“Kamo Akong mga Higala”

“Kamo akong mga higala kon inyong buhaton ang ginasugo ko kaninyo.”—JUAN 15:14.

1, 2. (a) Unsay kagikan sa mga higala ni Jesus? (b) Nganong hinungdanon nga kita mahimong mga higala ni Jesus?

 ANG mga lalaki nga kauban ni Jesus sa lawak sa itaas lainlaig kagikan. Ang magsoon nga si Pedro ug Andres mga mangingisda. Si Mateo kanhing maniningil ug buhis—usa ka propesyon nga tinamay sa mga Hudiyo. Ang pipila, sama kang Santiago ug Juan, lagmit nakaila kang Jesus sukad sa ilang pagkabata. Ang uban, sama kang Natanael, lagmit nakaila kaniya sulod sa pipila lamang ka tuig. (Juan 1:43-50) Bisan pa niana, ang tanang nanambong nianang halandomong gabii sa Paskuwa sa Jerusalem kombinsido nga si Jesus mao ang gisaad nga Mesiyas, ang Anak sa buhi nga Diyos. (Juan 6:68, 69) Hayan nga natandog gayod ang ilang kasingkasing sa dihang siya miingon: “Gitawag ko kamong mga higala, tungod kay ang tanang butang nga akong nadungog gikan sa akong Amahan gipahibalo ko kaninyo.”—Juan 15:15.

² Ang prinsipyo sa gipamulong ni Jesus sa iyang matinumanong mga apostoles mapadapat sa tanang dinihogang mga Kristohanon karon ug sa “ubang mga karnero.” (Juan 10:16) Bisag unsa pay atong kagikan, kita makapribilehiyo nga mahimong mga higala ni Jesus. Ang atong panaghigala kaniya hinungdanon kaayo tungod kay kon kita iyang mga higala, kita mga higala usab ni Jehova. Sa pagkatinuod, imposibleng moduol kang Jehova kon dili kita moduol una kang Kristo. (Basaha ang Juan 14:6, 21.) Nan, unsay atong buhaton aron mahimong mga higala ni Jesus ug magpabiling suod kaniya? Sa dili pa hisgotan kanang hinungdanong ulohan, ato unang susihon ang ehemplo ni Jesus sa pagkahimong maayong higala ug atong tan-awon kon unsay atong makat-onan sa paagi sa pagsanong sa iyang mga tinun-an.

Ang Ehemplo ni Jesus sa Pagkahimong Maayong Higala

3. Sa unsa nailhan si Jesus?

³ “Daghan ug higala ang tawong dato,” misulat ang maalamong hari nga si Solomon. (Prov. 14:20) Ang maong komento naghubit sa kiling sa dili-hingpit nga mga tawo—ang pagpakighigala pinasukad sa kon unsay ilang madawat inay sa mahatag. Dili ingon niana si Jesus. Wala siya maimpluwensiyahi sa pinansiyal o sosyal nga kahimtang sa usa ka tawo. Tinuod, si Jesus mibatig gugma sa usa ka dato nga batan-ong magmamando ug nagdapit kaniya nga mahimong iyang sumusunod. Apan, giingnan ni Jesus ang maong lalaki nga ibaligya ang iyang kabtangan ug ihatag sa mga kabos. (Mar. 10:17-22; Luc. 18:18, 23) Si Jesus nailhan, dili tungod sa iyang pagpakig-uban sa mga adunahan ug inila, kondili sa iyang pagpakighigala sa mga kabos ug tinamay.—Mat. 11:19.

4. Nganong ikaingon nga masalaypon ang mga higala ni Jesus?

⁴ Siyempre, ang mga higala ni Jesus maoy mga tawo nga masalaypon. Dihay higayon nga si Pedro napakyas sa paglantaw sa mga butang sumala sa panglantaw sa Diyos. (Mat. 16:21-23) Si Santiago ug Juan nagpakitag pagkaambisyoso sa dihang ilang gihangyo si Jesus nga hatagan silag prominenteng mga posisyon sa Gingharian. Nasuko ang ubang mga apostoles sa ilang gibuhat, ug kanunay silang maglantugi kon kinsay labing dako kanila. Apan, si Jesus mapailobong nagtul-id sa ilang panghunahuna ug wala masuko kanila.—Mat. 20:20-28.

