Nahimong Makahuloganon ang Akong Kinabuhi

Sumala sa giasoy ni Gaspar Martínez

Ang estorya sa akong kinabuhi susama nianang sa usa ka kabos nga probinsiyano nga nadato sa siyudad. Apan imong masayran nga ang bahandi nga akong natigom dili maoy akong gidahom.

NAGDAKO ko sa usa ka umaw nga banika sa katuigan sa 1930 sa Rioja nga rehiyon sa amihanang Espanya. Sa edad nga napulo, kinahanglan kong moundang pag-eskuyla, apan niadtong tungora makamao na kong mobasa ug mosulat. Kauban sa akong unom ka igsoong lalaki ug babaye, ako motabang sa pag-atiman sa among mga karnero ug sa pag-uma sa among gamayng luna sa yuta.

Tungod sa kakabos, nakahunahuna mi nga importante gyod ang salapi ug kabtangan. Kami nasina niadtong nakabaton ug mas labaw kay kanamo. Apan, matod pa sa obispo ang among dapit kono “ang labing relihiyosong baryo sa iyang sakop.” Wala siya mahibalo nga sa ulahi, daghan ang mobiya sa Katolisismo.

Pagpangitag Butang nga Mas Maayo

Akong giminyoan si Mercedes, usa ka dalaga nga nagdako usab sa among baryo. Wala madugay, nakabaton mig anak nga lalaki. Pagka 1957 namalhin mi sa sikbit nga siyudad sa Logroño, ug sa ngadtongadto misunod usab ang akong ginikanan ug mga igsoon. Tungod kay kulang kog kahanas, maglisod ko sa pagpangitag trabaho nga dako-dakog suweldo. Naghunahuna ko kon asa mangitag giya. Nagsugod ko sa pagpanukiduki diha sa lokal nga librarya, bisan tuod wala gyod ko mahibalo kon unsay pangitaon.

Sa ulahi, akong nadunggan ang bahin sa usa ka programa sa radyo nga nagtanyag ug pagtuon sa Bibliya pinaagig sulat. Sa dihang natapos nako ang akong pagtuon, dihay mga Evangelical Protestant nga mikontak kanako. Human sa pipila ka beses nakong pagtambong sa ilang simbahan, akong nakita ang pag-indigay sa prominenteng mga membro niadtong grupoha. Kay nakahinapos nga pareho ra ang tanang relihiyon, wala na ko mobalik.

Akong Nakaplagan Kon Unsa Gayoy Hinungdanon sa Kinabuhi

Sa 1964, usa ka batan-on nga ginganlag Eugenio ang miduaw sa among balay. Siya usa sa mga Saksi ni Jehova, usa ka relihiyon nga wala pa nako sukad madunggi. Apan andam kaayo ko sa pagpakighisgot bahin sa Bibliya. Nagtuo ko nga daghan na kog nahibaloan sa Kasulatan. Ako siyang gitubag gamit ang pipila sa mga teksto nga akong nakat-onan sa akong pag-eskuyla. Bisan tuod naningkamot ko pagdepensa sa pipila ka doktrina sa Protestante, sa pagkatinuod wala gyod ko motuo niana.

Human sa duha ka dugayng panaghisgot,  akong nakita nga hanas kaayo si Eugenio sa paggamit sa Pulong sa Diyos. Nahingangha ko kon giunsa niya pagkakita sa mga teksto ug pagsaysay niana, nga mas gamay man siyag grado kay kanako. Gipakita ni Eugenio gikan sa Bibliya nga kita nagkinabuhi na sa kataposang mga adlaw ug ang Gingharian sa Diyos sa dili madugay maghimo sa yuta nga paraiso. Nainteres gayod ako sa akong nakat-onan.—Sal. 37:11, 29; Isa. 9:6, 7; Mat. 6:9,10.

