Kinabuhing Walay Kataposan sa Yuta—Hinatag-sa-Diyos nga Paglaom

“Ang kalalangan gipailalom sa pagkawalay-pulos . . . pinasukad sa paglaom.”—ROMA 8:20.

1, 2. (a) Nganong hinungdanon kanato ang paglaom nga kinabuhing walay kataposan sa yuta? (b) Nganong daghan ang nagduhaduha niana?

 TINGALI imong mahinumdoman ang kalipay nga imong gibati sa dihang imong nahibaloan nga sa dili madugay ang mga tawo dili na matigulang ug mamatay kondili mabuhi sa yuta sa walay kataposan. (Juan 17:3; Pin. 21:3, 4) Lagmit nalipay ka nga ipaambit sa uban ang maong Kasulatanhong paglaom. Kay kon buot hunahunaon, ang paglaom nga kinabuhing walay kataposan maoy hinungdanong bahin sa maayong balita nga atong gisangyaw. Kini nag-apektar sa atong tinamdan sa kinabuhi.

² Ang kadaghanan sa relihiyon sa Kakristiyanohan wala magtagad sa maong paglaom. Bisan tuod nagtudlo ang Bibliya nga ang kalag mamatay, ang kadaghanan sa mga relihiyon nagtudlo sa dili-Kasulatanhong doktrina nga ang tawo adunay imortal nga kalag nga magpabiling buhi sa espirituhanong dapit. (Ezeq. 18:20) Tungod niana, daghang tawo ang nagduhaduha kon posible ba ang kinabuhing walay kataposan sa yuta. Nan, makapangutana kita: Gipaluyohan ba gayod sa Bibliya ang maong paglaom? Kon mao, kanus-a kana gibutyag sa Diyos ngadto sa mga tawo?

“Gipailalom sa Pagkawalay-Pulos . . . Pinasukad sa Paglaom”

3. Sa unsang paagi napadayag ang katuyoan sa Diyos alang sa katawhan sukad sa sinugdanan sa kasaysayan sa tawo?

³ Gipadayag ni Jehova ang iyang katuyoan alang sa katawhan sukad pa sa sinugdanan sa kasaysayan sa tawo. Klarong giingon sa Diyos nga si Adan mabuhi sa walay kataposan kon siya magmasinugtanon. (Gen. 2:9, 17; 3:22) Sa walay duhaduha, ang unang mga anak ni Adan nahibalo bahin sa pagkawala sa kahingpitan sa tawo, nga napamatud-an sa makitang ebidensiya. Ang entrada sa tanaman sa Eden gialihan, ug ang mga tawo matigulang na ug mamatay. (Gen. 3:23, 24) Sa paglabay sa panahon, nagkamubo ang kinabuhi sa tawo. Si Adan nabuhi ug 930 ka tuig. Ang nakalabang-buhi sa Lunop nga si Sem nabuhi lamang ug 600 ka tuig, ug ang iyang anak nga si Arpaksad sulod sa 438 ka tuig. Ang amahan ni Abraham nga si Tera nabuhi sulod sa 205 ka tuig. Si Abraham nabuhi sulod sa 175 ka tuig, ang iyang anak nga si Isaac 180 ka tuig, ug si Jacob sulod sa 147 ka tuig. (Gen. 5:5; 11:10-13, 32; 25:7; 35:28; 47:28) Daghang tawo ang lagmit nakaamgo kon unsay buot ipasabot nianang pag-us-os sa gitas-on sa kinabuhi sa tawo—nawala ang paglaom nga mabuhi sa walay kataposan! May katarongan ba silang molaom nga mabatonan pag-usab ang kinabuhing walay kataposan?

4. Nganong ang matinumanong mga tawo sa kakaraanan makatuo nga ipasig-uli sa Diyos ang mga panalangin nga giwala ni Adan?

