Kinabuhing Walay Kataposan sa Yuta—Paglaom nga Nadiskobrehan Pag-usab

“Oh Daniel, himoa nga tinago ang mga pulong . . . hangtod sa panahon sa kataposan. Daghan ang magngadto-nganhi, ug ang matuod nga kahibalo modagaya.”—DAN. 12:4.

1, 2. Unsang mga pangutana ang hisgotan niining artikuloha?

 MILYONMILYONG tawo karon ang tin-awng nakasabot sa Kasulatanhong pasikaranan sa paglaom nga kinabuhing walay kataposan sa paraisong yuta. (Pin. 7:9, 17) Sa pagsugod sa kasaysayan sa tawo, gipadayag sa Diyos nga ang tawo gihimo aron mabuhi, dili lamang sa pipila ka tuig ug dayon mamatay, kondili sa walay kataposan.—Gen. 1:26-28.

² Ang pagpasig-uli sa katawhan ngadto sa kahingpitan nga giwala ni Adan maoy bahin sa paglaom nga nabatonan sa Israel. Gipatin-aw diha sa Kristohanon Gregong Kasulatan ang paagi nga gamiton sa Diyos aron mabatonan sa katawhan ang kinabuhing walay kataposan sa paraiso sa yuta. Busa nganong kinahanglan mang madiskobrehan pag-usab ang paglaom sa tawo? Sa unsang paagi kini gipadayag ngadto sa daghan kaayong tawo?

Paglaom nga Gitago

3. Nganong dili ikatingala nga natago ang paglaom sa katawhan nga kinabuhing walay kataposan sa yuta?

³ Gitagna ni Jesus nga ang mini nga mga manalagna magtuis sa iyang mga pagtulon-an ug daghan ang mahisalaag. (Mat. 24:11) Si apostol Pedro nagpasidaan sa mga Kristohanon: “Aduna unyay mini usab nga mga magtutudlo taliwala kaninyo.” (2 Ped. 2:1) Gihisgotan ni apostol Pablo ang usa ka “yugto sa panahon [sa dihang ang mga tawo] dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan.” (2 Tim. 4:3, 4) Si Satanas maoy nagpahisalaag sa mga tawo ug naggamit sa apostatang Kristiyanidad aron tagoan ang makapadasig nga kamatuoran bahin sa katuyoan sa Diyos alang sa tawo ug sa yuta.—Basaha ang 2 Corinto 4:3, 4.

4. Unsa nga paglaom sa katawhan ang gisalikway sa apostatang mga lider sa relihiyon?

⁴ Gipatin-aw sa Kasulatan nga ang Gingharian sa Diyos maoy usa ka kagamhanan sa langit nga magdugmok ug magtapos sa tanang gobyerno sa tawo. (Dan. 2:44) Sulod sa usa ka libo tuig nga pagmando ni Kristo, si Satanas itambog sa kahiladman, ang mga patay banhawon, ug ang katawhan ipasig-uli sa kahingpitan dinhi sa yuta. (Pin. 20:1-3, 6, 12; 21:1-4) Apan, ang apostatang mga lider sa Kakristiyanohan nagsagop ug laing mga ideya. Pananglitan, ang ikatulong-siglo nga Amahan sa Simbahan nga si Origen sa Alexandria nagsaway niadtong mituo nga ang Milenyo magdalag mga panalangin dinhi sa yuta. Ang Katolikong teologo nga si Augustine sa Hippo (354-430 K.P.) “misuportar sa ideya nga walay milenyo,” nag-ingon ang The Catholic Encyclopedia. a

5, 6. Nganong supak man si Origen ug Augustine sa pagtulon-an sa Milenyo?

⁵ Nganong supak man si Origen ug si Augustine sa pagtulon-an sa Milenyo? Si Origen estudyante ni Clemente sa Alexandria, kinsa midawat sa ideya bahin sa imortal nga kalag gikan sa Gregong tradisyon. Kay naimpluwensiyahan pag-ayo si Origen sa mga pagtulon-an ni Plato bahin sa kalag, iyang “gidugang sa Kristiyanong doktrina  ang ideya ni Plato bahin sa kalag ug sa dulnganan niini,” miingon si Werner Jaeger nga usa ka teologo. Tungod niana, si Origen nagtudlo nga ang mga panalangin sa Milenyo dili mahitabo sa yuta kondili sa langit.

