Pagdelegar—Ngano ug sa Unsang Paagi?

ANG pagdelegar dugay nang gihimo sa Diyos bisan sa wala pa lalanga ang planetang Yuta. Si Jehova naglalang sa iyang bugtong Anak ug dayon siya naggamit sa iyang Anak ingong “batid nga magbubuhat” sa paglalang sa uniberso. (Prov. 8:22, 23, 30; Juan 1:3) Sa dihang gilalang sa Diyos ang unang magtiayon, siya nagsugo kanila nga ‘pun-on ang yuta ug gamhan kini.’ (Gen. 1:28) Ang Maglalalang naghatag sa tawo ug buluhaton sa pagpasangkad sa Paraiso sa Eden hangtod malukop ang tibuok yuta. Oo, sukad pa sa sinugdan, ang pagdelegar gihimo na ni Jehova ug sa iyang mga alagad.

Unsay nalangkit sa pagdelegar? Nganong ang Kristohanong mga ansiyano kinahanglang makakat-on sa pagdelegar ug pipila ka buluhaton sa kongregasyon ngadto sa uban, ug sa unsang paagi ila kanang mahimo?

Unsa ang Pagdelegar?

Ang “pagdelegar” nagkahulogang “pagpiyal sa lain; pagtudlo sa usa ingong hawas; pagsangon ug responsibilidad.” (Merriam-Webster’s Collegiate Dictionary, 11th Edition) Busa ang pagdelegar naglangkit ug paggamit sa uban aron makab-ot ang mga tumong. Kana nagpasabot ug paghatag ug responsibilidad sa uban.

Ang mga igsoon nga gisangonan ug responsibilidad diha sa kongregasyon angayng motuman sa ilang asaynment, motaho sa mga kalamposan, ug  subsob nga mokonsulta sa usa nga nagdelegar kanila. Hinunoa, ang dunay pangunang responsibilidad mao ang tinudlong igsoon nga nagdelegar sa buluhaton. Kinahanglan niyang tinoon nga dunay pag-uswag ang usa ka buluhaton ug mohatag ug sugyot kon gikinahanglan. Apan, ang pipila lagmit mangutana, ‘Nganong kinahanglan pa mang idelegar ang usa ka buluhaton kon ikaw makahimo niana?’

Nganong Modelegar?

Matikdi nga gilalang ni Jehova ang iyang bugtong Anak ug gihatagag responsibilidad nga makig-ambit sa paglalang sa uban pang butang. Sa pagkatinuod, “pinaagi kaniya gilalang ang tanang ubang butang sa langit ug sa yuta, ang mga butang nga makita ug ang mga butang nga dili-makita.” (Col. 1:16) Ang Maglalalang makahimo sa pagbuhat niana bisag walay tabang sa uban, apan iyang gipaambit sa iyang Anak ang kalipay sa pagpalampos sa usa ka buluhaton. (Prov. 8:31) Kini nakatabang sa Anak sa pagkat-on pag dugang bahin sa mga hiyas sa Diyos. Sa diwa, gigamit sa Amahan ang kahigayonan aron bansayon ang iyang bugtong Anak.

Sa dinhi pa si Jesu-Kristo sa yuta, iyang gisundog ang iyang Amahan pinaagi sa pagdelegar sa uban ug responsibilidad. Inanay niyang gibansay ang iyang mga tinun-an. Iyang gipadala ang 12 ka apostoles ug sa ulahi ang 70 pa ka tinun-an aron manguna sa buluhatong pagsangyaw. (Luc. 9:1-6; 10:1-7) Sa dihang nakaabot si Jesus sa maong mga dapit, napahimutang na didto ang usa ka maayong pundasyon alang sa iyang buluhaton. Sa dihang siya mibiya sa yuta, si Jesus naghatag sa iyang nabansayng mga tinun-an ug mas bug-at nga mga responsibilidad, lakip na ang pagsangyaw sa tibuok kalibotan.—Mat. 24:45-47; Buh. 1:8.

Ang pagdelegar ug pagbansay gihimo usab diha sa Kristohanong kongregasyon. Giingnan ni apostol Pablo si Timoteo: “Kining mga butanga ipiyal sa matinumanong mga tawo, nga, sa baylo, makabaton ug igong katakos sa pagpanudlo sa uban.” (2 Tim. 2:2) Oo, ang mga eksperyensiyado kinahanglang magbansay sa mga igsoon kinsa, sa baylo, magbansay usab sa uban.

Pinaagi sa pagdelegar sa pipila ka buluhaton nga gihatag kaniya, ikapaambit sa usa ka ansiyano ngadto sa uban ang kalipay sa pagpanudlo ug pag-atiman sa panon. Ang mga ansiyano nahibalo nga limitado lamang ang ilang katakos, busa angay nga magpatabang sila sa uban sa pagtuman sa ilang mga responsibilidad sa kongregasyon. Ang Bibliya nag-ingon: “Ang kaalam anaa sa mga makasaranganon.” (Prov. 11:2) Makasaranganon ka kon modawat ka sa imong mga limitasyon. Kon imong solohon ang buluhaton, hayan maugtas ka ug wala na kay panahon para sa imong pamilya. Busa maalamong ipaambit sa uban ang pipila ka responsibilidad. Tagda, pananglitan, ang usa ka brader nga nag-alagad ingong koordinetor sa lawas sa mga ansiyano. Mahimong hangyoon niya ang ubang mga ansiyano sa pag-awdit sa kuwenta sa kongregasyon. Pinaagi sa pagsusi sa mga rekord, mahibaloan sa maong mga ansiyano ang kahimtang sa panalapi sa kongregasyon.

