Likayi ang Kabaldahan Niining “Adlaw sa Maayong Balita”

ANG upat ka sanlahon nagsabotsabot kon unsay ilang buhaton. Walay naghatag nila ug limos diha sa ganghaan sa siyudad. Gipugngan sa naglikos nga mga Siryanhon ang pagpasulod ug pagkaon sa Samaria aron ang mga tawo mosurender o magutman. Walay kapuslanan kon mosulod sila sa siyudad; mahal kaayo ang pagkaon. Gani, may gitaho nga mikaon ug tawo.—2 Hari 6:24-29.

‘Mangadto na lang kaha ta sa kampo sa mga Siryanhon?’ miingon ang mga sanlahon. ‘Total wala may mawala nato.’ Sa dihang ngitngit na ug wala nay makakita nila, sila nanglakaw. Pag-abot nila sa kampo, hilom ang palibot. Walay mga guwardiya didto. Ang mga kabayo ug mga asno gihigtan apan walay mga sundalo. Ang upat milili sa usa ka tolda. Walay tawo sa sulod, apan dihay daghang pagkaon ug ilimnon. Sila nangaon ug nanginom. Ang mga sanlahon nakakita usab ug mga bulawan, plata, besti, ug ubang mahalong mga butang. Sila nanguha, nagtago niana, ug namalik aron manguha pag dugang. Ang tibuok kampo giabandonar na. Ang mga Siryanhon milagrosong gipadungog ni Jehova sa kabanha sa panon sa kasundalohan. Kay nagtuo nga sila giatake, ang mga Siryanhon nangalagiw. Nabilin ang tanan nilang butang!

Gipanguha ug gitagoan sa mga sanlahon ang mahalong mga butang. Apan, nahasol ang ilang tanlag sa dihang nahinumdom sila sa mga tawo nga gigutom sa Samaria. Sila miingon sa usag usa: “Dili husto ang atong gibuhat. Kining adlawa maoy adlaw sa maayong balita!” Ang mga sanlahon nagdalidalig balik sa Samaria ug gitaho ang maayong balita bahin sa ilang nakaplagan.—2 Hari 7:1-11.

Kita usab karon nagkinabuhi sa “adlaw sa maayong balita.” Nagtumong sa talagsaong bahin sa “ilhanan . . . sa presensiya ug sa kataposan sa sistema sa mga butang,” si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mat. 24:3, 14) Sa unsang paagi kana mag-apektar kanato?

Mahimong Mabug-atan Kita sa mga Kabalaka

Kay nalipay pag-ayo sa ilang nakaplagan, nalimtan kadiyot sa mga sanlahon ang Samaria. Ang ilang pagtagad nasentro sa kon unsay ilang makuha. Mahitabo ba usab kanato ang susama niana? Ang “kanihit sa pagkaon” maoy bahin sa daghang tagna nga nagtimaan sa konklusyon sa sistema sa mga butang. (Luc. 21:7, 11) Si Jesus nagpasidaan sa iyang mga tinun-an: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi.” (Luc. 21:34) Ingong mga Kristohanon, kita angayng magbantay nga dili tugotan ang mga kabalaka sa adlaw-adlawng pagkinabuhi nga magpahikalimot kanato sa kamatuoran nga kita nagkinabuhi na niining “adlaw sa maayong balita.”

Ang usa ka Kristohanon nga ginganlag Blessing wala motugot nga mabug-atan siya sa mga kabalaka sa kinabuhi. Siya nag-alagad ingong payunir, nakahuman sa pag-eskuyla, naminyog Bethelite sa ulahi, ug nadawat ingong membro sa pamilyang Bethel sa Benin. Siya miingon: “Nagtrabaho ko ingong tighinlo sa puy-anan, ug malipayon gayod ako sa akong asaynment.” Karon, si Blessing malipayong mahinumdom sa iyang 12 ka tuig sa  bug-os-panahong pag-alagad ug siya nalipay nga iyang gisentro ang iyang pagtagad sa “adlaw sa maayong balita” diin kita nagkinabuhi karon.

