“Makigdinaitay sa Tanang Tawo”

“Kon mahimo, kutob sa inyong maarangan, makigdinaitay sa tanang tawo.”—ROMA 12:18.

1, 2. (a) Unsang pasidaan ang gihatag ni Jesus sa iyang mga sumusunod? (b) Asa kita makakaplag ug tambag bahin sa kon unsay buhaton sa dihang kita lutoson?

 GIPASIDAN-AN ni Jesus ang iyang mga sumusunod nga sila pagalutoson sa mga nasod sa kalibotan, ug sa gabii una siya mamatay, iyang gipatin-aw kon ngano. Iyang giingnan ang iyang mga tinun-an: “Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.”—Juan 15:19.

² Nasinati ni apostol Pablo ang gipamulong ni Jesus. Sa iyang ikaduhang sulat sa iyang batan-ong kauban nga si Timoteo, si Pablo miingon: “Imong gisunod pag-ayo ang akong gitudlo, ang akong paagi sa pagkinabuhi, ang akong katuyoan, ang akong pagtuo, ang akong hataas-nga-pailob, ang akong gugma, ang akong pagkamainantoson, ang akong mga paglutos, ang akong mga pag-antos.” Dayon midugang si Pablo: “Sa pagkatinuod, ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Tim. 3:10-12) Sa kapitulo 12 sa iyang sulat  ngadto sa mga Kristohanon sa Roma, si Pablo naghatag ug maalamong tambag kon unsay ilang buhaton sa dihang sila lutoson. Ang iyang gipamulong makagiya kanato niining panahon sa kataposan.

“Pagtagana ug Maayong mga Butang”

3, 4. Sa unsang paagi ang tambag nga gihatag sa Roma 12:17 ikapadapat (a) diha sa panimalay nga nabahin tungod sa relihiyon? (b) diha sa atong pagpakiglabot sa atong mga silingan?

³ Basaha ang Roma 12:17. Gipatin-aw ni Pablo nga sa dihang kita lutoson, dili kita angayng mobalos. Ang pagpatalinghog sa iyang tambag ilabinang hinungdanon diha sa mga panimalay nga nabahin tungod sa relihiyon. Ang Kristohanong kapikas maningkamot nga dili mobalos pinaagi sa pagsulti o pagbuhat ug dili maayo. Walay maayong resulta kon ‘balosan ug daotan ang daotan.’ Sa kasukwahi, ang maong tinamdan makapasamot lamang sa situwasyon.

⁴ Si Pablo nagsugyot ug mas maayong paagi: “Pagtagana ug maayong mga butang sa atubangan sa tanang tawo.” Diha sa panimalay, mapugngan ang panaglalis kon ang asawa magpakitag tinuod nga kalulot sa iyang bana human kini mohimog dili maayong mga komento bahin sa iyang relihiyon. (Prov. 31:12) Si Carlos, nga karon membro na sa pamilyang Bethel, nag-asoy kon sa unsang paagi nabuntog sa iyang inahan ang grabeng pagsupak sa iyang amahan pinaagi sa pagpakitag kalulot ug pag-atiman pag-ayo sa panimalay. “Gidasig niya kaming mga anak nga magmatinahoron sa among amahan. Siya miinsistir nga makigdula kog bowling kang Papa bisan pag dili ko ganahan niana. Apan, malipay si Papa kon makigdula ko niya.” Sa ngadtongadto, siya misugod pagtuon sa Bibliya ug nagpabawtismo. Kon bahin sa “pagtagana ug maayong mga butang sa atubangan sa tanang tawo,” sagad mabuntog sa mga Saksi ni Jehova ang pagpihigpihig pinaagi sa paghatag ug praktikal nga tabang sa ilang mga silingan sa dihang mohapak ang mga katalagman.

