Sundoga si Jesus—Pagsangyaw nga Maisogon
Sundoga si Jesus—Pagsangyaw nga Maisogon
“Kami nakabaton ug kaisog . . . nga isulti kaninyo ang maayong balita.”—1 TES. 2:2.
1. Nganong makapadani kaayo ang maayong balita sa Gingharian?
PAGKANINDOT gayod nga makadungog ug maayong balita! Ug ang kinamaayohang balita mao ang bahin sa Gingharian sa Diyos. Kini nagpasalig kanato nga matapos ang pag-antos, sakit, kagul-anan, ug kamatayon. Kini nagbukas sa dalan ngadto sa kinabuhing walay kataposan, nagbutyag sa katuyoan sa Diyos, ug nagpakita kanato kon sa unsang paagi makabaton ug suod nga relasyon kaniya. Maghunahuna ka tingali nga ang tanan gustong makadungog niining balita nga gipaambit ni Jesus sa katawhan. Apan, ikasubo nga dili ingon niana ang nahitabo.
2. Ipatin-aw ang gipamulong ni Jesus: “Ako mianhi sa pagpahinabog panagkabahin.”
2 Giingnan ni Jesus ang iyang mga tinun-an: “Ayaw hunahunaa nga ako mianhi aron sa pagdalag pakigdait sa yuta; ako mianhi aron sa pagdala, dili sa pakigdait, kondili sa espada. Kay ako mianhi sa pagpahinabog panagkabahin, sa lalaki batok sa iyang amahan, ug sa anak nga babaye batok sa iyang inahan, ug sa batan-ong asawa batok sa iyang ugangang babaye. Sa pagkatinuod, ang mga kaaway sa usa ka tawo mao unya ang mga tawo sa iyang kaugalingong panimalay.” (Mat. 10:34-36) Imbes dawaton ang maayong balita, kadaghanan sa mga tawo nagsalikway niana. Ang uban naghimo gani sa ilang kaugalingon nga mga kaaway niadtong nagmantala niana, bisan pag sila maoy suod nga mga membro sa pamilya.
3. Unsay atong gikinahanglan aron kita magmalamposon diha sa pagsangyaw?
3 Kita nagmantala usab sa kamatuoran nga gimantala ni Jesus, ug ang mga tawo karon susama usab ug reaksiyon. Madahom kini. Si Jesus miingon sa iyang mga tinun-an: “Ang ulipon dili labaw kay sa iyang agalon. Kon sila naglutos kanako, sila magalutos usab kaninyo; kon sila nagbantay sa akong pulong, sila magbantay usab sa inyoha.” (Juan 15:20) Diha sa daghang nasod kita wala mag-atubang ug dayag nga paglutos, apan kita tamayon o dili tagdon. Busa, nagkinahanglan kitag pagtuo ug pagkamaunongon sa paglahutay sa pagsangyaw sa maayong balita nga maisogon.—Basaha ang 2 Pedro 1:5-8.
4. Nganong si Pablo kinahanglang ‘makabaton ug kaisog’ sa pagsangyaw?
4 Tingali may mga panahon nga malisdan ka sa pagsangyaw, o mahadlok ka sa pagpakigbahin sa ubang paagi sa pagsangyaw. Kon mao, dili ra ikaw ang mibati niana. Si apostol Pablo maoy usa ka maisogong magwawali nga may lalom nga pagsabot sa kamatuoran. Bisan pa niana, dihay mga panahon nga nalisdan siya sa pagsangyaw. Siya misulat ngadto sa mga Kristohanon sa Tesalonica: “Human kami mag-antos una ug gipasipalahan (ingon sa inyong nahibaloan) sa Filipos, kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.” (1 Tes. 2:2) Sa Filipos, ang mga awtoridad nagsugo nga si Pablo ug ang iyang kauban nga si Silas bunalan, bilanggoon, ug ibutang sa sepohan. (Buh. 16:16-24) Bisan pa niana, si Pablo ug Silas “nakabaton ug kaisog” sa pagpadayon sa pagsangyaw. Sa unsang paagi mahimo nato kana? Buweno, atong hisgotan kon unsay nakatabang sa mga alagad sa Diyos sa karaang panahon sa pagsulti nga maisogon sa kamatuoran bahin kang Jehova, ug atong sayron kon sa unsang paagi kita makasundog sa ilang panig-ingnan.
