Gipabilhan ba Nimo ang Nahimo ni Jehova sa Pagluwas Kanimo?
Gipabilhan ba Nimo ang Nahimo ni Jehova sa Pagluwas Kanimo?
“Bulahan si Jehova nga Diyos sa Israel, tungod kay giliso niya ang iyang pagtagad ug nagluwas sa iyang katawhan.”—LUC. 1:68.
1, 2. Sa unsang paagi ikailustrar ang atong kahimtang karon, ug unsang mga pangutana ang atong hisgotan?
IBUTANG ta nga ikaw naospital. Kauban nimo sa ward ang mga pasyente nga sama nimog balatian, usa ka makamatayng sakit nga walay tambal. Sa dihang imong nahibaloan nga dunay doktor nga nanguna sa pagpangitag tambal nianang sakita, ikaw malaomon. Naghinamhinam kang makabalita bahin sa panukiduki nga iyang gihimo. Usa ka adlaw, imong nahibaloan nga iya nang nakaplagan ang tambal niana! Ang doktor nga nakadiskobre niana mihimog dakong sakripisyo. Unsay imong bation? Segurado nga mobati kag halalom nga pagtahod ug pagpabili sa tawo nga mihimog paagi aron ikaw ug ang uban maluwas gikan sa kamatayon.
2 Morag dili katuohan ang maong situwasyon, apan sa pagkatinuod mao nay atong kahimtang. Ang matag usa kanato anaa sa kahimtang nga mas grabe pa niana. Kita nagkinahanglan gayod ug manluluwas. (Basaha ang Roma 7:24.) Aron kita maluwas, si Jehova mihimog dakong sakripisyo. Mao man usab ang iyang Anak. Nan, atong hisgotan ang upat ka hinungdanong mga pangutana. Nganong kinahanglan kitang luwason? Unsay gisakripisyo ni Jesus alang kanato? Unsay gisakripisyo ni Jehova? Ug sa unsang paagi atong ikapakita nga atong gipabilhan ang pagluwas ni Jehova kanato?
Kon Nganong Gikinahanglan Nato ang Kaluwasan
3. Sa unsang paagi ang sala ikatandi sa sakit nga mikaylap?
3 Sumala sa di pa dugayng banabana, ang usa sa mga sakit nga mikaylap pag-ayo sa daghang nasod mao ang trangkaso Espanyola niadtong 1918, nga nakapatay ug tinagpulo ka milyong tawo. Ang ubang mga sakit mas makamatay sa usa ka diwa. Bisan tuod pipila lang tingali ang matakboyan niini, ang kadaghanan kanila mangamatay. a Apan, komosta kon atong itandi ang sala sa sakit nga mikaylap? Hinumdomi ang giingon sa Roma 5:12: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” Siyento porsiyento ang naapektohan sa sala, sanglit ang tanang tawo makasala. (Basaha ang Roma 3:23.) Unsa kadaghana ang mangamatay? Si Pablo misulat nga tungod sa sala, ang “tanang tawo” mamatay.
4. Unsay panglantaw ni Jehova sa gitas-on sa atong kinabuhi, ug nganong lahi kini sa panglantaw sa mga tawo karon?
4 Alang sa daghan karon, normal na lang ang sala ug kamatayon. Ilang gikabalak-an ang ilang gitawag ug ahat nga kamatayon, apan giisip nga “natural” ang kamatayon nga resulta sa katigulangon. Tungod niini, dili na tin-aw kanila ang katuyoan sa Maglalalang. Kon itandi sa katuyoan sa Diyos alang sa tawo, mubo ra kaayo ang atong kinabuhi. Sa pagkatinuod, walay tawo nga nabuhi bisag “usa ka adlaw” sa panglantaw ni Jehova. (2 Ped. 3:8) Busa ang Pulong sa Diyos nag-ingon nga ang atong kinabuhi lumalabay lamang sama sa balili o sa usa ka hinungaw. (Sal. 39:5; 1 Ped. 1:24) Kinahanglan nato kanang hinumdoman. Ngano? Kon atong masabtan ang kagrabehon sa “sakit” nga mitakboy kanato, mas pabilhan nato ang “tambal”—ang atong kaluwasan.