Ako dayong gidawat ang pagtuon sa Bibliya. Halos tanan nga akong nakat-onan bag-o kanako ug nakatandog sa akong kasingkasing. Naghatag kini kanako ug bag-ong paglaom nga takos gayod sa tanang sakripisyo. Natapos ra gyod ang akong pagpangita. Karon ang akong mga pagpaningkamot aron moasenso morag dili na hinungdanon, ug ang akong pagpanglimbasog sa pagpangitag maayong trabaho dili na usab ang labing importante sa akong kinabuhi. Kon wad-on bisan ang sakit ug kamatayon, unsa pa kaha ang ubang mga problema?—Isa. 33:24; 35:5, 6; Pin. 21:4.

Ako dayong gisultihan ang akong mga paryente sa akong nakat-onan. Maikagon nakong gisaysay kanila nga ang Diyos nagsaad ug usa ka paraisong yuta diin ang matinumanong mga tawo mabuhi sa walay kataposan.

Gidawat sa Akong Pamilya ang Kamatuoran

Wala madugay, kapin na mi sa napulo nga magtigom sa balay sa akong uyoan kada Dominggo aron sa paghisgot bahin sa mga saad sa Bibliya. Moabot ug duha o tulo ka oras ang among panaghisgot kada semana. Sa dihang nakita ni Eugenio nga daghan sa akong mga paryente ang interesado sa Bibliya, iyang gihikay nga mahatagan ug personal nga atensiyon ang matag pamilya.

May mga paryente pa ko sa Durango, usa ka gamayng lungsod nga mga 120 kilometros ang gilay-on, diin walay Saksi nga nagpuyo. Busa paglabayg tulo ka bulan, mibakasyon ko ug pipila ka adlaw aron duawon sila ug ipaambit kanila ang akong bag-ong-kaplag nga pagtuo. Niadtong tungora, mga napulo mi nga magtigom kada gabii, ug lapas na mi sa tungang gabii mahuman. Silang tanan maikagong mamati. Sa dihang natapos ang akong mubo nga pagduaw, ako silang gibinlan ug mga Bibliya ug literatura. Sukad niadto, nagpadayon ang among komunikasyon.

Sa dihang ang mga Saksi nangabot sa Durango—nga wala pa sukad masangyawi—sila nakakaplag ug 18 ka tawo nga interesadong magtuon sa Bibliya. Ang mga Saksi malipayong naghikay nga madumalahan ug pagtuon ang matag pamilya.

Niadtong tungora, si Mercedes wala pa modawat sa kamatuoran, dili tungod kay nagduhaduha siya sa mga pagtulon-an sa Bibliya kondili tungod sa kahadlok sa tawo. Gibando sa Espanya ang buluhaton sa mga Saksi ni Jehova niadtong panahona, busa naghunahuna siya nga ipalagpot sa mga awtoridad ang among duha ka anak gikan sa eskuylahan ug kaming tanan mahimong sinalikway. Apan sa dihang iyang nakita nga ang tibuok pamilya midawat sa kamatuoran, gusto na sab niyang magtuon.

Sulod sa duha ka tuig, 40 ka membro sa akong pamilya ang nahimong mga Saksi. Oo, kami sa akong pamilya adunay samang tumong ug katuyoan sa kinabuhi. Ako mibati nga aduna koy nalampos nga hinungdanon kaayo. Kami dagayang gipanalanginan ug espirituwal nga mga bahandi.

Nahimong Mas Makahuloganon ang Kinabuhi

Sa misunod nga 20 ka tuig, akong gisentro ang akong pagtagad sa pagmatuto sa among duha ka anak nga lalaki ug sa pagtabang sa kongregasyon. Sa dihang namalhin mi ni Mercedes sa Logroño, diha lamay mga 20 ka Saksi sa maong siyudad nga may mga 100,000 ka molupyo. Wala madugay, nakadawat kog daghang responsibilidad sa kongregasyon.

