Relihiyon—Ako bay Nagpili o ang Akong Ginikanan?

SA Polandia daghan ang moingon sa mga Saksi ni Jehova, “Mao ni ang akong namat-ag kahayag, mao sab ni akong pakamatyan.” Kana nagpaila nga, sa ilang panglantaw, ang relihiyon gipasa gikan sa usa ka kaliwatan ngadto sa lain. Mao ba usab kana ang tinamdan bahin sa relihiyon diha sa inyong dapit? Unsay kasagarang resulta niana nga panglantaw? Ang relihiyon nahimo na lamang pormalidad ug tradisyon sa pamilya. Mahitabo ba usab kini sa mga Saksi ni Jehova nga nakakat-on sa kamatuoran gikan sa ilang mga ginikanan o apohan?

Wala kana mahitabo kang Timoteo, kinsa gimatuto sa iyang diyosnong inahan ug apohan sa pagtuo ug paghigugma sa matuod nga Diyos. Si Timoteo nasayod sa balaang mga sinulat “sukad pa sa pagkamasuso.” Sa ngadtongadto, uban sa iyang inahan ug apohan, si Timoteo nakombinsir nga ang Kristiyanidad mao ang kamatuoran. Siya ‘nakombinsir sa pagtuo’ sa iyang nadungog gikan sa Kasulatan mahitungod kang Jesu-Kristo. (2 Tim. 1:5; 3:14, 15) Busa, bisan pag gihimo sa Kristohanong mga ginikanan karon ang ilang maarangan sa pagtabang sa ilang mga anak nga mahimong mga alagad ni Jehova, ang mga anak mismo ang kinahanglang mougmad sa tinguha nga moalagad kang Jehova.—Mar. 8:34.

Ang matag usa angayng makombinsir sa pagtuo pinaagig lig-ong pamatuod aron siya mag-alagad kang Jehova tungod sa gugma ug magmatinumanon bisag unsa pay mahitabo. Sa ingon, ang iyang pagtuo molig-on ug dili matarog.—Efe. 3:17; Col. 2:6, 7.

Papel sa mga Anak

“Dugay na kong nagtuo nga ang mga Saksi ni Jehova mao ang matuod nga relihiyon,” miingon si Albert, a kinsa nagdako sa pamilyang Saksi, “apan nalisdan ko sa pagdawat sa ilang ginasulti kon sa unsang paagi ako angayng magkinabuhi.” Kon ikaw usa ka batan-on, lagmit ingon usab niana ang imong pagbati. Nganong dili maningkamot sa pagsusi kon unsay nalangkit sa paagi sa pagkinabuhi nga gusto sa Diyos nga atong subayon ug dayon magmalipayon sa pagbuhat sa iyang kabubut-on? (Sal. 40:8) “Nagsugod ko sa pag-ampo,” matod pa ni Albert. “Sa sinugdan, nalisdan ko. Kinahanglan nakong pugson ang akong kaugalingon nga moampo. Apan, wala madugay akong gibati nga mahimo kong bililhon atubangan sa Diyos kon maningkamot ko sa pagbuhat kon unsay husto. Kini naghatag kanako ug kusog sa paghimo sa gikinahanglang mga kausaban.” Pinaagi sa pagbaton ug suod nga relasyon kang Jehova, imong maugmad ang tinguha sa pagbuhat kon unsay iyang  gikinahanglan kanato.—Sal. 25:14; Sant. 4:8.

Paghunahuna ug usa ka dula o esport nga imong nasulayan, sama sa basketbol. Kon wala ka mahibalo sa lagda o dili kaayo ka makamaong modula niana, lagmit laayan ka. Apan, kon nahibalo ka sa lagda ug nahimong hanite niana, dili ka ba maghinamhinam sa pagdula, nga mangita pa ganig paagi nga makadula? Tinuod usab kana diha sa Kristohanong mga kalihokan. Busa pangandam alang sa mga tigom. Pakigbahin niana. Bisag pila pay imong edad, makadasig ka sa uban pinaagi sa imong panig-ingnan!—Heb. 10:24, 25.

Mapadapat usab kana sa pagsulti sa uban bahin sa imong pagtuo. Angay sab kining himoon tungod sa gugma, dili kay napugos lamang. Suknaa ang imong kaugalingon: ‘Nganong gusto man kong mosulti sa uban bahin kang Jehova? Unsay akong mga rason sa paghigugma kaniya?’ Kinahanglan nimong mailhan si Jehova ingong mahigugmaong Amahan. Siya misulti pinaagi ni Jeremias: “Kamo sa pagkatinuod mangita kanako ug makakaplag kanako, kay kamo mangita kanako sa bug-os ninyong kasingkasing.” (Jer. 29:13, 14) Unsa kahay kinahanglan nimong himoon? “Kinahanglan nakong usbon ang akong panghunahuna.” miingon si Jakub. “Sukad sa pagkabata, ako tigtambongan na sa mga tigom ug kanunayng mosangyaw sa kanataran, apan nahimo na lang kadtong rutina. Hinunoa, napabilhan nako pag-ayo ang kamatuoran sa dihang mas nailhan nako si Jehova ug naugmad ang suod nga relasyon kaniya.”

