Kristohanong mga Pamilya—Sunda ang Ehemplo ni Jesus!

“Si Kristo . . . nagbilin kaninyog sulondan aron kamo managsunod pag-ayo sa iyang mga tunob.”—1 PED. 2:21.

1. (a) Unsay papel sa Anak sa Diyos diha sa paglalang? (b) Unsay pagbati ni Jesus sa katawhan?

 SA DIHANG gilalang sa Diyos ang langit ug yuta, tupad kaniya ang iyang bugtong Anak ‘ingong batid nga magbubuhat.’ Ang Anak sa Diyos mitabang usab sa iyang Amahan sa dihang si Jehova nagdisenyo ug naglalang sa nagkadaiyang mga mananap ug mga tanom dinhi sa yuta ug sa dihang Siya nag-andam sa Paraiso aron puy-an sa mga linalang nga gihimo sa larawan sa Diyos. Ang Anak sa Diyos, nga sa ulahi nailhan ingong Jesus, nahigugma gayod sa katawhan. “Ang mga butang nga [iyang] gikahinangpan maoy uban sa mga anak sa mga tawo.”—Prov. 8:27-31; Gen. 1:26, 27.

2. (a) Unsay gitagana ni Jehova sa dili-hingpit nga katawhan? (b) Unsang bahina sa kinabuhi nga ang Bibliya naghatag ug mga instruksiyon?

² Human makasala ang unang magtiayon, ang pagtubos sa sala sa katawhan nahimong hinungdanong bahin sa katuyoan ni Jehova. Iyang gitagana ang halad lukat ni Kristo aron maposible kana. (Roma 5:8) Dugang pa, gitagana ni Jehova ang iyang Pulong, ang Bibliya, nga naggiya sa tawo kon sa unsang paagi magmalamposon sa kinabuhi bisan pa sa napanunod nga pagkadili-hingpit. (Sal. 119:105) Diha sa iyang Pulong, si Jehova naghatag ug instruksiyon aron sa pagtabang sa mga tawo nga makabaton ug lig-on, malipayon nga mga pamilya. Mahitungod sa kaminyoon, ang basahon sa Genesis nag-ingon nga ang lalaki kinahanglang “moipon sa iyang asawa ug sila mahimong usa ka unod.”—Gen. 2:24.

3. (a) Unsay gitudlo ni Jesus bahin sa kaminyoon? (b) Unsay atong hisgotan niining artikuloha?

³ Panahon sa yutan-ong ministeryo ni Jesus, iyang gipasiugda nga ang kaminyoon maoy permanenteng bugkos. Siya nagtudlog mga prinsipyo nga kon ipadapat, motabang sa mga pamilya sa  paglikay sa mga tinamdan ug panggawi nga magpameligro sa kaminyoon o sa kalipay sa pamilya. (Mat. 5:27-37; 7:12) Kining artikuloha maghisgot kon sa unsang paagi ang gitudlo ni Jesus ug ang ehemplo nga iyang gihatag sa dinhi pa siya sa yuta makatabang sa mga bana, asawa, ginikanan, ug mga anak sa pagbaton ug malipayon, makapatagbawng kinabuhi.

Kon sa Unsang Paagi ang Kristohanong Bana Magpasidungog sa Iyang Asawa

4. Unsay kaamgiran sa papel ni Jesus ug nianang sa Kristohanong mga bana?

⁴ Ang Diyos nagtudlo sa bana ingong ulo sa pamilya, maingon nga si Jesus ang Ulo sa kongregasyon. Si apostol Pablo nag-ingon: “Ang bana maoy ulo sa iyang asawa ingon nga si Kristo usab maoy ulo sa kongregasyon, sanglit siya mao ang manluluwas niining maong lawas. Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efe. 5:23, 25) Sa pagkatinuod, ang pagtratar ni Jesus sa iyang mga sumusunod naghatag panig-ingnan kon unsaon pagtratar sa Kristohanong mga lalaki ang ilang mga asawa. Atong hisgotan ang pipila ka paagi diin si Jesus naggamit sa awtoridad nga gihatag sa Diyos kaniya.