⁶ Una makombertir sa “Kristiyanidad” sa edad nga 33, si Augustine nahimong Neoplatoniko—sumusunod sa usa ka bersiyon sa pilosopiya ni Plato nga gitudlo ni Plotinus sa ikatulong siglo. Bisan pag nakombertir si Augustine sa “Kristiyanidad,” nagpabilin gihapon ang iyang Neoplatonikong panghunahuna. “Dako kaayo ang iyang papel sa pagsagol sa mga pagtulon-an sa Bag-ong Tugon ug sa Gregong pilosopiya ni Plato,” nag-ingon ang The New Encyclopædia Britannica. Para kang Augustine ang Usa ka Libo ka Tuig nga Pagmando nga gihisgotan diha sa Pinadayag kapitulo 20 “maoy usa lamang ka sambingay,” matod sa The Catholic Encyclopedia. Kini midugang: “Gisagop kini sa nagsunod nga mga teologo sa Kasadpan, ug wala na paluyohi ang pagtuo bahin sa yutan-ong milenyo.”

7. Unsang bakak nga pagtulon-an ang nagtuis sa paglaom sa tawo nga kinabuhing walay kataposan sa yuta, ug sa unsang paagi kana nahitabo?

⁷ Ang paglaom sa katawhan nga kinabuhing walay kataposan sa yuta gituis pinaagi sa ideya nga mikaylap sa karaang Babilonya ug sa tibuok kalibotan—nga ang tawo adunay dili-mamatay nga kalag o espiritu sulod sa lawas. Sa dihang gisagop sa Kakristiyanohan ang maong ideya, gituis sa mga teologo ang Kasulatan aron ang mga teksto nga naghubit sa langitnong paglaom pagasabton nga daw nagtudlo nga ang tanang buotang tawo moadto sa langit. Sumala niini nga panglantaw, ang kinabuhi sa tawo dinhi sa yuta temporaryo lamang—usa ka pagsulay sa pagtino kon siya takos ba sa kinabuhi sa langit. Nahitabo usab kana sa orihinal nga paglaom sa mga Hudiyo nga kinabuhing walay kataposan sa yuta. Samtang inanay nga gisagop sa mga Hudiyo ang Gregong ideya nga ang kalag dili mamatay, ang ilang orihinal nga paglaom sa kinabuhing walay kataposan sa yuta nakalimtan. Sukwahi gayod kana sa giingon sa Bibliya bahin sa tawo! Ang tawo maoy usa ka pisikal nga linalang, dili espiritu. Si Jehova nagsulti sa unang tawo: “Abog ikaw.” (Gen. 3:19) Sa yuta, dili sa langit, ang walay-kataposang puloy-anan sa tawo.—Basaha ang Salmo 104:5; 115:16.

Kamatuoran Mikidlap Diha sa Kangitngit

8. Unsay giingon sa pipila ka eskolar sa katuigan sa 1600 bahin sa paglaom sa tawo?

⁸ Bisan pag kadaghanan sa mga relihiyon nga nag-angkong Kristohanon wala magtudlo sa paglaom nga kinabuhing walay kataposan sa yuta, si Satanas dili kanunayng milampos sa pagtago sa kamatuoran. Latas sa katuigan, ang pipila ka maampingong magbabasa sa Bibliya nakakita sa mga kidlap sa kamatuoran samtang ilang nasabtan ang pipila ka bahin kon sa unsang paagi ipasig-uli sa Diyos ang katawhan ngadto sa kahingpitan. (Sal. 97:11; Mat. 7:13, 14; 13:37-39) Sa katuigan sa 1600, ang paghubad ug pag-imprenta sa Bibliya nakatabang nga mas kaylap nga mabatonan ang Balaang Kasulatan. Niadtong 1651, usa ka eskolar misulat nga sanglit pinaagi ni Adan ang tawo “nawad-an sa Paraiso, ug Kinabuhing Dayon sa Yuta,” busa pinaagi kang Kristo “ang  tanang tawo mabuhi sa Yuta; kon dili kana tinuod, dili haom ang maong pagtandi.” (Basaha ang 1 Corinto 15:21, 22.) Ang usa ka iladong Ingles nga magbabalak, nga si John Milton (1608-1674), misulat sa Paradise Lost ug sa sumpay niini nga Paradise Regained. Sa iyang mga balak, si Milton naghisgot sa ganti nga madawat sa mga matinumanon diha sa usa ka paraisong yuta. Bisan tuod halos tibuok kinabuhi siyang nagtuon sa Bibliya, iyang nakita nga ang Kasulatanhong kamatuoran dili bug-os nga masabtan hangtod moabot ang presensiya ni Kristo.