Ang maayo, makapadasig nga pagpakig-uban dakog mahimo aron ikaw magmalipayon sa imong ministeryo. “Siya nga nagalakaw uban sa mga tawong maalamon mahimong maalamon,” nag-ingon ang inspiradong panultihon. (Prov. 13:20) Busa pakighigala niadtong nangab-ot ug espirituwal nga mga tumong ug niadtong nagmalipayon sa pag-alagad kang Jehova. Si Jola miingon: “Ako nadasig pinaagi sa pagpakig-uban sa mga batan-on nga mahunahunaon sa espirituwal. Karon, malipayon na ako sa akong ministeryo.”

Papel sa Ginikanan

“Mapasalamaton kaayo ko sa akong mga ginikanan sa ilang pagtudlo kanako bahin kang Jehova,” miingon si Jola. Oo, ang mga ginikanan makaimpluwensiya gayod sa mga desisyon nga pagahimoon sa ilang mga anak. Si apostol Pablo misulat: “Kamong mga amahan, . . . magpadayon sa pagmatuto [sa inyong mga anak] sa disiplina ug sa pagdumala-sa-kaisipan ni Jehova.” (Efe. 6:4) Kining inspiradong tambag tin-awng nagpakita nga ang papel sa mga ginikanan mao ang pagtudlo sa ilang mga anak sa mga paagi ni Jehova, dili sa ilaha. Imbes nga isilsil sa inyong mga anak kon unsay inyong gustong malampos, pagkamaayo gayod kon inyo silang tabangan nga himoong tumong ang pagkinabuhi nga kaharmonya sa mga katuyoan ni Jehova!

Mahimo ninyong isilsil sa inyong mga anak ang pulong ni Jehova ug ‘magsulti mahitungod niini sa maglingkod kamo sa inyong balay ug sa maglakaw kamo sa dalan ug sa inyong paghigda ug sa inyong pagbangon.’ (Deut. 6:6, 7) “Maghisgot mi kanunay bahin sa lainlaing natad sa bug-os-panahong pag-alagad,” nahinumdom si Ewa ug Ryszard, nga may tulo ka anak. Unsay resulta? “Bisag bata pa sila, gusto na nilang magpalista sa Teokratikanhong Tunghaan sa Ministeryo, sila nahimong  mga magmamantala, ug sa ngadtongadto nagpabawtismo. Sa ulahi, sila misulod sa bug-os-panahong pag-alagad.”

Ang maayong panig-ingnan sa mga ginikanan hinungdanon. Si Ryszard miingon: “Determinado kami nga dili magkinabuhi ug dobleng kinabuhi, nga lahi ang ginabuhat sa balay ug lain usab sa kongregasyon.” Busa, suknaa ang imong kaugalingon: ‘Unsay makita sa akong mga anak sa akong kinabuhi? Makita ba nila ang akong tinuod nga gugma kang Jehova? Mamatikdan ba nila ang maong gugma diha sa akong mga pag-ampo ug personal nga pagtuon? Makita ba nila kini sa akong tinamdan sa pagsangyaw, kalingawan, ug materyal nga mga butang ug sa akong ginasulti bahin sa mga igsoon sa kongregasyon?’ (Luc. 6:40) Ang mga anak maniid sa inyong adlaw-adlawng pagkinabuhi ug makabantay sila kon dili magkauyon ang inyong gisulti ug gibuhat.

Ang disiplina nagdulag hinungdanong papel sa pagmatuto sa mga anak. Apan, ang inspiradong Pulong sa Diyos nagtug-an kanato nga ‘bansayon ang bata subay sa dalan nga alang kaniya.’ (Prov. 22:6) Si Ewa ug Ryszard mikomento, “Naggahin mig panahon nga dumalahag pagtuon sa Bibliya ang tagsa-tagsa namo ka anak.” Siyempre, ang mga ginikanan maoy modesidir kon bulagon sila pagtuon o dunganon. Bisag unsa pay kahimtang, ang bata kinahanglang trataron ingong indibiduwal. Nagkinahanglan kinig pagpailin-ilin ug pagkamakataronganon. Pananglitan, imbes sultihan lang ang inyong mga anak nga daotan ang pipila ka musika, nganong dili sila tudloan kon sa unsang paagi makahimog maalamong mga desisyon, kon sa unsang paagi nalangkit ang mga prinsipyo sa Bibliya?