5. Unsay nawala kanato tungod sa sala?
5 Aron masabtan ang kagrabehon sa sala ug ang mga epekto niini, kinahanglan natong masabtan kon unsay epekto niini kanato. Sa sinugdan, lisod tingali kanang sabton kay tungod sa sala nawala kanato ang usa ka butang nga wala pa nato masinati. Sa wala pa makasala si Adan ug Eva, sila nakatagamtam ug hingpit nga kinabuhi. Kay hingpit man sila, ilang makontrolar ang ilang hunahuna, pagbati, ug mga lihok. Busa makapadayon sila sa pag-ugmad ug maanindot nga mga hiyas ingong mga alagad ni Jehova nga Diyos. Hinunoa, ilang gisalikway kanang bililhong gasa. Tungod kay nakasala sila batok kang Jehova, sila ug ang ilang mga anak wala na makatagamtam sa matang sa kinabuhi nga mao untay gusto ni Jehova alang kanila. (Gen. 3:16-19) Sa samang higayon, ilang gipahinabo sa ilang kaugalingon ang makalilisang nga “sakit” nga atong gihisgotan ug gipasa kini kanato. Angayan lamang nga hukman sila ni Jehova. Apan alang kanato, siya naghatag ug paglaom sa kaluwasan.—Sal. 103:10.
Kon Unsay Gisakripisyo ni Jesus Alang sa Atong Kaluwasan
6, 7. (a) Sa unsang paagi gipakita ni Jehova sa sinugdan nga ang pagluwas kanato nagkinahanglag dakong sakripisyo? (b) Unsay atong makat-onan gikan sa mga halad nga gitanyag ni Abel ug sa mga patriarka nga nabuhi sa wala pa ang Balaod?
6 Nahibalo si Jehova nga nagkinahanglag dakong sakripisyo aron maluwas ang mga anak ni Adan ug Eva. Sa tagna nga nasulat sa Genesis 3:15, atong masayran kon unsay bugti sa atong kaluwasan. Si Jehova magtagana ug “binhi,” usa ka manluluwas, nga magalaglag kang Satanas sa umaabot. Apan, ang maong manluluwas mag-antos, nga makaagom sa mahulagwayong samad sa kiting. Morag makapasakit kana ug makapaluya, apan unsay kahulogan niana? Unsa ba gayoy antoson sa Pinili ni Jehova?
7 Aron maluwas ang katawhan gikan sa sala, ang manluluwas kinahanglang mohimog paagi sa pagtabon sa sala. Kini magpasig-uli sa katawhan ngadto sa Diyos pinaagi sa pagpahunong sa epekto sa sala. Unsa may nalangkit niana? Diha nay mga timailhan nga gikinahanglan ang usa ka halad. Sa dihang ang unang matinumanong tawo nga si Abel naghalad ug mananap ngadto kang Jehova, siya giuyonan sa Diyos. Sa ulahi, ang mahinadlokon-sa-Diyos nga mga patriarka sama kang Noe, Abraham, Jacob, ug Job naghalad usab ug mga mananap, nga nakapahimuot sa Diyos. (Gen. 4:4; 8:20, 21; 22:13; 31:54; Job 1:5) Ang Balaod ni Moises naghatag ug dugang katin-awan bahin sa mga halad.
8. Unsay gibuhat sa hataas nga saserdote sa tinuig nga Adlaw sa Pagtabon sa sala?
8 Lakip sa labing hinungdanong mga halad nga gisugo sa Balaod mao kadtong gitanyag panahon sa tinuig nga Adlaw sa Pagtabon sa Sala. Nianang adlawa, ang hataas nga saserdote mohimog mahulagwayong mga buhat. Siya motanyag ug mga halad ngadto kang Jehova aron sa pagtabon sa mga sala—una niadtong sa saserdoteng matang, dayon sa dili-saserdote nga mga tribo. Ang hataas nga saserdote mosulod sa Labing Balaan nga lawak sa tabernakulo o templo, diin siya lamang ang mahimong mosulod ug nianang adlawa lamang sa tuig. Didto iyang iwisik ang dugo sa mga halad atubangan sa arka sa pakigsaad. Sa ibabaw nianang sagradong arka, motungha ang hayag kaayo nga panganod, nga naghawas sa presensiya ni Jehova nga Diyos.—Ex. 25:22; Lev. 16:1-30.
