Modawat nga Mapasalamaton—Mohatag nga Kinasingkasing

SI Jehova, ang atong mahigugmaon nga langitnong Amahan, may kahangawa kanato. Ang Pulong sa Diyos nagpasalig kanato nga siya nahingawa pag-ayo sa tanan niyang mga alagad. (1 Ped. 5:7) Ang usa ka paagi nga si Jehova nagpakita sa iyang kahingawa mao ang pagtagana kanato ug lainlaing tabang para makaalagad kaniya nga matinumanon. (Isa. 48:17) Ilabina sa dihang kita makasinatig bug-at kaayong mga problema, buot ni Jehova nga atong pahimuslan ang tabang nga iyang gitagana. Gipakita kana sa Balaod ni Moises.

Ilalom sa Balaod, si Jehova nagtaganag mahigugmaong tabang alang “sa sinakit,” sama sa ilo, balo, ug langyaw. (Lev. 19:9, 10; Deut. 14:29) Siya nahibalo nga ang pipila sa iyang mga alagad hayan magkinahanglag tabang gikan sa ilang mga isigkamagsisimba. (Sant. 1:27) Busa, ang iyang mga alagad dili angayng magpanuko sa pagdawat ug tabang gikan niadtong gipalihok ni Jehova sa pagtabang kanila. Bisan pa niana, kon kita modawat ug tabang, ato kanang buhaton uban ang hustong tinamdan.

Sa samang higayon, ang Bibliya nagpasiugda nga ang katawhan sa Diyos may kahigayonan usab sa paghatag. Hinumdomi ang asoy bahin sa “kabos nga babayeng balo” nga nakita ni Jesus didto sa templo sa Jerusalem. (Luc. 21:1-4) Lagmit nakabenepisyo siya gikan sa mahigugmaong mga tagana ni Jehova alang sa mga babayeng balo nga gihisgotan diha sa Balaod. Bisan pa niana, ang maong balo nahinumdoman, dili tungod sa iyang pagdawat ug tabang, kondili sa iyang paghatag alang sa templo. Ang iyang pagkamahinatagon seguradong nakapalipay kaniya kay si Jesus miingon, “adunay labaw nga kalipay sa paghatag kay sa pagdawat.” (Buh. 20:35) Tungod nianang kamatuorana, sa unsang paagi imong ‘mabatasan ang paghatag’ ug bation ang kalipay sa pagbuhat niana?—Luc. 6:38.

“Unsay Akong Igabayad Kang Jehova?”

Ang salmista naghunahuna: “Unsay akong igabayad kang Jehova tungod sa tanan niyang mga kaayohan kanako?” (Sal. 116:12) Unsa ang mga kaayohan nga iyang nadawat? Si Jehova nagpaluyo kaniya panahon sa “kasakit ug kaguol.” Dugang pa, si Jehova ‘nagluwas sa iyang kalag gikan sa kamatayon.’ Busa gusto niyang ‘magbayad’ kang Jehova. Unsa may mahimo sa salmista? Siya miingon: “Pagabayran ko ang akong mga panaad kang Jehova.” (Sal. 116:3, 4, 8, 10-14) Siya nakahukom sa pagtuman sa tanan niyang panaad ug obligasyon kang Jehova.

Makahimo ka usab niana. Sa unsang paagi? Pinaagi sa pagkinabuhi sumala sa mga balaod ug prinsipyo sa Diyos. Busa, tinoa nga ang imong pagsimba kang Jehova mao ang labing hinungdanong butang sa imong kinabuhi ug tugotan ang espiritu sa Diyos nga mogiya kanimo sa tanan nimong buhaton. (Eccl. 12:13; Gal. 5:16-18) Siyempre, dili gayod nimo mabayran si Jehova sa tanan niyang nahimo  alang kanimo. Bisan pa niana, ‘malipay si Jehova’ kon ikaw kinasingkasing nga mag-alagad kaniya. (Prov. 27:11) Pagkadakong pribilehiyo nga mapahimut-an si Jehova niining paagiha!