9, 10. (a) Unsay gisulat ni Isaac Newton bahin sa paglaom sa katawhan? (b) Nganong nagtuo si Newton nga dugay pang moabot ang presensiya ni Kristo?

⁹ Ang iladong matematiko nga si Sir Isaac Newton (1642-1727) interesado usab kaayo sa Bibliya. Iyang nasabtan nga ang mga balaan pagabanhawon ngadto sa langit ug magmando uban ni Kristo. (Pin. 5:9, 10) Kon bahin sa mga sakop sa Gingharian, siya misulat: “Ang mga tawo padayong magpuyo sa yuta human sa adlaw sa paghukom ug dili lang sulod sa 1000 ka tuig kondili hangtod sa hangtod.”

¹⁰ Nagtuo si Newton nga ang presensiya ni Kristo maoy sa umaabot pa nga kasiglohan. “Ang usa ka rason kon nganong nagtuo si Newton nga dugay pang moabot ang Gingharian sa Diyos mao ang pagkakaylap kaayo sa apostatang pagtulon-an sa Trinidad,” matod sa historyano nga si Stephen Snobelen. Ang maayong balita natago pa. Ug si Newton wala pay nakitang grupo nga nag-angkong Kristohanon nga makasangyaw niana. Siya misulat: “Ang mga tagna ni Daniel ug ang mga tagna ni Juan [nga nasulat sa Pinadayag] dili pa masabtan hangtod sa panahon sa kataposan.” Si Newton nag-ingon: “‘Dayon,’ sumala ni Daniel, ‘daghan ang magngadto-nganhi, ug ang kahibalo modagaya.’ Kay ang Ebanghelyo kinahanglang isangyaw sa tanang kanasoran sa dili pa ang dakong kasakitan, ug kataposan sa kalibotan. Ang dili-maihap nga panon sa katawhan gikan sa tanang kanasoran, nga nanagdalag mga palwa sa palma, dili unta maluwas sa dakong kasakitan kon wala sila masangyawi sa Maayong Balita.”—Dan. 12:4; Mat. 24:14; Pin. 7:9, 10.

11. Nganong ang paglaom sa katawhan natago gihapon alang sa daghang tawo panahon ni Milton ug Newton?

¹¹ Sa panahon ni Milton ug Newton, peligroso ang pagpahayag ug mga ideya nga supak sa doktrina sa simbahan. Busa, kadaghanan sa ilang mga sinulat bahin sa Bibliya napatik lamang human sa ilang kamatayon. Ang Repormasyon (kalihokan nga mitultol sa pagkatukod sa Protestantismo) sa ika-16 nga siglo napakyas sa pagwagtang sa bakak nga pagtulon-an sa pagkadili-mamatay sa kalag ug ang dagkong mga sekta sa Protestante padayon nga nagtudlo sa ideya ni Augustine nga ang Milenyo nahitabo na. Milambo ba ang kahibalo panahon sa kataposan?