Kaisog Gikinahanglan sa Pag-atubang sa Pagdumot
5. Nganong ang kaisog gikinahanglan gayod niadtong maunongon kang Jehova?
5 Siyempre, ang pangunang ehemplo sa pagpakitag kaisog mao si Jesu-Kristo. Bisan pa niana, sukad sa sinugdanan sa kasaysayan sa tawo, ang kaisog gikinahanglan gayod niadtong nagmaunongon kang Jehova. Ngano? Human sa rebelyon didto sa Eden, si Jehova nagtagna nga adunay panag-away tali niadtong nag-alagad sa Diyos ug niadtong nag-alagad kang Satanas. (Gen. 3:15) Kini nga panag-away nadayag dayon sa dihang si Abel, nga usa ka matarong nga tawo, gipatay sa iyang igsoon. Sa ulahi, gidumtan usab si Enoc, laing matinumanong tawo nga nabuhi sa wala pa ang Lunop. Siya nagtagna nga ang Diyos moabot uban sa Iyang balaang mga manulonda aron sa pagpahamtang ug paghukom batok sa mga dili-diyosnon. (Jud. 14, 15) Tino nga daghan sa katawhan ang wala makauyon niining mensahea. Ang mga tawo nagdumot kang Enoc ug lagmit patyon nila siya kon wala pa taposa ni Jehova ang iyang kinabuhi. Maisogon gayod si Enoc!—Gen. 5:21-24.
6. Nganong nagkinahanglag kaisog si Moises sa pagpakigsulti kang Paraon?
6 Hunahunaa usab ang kaisog nga gipakita ni Moises sa pagpakigsulti kang Paraon, usa ka magmamando nga giisip, dili ingong hawas lamang sa mga diyos, kondili ingong diyos mismo, ang anak sa haring adlaw nga si Ra. Lagmit nga sama sa ubang mga Paraon, siya nagsimba usab sa iyang kaugalingon. Ang iyang isulti maoy matuman. Si Paraon gamhanan, arogante, ug gahian. Wala siya maanad nga sultian sa uban kon unsay iyang buhaton. Niining tawhana nga ang aghop nga magbalantayng si Moises, balikbalik nga miatubang—nga wala dapita ug wala dawata. Unsay gitagna ni Moises? Malaglagong mga hampak. Ug unsay iyang gihangyo? Siya mihangyo nga tugotan ang milyonmilyong ulipon ni Paraon sa pagbiya sa nasod! Nagkinahanglan bag kaisog si Moises? Tino gayod!—Num. 12:3; Heb. 11:27.
7, 8. (a) Unsang mga pagsulay ang naagoman sa mga matinumanon kaniadto? (b) Unsay nakatabang niadtong mga matinumanon sa wala pa ang Kristohanong panahon sa pagpakitag kaisog sa pagbayaw ug pagpalambo sa putli nga pagsimba?
7 Sa misunod nga mga siglo, ang mga manalagna ug ang ubang matinumanong mga alagad sa Diyos nagpadayon sa pagbarog nga maisogon dapig sa putli nga pagsimba. Gidumtan sila sa kalibotan ni Satanas. Si Pablo nag-ingon: “Sila gibato, sila gisulayan, sila gipamutol pinaagig gabas, sila gipamatay pinaagi sa espada, sila naglakawlakaw nga nagsul-ob sa mga panit sa karnero, sa mga panit sa kanding, samtang sila nag-antos sa kawalad-on, sa kasakitan, gidaogdaog.” (Heb. 11:37) Unsay nakatabang niadtong maunongong mga alagad sa Diyos sa pagbarog nga malig-on? Diha sa nag-unang mga bersikulo, gihisgotan sa apostol kon nganong nakalahutay si Abel, Abraham, Sara, ug ang uban pa. Siya miingon: “Wala sila makabaton sa katumanan sa mga saad, apan [pinaagi sa pagtuo] sila nakakita niini sa halayo ug nahinangop niini.” (Heb. 11:13) Sa walay duhaduha, ang mga manalagna sama kang Elias, Jeremias, ug ang ubang mga matinumanon sa wala pa ang Kristohanong panahon kinsa maisogong mibarog dapig sa matuod nga pagsimba natabangan usab sa paglahutay tungod sa ilang pagsalig nga matuman ang mga saad ni Jehova.—Tito 1:2.