Mahimong nahibalo ang inyong mga anak kon unsa gayoy inyong gidahom alang kanila ug sila morag misunod sa inyong gusto. Apan, kinahanglan ninyong aboton ang ilang kasingkasing. Hinumdomi, “ang laraw diha sa kasingkasing sa tawo ingon sa halawom nga katubigan, apan ang tawo nga may katakos sa pag-ila maoy magatimba niini.” (Prov. 20:5) Magmasinaboton, pangitag mga timailhan sa bisan unsang problema nga mahimong nagpahipi diha sa kasingkasing sa inyong mga anak, ug ayaw paglangan sa paglihok. Ipakita ang inyong kahingawa ug pagsuknag nahiangayng mga pangutana, nga walay pag-akusar. Sa gihapon, pagbantay nga dili mahimong maukit-ukiton. Ang imong tiunayng kahingawa modulot sa ilang kasingkasing ug motabang kanimo sa pagtabang kanila.

 Papel sa Kongregasyon

Ingong usa sa mga alagad sa Diyos, makatabang ka ba sa mga batan-on sa inyong kongregasyon nga pabilhan ang espirituwal nga panulondon nga ilang nadawat? Bisan tuod obligasyon sa mga ginikanan ang pagmatuto sa ilang mga anak, ang ubang membro sa kongregasyon, ilabina ang mga ansiyano, makapaluyo sa ilang mga pagpaningkamot. Ilabinang hinungdanon ang pagtabang niadtong mga pamilya nga usa ra sa ginikanan ang Saksi.

Unsay mahimo sa mga ansiyano aron matabangan ang mga batan-on sa paghigugma kang Jehova ug mobati nga sila gikinahanglan ug gipabilhan? Si Mariusz, nga magtatan-aw sa usa ka kongregasyon sa Polandia, miingon: “Ang mga ansiyano angayng makigsulti, makigsulti, makigsulti sa mga batan-on. Kana angayng himoon dili lang sa panahon nga motungha ang mga problema, kondili sa ubang mga higayon usab—sa ministeryo, human sa mga tigom, o diha sa dili-pormal nga kahimtang.” Nganong dili pangutan-on ang mga batan-on kon unsay ilang pagbati sa kongregasyon? Kon bukas ang linya sa komunikasyon, ang mga batan-on masuod sa kongregasyon ug mobati nga sila bahin niana.

Kon ikaw usa ka ansiyano, nailhan na ba nimo ang mga batan-on sa inyong kongregasyon? Bisan tuod ansiyano na karon si Albert, nga gihisgotan ganina, siya nakasinatig lainlaing pagsulay panahon sa iyang pagkabatan-on. Siya miingon, “Ingong hohamtong na, nagkinahanglan kog pagduaw sa mga magbalantay.” Ang mga ansiyano makapakita usab ug personal nga interes pinaagi sa pag-ampo nga unta ang mga batan-on mouswag sa espirituwal.—2 Tim. 1:3.

Makaayo alang sa mga batan-on nga makigbahin sa mga kalihokan sa kongregasyon. Kay kon dili, basin masentro ang ilang pagtagad sa pagkab-ot ug kalibotanong mga tumong. Kamong mga gulang-gulang na, makahimo ba kamo sa pagpakig-uban kanila diha sa ministeryo ug sa pagpakighigala kanila? Paggugol ug panahon nga maglingawlingaw uban sa mga batan-on, aron maugmad ang pagsalig ug panaghigalaay. Si Jola nahinumdom: “Usa ka payunir nga sister ang nagpakitag personal nga interes kanako. Siya ang akong kauban sa unang higayon nga misangyaw ko kay gusto nako.”

Imong Desisyon

Mga batan-on, pangutan-a ang inyong kaugalingon: ‘Unsay akong mga tumong? Kon wala pa ko mabawtismohi, gihimo ko ba kana nga tumong?’ Ang halalom nga gugma kang Jehova maoy angayng magtukmod sa usa nga magpabawtismo, dili ang obligasyon nga mosunod sa tradisyon sa pamilya.

Oo, hinaot nga si Jehova mahimo nimong tinuod nga Higala, ug ang kamatuoran imong bahandi. Si Jehova nagpahayag pinaagi ni manalagnang Isaias: “Ayaw iliraw ang imong panan-aw, kay ako imong Diyos.” Si Jehova magauban kanimo kon ikaw iyang higala. Siya magalig-on gayod kanimo ug “magahawid kanimo sa [iyang] tuong kamot sa pagkamatarong.”—Isa. 41:10.

[Footnote]

[Hulagway sa panid 4]

Sulayi sa pagsusi kon unsay anaa sa kasingkasing sa imong anak

[Hulagway sa panid 6]

Ang halalom nga gugma kang Jehova maoy angayng magtukmod sa usa nga magpabawtismo