Paghatag Ngadto sa Kongregasyon

Sa walay duhaduha mouyon ka nga nakabaton kag daghang kaayohan gikan sa Kristohanong kongregasyon. Pinaagi niana, si Jehova nagtaganag dagayang espirituwal nga pagkaon. Imong nadawat ang kamatuoran nga nagpahigawas kanimo gikan sa bakak nga pagtulon-an ug sa espirituwal nga kangitngit. (Juan 8:32) Diha sa mga tigom sa kongregasyon, asembliya, ug mga kombensiyon nga gihikay sa “matinumanon ug maalamong ulipon,” ikaw nakabaton ug kahibalo nga motultol sa kinabuhing dayon diha sa paraisong yuta diin wala nay kasakit ug pag-antos. (Mat. 24:45-47) Maihap ba nimo ang tanang kaayohan nga imong nadawat—ug madawat pa—pinaagi sa kongregasyon sa Diyos? Unsay imong ikabalos sa kongregasyon?

Si apostol Pablo misulat: “Ang tibuok lawas, kay takdo nga pagkadugtong ug gihimong magtambayayongay pinaagi sa matag lutahan nga naghatag sa gikinahanglan, sumala sa paglihok sa matag sangkap sa angay nga sukod, nagpatubo sa lawas alang sa pagpalig-on sa kaugalingon niini diha sa gugma.” (Efe. 4:15, 16) Bisan tuod kanang tekstoha sa panguna nagtumong sa mga dinihogan, ang prinsipyo niana mapadapat sa tanang Kristohanon karon. Oo, ang matag membro sa kongregasyon makatampo sa kaayohan ug pag-uswag sa kongregasyon. Sa unsang mga paagi?

Mahimo nato kana pinaagi sa pagpaningkamot pag-ayo nga atong madasig ug mapalig-on ang uban. (Roma 14:19) Makatampo usab kita sa ‘pagpatubo sa lawas’ pinaagi sa pag-ugmad sa bunga sa espiritu sa Diyos diha sa atong pagpakiglabot sa atong mga igsoon sa pagtuo. (Gal. 5:22, 23) Dugang pa, makapangita kitag mga kahigayonan sa ‘pagbuhat ug maayo ngadto sa tanan, apan ilabina kanila nga atong kabanay sa pagtuo.’ (Gal. 6:10; Heb. 13:16) Ang tanan sa kongregasyon—mga lalaki ug babaye, bata ug tigulang—makapakigbahin sa ‘pagpatubo sa lawas diha sa gugma.’

Dugang pa, atong magamit ang atong mga katakos, kusog, ug kahinguhaan sa pagpakigbahin sa nagaluwas-ug-kinabuhi nga buluhaton nga ginahimo sa kongregasyon. ‘Kamo nakadawat nga walay bayad,’ miingon si Jesu-Kristo. Unsay angay natong buhaton? ‘Paghatag nga walay bayad,’ siya miingon. (Mat. 10:8) Busa, bug-os nga makig-ambit sa hinungdanong buluhaton nga pagsangyaw sa Gingharian ug paghimog mga tinun-an. (Mat. 24:14; 28:19, 20) Limitado ba ang imong mahimo? Hinumdomi ang kabos nga babayeng balo nga gihubit ni Jesus. Diyutay ra kaayo ang iyang gihatag. Bisan pa niana, si Jesus miingon nga labaw pa ang iyang nahimo kay sa uban. Iyang gihatag ang tanan nga gitugot sa iyang kahimtang.—2 Cor. 8:1-5, 12.