Paglukmay sa mga Magsusupak Pinaagig “mga Baga”

5, 6. (a) Sa unsang diwa nga ang “mga baga” pundokon diha sa ulo sa kaaway? (b) Pag-asoy ug lokal nga eksperyensiya nga nagpakita kon sa unsang paagi ang pagpadapat sa tambag sa Roma 12:20 makapatunghag maayong mga resulta.

⁵ Basaha ang Roma 12:20. Sa pagpili sa mga pulong nga nahisulat niining bersikuloha, walay duhaduha si Pablo mikutlo sa atong mabasa sa Proverbio 25:21, 22: “Kon ang nagdumot kanimo gigutom, hatagi siya ug tinapay nga makaon; ug kon siya giuhaw, hatagi siya ug tubig nga mainom. Kay ikaw nagapundok ug mga baga sa ibabaw sa iyang ulo, ug si Jehova magabalos kanimo.” Maylabot sa iyang tambag nga mabasa sa Roma kapitulo 12, wala ipasabot ni Pablo nga ang mahulagwayong mga baga magsilot o magpakaulaw sa maglulutos. Hinunoa, ang maong panultihon—maingon man ang susamang mga pulong nga gigamit ni Pablo sa mga taga-Roma—morag nagtumong sa karaang paagi sa paglunsay ug metal. Ang Ingles nga eskolar sa ika-19ng siglo nga si Charles Bridges miingon nga aron  matunaw ang usa ka gahi nga metal, dili lamang kini isugba sa kalayo, kondili butangan usab ug baga ang ibabaw ug ilalom sa metal. Miingon usab siya nga bisan ang mga tawo nga tig-ag kasingkasing sagad malukmay kon pakitaag pailob, pagsakripisyo, ug mainit nga gugma.

⁶ Sama sa “mga baga,” ang malulotong mga buhat makalukmay sa kasingkasing sa mga maglulutos ug lagmit makapahunong sa ilang paglutos. Ang malulotong mga buhat mahimong makapausab sa tinamdan sa mga tawo ngadto sa katawhan ni Jehova ug sa mensahe sa Bibliya nga ilang ginasangyaw. Si apostol Pedro misulat: “Hupti ninyo ang maayong panggawi taliwala sa mga nasod, aron nga, sa butang nga ilang gisulti batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita maghimaya sa Diyos sa adlaw sa iyang pagsusi.”—1 Ped. 2:12.

“Makigdinaitay sa Tanang Tawo”

7. Unsa ang kalinaw nga gibilin ni Kristo sa iyang mga tinun-an, ug angay kining magtukmod kanato sa pagbuhat sa unsa?

⁷ Basaha ang Roma 12:18. Sa kataposang gabii nga kauban ni Jesus ang iyang mga apostoles, siya miingon kanila: “Ibilin ko kaninyo ang kalinaw, ihatag ko kaninyo ang akong kalinaw.” (Juan 14:27) Ang kalinaw nga gibilin ni Kristo sa iyang mga tinun-an mao ang kalinaw sa hunahuna nga masinati nila sa dihang ilang bation nga sila gihigugma ug giuyonan ni Jehova nga Diyos ug sa iyang pinalanggang Anak. Kini nga kalinaw sa hunahuna angayng magtukmod kanato nga magmakigdaiton sa uban. Ang matuod nga mga Kristohanon mahigugmaon sa kalinaw ug makigdaiton.—Mat. 5:9.

8. Sa unsang paagi kita mahimong makigdaiton diha sa panimalay ug sa atong kongregasyon?

⁸ Ang usa ka paagi nga ikapakita sa usa nga siya makigdaiton sulod sa pamilya mao ang paghusay dayon sa dili-pagsinabtanay inay pasagdan lamang kana. (Prov. 15:18; Efe. 4:26) Mapadapat usab kini sa Kristohanong kongregasyon. Gilangkit ni apostol Pedro ang pagkamakigdaiton sa pagpugong sa dila. (1 Ped. 3:10, 11) Human maghatag ug bug-at nga tambag bahin sa hustong paggamit sa dila ug sa panginahanglan nga likayan ang pangabugho ug pagkamatigion, si Santiago misulat: “Ang kaalam nga gikan sa itaas maoy una sa tanan putli, unya makigdaiton, makataronganon, andam mosunod, tugob sa kaluoy ug maayong mga bunga, dili mapihigpihigon, dili salingkapaw. Dugang pa, ang bunga sa pagkamatarong may binhi nga gipugas ubos sa malinawong mga kahimtang alang niadtong nagapakigdait.”—Sant. 3:17, 18.