8 Ang maong mga matinumanon nagpaabot sa usa ka masanag ug maanindot nga kaugmaon. Sa pagkabanhaw nila, sila sa ngadtongadto makadangat sa kahingpitan ug ‘mahigawas gikan sa pagkaulipon sa pagkadunot’ sa tabang ni Kristo Jesus ug sa iyang 144,000 nga luyoluyong mga saserdote. (Roma 8:21) Dugang pa, si Jeremias ug ang ubang maisogong mga alagad sa Diyos sa karaang panahon nakabatog kaisog tungod sa pasalig ni Jehova, nga makita diha sa iyang saad kang Jeremias: “Sila makig-away gayod batok kanimo, apan sila dili makadaog batok kanimo, kay ‘ako magauban kanimo,’ mao ang giingon ni Jehova, ‘aron sa pagluwas kanimo.’” (Jer. 1:19) Karong adlawa, kita mapalig-on usab kon atong palandongon ang mga saad sa Diyos ug ang espirituwal nga proteksiyon nga iyang gipasalig kanato.—Prov. 2:7; basaha ang 2 Corinto 4:17, 18.
Ang Gugma Nagtukmod Kang Jesus sa Pagsangyaw nga Maisogon
9, 10. Sa unsang mga paagi si Jesus nagpakitag kaisog atubangan (a) sa mga lider sa relihiyon, (b) sa grupo sa mga sundalo, (c) sa hataas nga saserdote, (d) ni Pilato?
9 Si Jesus, nga atong Ehemplo, nagpakitag pagkamaisogon sa lainlaing paagi. Pananglitan, bisan tuod gidumtan siya niadtong adunay gahom ug impluwensiya, wala pagaana ni Jesus ang mensahe nga gusto sa Diyos nga mahibaloan sa mga tawo. Siya maisogong nagyagyag sa gamhanang mga lider sa relihiyon tungod sa ilang pagpakamatarong sa kaugalingon maingon man sa ilang bakak nga mga pagtulon-an. Si Jesus walay lipodlipod nga naghukom kanila. Sa usa niana ka higayon, siya miingon: “Alaot kamo, mga eskriba ug mga Pariseo, mga salingkapaw! tungod kay kamo samag pinaputi nga mga lubnganan, nga sa panggawas sa pagkatinuod matahom tan-awon apan sa sulod puno sa mga bukog sa patayng mga tawo ug sa tanang matang sa kahugawan. Nianang paagiha kamo usab, sa panggawas, matarong tan-awon sa mga tawo, apan sa sulod kamo puno sa pagkasalingkapaw ug kalapasan.”—Mat. 23:27, 28.
10 Sa dihang giatubang sa usa ka grupo sa mga sundalo didto sa tanaman sa Getsemane, si Jesus maisogong nagpaila sa iyang kaugalingon. (Juan 18:3-8) Sa ulahi siya gidala atubangan sa Sanhedrin ug gisukitsukit sa hataas nga saserdote. Bisan tuod nahibalo siya nga ang hataas nga saserdote nangitag rason nga ipapatay siya, si Jesus maisogong nagpamatuod nga Siya mao ang Kristo ug ang Anak sa Diyos. Siya midugang nga sila makakita kaniya nga “magalingkod sa tuong kamot sa gahom ug magaanhi uban sa mga panganod sa langit.” (Mar. 14:53, 57-65) Wala madugay human niana, si Jesus nagbarog nga ginapos atubangan ni Pilato, kinsa makahatag unta kaniyag kagawasan. Apan si Jesus wala motubag sa mga akusasyon batok kaniya. (Mar. 15:1-5) Kining tanan nagkinahanglag dakong kaisog.
11. Sa unsang paagi ang kaisog nalangkit sa gugma?
11 Si Jesus miingon kang Pilato: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” (Juan 18:37) Si Jehova nagsugo kang Jesus sa pagsangyaw sa maayong balita, ug si Jesus nalipay sa pagbuhat niana tungod kay iyang gihigugma ang iyang langitnong Amahan. (Luc. 4:18, 19) Si Jesus nahigugma usab sa katawhan. Nahibalo siya nga lisod ang ilang kahimtang. Sa samang paagi, tungod usab sa atong dakong gugma sa Diyos ug sa atong silingan nga kita makasangyaw nga maisogon.—Mat. 22:36-40.
