Ang Gugma ni Kristo Magtukmod Kanato sa Paghigugma
Ang Gugma ni Kristo Magtukmod Kanato sa Paghigugma
“Si Jesus, kay nahigugma sa mga iyaha nga ania sa kalibotan, naghigugma kanila hangtod sa kataposan.”—JUAN 13:1.
1, 2. (a) Nganong talagsaon kaayo ang gugma nga gipakita ni Jesus? (b) Unsang mga bahin sa gugma ang atong hisgotan niining artikuloha?
SI Jesus nagpakitag hingpit nga ehemplo sa gugma. Ang tanan bahin kaniya—ang iyang pagsulti, paggawi, pagtudlo, ug ang paghalad niya sa iyang kinabuhi—nagpasundayag sa iyang gugma. Hangtod sa kataposang gutlo sa iyang kinabuhi dinhi sa yuta, si Jesus nagpakitag gugma ngadto sa iyang nahibalag ug ilabina sa iyang mga tinun-an.
2 Ang talagsaong ehemplo ni Jesus sa gugma naghatag ug hataas nga sukdanan nga pagasundon sa iyang mga sumusunod. Kini magdasig usab kanato sa pagpakitag gugma sa atong mga igsoon ug ngadto sa uban. Niining artikuloha, atong tagdon kon unsay makat-onan sa mga ansiyano gikan kang Jesus bahin sa pagpakitag gugma niadtong nakahimog kasaypanan, bisan sa bug-at nga mga sala. Atong hisgotan usab kon sa unsang paagi ang gugma ni Jesus nagpalihok sa mga Kristohanon sa pagtabang sa ilang mga igsoon ug sa uban panahon sa kalisdanan, katalagman, ug balatian.
3. Bisan pa sa kasaypanan nga nahimo ni Pedro, giunsa siya pagtratar ni Jesus?
3 Sa gabii una mamatay si Jesus, katulo siya gilimod sa iyang apostol nga si Pedro. (Mar. 14:66-72) Bisan pa niana, sa dihang si Pedro naghinulsol, sama sa gitagna ni Jesus nga iyang pagabuhaton, siya gipasaylo ni Jesus. Gipiyal ni Jesus kang Pedro ang dagkong mga responsibilidad. (Luc. 22:32; Buh. 2:14; 8:14-17; 10:44, 45) Unsay atong makat-onan gikan sa tinamdan ni Jesus niadtong nakahimog seryosong kasaypanan?
Ipakita ang Tinamdan ni Kristo Ngadto sa mga Nakasala
4. Unsa nga kahimtang ang ilabinang nagkinahanglan ug samag-Kristo nga tinamdan?
4 Lakip sa daghang kahimtang nga angayng magpasundayag ug samag-Kristo nga tinamdan, ang usa nga makapaguol kaayo mao ang pagpakiglabot sa usa nga seryosong nakasala, diha man sa pamilya o sa kongregasyon. Ikasubo, samtang nagkaduol na ang kataposan sa sistema ni Satanas, ang espiritu sa kalibotan nagdaot pag-ayo sa moralidad sa tawo. Ang daotang tinamdan sa kalibotan maylabot sa moralidad makaimpluwensiya kang bisan kinsa kanato, nga magpaluya sa atong determinasyon sa pagbuhat kon unsay husto. Sa unang siglo, ang pipila kinahanglang ipalagpot sa kongregasyon, ug ang uban gibadlong. Susama usab karon. (1 Cor. 5:11-13; 1 Tim. 5:20) Bisan pa niana, kon ang mga ansiyano magpakitag samag-Kristo nga gugma, makaapektar kini ug dako sa nakasala.
5. Sa unsang paagi angayng sundogon sa mga ansiyano ang tinamdan ni Jesus niadtong nakasala?
5 Sama ni Jesus, ang mga ansiyano kinahanglang mosunod sa matarong nga mga sukdanan ni Jehova sa tanang panahon. Sa pagbuhat niana, ilang mabanaag ang kalumo, kalulot, ug gugma ni Jehova. Kon ang usa tinuod nga mahinulsolon, “dugmok ug kasingkasing” ug “nahugno sa espiritu” tungod sa iyang kasaypanan, tingali dili malisdan ang mga ansiyano nga “ipasibo pag-usab ang maong tawo diha sa espiritu sa kalumo.” (Sal. 34:18; Gal. 6:1) Apan komosta man kon ang usa mosukol ug dili mahinulsolon?