⁴ Ang Pulong sa Diyos nag-ingon: “Ang kalalangan gipailalom sa pagkawalay-pulos . . . pinasukad sa paglaom.” (Roma 8:20) Unsang paglaoma? Ang unang tagna sa Bibliya nagpunting sa “binhi” nga ‘magsamad sa ulo sa halas.’ (Basaha ang Genesis 3:1-5, 15.) Alang sa mga matinumanon, ang saad maylabot sa Binhi naghatag ug paglaom nga tumanon sa Diyos ang iyang katuyoan alang sa katawhan. Kana naghatag sa mga tawo sama kang Abel ug Noe ug katarongan nga motuo nga ang Diyos magpasig-uli sa mga panalangin nga giwala ni Adan. Tingali naamgohan  niining mga tawhana nga ang ‘pagsamad sa tikod sa binhi’ naglangkit ug pag-ulag dugo.—Gen. 4:4; 8:20; Heb. 11:4.

5. Unsay nagpakita nga si Abraham nagtuo sa pagkabanhaw?

⁵ Tagda si Abraham. Sa dihang gisulayan, si Abraham “sama ug naghalad na kang Isaac, . . . [ang] iyang bugtong nga anak.” (Heb. 11:17) Nganong andam man siya sa pagbuhat niana? (Basaha ang Hebreohanon 11:19.) Kay siya nagtuo sa pagkabanhaw! Si Abraham may pasikaranan sa iyang pagtuo niana. Kon buot hunahunaon, gipasig-uli ni Jehova ang katakos ni Abraham sa pagsanay ug gipaposible nga siya ug ang iyang asawa nga si Sara makabaton ug anak sa ilang katigulangon. (Gen. 18:10-14; 21:1-3; Roma 4:19-21) Gisaaran usab ni Jehova si Abraham. Ang Diyos miingon kaniya: “Ang pagatawgon nga imong binhi maoy pinaagi kang Isaac.” (Gen. 21:12) Busa, si Abraham adunay lig-ong mga katarongan sa paglaom nga banhawon sa Diyos si Isaac.

6, 7. (a) Unsang pakigsaad ang gihimo ni Jehova uban kang Abraham? (b) Sa unsang paagi ang saad ni Jehova kang Abraham naghatag ug paglaom sa katawhan?

⁶ Tungod sa talagsaong pagtuo ni Abraham, si Jehova naghimog pakigsaad uban kaniya maylabot sa iyang kaliwat, o “binhi.” (Basaha ang Genesis 22:18.) Ang pangunang bahin sa “binhi” mao si Jesu-Kristo. (Gal. 3:16) Giingnan ni Jehova si Abraham nga ang iyang “binhi” modaghan “sama sa mga bituon sa kalangitan ug sama sa mga lugas sa balas nga anaa sa baybayon”—nga ang gidaghanon wala pa mahibaloi ni Abraham. (Gen. 22:17) Apan, sa ulahi gibutyag kana. Si Jesu-Kristo ug ang 144,000, nga magmando uban kaniya sa iyang Gingharian, maoy naglangkob sa “binhi.” (Gal. 3:29; Pin. 7:4; 14:1) Pinaagi sa Mesiyanikong Gingharian nga “ang tanang nasod sa yuta . . . magapanalangin sa ilang kaugalingon.”

⁷ Lagmit gayong wala masabti ni Abraham ang bug-os nga kahulogan sa pakigsaad nga gihimo ni Jehova uban kaniya. Bisan pa niana, “siya nagpaabot sa siyudad nga may tinuod nga mga patukoranan,” nag-ingon ang Bibliya. (Heb. 11:10) Ang maong siyudad mao ang Gingharian sa Diyos. Aron madawat ang mga panalangin ilalom niana nga Gingharian, kinahanglang mabuhi pag-usab si Abraham. Mabatonan lamang niya ang kinabuhing walay kataposan dinhi sa yuta pinaagi sa pagkabanhaw. Ug ang kinabuhing dayon mahimong mabatonan niadtong makalabang buhi sa Armagedon o niadtong pagabanhawon.—Pin. 7:9, 14; 20:12-14.

“Ang Espiritu Nagpugos Kanako”

8, 9. Nganong ang basahon ni Job dili lamang usa ka asoy bahin sa mga pagsulay nga naagoman sa usa ka tawo?

