Naggahin Ka bag Panahon Alang sa Pagtuon sa Bibliya?
Naggahin Ka bag Panahon Alang sa Pagtuon sa Bibliya?
SA MIAGING tuig, gipahibalo sa Nagamandong Lawas ang kausaban sa eskedyul sa tigom sa kongregasyon nga naghatag ug dugang panahon alang sa pagtuon sa Bibliya ug panaghisgot ingong pamilya. Kon ikaw ulo sa pamilya, seguroa nga madumalahan ang imong pamilya ug makahuloganon, regular nga pamilyahanong pagtuon sa Bibliya. Ang mga magtiayon nga walay anak makagamit niining panahona sa pagtuon sa Bibliya. Ang mga ulitawo ug dalaga nga walay responsibilidad sa pamilya makagamit niini alang sa personal nga pagtuon sa Bibliya.
Daghan ang nagpahayag ug apresasyon alang sa kahikayan sa paggahin ug gabii alang sa Pamilyahanong Pagsimba. Pananglitan, si Kevin, nga usa ka ansiyano, misulat: “Ang pulong ‘salamat’ dili pa igo sa pagpahayag kon unsay gibati sa among kongregasyon. Ingong mga ansiyano, among gihisgotan kon sa unsang paagi among magamit ang gabii nga walay tigom sa pagsunod sa kahikayan sa Nagamandong Lawas—ang pagtuon uban sa among mga pamilya.”
Si Jodi, kansang bana usa ka ansiyano, misulat: “Duna mi tulo ka anak nga babaye, nga nag-edad ug 15, 11, ug 2. Ning bag-o pa, namalhin mi sa kongregasyon nga naggamit ug senyas nga pinulongan. Nagkinahanglag dakong panahon ug paningkamot ang pagpangandam alang sa tanang tigom. Karon, tungod niini nga kausaban, duna na mi laing gabii nga magamit alang sa pamilyahanong pagsimba!”
Si John ug JoAnn, usa ka magtiayon nga regular payunir, misulat: “Dili regular ang among pamilyahanong pagtuon sa Bibliya kay amo man lang kining isal-ot sa lainlaing kalihokan sa kongregasyon. Kining bag-ong kahikayan maoy gasa gikan kang Jehova nga nagpalagsik kanamo sa espirituwal—kon gamiton namo ang maong panahon sa nahiangayng paagi.”
Si Tony, usa ka ulitawo nga nag-edad ug 25 anyos, naggahin sa Martes sa gabii alang sa personal nga pagtuon. Iyang gamiton ang ubang panahon sa semana sa pagpangandam alang sa mga tigom sa kongregasyon. Apan, si Tony miingon, “mahinamon kong magpaabot sa Martes.” Ngano? “Ang maong gabii maoy akong espesyal nga panahon uban kang Jehova.” Siya misaysay: “Sulod sa duha ka oras, akong tun-an ang mga ulohan nga magpalig-on sa akong relasyon kang Jehova. Kay taastaas man ang akong panahon sa pagtuon, makapamalandong na ko sa mga teksto nga akong gibasa.” Unsay resulta niana? “Ang tambag ni Jehova natisok pag-ayo sa akong kasingkasing.” Makahatag ba siyag pananglitan? “Sa librong Insight, akong nabasa ang bahin sa panaghigalaay ni David ug Jonatan. Daghan kog nakat-onan bahin sa pagkadili-mahakogon ni Jonatan. Ang iyang panig-ingnan nakatabang kanako sa pagsabot kon unsay kahulogan sa pagkahimong tinuod nga higala. Naghinamhinam kong makakat-on pa ug bag-ong mga butang kada Martes sa gabii!”
Sa walay duhaduha, ang tanang alagad ni Jehova makabenepisyog dako kon gamiton gayod ang dugang panahon alang sa makahuloganong pagtuon sa Bibliya ug pamilyahanong pagsimba.