6. Unsay angayng likayan sa mga ansiyano sa dihang makiglabot sa nakasala, ug ngano?
6 Kon ang nakasala dili modawat sa Kasulatanhong tambag o mamasangil sa uban, mahimong masuko ang mga ansiyano ug ang uban. Kay nahibalo sa kadaot nga gipahinabo nianang tawhana, sila lagmit matukmod sa pagsulti sa ilang pagbati bahin sa binuhatan ug tinamdan sa maong tawo. Apan, ang kasuko makadaot, ug wala magbanaag sa “panghunahuna ni Kristo.” (1 Cor. 2:16; basaha ang Santiago 1:19, 20.) Prangka nga gipasidan-an ni Jesus ang pipila sa iyang adlaw, apan wala gayod siya mosulti ug bisan unsa nga madumtanon o makapasakit. (1 Ped. 2:23) Hinunoa, iyang gipakita niadtong nakasala nga sila mahimong maghinulsol ug maangkon pag-usab ang pag-uyon ni Jehova. Sa pagkatinuod, ang usa sa pangunang mga katarongan nga mianhi si Jesus sa yuta mao ang “pagluwas sa mga makasasala.”—1 Tim. 1:15.
7, 8. Unsay angayng maggiya sa mga ansiyano sa pagdumalag hudisyal nga mga butang?
7 Sa unsang paagi ang ehemplo ni Jesus niining bahina makaapektar sa atong tinamdan niadtong kinahanglang disiplinahon sa kongregasyon? Hinumdomi nga ang kahikayan sa Kasulatan maylabot sa hudisyal nga aksiyon diha sa kongregasyon manalipod sa panon ug mahimong magtukmod sa nakasala sa paghinulsol. (2 Cor. 2:6-8) Ikasubo nga ang pipila dili mahinulsolon ug kinahanglang ipalagpot, apan kita madasig sa pagkahibalo nga daghan kanila sa ulahi ang mibalik kang Jehova ug sa iyang kongregasyon. Kon ang mga ansiyano magpakitag samag-Kristo nga tinamdan, matabangan nila ang maong tawo nga maghinulsol ug makabalik sa ulahi. Sa umaabot, ang pipila niining mga nakasala lagmit dili na mahinumdom sa tanang Kasulatanhong tambag nga gihatag sa mga ansiyano kanila, apan sila seguradong mahinumdom nga sila gipakitaag pagtahod ug gugma.
8 Busa, ang mga ansiyano angayng magpasundayag sa “bunga sa espiritu,” ilabina ang samag-Kristo nga gugma, bisan pag ang nakasala dili modawat ug Kasulatanhong tambag. (Gal. 5:22, 23) Dili sila angayng magdali-dali sa pagpalagpot sa nakasala gikan sa kongregasyon. Kinahanglan nilang ipakita nga gusto nilang mobalik siya kang Jehova. Busa, kon sa ulahi maghinulsol ang nakasala, sama sa gibuhat sa kadaghanan, lagmit magmapasalamaton gayod siya kang Jehova ug sa “mga gasa [nga] mga lalaki” kinsa nagtabang kaniya nga makabalik sa kongregasyon.—Efe. 4:8, 11, 12.