⁸ Sa yugto sa panahon tali sa apo sa tuhod ni Abraham nga si Jose ug sa manalagnang si Moises, dihay tawo nga ginganlag Job. Ang basahon sa Bibliya ni Job, nga lagmit gisulat ni Moises, nagpatin-aw kon nganong gitugotan ni Jehova si Job nga mag-antos ug kon unsay gisangpotan niana. Apan, ang basahon ni Job dili lamang asoy bahin sa pagsulay nga naagoman sa usa ka tawo; kini nasentro sa mga isyu nga nag-apektar sa tanang intelihenteng mga linalang sa Diyos. Ang maong basahon nagpatin-aw kanato nga si Jehova nagmando sa matarong nga paagi, ug kini nagbutyag nga ang integridad ug kaugmaon sa tanang yutan-ong mga alagad sa Diyos nalangkit sa isyu nga gipatungha didto sa Eden. Bisan tuod wala masabti ni Job kining isyuha, wala niya tugoti ang iyang tulo ka kauban sa pag-impluwensiya sa iyang hunahuna nga siya wala makahupot sa iyang integridad. (Job 27:5) Angay kining mopalig-on sa atong pagtuo ug motabang kanato sa pagkaamgo nga kita makahupot sa atong integridad ug makabayaw sa pagkasoberano ni Jehova.

⁹ Human makapamulong ang tulo ka maghuhupay konohay ni Job, “si Elihu nga anak nga lalaki ni Barakel nga Buzihanon mitubag.” Unsay nagtukmod kaniya sa pagsulti? “Ako napuno sa mga pulong,” siya miingon. “Ang espiritu nagpugos kanako sulod sa akong tiyan.” (Job 32:5, 6, 18) Bisan tuod ang gipamulong ni Elihu natuman sa dihang gipasig-uli ang kahimtang ni Job, ang iyang gipamulong makahuloganon usab sa uban. Kana naghatag ug paglaom sa tanang maghuhupot sa integridad.

10. Unsay nagpakita nga ang mensahe ni Jehova sa usa ka indibiduwal aduna usahay mas dakong kapadapatan sa katawhan sa katibuk-an?

¹⁰ Usahay si Jehova mohatag ug mensahe sa  usa ka indibiduwal nga adunay mas dako usab nga kapadapatan sa katawhan sa katibuk-an. Makita kini diha sa tagna ni Daniel nga naglangkit sa damgo sa hari sa Babilonya nga si Nabucodonosor bahin sa pagputol sa dako kaayong kahoy. (Dan. 4:10-27) Bisan tuod ang maong damgo may katumanan diha kang Nabucodonosor, kini adunay mas dako pang katumanan. Nagpaila kana nga ang pagmando sa Diyos dinhi sa yuta nga gipahayag pinaagi sa gingharian sa banay ni Haring David mapasig-uli human sa 2,520 ka tuig, sugod sa 607 W.K.P. a Ang pagkasoberano sa Diyos maylabot sa yuta napadayag pag-usab pinaagi sa pag-entrono kang Jesu-Kristo didto sa langit niadtong 1914. Hunahunaa lang kon sa unsang paagi ang pagmando sa Gingharian magtuman sa dili madugay sa paglaom sa masinugtanong katawhan!

“Luwasa Siya Gikan sa Pagkahulog sa Gahong!”

11. Unsay gipaila bahin sa Diyos sa gipamulong ni Elihu?

¹¹ Sa pagtubag kang Job, si Elihu naghisgot bahin sa “usa ka mensahero alang kaniya, usa ka tigpamaba, usa sa usa ka libo, aron sa pagsulti sa tawo sa iyang katul-id.” Unsa na man kon kining maong mensahero “mangaliyupo sa Diyos aron siya mahimuot kaniya”? Si Elihu nag-ingon: “Nan [ang Diyos] mopabor kaniya ug moingon, ‘Luwasa siya gikan sa pagkahulog sa gahong! Ako nakakaplag ug usa ka lukat! Mabag-o ang iyang unod labi pa kay sa pagkabatan-on.’” (Job 33:23-26) Kana nagpakita sa pagkaandam sa Diyos nga modawat sa “lukat,” alang sa mahinulsolong katawhan.—Job 33:24.