9. (a) Sa adlaw sa Pagtabon sa Sala, kinsay gihulagwayan sa hataas nga saserdote, ug unsay gisimbolohan sa iyang mga halad? (b) Unsay gihulagwayan sa pagsulod sa hataas nga saserdote sa Labing Balaan?
9 Si apostol Pablo gidasig sa pagpadayag sa kahulogan nianang mahulagwayong mga buhat. Iyang gipakita nga ang hataas nga saserdote naghulagway sa Mesiyas, si Jesu-Kristo, samtang ang pagtanyag ug mga halad nagsimbolo sa paghalad ni Kristo sa iyang kinabuhi. (Heb. 9:11-14) Kanang hingpit nga halad bug-os nga magtabon sa sala sa duha ka grupo sa katawhan—ang saserdoteng matang sa 144,000 ka dinihogan-sa-espiritung mga igsoon ni Kristo ug ang “ubang mga karnero.” (Juan 10:16) Sa dihang ang hataas nga saserdote mosulod sa Labing Balaan, siya naghulagway sa pagsulod ni Jesus sa langit aron sa pagtanyag sa bili sa halad lukat ngadto kang Jehova nga Diyos.—Heb. 9:24, 25.
10. Sumala sa gitagna sa Bibliya, unsay masinatian sa Mesiyas?
10 Tataw nga nagkinahanglag dakong sakripisyo ang pagluwas sa mga anak ni Adan ug Eva. Kinahanglang ihalad sa Mesiyas ang iyang kinabuhi! Ang mga manalagna sa Hebreohanong Kasulatan naghatag ug dugang mga detalye bahin niini. Pananglitan, si manalagnang Daniel nag-ingon nga ang “Mesiyas nga Pangulo” “pagapatyon” aron sa “pagtabon-sa-sala alang sa kasaypanan.” (Dan. 9:24-26) Si Isaias nagtagna nga ang Mesiyas isalikway, lutoson, ug patyon, o dughangon, aron pas-anon ang sala sa dili-hingpit nga mga tawo.—Isa. 53:4, 5, 7.
11. Sa unsang mga paagi si Jesus andam sa pagsakripisyo sa iyang kaugalingon alang sa atong kaluwasan?
11 Sa wala pa siya moanhi sa yuta, nahibalo na ang bugtong Anak sa Diyos kon unsay iyang maagoman sa pagluwas sa katawhan. Siya mag-antos pag-ayo ug dayon pagapatyon. Sa dihang gisulti kini sa iyang Amahan, siya ba midumili o misupak? Wala. Siya kinabubut-ong mituman sa sugo sa iyang Amahan. (Isa. 50:4-6) Sa susama, samtang dinhi sa yuta, si Jesus masinugtanong nagtuman sa kabubut-on sa iyang Amahan. Ngano? Siya mitubag pinaagi niining mga pulonga: “Gihigugma ko ang Amahan.” Siya usab miingon: “Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala.” (Juan 14:31; 15:13) Sa dakong bahin, ang atong kaluwasan maoy tungod sa gugma ni Jesus. Bisan tuod kinahanglan niyang ihalad ang iyang hingpit-tawhanong kinabuhi, siya malipayong nagsakripisyo alang sa atong kaluwasan.
Kon Unsay Gisakripisyo ni Jehova Alang sa Atong Kaluwasan
12. Kang kinsang kabubut-on ang lukat, ug nganong gitagana niya kana?
12 Si Jesus dili mao ang Tagmugna o May-Katuyoan sa halad lukat. Hinunoa, ang halad lukat maoy hinungdanon kaayong bahin sa kabubut-on sa Diyos. Gipakita ni apostol Pablo nga ang halaran sa templo, diin ginahimo ang paghalad, naghulagway sa kabubut-on ni Jehova. (Heb. 10:10) Busa ang kaluwasan nga atong madawat pinaagi sa halad ni Kristo, sa panguna utang nato kang Jehova. (Luc. 1:68) Kini maoy pagpasundayag sa iyang hingpit nga kabubut-on ug sa iyang dakong gugma sa katawhan.—Basaha ang Juan 3:16.