Pagpakitag Samag-Kristo nga Gugma Panahon sa Kataposan
9. Paghatag ug pananglitan diin si Jesus nagpakitag gugma sa iyang mga tinun-an.
9 Gisulat ni Lucas ang talagsaong kahimtang diin si Jesus nagpakitag gugma. Kay nahibalo nga sa ulahi ang laglagonong siyudad sa Jerusalem pagalikosan sa Romanong kasundalohan ug walay makakalagiw, si Jesus mahigugmaong nagpasidaan sa iyang mga tinun-an: “Inigkakita ninyo nga malibotan ang Jerusalem sa nagkampong kasundalohan, nan hibaloi nga haduol na ang paglaglag kaniya.” Unsay angay nilang buhaton? Si Jesus abanteng naghatag ug tin-aw ug espesipikong mga instruksiyon. “Nan silang anaa sa Judea pakalagiwa ngadto sa kabukiran, ug kadtong anaa sa iyang taliwala pabiyaa, ug kadtong anaa sa mga dapit sa kabanikahan ayaw na pasudla kaniya; tungod kay kini maoy mga adlaw sa pagpadapat sa hustisya, aron matuman ang tanang butang nga nahisulat.” (Luc. 21:20-22) Human likosi sa Romanong kasundalohan ang Jerusalem niadtong 66 K.P., gisunod sa mga masinugtanon ang maong mga instruksiyon.
10, 11. Sa unsang paagi ang pagbiya sa unang mga Kristohanon sa Jerusalem motabang kanato sa pagpangandam alang sa “dakong kasakitan”?
10 Panahon sa ilang pagbiya sa Jerusalem, ang mga Kristohanon kinahanglang magpakitag samag-Kristo nga gugma sa usag-usa, maingon nga si Kristo nagpakitag gugma kanila. Kinahanglan gayod nilang ipaambit sa uban ang bisan unsa nga ilang nabatonan. Apan ang tagna ni Jesus aduna pay mas dakong katumanan kay sa kalaglagan sa maong siyudad. Siya nagtagna: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mat. 24:17, 18, 21) Una pa ug panahon sa “dakong kasakitan” nga hapit nang mahitabo, kita usab mahimong makaagom ug mga kalisdanan. Ang pagbaton ug samag-Kristo nga tinamdan motabang kanato sa paglahutay.
11 Nianang panahona, kita kinahanglang mosunod sa ehemplo ni Jesus, nga magpakitag dili-mahakogong gugma. May kalabotan niini, si Pablo nagtambag: “Magpahimuot ang matag usa kanato sa iyang silingan sa kon unsay maayo aron sa paglig-on kaniya. Kay bisan gani si Kristo wala magpahimuot sa iyang kaugalingon . . . Karon hinaot ang Diyos nga naghatag ug pag-antos ug paghupay magtugot kaninyo nga mabatonan sa inyong taliwala ang samang tinamdan sa pangisip nga nabatonan ni Kristo Jesus.”—Roma 15:2, 3, 5.
12. Unsang matanga sa gugma ang kinahanglan natong ugmaron karon, ug ngano?
12 Si Pedro, nga gipakitaag gugma ni Jesus, nag-awhag usab sa mga Kristohanon nga ugmaron ang “dili-salingkapaw nga inigsoong pagbati” ug magpasundayag ug “pagkamasinugtanon sa kamatuoran.” Kinahanglan nga sila “mainiton nga maghigugmaay sa usag usa gikan sa kasingkasing.” (1 Ped. 1:22) Karong adlawa, mas hinungdanon nga atong ugmaron ang samag-Kristo nga mga hiyas. Gani, nagkagrabe na ang pagpit-os nga giatubang sa tanang alagad sa Diyos. Walay usa ang angayng mosalig sa bisan unsang bahin niining kalibotana, sama sa klarong gipakita sa paghuyang sa ekonomiya sa kalibotan. (Basaha ang 1 Juan 2:15-17.) Hinunoa, samtang nagkaduol ang kataposan niining sistemaha, kinahanglang mas makigsuod kita kang Jehova ug sa atong mga igsoon, nga mag-ugmad ug suod nga relasyon diha sa kongregasyon. Si Pablo nagtambag: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Ug si Pedro dugang nagpasiugda niini sa pag-ingon: “Labaw sa tanang butang, batoni ang mainit nga gugma alang sa usag usa, kay ang gugma magatabon sa daghang sala.”—1 Ped. 4:8.
13-15. Sa unsang paagi gipakita sa pipila ka igsoon ang samag-Kristo nga gugma human sa mga katalagman?
