc. 9:1, 2; 10:1, 16, 17) Tungod sa kaepektibo ni Jesus ug sa iyang mga tinun-an, ang mga Pariseo mireklamo: “Tan-awa! Ang kalibotan nagsunod na kaniya.” (Juan 12:19) Busa dili kay wala gayoy alamag ang kadaghanan sa mga Hudiyo. Bisan pa niana, sila nagpabiling ‘walay-alamag’ bahin kang Jesus ingong Mesiyas. Mahimo unta nilang palalomon ang ilang kahibalo ug gugma sa Mesiyas, apan wala nila kana buhata. Ang pipila kanila nahimong kakunsabo sa pagpatay kang Jesus. Tungod niana, si apostol Pedro miawhag kanila: “Busa, paghinulsol kamo, ug pamalik kamo aron mapapas ang inyong mga sala, aron ang mga panahon sa kahayahay moabot gikan sa atubangan ni Jehova ug aron iyang ipadala ang Kristo nga gitudlo alang kaninyo, si Jesus.” (Buh. 3:19, 20) Makalilipay nga libolibo ka Hudiyo ang nagpatalinghog niana, lakip na ang “usa ka dakong panon sa mga saserdote.” Wala na sila molihok ingong mga tawong walay alamag. Hinunoa, sila naghinulsol ug nakabaton sa pag-uyon ni Jehova.—Buh. 2:41; 4:4; 5:14; 6:7.