13, 14. Sa unsang paagi ang ehemplo ni Abraham motabang kanato sa pagsabot ug pagpabili sa gihimo ni Jehova alang kanato?
13 Unsay gisakripisyo ni Jehova sa pagpakita sa iyang gugma kanato niining paagiha? Lisod kining tugkaron. Apan, adunay asoy sa Bibliya nga makatabang kanato sa pagsabot niini. Si Jehova nagsugo sa matinumanong tawo nga si Abraham sa pagbuhat ug usa ka butang nga lisod kaayong himoon—ang paghalad sa iyang anak nga si Isaac. Si Abraham maoy mahigugmaong amahan. Sa pagpakigsulti ni Jehova kang Abraham iyang gihisgotan si Isaac ingong “imong bugtong anak nga imong gihigugma pag-ayo.” (Gen. 22:2) Bisan pa niana, nasabtan ni Abraham nga ang pagbuhat sa kabubut-on ni Jehova mas importante kay sa iyang gugma kang Isaac. Busa misugot si Abraham. Apan, wala tugoti ni Jehova nga buhaton ni Abraham ang Iyang pagahimoon mismo sa umaabot. Ang Diyos nagpadalag manulonda aron pugngan si Abraham sa paghalad sa iyang anak. Si Abraham determinado gayong motuman sa Diyos nianang malisod nga pagsulay nga siya nagtuo nga makita lamang niya pag-usab ang iyang anak pinaagi sa pagkabanhaw. Hugot ang pagtuo ni Abraham nga banhawon sa Diyos ang iyang anak. Gani, si Pablo nag-ingon nga nahibalik pag-usab kang Abraham si Isaac pinaagi sa pagkabanhaw “sa masambingayong paagi.”—Heb. 11:19.
14 Mahanduraw ba nimo ang kasakit nga gibati ni Abraham samtang siya nag-andam sa paghalad sa iyang anak? Sa usa ka diwa, ang kasinatian ni Abraham makatabang sa pag-ilustrar sa pagsakripisyo ni Jehova sa usa nga iyang gitawag nga “akong Anak, ang hinigugma.” (Mat. 3:17) Apan, hinumdomi nga lagmit mas labaw pa ang kasakit nga gibati ni Jehova. Kauban niya ang iyang Anak sulod sa minilyon, lagmit binilyon pa gani, ka katuigan. Ang Anak malipayong nagtrabaho kauban sa Amahan ingong iyang hinigugmang “batid nga magbubuhat” ug ingong iyang Tigpamaba, “ang Pulong.” (Prov. 8:22, 30, 31; Juan 1:1) Dili gayod nato mahibaloan sa bug-os kon unsa ka grabe ang giantos ni Jehova sa dihang ang iyang Anak gisakit, gibiaybiay, ug dayon gipatay ingong usa ka kriminal. Pagkadakong sakripisyo ang gihimo ni Jehova alang sa atong kaluwasan! Busa, sa unsang paagi nato ikapakita nga atong gipabilhan ang maong kaluwasan?
Sa Unsang Paagi Nimo Ikapakita nga Imong Gipabilhan ang Kaluwasan?
15. Sa unsang paagi bug-os nga natuman ni Jesus ang pagtabon sa sala, ug unsay atong mabatonan tungod niana?
15 Bug-os nga natuman ni Jesus ang pagtabon sa sala human siya mabanhaw ngadto sa langit. Nakauban pag-usab ang iyang hinigugmang Amahan, iyang gitanyag Kaniya ang bili sa iyang halad. Misunod ang dagkong mga panalangin. Mabatonan na ang bug-os nga kapasayloan, una sa mga sala sa dinihogang mga igsoon ni Kristo, dayon “nianang sa tibuok kalibotan.” Tungod sa maong halad, ang tanan nga kinasingkasing nga maghinulsol sa ilang kasal-anan ug mahimong tinuod nga mga sumusunod ni Kristo karon makabaton ug hinlong baroganan atubangan ni Jehova nga Diyos. (1 Juan 2:2) Sa unsang paagi kini mapadapat kanimo?
16. Sa unsang paagi nato ikailustrar kon nganong angay kitang magmapasalamaton sa kaluwasan nga gitagana ni Jehova kanato?