5. Sa unsang paagi si Jesus naggamit sa iyang awtoridad ibabaw sa iyang mga tinun-an?

⁵ Si Jesus “malumog-buot ug mapainubsanon sa kasingkasing.” (Mat. 11:29) Siya usab molihok dayon kon gikinahanglan. Wala gayod siya mapakyas sa pagtuman sa iyang mga responsibilidad. (Mar. 6:34; Juan 2:14-17) Siya malulotong nagtambag sa iyang mga tinun-an, sa makadaghan pa gani kon gikinahanglan. (Mat. 20:21-28; Mar. 9:33-37; Luc. 22:24-27) Bisan pa niana, wala niya sila kasab-i o pakaulawi, ni gipabati niya kanila nga sila wala higugmaa o dili makahimo sa pagtuman sa iyang gitudlo kaniya. Hinunoa, iyang gihatagag komendasyon ug gidasig ang iyang mga tinun-an. (Luc. 10:17-21) Mao diay nga naangkon ni Jesus ang pagtahod sa iyang mga tinun-an kay siya mahigugmaon ug maluluy-on kanila!

6. (a) Unsay makat-onan sa bana gikan sa pagtratar ni Jesus sa iyang mga tinun-an? (b) Unsang pagdasig ang gihatag ni Pedro sa mga bana?

⁶ Ang panig-ingnan ni Jesus nagtudlo sa mga bana nga dili sila angayng magharihari sa ilang mga asawa, kondili pakitaan kinig pagtahod ug nagsakripisyo-sa-kaugalingon nga gugma. Si apostol Pedro nagdasig sa mga bana sa pagsundog sa pagkamahigugmaon ni Jesus pinaagi sa pagsabot sa ilang mga asawa, nga “maghatag kanila ug kadungganan.” (Basaha ang 1 Pedro 3:7.) Nan, sa unsang paagi gamiton sa bana ang iyang awtoridad ug sa samang higayon maghatag ug pasidungog sa iyang asawa?

7. Sa unsang paagi ang bana makapasidungog sa iyang asawa? Iilustrar.

⁷ Ang maampingong pagtagad sa opinyon ug pagbati sa iyang asawa sa dili pa mohimog mga desisyon nga mag-apektar sa pamilya maoy usa ka paagi nga ang bana makapasidungog sa iyang asawa. Tingali kinahanglang mohimog desisyon maylabot sa pagbalhin ug pinuy-anan o trabaho o mahitungod sa naandan nang mga kalihokan, sama sa kon asa magbakasyon o kon unsaon pagpamenos ang mga galastohan sa pamilya  panahon sa krisis. Sanglit maapektahan man ang pamilya, makaayo ug maluloton alang sa bana kon iyang tagdon ang opinyon sa iyang asawa, kay makatabang kini kaniya sa paghimog timbang, mas masinabtanong desisyon, ug mas dali alang sa asawa nga mopaluyo sa iyang bana. (Prov. 15:22) Ang Kristohanong mga bana nga nagpasidungog sa ilang mga asawa dili lamang makaangkon sa gugma ug pagtahod niini kondili, labaw sa tanan, sa pag-uyon ni Jehova.—Efe. 5:28, 29.

Kon sa Unsang Paagi ang Asawa Magpakitag Halalom nga Pagtahod sa Iyang Bana

8. Nganong dili maayong sundogon ang gihimo ni Eva?

⁸ Si Jesus nagpakitag hingpit nga sulondan alang sa Kristohanong mga asawa maylabot sa pagpasakop sa awtoridad. Pagkalahi gayod sa iyang panglantaw sa awtoridad kon itandi sa tinamdan nga gipakita sa unang babaye! Si Eva napakyas sa paghatag ug maayong panig-ingnan sa mga asawa. Ang iyang bana maoy gitudlo sa Diyos nga mahimong iyang ulo ug pinaagi kang Adan nga si Jehova mohatag ug mga instruksiyon. Apan, wala tahora ni Eva ang maong kahikayan. Napakyas siya sa pagsunod sa instruksiyon nga gipasa ni Adan kaniya. (Gen. 2:16, 17; 3:3; 1 Cor. 11:3) Tinuod nga si Eva nalimbongan, apan nangutana unta siya sa iyang bana kon angay ba siyang motuo sa tingog nga nangangkong nahibalo sa ‘nasayran sa Diyos.’ Hinunoa, siya nangahas sa pagdirehir sa iyang bana.—Gen. 3:5, 6; 1 Tim. 2:14.