5, 6. (a) Nganong si Jesus nagpabiling higala sa kadaghanan sa iyang mga apostoles? (b) Nganong gitapos ni Jesus ang iyang panaghigala kang Judas?

⁵ Si Jesus nagpabilin nga ilang higala, dili tungod kay gikonsentir niya sila o nagpakabuta-bungol siya sa ilang mga kahuyangan.  Hinunoa, iyang gisentro ang iyang pagtagad sa ilang maayong motibo ug positibong mga hiyas. Pananglitan, si Pedro, Santiago, ug Juan nahikatulog imbes paluyohan si Jesus sa labing malisod nga yugto sa iyang kinabuhi. Masabot nga siya nahigawad kanila. Bisan pa niana, iyang nakita nga maayo ang ilang motibo, ug siya miingon: “Maikagon ang espiritu, apan maluya ang unod.”—Mat. 26:41.

⁶ Sa kasukwahi, gitapos ni Jesus ang iyang panaghigala kang Judas Iscariote. Bisan tuod si Judas nagpakaaron-ingnong higala gihapon ni Jesus, namatikdan ni Jesus nga gitugotan niining kanhing suod niyang kauban nga mahugawan ang iyang kasingkasing. Tungod kay si Judas nakighigala sa kalibotan, iyang gihimo ang iyang kaugalingon nga kaaway sa Diyos. (Sant. 4:4) Busa, gipalakaw na ni Jesus si Judas sa dihang Iyang gipahayag ang Iyang panaghigala sa nahibiling 11 ka matinumanong mga apostoles.—Juan 13:21-35.

7, 8. Sa unsang paagi gipamatud-an ni Jesus ang iyang gugma alang sa iyang mga higala?

⁷ Wala isentro ni Jesus ang iyang pagtagad sa kasaypanan sa iyang maunongong mga higala ug iyang gihimo ang labing maayo alang kanila. Pananglitan, siya miampo sa iyang Amahan nga panalipdan unta sila panahon sa mga pagsulay. (Basaha ang Juan 17:11.) Si Jesus nagpakitag konsiderasyon sa ilang pisikal nga mga limitasyon. (Mar. 6:30-32) Interesado siya dili lamang sa pagsulti kanila kon unsay iyang gihunahuna kondili sa pagpamati usab ug pagsabot kon unsay ilang gihunahuna ug gibati.—Mat. 16:13-16; 17:24-26.

⁸ Si Jesus nabuhi ug namatay alang sa iyang mga higala. Tinuod, siya nahibalo nga kinahanglan niyang ihalad ang iyang kinabuhi ingong legal nga kinahanglanon sa pagtuman sa sukdanan ni Jehova sa hustisya. (Mat. 26:27, 28; Heb. 9:22, 28) Apan gihatag ni Jesus ang iyang kinabuhi ingong pamatuod sa iyang gugma. “Walay usa nga may gugmang labaw pa kay niini,” miingon si Jesus, “nga ang usa magtugyan sa iyang kalag alang sa iyang mga higala.”—Juan 15:13.

Unsay Pagsanong sa mga Tinun-an sa Pagpakighigala ni Jesus?

9, 10. Unsay pagsanong sa mga tawo sa pagkamanggihatagon ni Jesus?

⁹ Si Jesus manggihatagon sa iyang panahon, pagmahal, ug materyal nga mga butang. Tungod niini, ang mga tawo nasuod kaniya ug nalipay nga mobalos sa iyang kaayo. (Luc. 8:1-3) Pinasukad sa personal nga kasinatian, si Jesus nakaingon: “Batasana ang paghatag, ug pagahatagan kamo sa mga tawo. Ibubo nila sa inyong sabakan ang usa ka maayong takos, dinasok, tinantan ug nagaawas. Kay sa sukod nga inyong ginasukod, sila magasukod nganha kaninyo ingong balos.”—Luc. 6:38.