Ang pagdelegar maghatag kahigayonan sa uban sa pagbaton sa gikinahanglang kahanas ug kasinatian. Kini maghatag usab ug kahigayonan sa nagdelegar nga makita ang mga katakos niadtong gihatagan sa buluhaton. Busa, pinaagi sa pagdelegar sa nahiangay nga mga buluhaton diha sa kongregasyon, masulayan sa mga ansiyano “kon angayan ba” nga mahimong ministeryal nga alagad ang pipila ka lalaki.—1 Tim. 3:10.

Sa kataposan, pinaagi sa pagdelegar, mapasundayag sa mga ansiyano ang ilang pagsalig sa uban. Gibansay ni Pablo si Timoteo diha sa misyonaryong pag-alagad pinaagi sa pagpauban kaniya. Sila nagkasuod gayod sa usag usa. Gani si Pablo nagtawag kang Timoteo nga “usa ka tiunay nga anak diha sa pagtuo.” (1 Tim. 1:2) Sa samang paagi, si  Jehova ug si Jesus nagkasuod pa gayod samtang magkauban silang naglalang sa tanang ubang butang. Kon ipiyal sa mga ansiyano ngadto sa uban ang pipila ka buluhaton, ilang maugmad ang suod nga relasyon sa usag usa.

Kon Nganong ang Uban Nagpanuko

Bisan pag nahibalo sa mga kaayohan sa pagdelegar, ang pipila ka ansiyano nalisdan paghimo niana. Tingali nagpanuko sila kay ilang gibati nga mamenosan ang ilang awtoridad. Basin naghunahuna sila nga kinahanglang sila ang mangunay sa buluhaton. Apan, hinumdomi nga sa wala pa mosaka sa langit si Jesus, iyang gipiyal sa iyang mga tinun-an ang pagdumala sa usa ka dakong buluhaton, nga nahibalo nga mas dako pa ang ilang mahimo kay kaniya!—Mat. 28:19, 20; Juan 14:12.

Ang ubang mga ansiyano lagmit nagdelegar kaniadto apan wala sila makontento sa mga sangpotanan niana. Gibati nila nga mas pulido ug mas paspas ang trabaho kon sila ang mangunay niana. Apan, tagda ang panig-ingnan ni Pablo. Nahibalo siya sa kaayohan sa pagdelegar, apan naamgohan usab niya nga dili sa tanang higayon nga mahimo sa mga igsoon nga iyang gibansay ang tanan niyang gidahom. Sa iyang unang misyonaryong panaw, gibansay ni Pablo ang iyang kaubang batan-on nga si Marcos. Wala gayod malipay si Pablo sa dihang si Marcos mibiya sa iyang asaynment ug mipauli sa Jerusalem. (Buh. 13:13; 15:37, 38) Apan wala kana makapugong kaniya sa pagbansay sa uban. Sama sa nahisgotan na, iyang gidapit ang batan-ong Kristohanon nga si Timoteo aron mahimo niyang kauban sa pagpanaw. Sa dihang makahimo na si Timoteo sa pagpas-an ug mas bug-at nga responsibilidad, gibilin siya ni Pablo sa Efeso, ug gipiyal kaniya ang pagtudlog mga magtatan-aw ug ministeryal nga mga alagad.—1 Tim. 1:3; 3:1-10, 12, 13; 5:22.

Sa samang paagi, ang mga ansiyano karon dili angayng moundang sa pagbansay sa mga igsoon bisan pag dunay dili mosanong sa maong pagbansay. Maalamon ug mahinungdanon nga kita makakat-on sa pagsalig sa uban ug sa pagbansay kanila. Apan, unsang mga butanga ang angayng konsiderahon sa mga ansiyano sa dihang sila modelegar?

Kon Unsaon Pagdelegar

Sa dihang modelegar ug mga responsibilidad, konsideraha ang kuwalipikasyon sa mga brader nga buot nimong hatagan niana. Sa dihang nanginahanglag mga igsoon nga moapod-apod ug pagkaon sa Jerusalem, ang mga apostoles mipili ug ‘pito ka lalaki nga napanghimatud-ang maayo, puno sa espiritu ug kaalam.’ (Buh. 6:3) Kon imong idelegar ang usa ka dakong buluhaton sa usa ka igsoon nga dili pa kasaligan, basin mapakyas lamang siya sa pagbuhat niana. Busa, ginagmayng buluhaton una ang idelegar. Kon siya molampos sa pagbuhat niana, basin puwede na siyang hatagan ug dugang responsibilidad.