9. Unsang ehemplo ang gihatag ni Jesus maylabot sa pagpasakop?

⁹ Sa laing bahin, si Jesus naghatag ug hingpit nga sulondan sa pagpasakop sa iyang Ulo. Ang iyang tinamdan ug paagi sa pagkinabuhi nagpakita nga siya “wala maghunahuna sa pagpangilog, nga mao, nga siya mahimong katumbas sa Diyos.” Sa kasukwahi, “iyang gihaw-asan ang iyang kaugalingon ug gihuptan ang dagway sa usa ka ulipon.” (Filip. 2:5-7) Karong adlawa, ingong nagamandong Hari, si Jesus nagpakita gihapon sa maong tinamdan. Siya mapainubsanong nagpasakop sa iyang Amahan sa tanang butang ug nagpaluyo sa Iyang pagkaulo.—Mat. 20:23; Juan 5:30; 1 Cor. 15:28.

10. Sa unsang paagi ang asawa mahimong makapaluyo sa pagkaulo sa iyang bana?

¹⁰ Maayong sundogon sa usa ka Kristohanong asawa si Jesus pinaagi sa pagpaluyo sa pagkaulo sa iyang bana. (Basaha ang 1 Pedro 2:21; 3:1, 2.) Tagda ang usa ka situwasyon diin mahimo niya kini. Ang iyang anak nga lalaki nananghid nga moapil sa usa ka kalihokan nga nagkinahanglag pagtugot sa ginikanan. Sanglit ang maong butang wala pa man nila maestoryahi sa iyang bana, maayong mangutana una siya, “Nananghid ka na ba ni papa nimo?” Kon wala pa, hisgotan una niya kini uban sa iyang bana sa dili pa modesisyon. Dugang pa, dili maayong supakon sa usa ka Kristohanong asawa ang iyang bana o kuwestiyonon ang iyang opinyon atubangan sa ilang mga anak. Kon dili siya mouyon sa iyang bana bahin sa usa ka butang, iya kining estoryahon nga sila rang duha.—Efe. 6:4.

 Panig-ingnan ni Jesus Alang sa mga Ginikanan

11. Unsang panig-ingnan ang gihatag ni Jesus sa mga ginikanan?

¹¹ Bisan tuod si Jesus wala magminyo o makabaton ug mga anak, siya maoy maayo kaayong sulondan sa Kristohanong mga ginikanan. Sa unsang paagi? Siya mahigugmaon ug mapailobong nagtudlo sa iyang mga tinun-an pinaagi sa pulong ug buhat. Iyang gipakita kanila kon unsaon pagtuman ang iyang gisugo kanila. (Luc. 8:1) Ang iyang pagtratar sa iyang mga tinun-an nagtudlo kanila kon unsaon nila pagtratar ang usag usa.—Basaha ang Juan 13:14-17.

12, 13. Unsay gikinahanglan kon gusto sa mga ginikanan nga ang ilang mga anak modako nga mahinadlokon sa Diyos?

¹² Ang mga anak sagad mosundog sa ilang mga ginikanan, maayo man ang gibuhat niini o dili. Busa, mga ginikanan, suknaa ang inyong kaugalingon: ‘Unsang panig-ingnan ang among gihatag sa among mga anak maylabot sa panahon nga among gigugol sa pagtan-awg TV ug paglingawlingaw maingon man sa pagtuon sa Bibliya ug pagsangyaw sa kanataran? Unsa man gayoy prioridad sa among pamilya? Naghatag ba kamig maayong ehemplo pinaagi sa pag-una sa matuod nga pagsimba diha sa among kinabuhi?’ Ang balaod sa Diyos kinahanglang matisok una sa kasingkasing sa mga ginikanan kon gusto nila nga ang ilang mga anak modako nga mahinadlokon sa Diyos.—Deut. 6:6.