¹⁰ Siyempre, ang pipila nakig-uban kang Jesus tungod lamang sa kon unsay ilang madawat. Kining mini nga mga higala mibiya kang Jesus sa dihang wala nila masabti ang iyang gisulti. Imbes mosalig kang Jesus, sila naghunahunag dili maayo ug mibiya kaniya. Sa kasukwahi, ang mga  apostoles maunongon kaniya. Ang ilang panaghigala kang Kristo sagad masulayan, apan ilang gihimo ang ilang maarangan sa pagpaluyo kaniya sa maayo ug dili maayong panahon. (Basaha ang Juan 6:26, 56, 60, 66-68.) Sa iyang kataposang gabii ingong tawo sa yuta, gipahayag ni Jesus ang iyang pagmahal sa iyang mga higala: “Kamo mao ang nagpabilin kanako diha sa akong mga pagsulay.”—Luc. 22:28.

11, 12. Unsay gipasalig ni Jesus sa iyang mga tinun-an, ug unsay ilang sanong?

¹¹ Wala madugay human komendahi ni Jesus ang iyang mga tinun-an sa ilang pagkamaunongon, sila mibiya kaniya. Sa makadiyot, ilang gitugotan ang kahadlok sa tawo nga maoy mopatigbabaw imbes ang ilang gugma kang Kristo. Sa makausa pa, gipasaylo sila ni Jesus. Human sa iyang kamatayon ug pagkabanhaw, siya nagpakita sa iyang mga tinun-an ug nagpasalig kanila sa iyang panaghigala. Dugang pa, iyang gipiyal kanila ang usa ka sagradong buluhaton—ang paghimog mga tinun-an “sa katawhan sa tanang kanasoran” ug pagkahimong iyang mga saksi “hangtod sa kinalay-ang dapit sa yuta.” (Mat. 28:19; Buh. 1:8) Unsay sanong sa mga tinun-an?

¹² Gihimo sa mga tinun-an ang tanan nga ilang maarangan sa pagsangyaw sa mensahe sa Gingharian. Sa tabang sa balaang espiritu ni Jehova, dali rang mikaylap sa Jerusalem ang ilang pagtulon-an. (Buh. 5:27-29) Bisan ang hulga sa kamatayon wala makapugong kanila sa pagsugot sa sugo ni Jesus sa paghimog mga tinun-an. Sulod lamang sa pipila ka dekada human nila madawat ang sugo ni Jesus, si apostol Pablo nakasulat nga ang maayong balita gikawali na “sa tibuok kalalangan ilalom sa langit.” (Col. 1:23) Tino nga gipamatud-an niining maong mga tinun-an nga ilang gipabilhan ang ilang panaghigala kang Jesus!

13. Sa unsang mga paagi gipadapat sa mga tinun-an ang mga pagtulon-an ni Jesus?

¹³ Kadtong nahimong mga tinun-an nagpadapat sa mga pagtulon-an ni Jesus. Alang sa daghan, kini nagpasabot ug paghimog dagkong kausaban sa ilang panggawi ug kinaiya. Ang pipila ka bag-ong mga tinun-an maoy kanhing mga homoseksuwal, mananapaw, palahubog, o mga kawatan. (1 Cor. 6:9-11) Kinahanglang bag-ohon sa uban ang ilang tinamdan ngadto sa mga tawo nga lahi ug rasa. (Buh. 10:25-28) Bisan pa niana, ilang gisugot si Jesus. Ilang gihukas ang ilang daang personalidad ug gisul-ob ang bag-o. (Efe. 4:20-24) Sila nasinati sa “panghunahuna ni Kristo,” nga nakasabot ug nagsundog sa iyang paagi sa paghunahuna ug paglihok.—1 Cor. 2:16.