13 Sa tibuok kalibotan, ang mga Saksi ni Jehova nailhan sa pagpakitag tinuod nga gugma. Tagda ang mga Saksi kinsa miboluntaryo sa pagtabang human mapayhag sa mga bagyo ang habagatang bahin sa United States niadtong 2005. Kay natandog sa ehemplo ni Jesus, kapin sa 20,000 ang miboluntaryo, daghan kanila ang mibiya sa komportableng mga pinuy-anan ug maayong mga trabaho aron motabang sa ilang mga igsoon.
14 Sa usa ka dapit, 80 kilometros ang gisanapan ug tubig sa dagat ug ang tubig misulbong ug 10 metros. Pag-atras sa tubig, untersiya sa mga balay ug ubang mga tinukod ang napayhag. Ang mga Saksing boluntaryo gikan sa pipila ka nasod, nga ang uban batid sa pagpanukod, nagdalag mga galamiton ug mga materyales ug andam nga mobuhat sa bisan unsa. Duha ka magsoon sa unod nga mga biyuda nagkarga sa ilang mga butang diha sa usa ka gamayng trak ug mibiyaheg 3,000 kilometros aron motabang. Ang usa kanila nagpabilin sa maong dapit, nga nagtabang gihapon sa lokal nga komite sa paghatag ug hinabang ug nag-alagad ingong regular payunir.
15 Kapin sa 5,600 ka balay sa mga Saksi ug uban pa diha sa maong dapit ang gipangtukod pag-usab o gipang-ayo. Unsay gibati sa mga Saksi didto sa talagsaong gugma nga gipasundayag kanila? Usa ka sister kansang balay naguba ang mibalhin sa usa ka gamayng treyler, nga nagtulo ang atop ug guba ang lutoanan. Gitukoran siya sa mga brader ug usa ka kasarangan apan komportableng balay. Nagtindog atubangan sa iyang nindot ug bag-ong balay, siya mihilak tungod kay siya mapasalamaton kang Jehova ug sa iyang mga igsoon. Diha sa daghan pang ubang kahimtang, ang mga Saksi nga nawad-an sa ilang mga balay nagpabilin gihapon sa ilang temporaryong sak-anan sulod sa usa ka tuig o kapin pa human matukod pag-usab ang ilang mga balay. Ngano man? Aron dunay kapuy-an ang mga boluntaryo. Usa gayod ka maayong ehemplo sa pagpasundayag sa tinamdan ni Kristo!
Pagpakita sa Tinamdan ni Jesus sa Masakiton
16, 17. Sa unsang mga paagi nga atong mabanaag ang tinamdan ni Kristo sa mga masakiton?
16 Dili tanan kanato ang nakasinatig dagkong mga katalagman. Apan kitang tanan makaatubang gayod ug mga problema sa panglawas, sa ato man o sa atong pamilya. Ang tinamdan ni Jesus sa mga masakiton naghatag ehemplo alang kanato. Tungod sa gugma, siya naluoy kanila. Sa dihang gidala sa mga tawo ang ilang mga masakiton, “giayo niya ang tanang masakiton.”—Mat. 8:16; 14:14.
17 Sa atong adlaw, ang mga Kristohanon walay gahom sa pagpanambal, apan sama ni Jesus sila mabination sa mga masakiton. Sa unsang paagi nila kana gipasundayag? Ingong usa ka ebidensiya niana, gipakita sa mga ansiyano nga nabatonan nila ang tinamdan ni Kristo pinaagi sa paghimog kahikayan alang sa pagtabang sa mga masakiton diha sa kongregasyon ug sa pagtino nga matagana ang maong tabang, nga nagsunod sa prinsipyo sa Mateo 25:39, 40. a (Basaha.)