12. Unsang paglaom alang sa katawhan ang gipadayag sa mga pulong ni Elihu?

¹² Lagmit si Elihu wala makasabot sa bug-os nga kahulogan sa lukat, maingon nga ang mga manalagna wala makasabot sa bug-os sa ilang gisulat. (Dan. 12:8; 1 Ped. 1:10-12) Bisan pa niana, ang gipamulong ni Elihu nagpaila nga sa umaabot dawaton sa Diyos ang usa lukat ug iyang ipahigawas ang tawo gikan sa daotang mga epekto sa pagkatigulang ug kamatayon. Ang mga pulong ni Elihu nagpadayag sa kahibulongang paglaom nga kinabuhing walay kataposan. Ang basahon ni Job nagpakita usab nga aduna unyay pagkabanhaw.—Job 14:14, 15.

13. Unsay kahulogan sa mga pulong ni Elihu alang sa mga Kristohanon?

¹³ Karong adlawa, ang mga pulong ni Elihu makahuloganon gihapon alang sa milyonmilyong Kristohanon nga naglaom nga  makalabang-buhi sa kalaglagan niining presenteng sistema sa mga butang. Ang mga tigulang nga makalabang buhi mahibalik sa adlaw sa ilang pagkabatan-on. (Pin. 7:9, 10, 14-17) Dugang pa, ang paglaom nga makita ang mga binanhaw nga mahibalik sa ilang pagkabatan-on padayong maghatag ug kalipay sa matinumanong katawhan. Siyempre, ang imortal nga kinabuhi sa langit alang sa dinihogang mga Kristohanon ug kinabuhing walay kataposan dinhi sa yuta alang sa “ubang mga karnero” ni Jesus nagdepende sa pagpasundayag ug pagtuo sa halad lukat ni Kristo.—Juan 10:16; Roma 6:23.

Lamyon ang Kamatayon

14. Unsay nagpakita nga duna pay laing gikinahanglan gawas sa Balaod ni Moises aron mabatonan sa mga Israelinhon ang paglaom nga kinabuhing walay kataposan?

¹⁴ Ang kaliwat ni Abraham nahimong gawasnong nasod sa dihang sila misulod sa usa ka pakigsaad uban sa Diyos. Sa dihang naghatag kanila sa Balaod, si Jehova miingon: “Tumanon gayod ninyo ang akong mga lagda ug ang akong hudisyal nga mga hukom, nga kon buhaton sa usa ka tawo, siya usab gayod mabuhi pinaagi kanila.” (Lev. 18:5) Kay wala man sila makaabot sa hingpit nga mga sukdanan sa Balaod, ang mga Israelinhon nahimong tinunglo ug nagkinahanglag kagawasan.—Gal. 3:13.

15. Mahitungod sa unsang umaabot nga panalangin nga si David giinspirar sa pagsulat?

¹⁵ Human kang Moises, giinspirar ni Jehova ang ubang mga magsusulat sa Bibliya sa paghisgot bahin sa kinabuhing walay kataposan. (Sal. 21:4; 37:29) Pananglitan, si salmistang David nagtapos sa usa ka salmo bahin sa panaghiusa sa matuod nga mga magsisimba didto sa Zion niining mga pulonga: “Didto gisugo ni Jehova nga maanaa ang panalangin, bisan ang kinabuhi hangtod sa panahong walay tino [o, sa walay kataposan].”—Sal. 133:3.

16. Pinaagi kang Isaias, unsay gisaad ni Jehova bahin sa umaabot sa “tibuok yuta”?

¹⁶ Giinspirar ni Jehova si Isaias sa pagtagna bahin sa kinabuhing walay kataposan sa yuta. (Basaha ang Isaias 25:7, 8.) Sama sa makatuok nga “tabon,” o habol, ang sala ug kamatayon nagpabug-at sa katawhan. Gipasaligan ni Jehova ang iyang katawhan nga ang sala ug kamatayon pagalamyon, o wagtangon, “gikan sa tibuok yuta.”