Pagpakighigala Kang Jesus Karon

14. Unsay gisaad ni Jesus nga buhaton panahon “sa kataposan sa sistema sa mga butang”?

¹⁴ Daghan niadtong unang-siglong mga Kristohanon ang nakaila kang Jesus o nakakita kaniya human sa iyang pagkabanhaw. Dayag nga wala nato mabatoni kanang pribilehiyoa. Nan, sa unsang paagi kita mahimong mga higala ni Kristo? Ang usa ka paagi mao ang pagsunod sa pagtultol nga gitagana sa matinumanon ug maalamong ulipon nga matang, nga gilangkoban sa dinihogan-sa-espiritu nga mga igsoon ni Jesus nga buhi pa sa yuta. Si Jesus nagsaad nga panahon “sa kataposan sa sistema sa mga butang” siya magtudlo sa maong ulipon “ibabaw sa tanan niyang mga kabtangan.” (Mat. 24:3, 45-47) Karong adlawa, ang kadaghanan niadtong nakighigala kang Kristo dili sakop niining ulipon nga matang. Sa unsang paagi ang ilang pagsanong sa pagtultol nga ilang nadawat gikan sa matinumanon ug maalamong ulipon nag-impluwensiya sa ilang panaghigala kang Kristo?

15. Sa unsang paagi mailhan nga karnero o kanding ang usa ka indibiduwal?

¹⁵ Basaha ang Mateo 25:31-40. Gitawag ni Jesus kadtong maglangkob sa matinumanong  ulipon ingong iyang mga igsoon. Sa ilustrasyon bahin sa paglain sa mga karnero gikan sa mga kanding, si Jesus klarong nag-ingon nga sama rag gibuhat kaniya ang atong gibuhat sa iyang mga igsoon. Gani, siya miingon nga ang usa ka indibiduwal mailhang karnero o kanding pinaagi sa iyang pagtratar bisan “sa labing ubos niining [iyang] mga igsoon.” (Mat. 25:31-40) Busa, ang pagpaluyo sa matinumanong ulipon mao ang pangunang paagi nga ikapasundayag niadtong adunay yutan-ong paglaom nga gusto nilang mahimong mga higala ni Kristo.

16, 17. Sa unsang paagi atong ikapakita ang atong pagpakighigala sa mga igsoon ni Kristo?

¹⁶ Kon naglaom ka nga mabuhi sa yuta ilalom sa Gingharian sa Diyos, sa unsang paagi nimo ikapakita nga nakighigala ka sa mga igsoon ni Kristo? Atong hisgotan ang tulo lamang ka paagi. Una, pinaagi sa tibuok kasingkasing nga pagpakig-ambit sa buluhatong pagsangyaw. Si Kristo nagsugo sa iyang mga igsoon nga isangyaw ang maayong balita sa tibuok kalibotan. (Mat. 24:14) Bisan pa niana, ang nahibilin sa mga igsoon ni Kristo dinhi sa yuta malisdan sa pag-abaga sa maong responsibilidad kon walay tabang sa ubang mga karnero. Sa pagkatinuod, sa matag higayon nga ang ubang mga karnero nakigbahin sa buluhatong pagsangyaw, ilang gitabangan ang mga igsoon ni Kristo sa pagtuman sa ilang sagradong sugo. Ang matinumanon ug maalamong ulipon nagpabili gayod sa ilang gibuhat, maingon man usab si Kristo.

¹⁷ Ang ikaduhang paagi nga ang ubang mga karnero makatabang sa mga igsoon ni Kristo maoy sa pagsuportar sa buluhatong pagsangyaw sa pinansiyal nga paagi. Gidasig ni Jesus ang iyang mga sumusunod nga makighigala pinaagi sa “dili-matarong nga mga bahandi.” (Luc. 16:9) Wala kana magpasabot nga atong mapalit ang panaghigala kang Jesus o kang Jehova. Hinunoa, pinaagi sa paggamit sa atong materyal nga mga butang sa pagpauswag sa intereses sa Gingharian, atong gipamatud-an ang atong panaghigala ug gugma, dili lamang sa pulong, kondili “sa buhat ug sa kamatuoran.” (1 Juan 3:16-18) Kita naghatag ug pinansiyal nga tabang sa dihang kita makigbahin sa buluhatong pagsangyaw, maghatag ug donasyon alang sa pagtukod ug pagmentinar sa atong mga tigomanan, ug sa dihang kita moamot alang sa tibuok-kalibotang buluhatong pagsangyaw. Dako man o gamay ang atong giamot, tinong pabilhan ni Jehova ug ni Jesus ang atong malipayong paghatag.—2 Cor. 9:7.