Pagdawat Uban ang Hustong Tinamdan

Bisan pa niana, may mga panahon tingali nga magkinahanglan kag tabang gikan sa kongregasyon. Ayaw gayod pagpanuko sa pagdawat ug bisan unsang tabang nga ikahatag sa kongregasyon sa dihang ikaw nabug-atan sa mga problema niining sistemaha. Si Jehova nagtaganag kuwalipikado ug mahangawaong mga lalaki aron sa ‘pagbantay sa kongregasyon’—sa pagtabang kanimo sa dihang makasinati kag mga pagsulay ug mga kalisdanan. (Buh. 20:28) Ang mga ansiyano ug ang uban pa diha sa kongregasyon gustong mohupay, mopaluyo, ug motabang kanimo panahon sa kalisdanan.—Gal. 6:2; 1 Tes. 5:14.

Apan, sa dihang ikaw hatagag tabang, tinoa nga dawaton kana uban ang hustong tinamdan. Pabilhi kanunay ang tabang nga imong madawat. Isipa ang maong tabang gikan sa mga igsoon ingong pamatuod sa dili-takos nga kalulot sa Diyos. (1 Ped. 4:10) Nganong hinungdanon man kana? Tungod kay dili nato gusto nga modawat nga walay pagpabili, sama sa ginahimo sa kadaghanan sa kalibotan.

 Mahimong Timbang ug Makataronganon

Sa iyang sulat ngadto sa kongregasyon sa Filipos, si Pablo misulat bahin kang Timoteo: “Wala akoy lain nga may sama kaniyag tinamdan kinsa tiunay nga moatiman sa mga butang labot kaninyo.” Apan, midugang si Pablo: “Ang tanang uban pa nagtinguha sa ilang kaugalingong kaayohan, dili nianang kang Kristo Jesus.” (Filip. 2:20, 21) Nan, unsay atong buhaton aron dili mahimong sobra ka puliki sa “kaugalingong kaayohan”?

Dili gayod kita mamugos sa atong mga igsoon sa kongregasyon nga tabangan kita sa atong mga problema. Nganong dili man? Hunahunaa kini: Sa walay duhaduha, mapasalamaton gayod kita kon dunay igsoon nga mohatag kanato ug materyal nga tabang panahon sa kalisod. Apan pugson ba nato siya sa paghatag? Siyempre dili. Sa susama, bisan tuod ang atong mahigugmaong mga igsoon malipay gayod sa pagtabang kanato, kita kinahanglan nga mahimong timbang ug makataronganon sa atong dahomon nga ihatag nila kanato. Kon buot hunahunaon, gusto nato nga kinabubut-on silang motabang kanato.

Tino nga ang imong mga igsoon andam gayong motabang kanimo. Bisan pa niana, may mga panahon nga dili sila makahatag sa tanan nimong gikinahanglan. Kon mahitabo kana, makasalig ka nga si Jehova motabang kanimo sa bisan unsang kalisdanan nga imong maagoman, sama sa iyang gibuhat kaniadto sa salmista.—Sal. 116:1, 2; Filip. 4:10-13.

Busa, ayaw pagpanuko sa pagdawat nga mapasalamaton sa bisan unsa nga itagana ni Jehova kanimo—ilabina panahon sa kalisdanan. (Sal. 55:22) Gusto niyang buhaton nimo kana. Apan, buot usab niya nga ikaw mahimong “malipayong maghahatag.” Busa, bug-os nga ‘ihukom diha sa imong kasingkasing’ nga mohatag kutob sa imong maarangan sa pagpaluyo sa matuod nga pagsimba. (2 Cor. 9:6, 7) Nianang paagiha, mahimo nimo ang pagdawat nga mapasalamaton ug ang paghatag nga kinasingkasing.

[Kahon/Mga hulagway sa panid 31]

‘Unsay akong ibayad kang Jehova tungod sa tanan niyang kaayo kanako?’—Sal. 116:12

▪ Pangitag kahigayonan sa ‘pagbuhat ug maayo ngadto sa tanan’

▪ Dasiga ug palig-ona ang uban

▪ Bug-os nga makig-ambit sa buluhatong paghimog mga tinun-an kutob sa imong maarangan