Apan, duna pay laing mga butang nga angayng tagdon. Dili managsama ang mga kinaiya ug katakos sa matag usa. Managlahi usab ang ilang mga kasinatian. Ang usa ka brader nga mahigalaon ug mapahiyomon lagmit maayong itudlo ingong atendant, samtang ang usa nga organisado ug sistematiko mahimong makatabang sa sekretaryo sa kongregasyon. Ang usa ka sister nga maayo sa dekorasyon mahimong itudlo nga maoy mag-areglar sa mga bulak panahon sa Memoryal.

Sa dihang magsangon ug mga responsibilidad, isaysay sa tin-aw ang inyong tumong. Sa wala pa ipadala ni Juan Bawtista ang mga mensahero ngadto kang Jesus, iya unang gisaysay kanila kon unsay gusto niyang mahibaloan ug kon unsang mga pulonga ang ilang isulti. (Luc. 7:18-20) Sa laing bahin, sa dihang gisugo ni Jesus ang iyang  mga tinun-an nga hiposon ang sobra sa pagkaon nga milagroso niyang gitagana, iyang gipiyal kanila kon unsaon nila kana pagbuhat. (Juan 6:12, 13) Nagdepende kana sa matang sa trabaho ug sa katakos sa gihatagan niana. Angayng mahibaloan sa nagdelegar ug sa gihatagag responsibilidad kon unsay mahimong resulta niana ug kon unsa kasubsob nga itaho ngadto sa nagdelegar ang mga kalamboan. Silang duha angayng mahibalo kon unsang mga butanga ang mahimong desisyonan sa gipiyalan sa maong buluhaton. Kon dunay tagal ang paghuman sa buluhaton, mas maayo nga magkauyon sila niana imbes ang nagdelegar lamang ang magtakda sa petsa.

Ang gisangonan sa responsibilidad angayng tagan-an ug kuwarta, mga galamiton, ug tabang kon gikinahanglan. Tingali makaayo kon ipahibalo sa uban ang maong kahikayan. Sa dihang gipiyal ni Jesus kang Pedro ang “mga yawi sa gingharian sa mga langit,” gihimo niya kana atubangan sa ubang mga tinun-an. (Mat. 16:13-19) Sa samang paagi, diha sa pipila ka kahimtang mas maayo tingali nga mahibalo ang kongregasyon kon kinsay gisangonan sa usa ka buluhaton.

Kinahanglang mag-amping usab. Kon magsige gihapon kag panghilabot sa buluhaton nga imo nang gisangon sa usa, sama rag ikaw miingon, “Wala koy pagsalig nimo.” Tinuod, may mga panahon tingali nga ang resulta sa iyang gihimo lahi sa imong gidahom. Apan, kon hatagag higayon ang gisangonan nga mobuhat niana, hayan makabaton siyag pagsalig sa kaugalingon ug makakat-on sa pagbuhat niana. Siyempre, wala kini magpasabot nga dili na gyod ka magpakabana kon giunsa niya kana pagbuhat. Bisan tuod gipiyal ni Jehova sa iyang Anak ang pipila ka responsibilidad maylabot sa paglalang, nalangkit gihapon siya sa maong buluhaton. Siya miingon ngadto sa Batid nga Magbubuhat: “Buhaton nato ang tawo sumala sa atong larawan.” (Gen. 1:26) Busa pinaagi sa pulong ug buhat, suportahi ang buluhaton, ug hatagig komendasyon ang mga paningkamot sa gisangonan niana. Makatabang kaniya kon inyong hisgotan sa mubo ang mga resulta niana. Kon aduna pay kinahanglang pauswagon, ayaw pagpanuko sa paghatag ug dugang tambag o tabang. Hinumdomi nga sa katibuk-an ikaw, nga maoy nagdelegar, ang may pangunang responsibilidad sa maong buluhaton.—Luc. 12:48.

Daghan ang nakabenepisyo tungod kay ang mga buluhaton sa kongregasyon gidelegar kanila sa mga ansiyano nga nagpakitag tiunayng interes. Sa pagkatinuod, ang tanang ansiyano kinahanglang makakat-on kon nganong angay silang modelegar ug kon sa unsang paagi ila kanang buhaton, isip pagsundog kang Jehova.

[Kahon sa panid 29]

ANG PAGDELEGAR MAOY

• paagi sa pagpaambit sa uban sa kalipay tungod sa mga kalamposan

• paagi sa pagpalampos sa mas daghan pang mga butang

• pagpakitag kaalam ug pagkamakasaranganon

• paagi sa pagbansay sa uban

• paagi sa pagpasundayag ug pagsalig sa uban

[Kahon sa panid 30]

KON UNSAON PAGDELEGAR

• Pagpili ug takos nga mga igsoon alang sa usa ka buluhaton

• Isaysay sa tin-aw/pakigkomunikar

• Ipatin-aw kon unsay inyong tumong

• Itagana ang mga butang nga gikinahanglan

• Suportahi ang buluhaton, ug ipakita ang imong pagsalig

• Ilha nga ikaw ang dunay pangunang responsibilidad

[Mga hulagway sa panid 31]

Ang pagdelegar naglakip sa pagsangon ug responsibilidad ug pagmonitor sa kalamboan niana