18. Nganong angay natong tumanon ang binase-sa-Bibliya nga pagtultol nga gitagana sa mga ansiyano sa kongregasyon?

¹⁸ Ang ikatulong paagi nga kita makapamatuod nga kita mga higala ni Kristo maoy pinaagi sa pagsunod sa pagtultol nga gihatag sa mga ansiyano sa kongregasyon. Sila gitudlo sa balaang espiritu ilalom sa pagtultol ni Kristo. (Efe. 5:23) “Magmasinugtanon kamo sa mga nagapanguna kaninyo ug magmapinasakopon,” misulat si apostol Pablo. (Heb. 13:17) Usahay, malisdan tingali kita sa pagtuman sa binase-sa-Bibliya nga pagtultol nga gihatag sa mga ansiyano. Lagmit nahibalo kita sa ilang mga kahuyangan, ug makaapektar kini sa atong paglantaw sa ilang tambag. Bisan pa niana, si Kristo, ang Ulo sa kongregasyon,  malipay sa paggamit niining dili-hingpit nga mga tawo. Busa, ang atong reaksiyon sa ilang awtoridad mag-impluwensiya sa atong panaghigala kang Kristo. Kon dili nato tan-awon ang kasaypanan sa mga ansiyano ug malipayon kitang mosunod sa ilang pagtultol, atong gipamatud-an ang atong gugma kang Kristo.

Kon Asa Kita Makakaplag ug Maayong mga Higala

19, 20. Unsay atong makaplagan sulod sa kongregasyon, ug unsay atong hisgotan sa sunod artikulo?

¹⁹ Si Jesus nagpadayon sa pag-atiman kanato dili lamang pinaagi sa mahigugmaong mga ansiyano kondili sa pagtagana usab kanato ug espirituwal nga mga inahan ug mga igsoon sulod sa kongregasyon. (Basaha ang Marcos 10:29, 30.) Sa dihang nakig-uban ka sa organisasyon ni Jehova, unsay reaksiyon sa imong mga paryente? Maayo kon ilang gipaluyohan ang imong mga paningkamot sa pagpakigsuod sa Diyos ug kang Kristo. Apan nagpasidaan si Jesus nga usahay “ang mga kaaway sa usa ka tawo mao unya ang mga tawo sa iyang kaugalingong panimalay.” (Mat. 10:36) Makapahupay ang pagkahibalo nga sulod sa kongregasyon, kita makakaplag ug mga higala nga mounong labaw pa kay sa literal nga igsoon!—Prov. 18:24.

²⁰ Gipakita diha sa mga pangomosta ni Pablo sa paniklop sa iyang sulat sa kongregasyon sa Roma nga siya nakabaton ug daghang suod nga mga higala. (Roma 16:8-16) Si apostol Juan nagtapos sa iyang ikatulong sulat pinaagi sa mga pulong: “Ipangomosta ako sa mga higala sumala sa ngalan.” (3 Juan 14) Dayag nga siya usab nakabaton ug daghang suod nga mga higala. Sa unsang paagi nato masundog ang ehemplo ni Jesus ug sa unang mga tinun-an sa pagbaton ug suod nga panaghigalaay diha sa kongregasyon? Ang sunod nga artikulo maghisgot sa tubag nianang pangutanaha.

Unsay Imong Tubag?

• Unsang ehemplo ang gipakita ni Jesus sa pagkahimong maayong higala?

• Unsay sanong sa mga tinun-an sa pagpakighigala ni Jesus?

• Sa unsang paagi atong mapamatud-an nga kita mga higala ni Kristo?

[Mga Pangutana sa Pagtuon]

[Hulagway sa panid 14]

Si Jesus interesado kon unsay gihunahuna ug gibati sa iyang mga higala

[Mga hulagway sa panid 16]

Sa unsang paagi atong ikapakita nga gusto natong mahimong mga higala ni Kristo?