“Ang Matuod nga Kahibalo Modagaya”

12. Kanus-a modagaya ang matuod nga kahibalo?

¹² Maylabot “sa panahon sa kataposan,” si Daniel nagtagna sa usa ka maayo kaayong kalamboan. (Basaha ang Daniel 12:3, 4, 9, 10.) “Niana nga panahon ang mga matarong mosidlak ingon nga kahayag sa adlaw,” miingon si Jesus. (Mat. 13:43) Sa unsang paagi ang matuod nga kahibalo modagaya panahon sa kataposan? Tagda ang pipila ka kalamboan sa kasaysayan sa mga dekada una pa ang 1914, ang tuig diin nagsugod ang panahon sa kataposan.

13. Unsay gisulat ni Charles Taze Russell human niya tun-i ang bahin sa pagpasig-uli ngadto sa kahingpitan?

¹³ Sa ulahing katuigan sa 1800, daghang sinserong mga indibiduwal ang nagtinguha nga makasabot sa “sumbanan sa makapahimsog nga mga pulong.” (2 Tim. 1:13) Usa niana si Charles Taze Russell. Niadtong 1870 siya ug ang pipila nga nagapangita sa kamatuoran nagpormag usa ka klase sa pagtuon sa Bibliya. Pagka 1872 ilang gitun-an ang bahin sa pagpasig-uli sa katawhan ngadto sa kahingpitan. Sa ulahi, si Russell misulat: “Nianang panahona lamang nga among nakita ang dakong kalainan sa ganti nga gilaoman sa simbahan (kongregasyon sa dinihogang mga Kristohanon) nga ginasulayan karon ug sa ganti sa mga matinumanon sa kalibotan.” Ang ganti sa mga matinumanon sa kalibotan mao ang “pagpasig-uli sa katawhan ngadto sa kahingpitan nga napahimuslan didto sa Eden sa ilang amahan ug ulo, si Adan.” Si Russell miingon nga siya gitabangan  sa uban sa iyang pagtuon sa Bibliya. Kinsa man kini sila?

14. (a) Unsay pagsabot ni Henry Dunn sa Buhat 3:21? (b) Kinsay giingon ni Dunn nga mopuyo sa yuta sa walay kataposan?

¹⁴ Si Henry Dunn maoy usa kanila. Siya misulat bahin sa “pagpasig-uli sa tanang butang nga gisulti sa Diyos pinaagi sa baba sa iyang balaang mga manalagna sa karaang panahon.” (Buh. 3:21) Nahibalo sa Dunn nga ang maong pagpasig-uli maglakip sa pagtuboy sa katawhan ngadto sa kahingpitan dinhi sa yuta sulod sa Usa ka Libo ka Tuig nga Pagmando ni Kristo. Gitun-an usab ni Dunn ang pangutana nga gikalibgan sa daghan, Kinsay mopuyo sa yuta sa walay kataposan? Iyang gisaysay nga minilyon ang pagabanhawon, pagatudloan sa kamatuoran, ug hatagag kahigayonan sa pagpasundayag ug pagtuo kang Kristo.

15. Unsay nasabtan ni George Storrs bahin sa pagkabanhaw?

¹⁵ Sa 1870, si George Storrs nakahinapos usab nga ang mga dili matarong pagabanhawon ug hatagag higayon nga mabuhi sa walay kataposan. Nasabtan usab niya gikan sa Kasulatan nga kon dili mosanong ang gibanhaw, siya “pagapatyon, bisan pag ang ‘makasasala usa ka gatos ka tuig ang panuigon.’” (Isa. 65:20) Si Storrs nagpuyo sa Brooklyn, New York, ug editor sa magasing Bible Examiner.

16. Unsay nakapalahi sa mga Estudyante sa Bibliya gikan sa Kakristiyanohan?

¹⁶ Nasabtan ni Russell gikan sa Bibliya nga panahon na aron ipakaylap ang maayong balita. Busa niadtong 1879, siya misugod pagpatik sa Zion’s Watch Tower and Herald of Christ’s Presence, nga karon gitawag ug Ang Bantayanang Torre Nagapahayag sa Gingharian ni Jehova. Sa sinugdan, gamay ra kaayo ang nakasabot sa kamatuoran bahin sa paglaom sa katawhan, apan nianang panahona daghang grupo sa mga Estudyante sa Bibliya diha sa lainlaing kayutaan ang nagadawat ug nagatuon sa Bantayanang Torre. Ang pagtuo nga pipila lamang ang moadto sa langit, samtang milyonmilyon ang hatagan ug hingpit nga tawhanong kinabuhi dinhi sa yuta, maoy nakapalahi gayod sa mga Estudyante sa Bibliya gikan sa kadaghanan diha sa Kakristiyanohan.