Ang Balaang Espiritu Maghatag Kanatog Kaisog sa Pagsangyaw
12. Unsay nakapalipay sa unang mga tinun-an?
12 Sa mga semana human sa kamatayon ni Jesus, ang mga tinun-an nalipay kay sa tabang ni Jehova daghan ang nadugang kanila. Aw, sa usa lamang ka adlaw, dihay nabawtismohan nga mga 3,000 ka Hudiyo ug mga proselita gikan sa ubang kayutaan nga nangadto sa Jerusalem aron sa pagsaulog sa Pentekostes! Lagmit giestoryahan gayod kadto sa tibuok Jerusalem! Ang Bibliya nag-ingon: “Giabot ug kahadlok ang tanang kalag, ug nahitabo ang daghang tilimad-on ug mga ilhanan pinaagi sa mga apostoles.”—Buh. 2:41, 43.
13. Nganong ang mga igsoon nag-ampo alang sa kaisog, ug unsay resulta?
13 Ang mga lider sa relihiyon nasuko pag-ayo ug ilang gipadakop si Pedro ug Juan, gipabilanggo sila sa tibuok gabii, ug gibaoran nga dili na mosulti bahin kang Jesus. Sa dihang gibuhian sila, ilang gitug-an sa mga igsoon ang nahitabo, ug silang tanan nag-ampo bahin sa pagsupak nga ilang giatubang, nga naghangyo: “Jehova, . . . itugot sa imong mga alagad ang pagpadayon pagsulti sa imong pulong uban ang bug-os nga kaisog.” Unsay resulta? “Silang tanan gayod napuno sa balaang espiritu ug nanagsulti sa pulong sa Diyos uban ang kaisog.”—Buh. 4:24-31.
14. Sa unsang paagi ang balaang espiritu nagtabang kanato sa pagsangyaw?
14 Matikdi nga ang gamhanang balaang espiritu ni Jehova maoy nagtabang sa mga tinun-an sa pagsulti sa pulong sa Diyos nga maisogon. Ang kaisog sa pagsulti sa kamatuoran ngadto sa uban, bisan niadtong supak sa atong mensahe, wala maggikan kanato. Si Jehova makahatag ug mohatag kanato sa iyang balaang espiritu kon ato kanang pangayoon kaniya. Sa tabang ni Jehova, kita usab makapakitag kaisog sa paglahutay sa bisan unsang paglutos.—Basaha ang Salmo 138:3.
Ang mga Kristohanon Karon Maisogong Nagsangyaw
15. Sa unsang paagi ang kamatuoran nagbahin sa katawhan karon?
15 Sa atong adlaw, ang kamatuoran padayon usab nga nagbahin sa katawhan. Ang uban modawat niana, samtang ang uban wala makasabot ni magpabili sa atong pagsimba. Ang uban manaway, magbugalbugal, o magdumot pa gani kanato, sama gayod sa gitagna ni Jesus. (Mat. 10:22) Usahay, kita daoton pinaagi sa pagpakaylap ug sayop nga impormasyon ug propaganda diha sa mga balita. (Sal. 109:1-3) Bisan pa niana, ang katawhan ni Jehova nagmantala sa maayong balita sa tibuok kalibotan.