18. Sa unsang paagi gipakita sa duha ka sister ang ilang tiunay nga gugma sa laing sister, ug unsay resulta niini?
18 Siyempre, dili kinahanglan nga mahimong ansiyano aron makabuhat ug maayo sa uban. Tagda ang kahimtang sa 44-anyos nga si Charlene, kinsa adunay kanser ug gitagalan sa mga doktor ug napulo ka adlaw. Kay nakakita sa iyang panginahanglan ug sa kalisod nga gisagubang sa iyang mahigugmaong bana tungod sa pag-atiman kaniya, duha ka sister, si Sharon ug Nicolette, ang bug-os-panahong mitabang kaniya sa nahibiling mga yugto sa iyang kinabuhi. Gipakita ni Sharon ug Nicolette ang ilang gugma kang Charlene, nga nag-atiman kaniya dili lamang sa napulo ka adlaw, kondili sulod sa unom ka semana. “Lisod kaayo kon nahibalo ka nga dili na maulian ang usa ka tawo,” miingon si Sharon. “Apan, si Jehova nagpalig-on kanamo. Kini nga kasinatian mas nakapasuod kanamo sa Diyos ug sa usag usa.” Ang bana ni Charlene miingon: “Dili gyod nako malimtan ang maluloton ug praktikal nga tabang nga gihatag niining duha ka sister. Ang ilang maayong motibo ug positibong tinamdan nakatabang ug dako kang Charlene nga maantos kining kataposang pagsulay ug naghatag kanako sa pisikal ug emosyonal nga tabang nga ako gayong gikinahanglan. Mapasalamaton ako kanila sa tibuok nakong kinabuhi. Ang ilang pagsakripisyo-sa-kaugalingon nagpalig-on sa akong pagtuo kang Jehova ug sa akong gugma sa tibuok kapunongan sa mga igsoon.”
19, 20. (a) Unsa ang lima ka bahin sa tinamdan ni Kristo nga atong gihisgotan? (b) Unsay determinado nimong buhaton?
19 Niining serye sa tulo ka artikulo, atong nahisgotan ang lima ka bahin sa tinamdan ni Kristo ug sa unsang paagi kita maghunahuna ug molihok sama kaniya. Hinaot nga kita mahimong “malumog-buot ug mapainubsanon sa kasingkasing,” sama kang Jesus. (Mat. 11:29) Maningkamot usab kita sa pagpakitag kalulot sa uban, bisan pag dayag kaayo ang ilang mga kahuyangan. Magmaisogon kita sa pagtuman sa tanang sugo ni Jehova, bisan pag nailalom sa mga pagsulay.
20 Sa kataposan, atong ipakita ang samag-Kristo nga gugma sa tanan natong mga igsoon “hangtod sa kataposan,” sama sa gihimo ni Kristo. Ang maong gugma nagpaila kanato ingong tinuod nga mga sumusunod ni Jesus. (Juan 13:1, 34, 35) Oo, “himoa nga magpadayon ang inyong inigsoong gugma.” (Heb. 13:1) Ayaw pagpanuko! Gamita ang imong kinabuhi sa pagdayeg kang Jehova ug sa pagtabang sa uban! Si Jehova magapanalangin sa imong sinserong mga paningkamot.
[Footnote]
a Tan-awa ang artikulong “Buhata ang Labaw pa Kay sa Pag-ingon: ‘Painiti ug Busga ang Inyong Kaugalingon’” sa Oktubre 15, 1986, nga gula sa Ang Bantayanang Torre.
Makapatin-aw Ka Ba?
• Sa unsang paagi ikapakita sa mga ansiyano ang tinamdan ni Kristo niadtong nakasala?
• Ngano man nga ang pagpakita ug samag-Kristo nga gugma hinungdanon kaayo niining panahon sa kataposan?
• Sa unsang paagi atong ikapakita ang tinamdan ni Kristo sa mga masakiton?
[Mga Pangutana sa Pagtuon]
[Hulagway sa panid 17]
Gusto sa mga ansiyano nga ang nakasala mobalik kang Jehova
[Hulagway sa panid 18]
Sa unsang paagi gibanaag sa mga Kristohanon nga mibiya sa Jerusalem ang tinamdan ni Kristo?
[Hulagway sa panid 19]
Ang mga Saksi ni Jehova nailhan sa ilang pagpakitag samag-Kristo nga gugma