17. Sa unsang paagi midagaya ang matuod nga kahibalo?

¹⁷ Ang gitagnang “panahon sa kataposan” nagsugod niadtong 1914. Midagaya ba ang matuod nga kahibalo bahin sa paglaom sa katawhan? (Dan. 12:4) Sa 1913, ang mga sermon ni Russell  giimprenta diha sa 2,000 ka mantalaan nga may 15,000,000 ka magbabasa. Pagkatapos sa 1914, kapin sa 9,000,000 ka tawo diha sa tulo ka kontinente ang nakakita sa “Photo-Drama of Creation”—usa ka programa nga may mga pelikula ug mga eslayd nga nagsaysay sa Milenyong Pagmando ni Kristo. Sukad sa 1918 hangtod sa 1925, ang pakigpulong nga “Minilyong Buhi Karon Dili na Gayod Mamatay,” nga nagpatin-aw sa paglaom nga kinabuhing walay kataposan sa yuta, gihatag sa mga alagad ni Jehova diha sa kapin sa 30 ka pinulongan sa tibuok kalibotan. Pagka 1934, nasabtan sa mga Saksi ni Jehova nga kadtong naglaom nga mabuhi sa walay kataposan sa yuta kinahanglang mabawtismohan. Kini nga paglaom naghatag kanilag dugang kasibot sa pagsangyaw sa maayong balita sa Gingharian. Karon, milyonmilyon ang mapasalamaton gayod kang Jehova tungod sa paglaom nga kinabuhing walay kataposan sa yuta.

“Mahimayaong Kagawasan” sa Umaabot!

18, 19. Unsang matanga sa kinabuhi ang gitagna sa Isaias 65:21-25?

¹⁸ Si manalagnang Isaias giinspirar sa pagsulat bahin sa matang sa kinabuhi nga matagamtam sa katawhan sa Diyos dinhi sa yuta. (Basaha ang Isaias 65:21-25.) Ang pipila ka kahoy nga naglungtad na sa dihang gisulat ni Isaias kanang mga pulonga 2,700 ka tuig kanhi dayag nga buhi pa hangtod karon. Mahanduraw ba nimo ang imong kaugalingon nga mabuhi sa ingon niana kadugay nga lig-on ug maayog lawas?

¹⁹ Dili sama sa kamubo sa kinabuhi karon, ang kinabuhi unya didto maghatag ug walay-kataposang kahigayonan sa pagpanukod, pagpananom, ug pagkat-on. Hunahunaa ang mga panaghigalaay nga mahimo nimong ugmaron. Kanang suod nga mga relasyon magpadayon hangtod sa hangtod. “Mahimayaong kagawasan” gayod ang mapahimuslan unya dinhi sa yuta sa “mga anak sa Diyos”!—Roma 8:21.

[Footnote]

Makapatin-aw Ka Ba?

• Sa unsang paagi natago ang paglaom sa tawo nga mabuhi sa yuta?

• Unsang pagsabot ang nabatonan sa mga magbabasa sa Bibliya sa katuigan sa 1600?

• Sa unsang paagi ang tinuod nga paglaom sa katawhan nahimong mas tin-aw pag-abot sa 1914?

• Sa unsang paagi midagaya ang kahibalo bahin yutan-ong paglaom?

[Mga Pangutana sa Pagtuon]

[Mga hulagway sa panid 13]

Ang magbabalak nga si John Milton (wala) ug ang matematisyan nga si Isaac Newton (tuo) nahibalo bahin sa paglaom nga kinabuhing walay kataposan sa yuta

[Mga hulagway sa panid 15]

Nasabtan sa unang mga Estudyante sa Bibliya gikan sa Kasulatan nga panahon na nga ipahibalo sa tibuok kalibotan ang tinuod nga paglaom sa katawhan