9. Bisan tuod maningkamot kita nga ‘magmakigdaiton sa tanang tawo,’ unsay angay natong hinumdoman?

⁹ Sa Roma 12:18, gipakita ni Pablo nga dili lamang sulod sa pamilya ug sa kongregasyon nga kita angayng magmakigdaiton. Siya miingon nga kita kinahanglang “makigdinaitay sa tanang tawo.” Naglakip kana sa mga silingan, kauban sa trabaho, eskolmet, ug mga tawo nga atong mahimamat diha sa kanataran. Apan, naghatag ang  apostol ug limitasyon sa iyang tambag pinaagi sa pag-ingon: “Kon mahimo, kutob sa inyong maarangan.” Nagpasabot kana nga atong buhaton ang tanan kutob sa atong mahimo nga ‘magmakigdaiton sa tanang tawo’ apan dili ikompromiso ang matarong nga mga prinsipyo sa Diyos.

Si Jehova ang Manimalos

10, 11. Sa unsang diwa nga atong ‘hatagag dapit ang kapungot,’ ug nganong haom kini?

¹⁰ Basaha ang Roma 12:19. Bisan “niadtong nagasupak” sa atong buluhaton ug mensahe, kita kinahanglang ‘magpugong sa kaugalingon bisan ilalom sa daotan’ ug magpakitag ‘kalumo.’ (2 Tim. 2:23-25) Si Pablo nagtambag sa mga Kristohanon nga dili manimalos kondili ‘hatagag dapit ang kapungot.’ Kang kinsang kapungot ang gipasabot ni Pablo? Siya wala gayod magtumong sa atong kapungot. Tataw nga ang atong hatagag dapit mao ang kapungot sa Diyos. Ingong mga Kristohanon, kita nahibalo nga dili atoa ang panimalos. Ang salmista misulat: “Likayi ang kasuko ug biyai ang kaaligutgot; ayaw pagpanginit nga mosangko lamang sa pagbuhat ug daotan.” (Sal. 37:8) Ug si Solomon nagtambag: “Ayaw pag-ingon: ‘Mobalos ako sa daotan!’ Paglaom kang Jehova, ug siya magaluwas kanimo.”—Prov. 20:22.

¹¹ Kon ang mga maglulutos mohimog kadaot kanato, ang maalamong buhaton mao nga isalig nato kang Jehova ang pagsilot kanila, kana kon angay silang silotan. Sa pagpakita nga ang kapungot ni Jehova ang iyang gipasabot, si Pablo midugang: “Nahisulat: ‘Akoa ang panimalos; ako magabalos, nag-ingon si Jehova.’” (Itandi ang Deuteronomio 32:35.) Kon kita manimalos, kita mahimong mapangahason, nga nagbuhat sa usa ka butang nga si Jehova lang ang may katungod. Dugang pa, magpakita kana nga kulang kitag pagtuo sa saad ni Jehova: “Ako magabalos.”