¹³ Kon ang mga ginikanan maningkamot sa pagpadapat sa mga prinsipyo sa Bibliya diha sa adlaw-adlawng kalihokan, mamatikdan kini sa mga bata. Ang gisulti ug gitudlo sa mga ginikanan makaimpluwensiya sa ilang mga anak. Apan, kon makita sa mga anak nga ang ilang ginikanan wala magsunod sa mga sukdanan nga ilang gitakda, magtuo ang mga bata nga ang mga prinsipyo sa Bibliya dili gayod importante o mapuslanon. Ingong resulta, ang mga anak mas daling mahaylo sa pagpit-os sa kalibotan.

14, 15. Unsang mga prinsipyoha ang angayng ugmaron sa mga ginikanan diha sa ilang mga anak, ug unsa ang usa ka paagi nga mahimo nila kini?

¹⁴ Ang Kristohanong mga ginikanan nahibalo nga ang pagmatuto sa ilang anak naglangkit ug labaw pa kay sa pagtagana sa iyang materyal nga panginahanglan. Busa, dili gayod maalamon nga tudloan ang bata sa pagkab-ot sa mga tumong nga maghatag lamang kaniyag materyal nga bentaha. (Eccl. 7:12) Si Jesus nagtudlo sa iyang mga tinun-an nga unahon ang espirituwal nga mga butang. (Mat. 6:33) Busa, ingong pagsundog kang Jesus, ang Kristohanong mga ginikanan kinahanglang maningkamot usab sa pag-ugmad diha sa ilang mga anak sa tinguha sa pagkab-ot ug espirituwal nga mga tumong.

¹⁵ Ang usa ka paagi nga mahimo kini sa mga ginikanan mao ang pagpangitag higayon nga ang ilang mga anak makapakig-uban niadtong anaa sa bug-os-panahong pag-alagad. Hunahunaa kon unsa ka makapadasig nga masinati sa mga tin-edyer ang mga payunir o ang magtatan-aw sa sirkito ug ang iyang asawa. Ang nagaduaw nga mga misyonaryo, Bethelite, ug mga boluntaryo sa buluhatong pagpanukod mahimong makasaysay  nga madasigon bahin sa ilang kalipay sa pag-alagad kang Jehova. Sa walay duhaduha, ang maong mga bisita makaasoy ug makaiikag nga mga kasinatian. Ang ilang nagsakripisyo-sa-kaugalingon nga pag-alagad makatabag dako sa inyong mga anak sa paghimog maalamong mga desisyon, pagtakdag espirituwal nga mga tumong, ug pagbatog igong edukasyon nga makasuportar sa ilang bug-os-panahong pag-alagad.

Mga Anak—Unsay Motabang Kaninyo sa Pagsundog sa Ehemplo ni Jesus?

16. Sa unsang paagi gitahod ni Jesus ang iyang yutan-ong mga ginikanan ug ang iyang langitnong Amahan?

¹⁶ Mga anak, si Jesus nagpakita usab ug maayong ehemplo alang kaninyo. Si Jesus gipiyal kang Jose ug Maria, ug siya nagmasinugtanon kanila. (Basaha ang Lucas 2:51.) Iyang naila nga, bisan pa sa ilang pagkadili-hingpit, sila maoy gipiyalan sa Diyos sa pag-atiman kaniya. Tungod niana, angay silang tahoron. (Deut. 5:16; Mat. 15:4) Bisan sa dihang hamtong na siya, si Jesus kanunayng naghimo sa mga butang nga makapahimuot sa iyang langitnong Amahan. Naglangkit kana sa pagsukol sa tentasyon. (Mat. 4:1-10) May mga higayon nga kamong mga batan-on tentalon sa pagsupak sa inyong mga ginikanan. Unsay makatabang kaninyo sa pagsundog sa ehemplo ni Jesus?