16. Unsang eksperyensiya ang nagpakita nga ang kaisog makausab sa panglantaw niadtong atong gisangyawan?
16 Ang atong kaisog mahimong mag-usab sa panglantaw sa mga tawo bahin sa mensahe sa Gingharian. Usa ka sister sa Kyrgyzstan nag-asoy: “Samtang ako nagsangyaw, giingnan ko sa usa ka tagbalay: ‘Ako nagtuo sa Diyos apan dili sa Diyos sa mga Kristohanon. Kon mobalik gani ka dinhi, ipagukod ti ka sa akong iro!’ Sa iyang likod dihay dako nga bulldog. Apan panahon sa pagpanagtag sa Kingdom News Num. 37, ‘Ang Kataposan sa Bakak nga Relihiyon Haduol Na!,’ nakahukom ko sa pagbalik nianang balaya nga nanghinaot nga mahimamat ang lain pang membro sa pamilya nianang tawhana. Apan, siya gihapon ang miabli sa pultahan. Miampo dayon ko kang Jehova ug unya miingon kaniya: ‘Komosta. Nahinumdom ko sa atong panag-estoryahay tulo ka adlaw ang miagi, ug nahinumdom sab ko sa imong iro. Apan dili mahimong labyan ti ka tungod kay sama kanimo, ako nagtuo sa bugtong matuod nga Diyos. Sa dili madugay silotan sa Diyos ang tanang relihiyon nga nagpasipala kaniya. Daghan ka pag masayran bahin niana pinaagi sa pagbasa niini.’ Sa akong katingala, gidawat sa tawo ang Kingdom News. Dayon miadto ko sa laing balay. Paglabay sa pipila ka minutos, ang tawo nagdagan paingon nako dala ang Kingdom News. ‘Ako na ning nabasa,’ matod pa niya. ‘Unsa may akong buhaton aron dili masuko ang Diyos nako?’” Nasugdan ang usa ka pagtuon sa Bibliya uban kaniya, ug siya misugod pagtambong sa mga tigom.
17. Sa unsang paagi ang kaisog sa usa ka sister nakapalig-on sa ginatun-an sa Bibliya nga gidaog sa kahadlok?
17 Ang atong kaisog makadasig usab sa uban nga magmaisogon. Sa Rusya usa ka sister nga nagsakay sa bus ang mitanyag ug magasin sa laing pasahero. Sa kalit lang dihay tawo nga mitindog ug iyang gilabni ang magasin, gikumot kana, ug gilabay. Iyang gibalikas ang sister, unya gipangayo ang iyang adres ug gipasidan-an siya nga dili na mosangyaw sa maong baryo. Ang sister miampo kang Jehova alang sa tabang ug iyang gipahinumdoman ang iyang kaugalingon sa mga pulong ni Jesus: “Ayaw ninyo kahadloki silang makapatay sa lawas.” (Mat. 10:28) Siya kalmadong mitindog ug miingon sa tawo, “Di nako ihatag nimo ang akong adres, ug magpadayon ko pagsangyaw dinhi sa baryo.” Dayon nanaog siya sa bus. Wala mahibalo ang sister nga ang usa sa iyang ginatun-an sa Bibliya diha usab diay sa maong bus. Ang maong babaye gidaog sa iyang kahadlok sa tawo maong dili siya motambong sa mga tigom. Apan, human niya makita ang kaisog sa sister, ang babaye nakahukom nga mosugod na siya pagtambong sa mga tigom.”
18. Unsay motabang kanimo sa pagsangyaw nga maisogon, sama kang Jesus?
18 Niining kalibotan nga nahimulag sa Diyos, kinahanglang magmaisogon sa pagsangyaw sama kang Jesus. Unsay motabang kanimo sa pagbuhat niana? Lantaw sa umaabot. Hupting lig-on ang imong gugma sa Diyos ug sa silingan. Pag-ampo kang Jehova alang sa kaisog. Hinumdomi kanunay nga wala ka gayod mag-inusara, kay si Jesus nagauban kanimo. (Mat. 28:20) Ang balaang espiritu magpalig-on kanimo. Ug si Jehova magapanalangin ug magapaluyo kanimo. Busa, hinaot nga magmaisogon kita ug moingon: “Si Jehova ang akong magtatabang; dili ako mahadlok. Unsay arang mabuhat sa tawo kanako?”—Heb. 13:6.
Unsay Imong Tubag?
• Nganong ang mga alagad sa Diyos nagkinahanglag kaisog?
• Bahin sa pagkamaisogon, unsay atong makat-onan gikan . . .
sa mga matinumanon nga nabuhi una kang Kristo?
kang Jesu-Kristo?
sa unang mga Kristohanon?
sa mga isigka-Kristohanon karon?
[Mga Pangutana sa Pagtuon]
[Hulagway sa panid 21]
Way-kokahadlok nga giyagyag ni Jesus ang binuhatan sa mga lider sa relihiyon
[Hulagway sa panid 23]
Si Jehova naghatag kanatog kaisog sa pagsangyaw