Ang Pagtinabangay Makapauswag sa Espirituwal

ANG pagtinabangay hinungdanon alang sa mga pamilya nga gustong mouswag sa espirituwal. Sa dihang gilalang ni Jehova ang unang magtiayon, iyang gipasiugda ang pagkahinungdanon sa pagtinabangay. Si Eva magsilbing “katimbang” ni Adan. (Gen. 2:18) Ang magtiayon angayng magtinabangay sa usag usa. (Eccl. 4:9-12) Gikinahanglan usab ang pagtinabangay sa pagtuman sa papel nga gihatag ni Jehova sa mga ginikanan ug mga anak.

Pamilyahanong Pagsimba

Si Barry ug Heidi adunay lima ka anak. Ilang naobserbahan nga ang regular nga pagtuon sa Bibliya sa pamilya nakatabang kanila nga mouswag sa espirituwal. Si Barry miingon: “Alang sa among pagtuon sa pamilya, akong hatagan ang mga bata ug ginagmayng mga asaynment matag karon ug unya. Mahimong pakomentohon nako sila sa ilang nabasa sa Pagmata! Mag-ensayo usab kami kon unsay among isulti sa tagbalay aron ang mga bata maandam sa pagsangyaw.” Si Heidi midugang: “Ang matag usa kanamo adunay listahan sa espirituwal nga mga tumong nga gusto namong kab-oton, ug matag karon ug unya panahon sa pagtuon sa pamilya, amo kining tan-awon kon unsa nay among nahimong pag-uswag.” Namatikdan usab niining magtiayona nga ang pagtakdag mga gabii kada semana nga dili sila motan-awg telebisyon maghatag kahigayonan sa pamilya nga makabasa sa mga publikasyon.

Mga Tigom sa Kongregasyon

Si Mike ug Denise adunay upat ka anak. Unsang kaayohan ang napahimuslan sa pamilya tungod sa pagtambayayongay? Matod ni Mike: “Usahay, bisag naningkamot kami pag-ayo nga dili maulahi sa tigom wala gihapon kami molampos, apan among nakita nga ang pagtinabangay nakatabang kanamo niining bahina.” Si Denise miingon: “Sa dihang nagdako ang mga bata, ang matag usa adunay iyang buluhaton. Ang among anak babaye nga si Kim motabang sa pagluto ug pag-andam sa lamesa.” Ang ilang anak nga si Michael nahinumdom: “Kada Martes sa gabii dunay tigom sa among balay. Busa manglimpiyo mi ug andamon namo ang mga lingkoranan.” Ang laing anak nga si Matthew midugang: “Seguroon ni Papa nga sayo siyang mopauli gikan sa trabaho panahon sa tigom aron tabangan mi sa pagpangandam alang sa tigom.” Unsay resulta niana?

Dili Gayod Makawang ang Paningkamot

Si Mike nag-asoy: “Sa 1987, nagpayunir mi ni Denise. Nianang panahona, kauban pa namo sa balay ang tulo sa among mga anak. Ang duha kanila nagpayunir usab, ug ang uban nagboluntaryo sa Bethel diha sa mga proyekto sa konstruksiyon. Nadugangan ang kalipay sa among pamilya kay nakatabang mig 40 ka indibiduwal nga makadangat sa pagpahinungod kang Jehova ug sa pagpabawtismo. Nakapribilehiyo usab kami sa pagtrabaho ingong pamilya diha sa mga proyekto sa konstruksiyon, bisan sa laing mga nasod.”

Sa pagkatinuod, ang pagtinabangay ingong pamilya dili gayod makawang. Duna pa bay laing mga paagi nga magtambayayongay kamo ingong pamilya? Makaseguro ka nga ang pagtinabangay motabang sa imong pamilya nga mouswag sa espirituwal.

[Hulagway sa panid 28]

Ang pag-ensayo motabang kanimo nga mouswag sa imong ministeryo