Pagbantay sa mga Butang nga Makahurot sa Panahon

Sa dihang nagpadala sa 70 ka tinun-an, si Jesus miingon: “Sa pagkatinuod, dako ang alanihon, apan diyutay ang mga mamumuo. Busa pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Luc. 10:2) Kon maglangan-langan sa pag-ani, mawala ang pipila sa mga anihon. Sa susama, kon kita magpasagad sa buluhatong pagsangyaw, mahimong mawala usab ang daghang kinabuhi. Busa si Jesus midugang: “Ayaw panggakos sa pagpangomosta kang bisan kinsa diha sa dalan.” (Luc. 10:4) Sa orihinal nga pinulongan, ang pulong “pagpangomosta” mahimong magpasabot ug labaw pa sa pagsultig “komosta” o “maayong adlaw.” Kini mahimong maglakip usab sa paggaksanay ug dugay nga pag-estoryahay sa dihang kita makahibalag ug higala. Mao nga giingnan ni Jesus ang iyang mga sumusunod nga likayan ang wala-kinahanglanang mga kabaldahan ug gamiton ang ilang panahon sa maalamong paagi. Hinungdanon kaayo ang mensahe nga ilang isangyaw.

Hunahunaa ang panahon nga mausik diha sa mga kabaldahan. Sulod sa daghang katuigan, ang telebisyon mao ang pangunang tig-usik ug panahon. Apan, komosta man ang cellphone ug kompiyuter? Sumala sa surbi nga gihimo diha sa 1,000 ka hamtong sa Britanya, ang “ordinaryong taga-Britanya mogugol ug 88 minutos kada adlaw diha sa telepono, dugang 62 minutos sa cellphone, 53 minutos sa pag-e-mail ug 22 minutos sa pag-text.” Ang total nga oras mikabat ug kapin sa duha ka pilo sa oras nga gugolon sa usa ka oksilyare payunir diha sa ministeryo kada adlaw! Unsa ka daghang panahon ang imong gigugol sa pagtelepono, pag-e-mail, ug pag-text?

Si Ernst ug Hildegard Seliger naggamit sa ilang panahon sa maalamong paagi. Silang duha migugol ug kapin sa 40 ka tuig diha sa mga kampo konsentrasyon sa Nazi ug Komunistang mga bilanggoan. Human sila buhii, sila nagpayunir hangtod natapos ang ilang yutan-ong kinabuhi.

Daghan ang gustong makig-sinulatay sa mga Seliger. Mahimo unta nilang gamiton ang dakong bahin sa ilang panahon sa pagbasa ug pagpadalag mga sulat. Hinunoa, ang ilang pag-alagad kang Jehova mao ang ilang prayoridad sa kinabuhi.

Siyempre, kitang tanan gustong makadawat ug mga sulat ug tawag gikan sa atong mga minahal, ug walay daotan niana. Ang pagpili ug maayong mga kalihokan sa matag adlaw mapuslanon. Apan, maalamon nga kita magbantay nga dili mahurot ang atong panahon sa mga kabaldahan niining adlaw sa pagsangyaw sa maayong balita.

Bug-os Isangyaw ang Maayong Balita

Dako gayong panalangin nga magkinabuhi panahon sa “adlaw sa maayong balita.” Dili kita magpalinga sama sa nahitabo sa upat ka sanlahon sa sinugdan. Hinumdomi nga sila mihinapos: “Dili husto ang atong gibuhat.” Sa susama, dili husto nga tugotan ang kaugalingong mga pangagpas o makahurot-sa-panahong mga kabaldahan nga magpugong kanato sa pagpakig-ambit sa bug-os diha sa ministeryo.

Niining bahina, kita adunay maayo kaayong ehemplo nga sundogon. Sa paghinumdom sa unang 20 ka tuig sa iyang ministeryo, si Pablo misulat: “Bug-os ko nga giwali ang maayong balita bahin kang Kristo.” (Roma 15:19) Wala tugoti ni Pablo nga mawala ang iyang kasibot. Hinaot nga kita magmasiboton sama kaniya sa pagpahayag sa mensahe sa Gingharian niining “adlaw sa maayong balita.”

[Hulagway sa panid 28]

Wala tugoti ni Blessing ang mga kabalaka sa kinabuhi nga mobalda sa iyang bug-os-panahong pag-alagad

[Hulagway sa panid 29]

Ang mga Seliger naggamit sa ilang panahon sa maalamong paagi