17. Unsang matagnaong papel sa Mesiyas ang nagbukas sa dalan ngadto sa kinabuhing walay kataposan?

¹⁷ Tagda usab kon unsay giingon sa Balaod ni Moises mahitungod sa kanding alang kang Azazel. Kas-a sa usa ka tuig, sa Adlaw sa Pagtabon sa Sala, ‘itapion [sa hataas nga saserdote] ang duha niya ka kamot sa ulo sa buhing kanding ug isugid  ibabaw niini ang tanang kasaypanan sa mga anak sa Israel, ug itapion niya sila sa ulo sa kanding ug pagadad-on sa kanding mismo ang tanan nilang kasaypanan ngadto sa usa ka desyerto nga yuta.’ (Lev. 16:7-10, 21, 22) Si Isaias nagtagna bahin sa pag-abot sa Mesiyas, nga may susamang papel ug iyang pagadad-on sa halayo ang “mga sakit,” “mga kasakit,” ug “sala mismo sa daghang tawo,” sa ingon nagbukas sa dalan ngadto sa kinabuhing walay kataposan.—Basaha ang Isaias 53:4-6, 12.

18, 19. Unsang paglaoma ang gipasiugda sa Isaias 26:19 ug Daniel 12:13?

¹⁸ Pinaagi kang Isaias, giingnan ni Jehova ang Israel nga iyang katawhan: “Ang imong mga patay mangabuhi. Ang akong mga patayng lawas—sila mobangon. Pagmata ug paghugyaw sa kalipay, kamong mga pumoluyo sa abog! Kay ang imong yamog maoy ingon sa yamog sa mga malba, ug ang yuta magtugot bisan niadtong walay gahom sa kamatayon nga mahimugso.” (Isa. 26:19) Ang Hebreohanong Kasulatan klarong nagpadayag sa paglaom sa pagkabanhaw ug kinabuhi dinhi sa yuta. Pananglitan, sa hapit nang mag-100 ang edad ni Daniel, gipasaligan siya ni Jehova: “Ikaw mopahulay, apan ikaw mobarog alang sa imong bahin sa kataposan sa mga adlaw.”—Dan. 12:13.

¹⁹ Tungod sa paglaom sa pagkabanhaw, si Marta nakaingon kang Jesus mahitungod sa iyang igsoon nga namatay: “Ako nahibalo nga mobangon siya diha sa pagkabanhaw sa kataposan nga adlaw.” (Juan 11:24) Ang mga pagtulon-an ba ni Jesus ug ang inspiradong mga sinulat sa iyang mga tinun-an nag-usab niining paglaoma? Ang kinabuhing walay kataposan dinhi sa yuta mao ba gihapoy paglaom nga gitanyag ni Jehova sa katawhan? Atong hisgotan ang mga tubag niining mga pangutanaha sa sunod nga artikulo.

[Footnote]

Makapatin-aw Ka Ba?

• Pinasukad sa unsa nga paglaom nga ang mga tawo “gipailalom sa pagkawalay-pulos”?

• Unsay nagpamatuod nga si Abraham nagtuo sa pagkabanhaw?

• Unsang paglaom ang gitanyag ngadto sa katawhan diha sa mga pulong ni Elihu kang Job?

• Sa unsang paagi gipasiugda sa Hebreohanong Kasulatan ang paglaom sa pagkabanhaw ug kinabuhing walay kataposan sa yuta?

[Mga Pangutana sa Pagtuon]

[Hulagway sa panid 5]

Ang mga pulong ni Elihu kang Job nagpadayag sa paglaom nga ang tawo mahigawas sa pagkatigulang ug kamatayon

[Hulagway sa panid 6]

Gipasaligan si Daniel nga ‘siya mobarog alang sa iyang bahin sa kataposan sa mga adlaw’