12. Kanus-a ipadayag ang kapungot ni Jehova, ug sa unsang paagi?

¹² Sa unang bahin sa iyang sulat sa mga taga-Roma, si Pablo miingon: “Ang kapungot sa Diyos gipadayag gikan sa langit batok sa tanang pagkadili-diyosnon ug pagkadili-matarong sa mga tawo nga nagsugpo sa kamatuoran sa dili-matarong nga paagi.” (Roma 1:18) Ang kapungot ni Jehova ipadayag gikan sa langit pinaagi sa iyang Anak sa panahon sa “dakong kasakitan.” (Pin. 7:14) Kana maoy “pamatuod sa matarong nga paghukom sa Diyos,” ingon sa gipatin-aw ni Pablo sa lain niyang sulat: “Ginatagad dinhi nga matarong sa bahin sa Diyos nga mobalos ug kasakitan niadtong nagsakit kaninyo, apan, kaninyo nga nag-antos ug kasakitan, kahupayan uban kanamo inigpadayag na sa Ginoong Jesus gikan sa langit uban sa iyang gamhanang mga manulonda sa nagdilaab nga kalayo, sa dihang siya manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.”—2 Tes. 1:5-8.

Daoga ang Daotan Pinaagi sa Maayo

13, 14. (a) Nganong dili kita matingala sa dihang kita lutoson? (b) Sa unsang paagi kita magpanalangin niadtong naglutos kanato?

¹³ Basaha ang Roma 12:14, 21. Kay bug-os makasalig nga tumanon ni Jehova ang iyang mga saad, mahimo natong isentro ang tanan natong paningkamot diha sa buluhaton nga iyang gipabuhat kanato—ang pagsangyaw sa “maayong balita sa gingharian” sa “tibuok gipuy-ang yuta.” (Mat. 24:14) Kita nahibalo nga ang atong buluhaton makapasuko sa atong mga kaaway, kay si Jesus nagpasidaan kanato: “Kamo pagadumtan sa tanang kanasoran tungod sa akong ngalan.” (Mat. 24:9) Busa, dili kita matingala o maluya sa dihang kita pagalutoson. Si apostol Pedro misulat: “Mga hinigugma, ayaw kamo kahibulong sa pagdilaab taliwala kaninyo, nga nagakahitabo kaninyo ingon nga pagsulay, nga daw usa ka katingad-ang butang ang midangat kaninyo. Sa kasukwahi, magpadayon sa pagmaya sanglit kamo mga mag-aambit sa mga pag-antos ni Kristo.”—1 Ped. 4:12, 13.

¹⁴ Imbes mayugot kita sa mga maglulutos, maningkamot kita sa paglamdag sa ilang hunahuna, kay nahibalo kita nga ang pipila kanila wala masayod sa ilang gibuhat. (2 Cor. 4:4) Magpatalinghog gayod kita sa tambag ni Pablo: “Magpadayon sa pagpanalangin kanila nga nagalutos; himoa ang pagpanalangin ug ayaw pagpanunglo.” (Roma 12:14) Ang pag-ampo maoy usa ka paagi  sa pagpanalangin kanila. Si Jesus miingon diha sa iyang Wali sa Bukid: “Magpadayon sa paghigugma sa inyong mga kaaway, sa pagbuhat ug maayo niadtong nagadumot kaninyo, sa pagpanalangin niadtong nagatunglo kaninyo, sa pag-ampo alang sa mga nagainsulto kaninyo.” (Luc. 6:27, 28) Nasinati mismo ni apostol Pablo nga ang usa ka maglulutos posible nga mahimong matinumanong tinun-an ni Kristo ug masibotong alagad ni Jehova. (Gal. 1:13-16, 23) Sa laing sulat, si Pablo miingon: “Sa dihang gisultihag pasipala, kami nanalangin; sa dihang gilutos, kami nag-antos; sa dihang gidaot ang dungog, kami nangaliyupo.”—1 Cor. 4:12, 13.

15. Unsa ang labing maayong paagi nga madaog ang daotan pinaagi sa maayo?

¹⁵ Busa, ang matuod nga Kristohanon magpatalinghog sa paniklop nga bersikulo sa Roma kapitulo 12: “Ayaw pagpadaog sa daotan, kondili padayong daoga ang daotan pinaagi sa maayo.” Ang tuboran sa tanang pagkadaotan mao si Satanas nga Yawa. (Juan 8:44; 1 Juan 5:19) Sa pinadayag nga gihatag ngadto kang apostol Juan, miingon si Jesus nga ang iyang dinihogang mga igsoon “nakadaog batok [kang Satanas] tungod sa dugo sa Kordero ug tungod sa pulong sa ilang pagpanghimatuod.” (Pin. 12:11) Nagpakita kini nga ang labing maayong paagi nga madaog si Satanas ug ang iyang daotang impluwensiya ibabaw niining sistema sa mga butang mao ang pagbuhat ug maayo pinaagi sa atong pagsangyaw sa maayong balita sa Gingharian.

