Mga Pangutana Gikan sa mga Magbabasa

Unsang leksiyon ang gitudlo kanato sa Proverbio 24:27?

Sa paghatag ug tambag ngadto sa usa ka batan-ong lalaki, ang magsusulat sa Proverbio miingon: “Hikaya ang imong buhat sa gawas, ug andama kini alang kanimo diha sa uma. Human niana lig-onon mo usab ang imong panimalay.” Unsang punto ang gipasiugda niining inspiradong panultihon? Gipasiugda niini nga ang usa ka lalaki kinahanglang mangandam pag-ayo sa dili pa siya magminyo ug magsugod ug pamilya, nga nahibalo sa mga responsibilidad nga angay niyang abagahon.

Kaniadto, kining bersikuloha gipatin-aw usahay nga ang bana ug amahan dili lamang mag-atiman sa iyang sekular nga trabaho kondili maglig-on usab, o magdasig, sa iyang pamilya, pananglitan pinaagi sa pagtudlo kanila bahin sa Diyos ug sa Bibliya. Bisan tuod kana tinuod ug Kasulatanhon, morag dili na maoy gipasiugda niining bersikuloha. Nganong dili man? Tagda ang duha ka rason.

Una, ang bersikulo wala maghisgot bahin sa pagpalig-on sa diwa nga dasigon ang naglungtad na nga pamilya. Hinunoa, ang gipasabot niana mao ang literal nga pagtukod ug balay. Ang pulong nga gihubad ug “lig-onon” mahimong mahulagwayon usab, nga nagpasabot ug pagtukod, o pagsugod, ug usa ka pamilya—sa ato pa, pagminyo ug pagbatog mga anak.

Ikaduha, ang bersikulo nagpasiugda sa pagbuhat ug mga butang sa hustong han-ay, nga samag miingon, “Una buhata kini; dayon buhata kana.” Nan, buot bang ipasabot nga unahon ang sekular imbes ang espirituwal nga responsibilidad? Dili gayod!

Sa panahon sa Bibliya, kon ang usa ka lalaki gustong magsugod ug pamilya pinaagi sa pagminyo, kinahanglang pangutan-on niya ang iyang kaugalingon, ‘Makahimo na ba ako sa pag-atiman ug pagbuhig asawa ug mga anak nga mahimong mabatonan namo sa ulahi?’ Sa dili pa magsugod ug pamilya, duna siyay angayng buhaton, atimanon niya ang iyang uma. Busa, ang Today’s English Version tatawng naghubad niining bersikuloha: “Ayaw pagtukod ug balay ni magsugod ug pamilya kon wala pa maandam ang imong uma, ug wala ka pay klarong trabaho.” Mapadapat ba usab kanang prinsipyoha karon?

Oo. Ang usa ka lalaki nga gustong magminyo kinahanglang mangandam pag-ayo alang sa maong responsibilidad. Kon maayo ang iyang lawas, kinahanglang manarbaho siya. Siyempre, dili lang materyal nga mga butang ang itagana sa lalaki sa iyang pamilya. Gipakita sa Pulong sa Diyos nga ang usa ka lalaki nga wala magtagana sa pisikal, emosyonal, ug espirituwal nga panginahanglan sa iyang pamilya mas daotan pa kay sa tawong walay pagtuo! (1 Tim. 5:8) Busa, sa pagpangandam alang sa kaminyoon ug sa pamilyahanong kinabuhi, angayng suknaon sa usa ka batan-ong lalaki ang iyang kaugalingon: ‘Makahimo na ba ako sa pagtagana sa materyal nga panginahanglan sa usa ka pamilya? Andam na ba akong manguna sa pamilya maylabot sa espirituwal nga mga butang? Ako bang tumanon ang akong responsibilidad sa pagdumala ug regular nga pagtuon sa Bibliya uban sa akong asawa ug mga anak?’ Ang Pulong sa Diyos nagpasiugda nianang hinungdanong mga responsibilidad.—Deut. 6:6-8; Efe. 6:4.

Busa ang usa ka lalaki nga mangitag pangasaw-onon angayng mamalandong sa prinsipyo nga makita sa Proverbio 24:27. Sa susama, maayong suknaon usab sa usa ka batan-ong babaye ang iyang kaugalingon kon andam na ba siyang moabaga sa mga responsibilidad sa usa ka asawa ug inahan. Ang mga managtrato nga nagplanong magminyo ug ang mga bag-ong minyo mahimong makasukna sa susamang mga pangutana sa dihang maghisgot sila bahin sa pagbatog mga anak. (Luc. 14:28) Ang pagsunod sa maong inspiradong giya makatabang sa katawhan sa Diyos sa paglikay sa kagul-anan ug sa pagtagamtam ug malipayon nga pamilyahanong kinabuhi.

[Blurb sa panid 12]

Unsang mga pangutana bahin sa kaminyoon ang angayng isukna sa usa ka batan-ong lalaki sa iyang kaugalingon?