Dayon, sa dihang ako 56 anyos na, kalit nga gisira sa kompaniya ang pabrika nga akong gitrabahoan ug nawad-an kog trabaho. Dugay na kong gusto nga mosulod sa bug-os-panahong pag-alagad, busa akong gipahimuslan ang kahigayonan nga mahimong payunir. Gamay ra ang akong nadawat nga pensiyon, ug lisod ang pagpaigo niana. Si Mercedes mitabang pinaagig pagtrabaho isip tiglimpiyo. Kami nakatagana sa among pamilya ug wala gayod kami makulangi sa mga butang nga hinungdanon. Ako payunir gihapon, ug siya mag-oksilyare payunir matag karon ug unya,  nga malipayon kaayong makig-ambit sa buluhatong pagsangyaw.

Pipila ka tuig kanhi, si Mercedes regular nga magbilin ug mga magasin sa usa ka batan-ong babaye nga ginganlag Merche kinsa sa bata pa nadumalahag pagtuon sa Bibliya. Maikagong gibasa ni Merche ang atong mga magasin, ug namatikdan ni Mercedes nga nahibalo gihapon si Merche kon unsa ka hinungdanon ang kamatuoran sa Bibliya. Sa kataposan, si Merche midawat ug pagtuon sa Bibliya ug misugod sa pag-uswag. Apan si Vicente, nga iyang bana, kusog moinom ug kanunayng mawad-ag trabaho. Ingong resulta, dili siya makasuportar sa iyang asawa; nameligro ang ilang kaminyoon tungod sa iyang pagkapalainom.

Ang akong asawa misugyot kang Merche nga makig-estorya si Vicente kanako, ug sa kataposan misugot ang iyang bana. Human sa pipila ka pagduaw, siya midawat ug pagtuon sa Bibliya. Si Vicente nagsugod sa pagbag-o, nga mohunong sa pag-inom sulod sa pipila ka adlaw sa matag panahon. Dayon ang iyang pagpugong sa pag-inom moabot na ug usa ka semana o kapin pa. Sa ngadtongadto, siya mihunong na sa pag-inom ug alkoholikong ilimnon. Maayo na ang iyang panagway, ug nagkahiusa na ang iyang pamilya. Ang iyang tibuok pamilya, lakip sa iyang asawa ug anak nga babaye, madasigong nagsuportar sa gamayng kongregasyon sa Canary Islands diin sila namuyo.

Paghandom sa Akong Malipayong Kinabuhi

Bisan tuod ang pipila sa akong mga paryente nga nakakat-on sa kamatuoran sa Bibliya sa miaging katuigan nangamatay na, nagkadako ang among pamilya, ug kami dagayang gipanalanginan sa Diyos. (Prov. 10:22) Makapalipay gayong makita nga halos tanan nga misugod pagtuon sa Bibliya 40 ka tuig kanhi—kauban sa ilang mga anak ug apo—ang matinumanong nag-alagad kang Jehova!

Daghan na kog mga paryente nga Saksi ug daghan kanila ang nag-alagad ingong mga ansiyano, ministeryal nga alagad, ug mga payunir. Ang akong kinamagulangang anak nga lalaki ug ang iyang asawa nag-alagad sa sangang buhatan sa mga Saksi ni Jehova sa Madrid, Espanya. Sa dihang na-Saksi ko, diha lamay mga 3,000 kanamo sa Espanya. Karon aduna nay kapin sa 100,000. Malipayon gayod ako diha sa bug-os-panahong pag-alagad, ug mapasalamaton kaayo ko sa Diyos sa makapatagbaw nga kinabuhi sa pag-alagad. Bisan pag gamay ra kog grado, matag karon ug unya ako mag-alagad ingong kapuling magtatan-aw sa sirkito.

Pipila ka tuig kanhi, akong nahibaloan nga halos wala nay nagpuyo sa baryo diin ako nagdako. Tungod sa kakabos, napugos ang mga molupyo didto sa pagbiya sa ilang mga uma ug balay aron mangitag mas maayong kinabuhi. Makapalipay nga daghan niadtong namalhin—lakip kanako—ang nakakaplag ug laing matang sa bahandi. Among nakat-onan nga adunay katuyoan ang kinabuhi ug ang pag-alagad kang Jehova makahatag ug dakong kalipay.

[Hulagway sa panid 32]

Halos tanang paryente ni Brader Martínez nga anaa sa kamatuoran