Mga Binhi sa Kamatuoran Nakaabot sa Hilit nga mga Dapit

ANG Republika sa Tuva sa Rusya nahimutang sa kinahabagatang tumoy sa Siberia, nga ang Mongolia anaa sa habagatan ug sidlakan niini. Daghang tawo sa Tuva ang nagpuyo sa hilit nga mga komunidad nga lisod maabtan sa mensahe sa Gingharian. Apan di pa dugay, usa ka grupo sa mga tawo gikan sa ubay-ubayng hilit nga mga dapit sa Tuva ang miadto sa Kyzyl, ang kaulohan niini, aron sa pagtambong ug seminar. Si Maria, nga usa ka payunir sa Kyzyl, nakadungog bahin sa ilang pag-abot, ug iyang naamgohan nga kini usa ka talagsaong kahigayonan sa pagpaambit kanila sa maayong balita.

Giasoy ni Maria ang nahitabo: “Ang eskuylahan diin ako nagmaestra nag-eskedyul ug seminar kon unsaon pagsulbad ang pag-abuso sa alkoholikong ilimnon ug droga. Mga 50 ka tawo gikan sa kinalay-ang mga rehiyon sa Tuva ang manambong niana. Ang grupo naglakip sa mga magtutudlo, sikologo, tigsusi sa kahimtang sa mga bata, ug uban pa.” Para kang Maria, kini nga seminar maoy usa ka oportunidad ug usa ka hagit usab. Siya nagpatin-aw: “Ako maulawon mao nga malisdan ko sa pagsangyaw sa di-pormal nga paagi. Apan, ako nag-ampo kang Jehova nga makabaton unta akog kaisog sa pagbuntog sa akong kahadlok ug gamiton kini nga oportunidad sa paghatag ug pamatuod.” Milampos ba siya?

Si Maria nagpadayon: “Nakakaplag kog magasing Pagmata! nga naghisgot bahin sa mga phobia. Naghunahuna ko nga hayan mainteres niana ang usa ka sikologo, busa gidala nako kanang magasina sa eskuylahan. Nianang adlawa, usa sa mga magtutudlo nga mitambong sa seminar misulod sa akong opisina, ug akong gitanyag kaniya ang magasin. Gidawat dayon niya kana. Gani, siya miingon nga may phobia sab siya. Pagkaugma, gidad-an nako siya sa librong Mga Pangutanang Gisukna sa mga Batan-on—Mga Tubag nga Mosaler, Tomo 1. Gidawat usab niya kana. Sanglit giganahan man siya sa libro, naghunahuna ko nga basin mainteres usab ang ubang mga magtutudlo sa maong basahon. Busa nagdala kog usa ka karton sa librong Gisukna sa mga Batan-on ug sa uban pang mga publikasyon.” Wala madugay, nahurot ang basahon. Giasoy ni Maria ang nahitabo: “Pipila ka kauban sa magtutudlo nga akong gihatagan sa librong Gisukna sa mga Batan-on ang nangadto sa akong opisina ug nangutana, ‘Asa man makakuhag libro?’” Wala gyod sila masayop sa pagduol nako!

Natapos ang seminar sa adlawng Sabado. Nianang adlawa walay trabaho si Maria, busa nagdispley siyag mga literatura diha sa mga lamesa sa iyang opisina. Diha siyay gipaskin nga mensahe: “Minahal nga mga Magtutudlo! Makakuha kamo ug basahon para sa inyong kaugalingon ug sa inyong mga higala. Kining maanindot nga mga publikasyon motabang kaninyo nga magmalamposon sa inyong trabaho ug magpalig-on sa inyong pamilya.” Unsay ilang sanong? “Pag-adto nako sa akong opisina nianang adlawa halos nahurot na ang basahon. Nagkuha dayon ko ug bag-ong suplay sa mga libro ug magasin.” Pagkahuman sa seminar, si Maria nakapahimutang ug 380 ka magasin, 173 ka libro, ug 34 ka brosyur. Sa dihang ang nanambong sa seminar namauli na sa hilit nga mga dapit diin sila nagpuyo ug nagtrabaho, dala nila ang mga basahon. Miingon si Maria, “Nalipay kaayo ko nga ang mga binhi sa kamatuoran nakaabot na sa hilit kaayong mga dapit sa Tuva!”—Eccl. 11:6.

[Mapa sa panid 32]

(Alang sa aktuwal nga porma, tan-awa ang publikasyon)

RUSYA

REPUBLIKA SA TUVA