Batang Babaye nga Manggihatagon

NING bag-o pa, bisag walay nagsugo, gibahin sa usa ka nuybe-anyos nga batang babaye sa Brazil ang iyang natigom nga kuwarta—ang usa ka bahin 18 dolyares ug ang lain 25 dolyares. Gihulog niya ang mas gamay nga kantidad sa donation box sa ilang Kingdom Hall alang sa mga galastohan sa kongregasyon. Dayon iyang gipadala ang mas dakong kantidad ngadto sa sangang buhatan sa mga Saksi ni Jehova, uban ang mubong sulat. Ang iyang sulat nag-ingon: “Ako ning iamot sa tibuok-kalibotang buluhaton. Gusto nakong makatabang sa daghang igsoon sa tibuok kalibotan sa pagsangyaw sa maayong balita. Ako ning gihatag tungod sa akong dakong gugma kang Jehova.”

Ang ginikanan sa maong bata nagtudlo kaniya sa kahinungdanon sa pagpakigbahin sa buluhatong pagsangyaw sa Gingharian. Sila usab nagsilsil kaniya nga kinahanglang ‘pasidunggan si Jehova pinaagi sa iyang bililhong mga butang.’ (Prov. 3:9) Sama nianang batang babaye, hinaot nga kita magmasiboton sa pagpalambo sa intereses sa Gingharian, sa atong lugar ug sa tibuok kalibotan!