16 Atong balikan ang ilustrasyon nga gihisgotan sa sinugdan. Ibutang ta nga kadtong doktor nga nakakaplag sa tambal moadto sa inyong ward ug motanyag niini sa mga pasyente: Si bisan kinsa nga modawat sa tambal ug mosunod sa gisulti sa doktor mamaayo gayod. Komosta kon ang kadaghanan sa mga pasyente dili motuo sa iyang giingon ug moreklamo nga dili sila ganahang motomar sa tambal o mosunod sa gipabuhat sa doktor kanila? Mosundog ka ba nila, bisan pag duna ka nay lig-ong ebidensiya nga makaayo gayod ang maong tambal? Siyempre, dili! Sa walay duhaduha ikaw mapasalamaton sa maong tambal ug dayon maampingong mosunod sa giingon sa doktor, lagmit sultihan pa gani nimo ang uban sa imong desisyon. Sa labaw pa nga diwa, ang matag usa kanato angayng magmaikagon sa pagpakita kang Jehova kon unsa kita kamapasalamaton sa kaluwasan nga iyang gitagana pinaagi sa halad lukat sa iyang Anak.—Basaha ang Roma 6:17, 18.
17. Sa unsang mga paagi nimo ikapakita nga ikaw mapasalamaton sa gihimo ni Jehova sa pagluwas kanimo?
17 Kon kita mapasalamaton sa gihimo ni Jehova ug sa iyang Anak aron kita maluwas gikan sa sala ug kamatayon, ato kanang ipakita. (1 Juan 5:3) Atong suklan ang atong kiling sa pagpakasala. Ato gayong likayan ang tinuyong pagbatasan sa sala ug ang sinalingkapaw nga dobleng kinabuhi nga sagad moduyog niana. Kon dili nato kana likayan, sama rag wala nato pabilhi ang halad lukat. Hinunoa, atong ipakita ang atong pagkamapasalamaton pinaagi sa pagpaningkamot nga magpabiling hinlo sa panglantaw sa Diyos. (2 Ped. 3:14) Ipakita usab nato kana pinaagi sa pagpaambit ngadto sa uban sa atong maanindot nga paglaom sa kaluwasan, aron sila usab makabaton ug hinlo nga baroganan atubangan ni Jehova ug sa paglaom nga mabuhi sa walay kataposan. (1 Tim. 4:16) Angay gayod natong gamiton ang atong panahon ug kusog sa pagdayeg kang Jehova ug sa iyang Anak. (Mar. 12:28-30) Hunahunaa lang kini! Moabot ang panahon nga kita bug-os nga maayo o mapasaylo sa atong kasal-anan. Atong matagamtam ang kinabuhi nga gusto sa Diyos alang kanato, hingpit ug sa walay kataposan—tungod sa gihimo ni Jehova sa pagluwas kanato!—Roma 8:21.
[Footnote]
a Gikaingon nga 20 ngadto 50 porsiyento sa populasyon sa kalibotan niadtong panahona ang gitakboyan ug trangkaso Espanyola. Ang virus lagmit nakapatay ug tali sa 1 ngadto sa 10 porsiyento sa mga tawo nga gitakboyan niini. Sa kasukwahi, ang Ebola virus dili komon, apan sa pipila ka pagdagsang niini, kini nakapatay ug duolan sa 90 porsiyento sa gitakboyan niini.
Unsay Imong Tubag?
• Nganong nagkinahanglan ka gayod ug kaluwasan?
• Sa unsang paagi ang pagsakripisyo ni Jesus nag-apektar kanimo?
• Unsay imong pagbati sa gasa ni Jehova nga lukat?
• Unsay imong buhaton agig pagpasalamat sa pagluwas ni Jehova kanimo?
[Mga Pangutana sa Pagtuon]
[Hulagway sa panid 27]
Sa Adlaw sa Pagtabon sa Sala, ang hataas nga saserdote sa Israel naghulagway sa Mesiyas
[Hulagway sa panid 28]
Ang pagkaandam motanyag ni Abraham sa iyang anak naghatag kanatog daghang pagtulon-an bahin sa mas dakong sakripisyo nga gihimo ni Jehova