Magmaya Diha sa Paglaom

16, 17. Unsay gitudlo kanato sa Roma kapitulo 12 bahin sa (a) kon sa unsang paagi angay natong gamiton ang atong kinabuhi? (b) kon sa unsang paagi kita magagawi sulod sa kongregasyon? (c) kon sa unsang paagi kita makiglabot niadtong nagsupak sa atong pagtuo?

¹⁶ Ang atong mubong panaghisgot sa kapitulo 12 sa sulat ni Pablo ngadto sa mga Kristohanon sa Roma nagpahinumdom kanato ug daghang butang. Atong nakat-onan nga ingong dedikadong mga alagad ni Jehova, kinahanglan nga andam kitang mohimog mga sakripisyo. Kay natukmod sa espiritu sa Diyos, kinasingkasing kitang naghimog mga sakripisyo tungod kay ang atong gahom sa pagpangatarongan nagkombinsir kanato nga mao kana ang kabubut-on sa Diyos. Kita mainiton sa espiritu ug masibotong naggamit sa lainlain natong gasa. Kita nag-alagad nga mapainubsanon ug makasaranganon, nga naghimo sa atong maarangan sa pagpatunhay sa Kristohanong panaghiusa. Kita nagpakitag pagkamaabiabihon ug tiunay nga pagbati alang sa atong isigkaingon.

¹⁷ Ang Roma kapitulo 12 naghatag usab kanato ug daghang tambag kon unsay atong buhaton sa dihang kita pagalutoson. Kita dili mobalos. Maningkamot kita sa pagbuntog sa pagsupak pinaagig malulotong mga buhat. Kutob sa maarangan, kita kinahanglang magmakigdaiton sa tanang tawo, basta wala kitay malapas nga prinsipyo sa Bibliya. Mapadapat kini diha sa pamilya, kongregasyon, mga silingan, trabahoan, eskuylahan, ug sa atong pag-alagad sa kanataran. Bisan sa dihang nag-atubang ug paglutos, buhaton nato ang atong maarangan nga madaog ang daotan pinaagi sa maayo, nga maghinumdom nga iya ni Jehova ang panimalos.

18. Unsa ang tulo ka tambag nga gihatag sa Roma 12:12?

¹⁸ Basaha ang Roma 12:12. Gawas pa niining tanang maalamon ug praktikal nga tambag, may tulo pa nga gihatag si Pablo. Sanglit dili gayod nato mahimo kining tanan kon wala ang tabang ni Jehova, ang apostol nagtambag kanato sa ‘paglahutay diha sa pag-ampo.’ Makatabang kini kanato sa pagsunod sa iyang laing tambag nga “mag-antos ilalom sa kasakitan.” Sa kataposan, kinahanglang isentro nato ang atong hunahuna sa kaugmaon nga gisaad ni Jehova ug “magmaya diha sa paglaom” nga walay kataposang kinabuhi, sa langit man o sa yuta.

Agig Pagsubli

• Unsay angay natong buhaton kon kita lutoson?

• Sa unsang mga natad nga kita angayng magmakigdaiton, ug sa unsang paagi?

• Nganong dili kita angayng manimalos?

[Mga Pangutana sa Pagtuon]

[Hulagway sa panid 8]

Ang paghatag ug praktikal nga tabang sa atong mga silingan mahimong makabuntog sa pagpihigpihig

[Hulagway sa panid 9]

Naningkamot ka ba nga mahimong makigdaiton sulod sa kongregasyon?