17, 18. (a) Unsang matanga sa tentasyon ang giatubang sa mga batan-on sa eskuylahan? (b) Unsay hinumdoman sa mga batan-on aron ilang masuklan ang mga pagsulay?

¹⁷ Lagmit ang kadaghanan sa inyong mga eskolmet walay pagpabili sa mga sukdanan sa Bibliya. Tingali pugson mo nila sa pag-apil sa kuwestiyonableng mga kalihokan ug biaybiayon mo kon mobalibad. Kon bugalbugalan mo sa inyong mga eskolmet, unsa may inyong buhaton? Kamo nahibalo nga kon kamo magpadaog sa kahadlok ug moduyog kanila, mahigawad ang inyong mga ginikanan ug si Jehova. Unsa may mahitabo kaninyo kon inyong sundon ang inyong mga eskolmet? Tingali nagtakda na kamog pipila ka tumong alang sa inyong kaugalingon, sama sa pagkahimong payunir o ministeryal nga alagad, pag-alagad diin mas dako ang panginahanglan alang sa mga magmamantala sa Gingharian, o pagkahimong Bethelite. Ang pagpakig-uban ba sa inyong mga eskolmet motabang kaninyo sa pagkab-ot sa inyong mga tumong?

¹⁸ Kamo bang mga batan-on nakasinati nag pagsulay sa inyong pagtuo? Unsay inyong gibuhat? Hinumdomi ang inyong sulondan, si Jesus. Siya wala magpadaog sa tentasyon ug mibarog nga malig-on dapig sa kon unsay husto. Ang paghinumdom niini mohatag kaninyog kaisog sa pagsulti nga dili gayod kamo moduyog kanila sa pagbuhat ug daotan. Sama kang Jesus, itutok ang inyong mga mata sa palaaboton nga tibuok-kinabuhing malipayon nga pag-alagad ug pagkamasinugtanon kang Jehova.—Heb. 11:2.

Ang Sekreto sa Malipayon nga Pamilyahanong Kinabuhi

19. Unsay makahatag ug tinuod nga kalipay?

¹⁹ Gusto ni Jehova nga Diyos ug ni Jesu-Kristo ang labing maayo alang sa katawhan. Bisan sa atong pagkadili-hingpit, posible nga kita magmalipayon. (Isa. 48:17, 18; Mat. 5:3) Si Jesus nagtudlog mga kamatuoran sa Bibliya nga maghatag kalipay sa katawhan, apan dili kay kana ray iyang gitudlo sa iyang mga tinun-an. Gitudlo usab niya ang labing maayong paagi sa pagkinabuhi. Gawas pa niana, siya naghatag ug maayong ehemplo sa usa ka timbang nga pagkinabuhi ug tinamdan. Kitang tanan, bisan unsa pay atong papel diha sa pamilya, makabenepisyo sa pagsundog sa iyang panig-ingnan. Busa, kamong mga bana, asawa, ginikanan, ug mga anak, sundoga ninyo ang ehemplo ni Jesus! Ang pagsunod sa gitudlo ni Jesus ug pagsundog sa iyang panig-ingnan mao gayod ang sekreto sa pagtagamtam ug makapatagbaw ug malipayon nga pamilyahanong kinabuhi.

Unsay Imong Tubag?

• Sa unsang paagi gamiton sa mga bana ang awtoridad nga gihatag sa Diyos kanila?

• Sa unsang paagi masundog sa asawa ang ehemplo ni Jesus?

• Unsay makat-onan sa mga ginikanan sa pagtratar ni Jesus sa iyang mga tinun-an?

• Unsay makat-onan sa mga batan-on sa ehemplo ni Jesus?

[Mga Pangutana sa Pagtuon]

[Hulagway sa panid 8]

Sa dili pa mohimog desisyon nga makaapektar sa pamilya, unsay himoon sa usa ka mahigugmaong bana?

[Hulagway sa panid 9]

Unsa nga situwasyon ang maghatag sa asawa ug kahigayonan nga mopaluyo sa pagkaulo sa iyang bana?

[Hulagway sa panid 10]

Ang mga anak mosundog sa maayong batasan sa ilang mga ginikanan