Mahala ang Imong Dapit Diha sa Kongregasyon
Mahala ang Imong Dapit Diha sa Kongregasyon
“Ang Diyos nagpahiluna sa mga sangkap sa lawas, ang matag usa niini, sumala sa iyang gikahimut-an.”—1 COR. 12:18.
1, 2. (a) Unsay nagpakita nga ang matag usa diha sa kongregasyon mahimong makabaton ug dapit nga iyang mahalon? (b) Unsang mga pangutana ang hisgotan niining artikuloha?
SUKAD sa mga adlaw sa karaang Israel, ang kongregasyon mao na ang kahikayan nga gigamit ni Jehova sa pag-atiman sa iyang katawhan ug paghatag kanilag pagtultol. Pananglitan, human mapukan sa mga Israelinhon ang siyudad sa Ai, “gibasa [ni Josue] sa makusog ang tanang pulong sa balaod, ang panalangin ug ang maldisyon, sumala sa tanang nahisulat sa basahon sa balaod . . . atubangan sa tibuok kongregasyon sa Israel.”—Jos. 8:34, 35.
2 Sa unang siglo K.P., giingnan ni apostol Pablo ang ansiyano nga si Timoteo nga ang Kristohanong kongregasyon mao ang “panimalay sa Diyos” ug “haligi ug tukod sa kamatuoran.” (1 Tim. 3:15) Ang “panimalay” sa Diyos karon mao ang tibuok-kalibotang kapunongan sa matuod nga mga Kristohanon. Sa kapitulo 12 sa iyang unang inspiradong sulat sa mga taga-Corinto, gipakasama ni Pablo ang kongregasyon sa lawas sa tawo. Siya miingon nga bisan tuod ang matag sangkap adunay lainlaing obra, ang tanan hinungdanon. “Ang Diyos nagpahiluna sa mga sangkap sa lawas,” misulat si Pablo, “ang matag usa niini, sumala sa iyang gikahimut-an.” Miingon pa gani siya nga “ang mga bahin sa lawas nga atong gihunahuna nga dili kaayo dungganon, kini sila atong gihatagan ug mas dakong pasidungog.” (1 Cor. 12:18, 23) Busa, ang papel sa usa ka matarong nga tawo diha sa panimalay sa Diyos dili labaw ni ubos nianang sa laing matinumanong Kristohanon. Managlahi lamang kana. Nan, sa unsang paagi atong makita ang atong dapit diha sa kahikayan sa Diyos ug mahalon kana? Unsay mahimong makaapektar sa atong dapit diha sa kongregasyon? Ug sa unsang paagi ‘madayag sa tanang tawo ang atong pag-uswag’?—1 Tim. 4:15.
Mahalon ang Atong Dapit—Sa Unsang Paagi?
3. Unsa ang usa ka paagi nga atong makita ang atong dapit diha sa kongregasyon ug mapasundayag nga gimahal nato kana?
3 Ang usa ka paagi nga atong makita ang atong dapit diha sa kongregasyon ug mapasundayag nga ato kanang gimahal mao ang bug-os nga pagpakigtambayayong sa “matinumanon ug maalamong ulipon” ug sa hawas niini, ang Nagamandong Lawas. (Basaha ang Mateo 24:45-47.) Kinahanglang susihon nato kon unsay atong pagsanong sa pagtultol nga atong madawat gikan sa ulipon nga matang. Pananglitan, latas sa katuigan, kita nakadawat ug klarong mga instruksiyon bahin sa pamesti ug panghindik, kalingawan, ug sayop nga paggamit sa Internet. Ato ba gayong gipatalinghogan ang maong mga tambag aron kita mapanalipdan sa espirituwal? Komosta ang pahimangno sa pagbaton ug regular nga rutina sa pamilyahanong pagsimba? Ato bang gisunod ang maong tambag ug naggahin ug usa ka gabii alang niana? Kon kita ulitawo o dalaga, naggahin ba kitag panahon alang sa personal nga pagtuon sa Kasulatan? Si Jehova magapanalangin kanato ingong indibiduwal ug ingong pamilya kon atong sundon ang paggiya sa ulipon nga matang.
4. Unsay angay natong tagdon sa dihang mohimog mga desisyon?
4 Ang pipila lagmit mangatarongan nga ang matag usa ang angayng modesisyon maylabot sa kalingawan ug sa pamesti ug panghindik. Apan, alang sa usa ka dedikadong Kristohanon nga nagmahal sa iyang dapit diha sa kongregasyon, dili lang ang kaugalingong gusto ang basehanan sa paghimog mga desisyon. Gikinahanglan gayong tagdon ang panglantaw ni Jehova nga makita diha sa iyang Pulong, ang Bibliya. Ang mensahe niini angay nga mahimong ‘lampara sa atong tiil, ug kahayag sa atong alagianan.’ (Sal. 119:105) Maalamon usab nga atong tagdon kon unsay epekto sa atong desisyon diha sa atong ministeryo ug sa ubang mga tawo, sa sulod ug gawas sa kongregasyon.—Basaha ang 2 Corinto 6:3, 4.
5. Nganong angay kitang magbantay batok sa espiritu sa pagkaindependente?
5 “Ang espiritu nga nagalihok karon diha sa mga anak sa pagkadili-masinugtanon” kaylap kaayo nga sama kini sa hangin nga atong gihanggab. (Efe. 2:2) Ang maong espiritu magpahunahuna kanato nga wala kita magkinahanglan sa giya gikan sa organisasyon ni Jehova. Siyempre dili nato gustong mahisama kang Diotrefes, kinsa ‘wala modawat sa bisan unsa gikan kang apostol Juan nga may pagtahod.’ (3 Juan 9, 10) Kinahanglang magbantay kita nga dili maugmad ang espiritu sa pagkaindependente. Pinaagi sa pulong ug buhat, hinaot nga dili nato supakon ang gigamit ni Jehova karon sa pagpakigkomunikar kanato. (Num. 16:1-3) Sa kasukwahi, angay natong mahalon ang atong pribilehiyo nga makigtambayayong sa ulipon nga matang. Dili ba angay kitang maningkamot nga magmasinugtanon ug magmapinasakopon niadtong nanguna sa atong kongregasyon?—Basaha ang Hebreohanon 13:7, 17.
6. Nganong angay natong susihon ang atong personal nga mga sirkumstansiya?
6 Ang pagsusi pag-ayo sa atong personal nga mga sirkumstansiya ug ang pagbuhat sa atong maarangan sa ‘paghimaya sa atong ministeryo’ ug sa pagpasidungog kang Jehova maoy laing paagi sa pagpakita nga atong gimahal ang atong dapit diha sa kongregasyon. (Roma 11:13) Ang pipila makahimo sa pagregular payunir. Ang uban nag-alagad diha sa linaing matang sa bug-os panahong pag-alagad ingong mga misyonaryo, nagapanawng mga magtatan-aw, ug mga membro sa pamilyang Bethel sa tibuok kalibotan. Daghang mga igsoon ang nagtabang sa pagpanukod ug Kingdom Hall. Ang kinabag-an sa katawhan ni Jehova naningkamot pag-ayo sa pagtagana sa espirituwal nga panginahanglan sa ilang pamilya ug bug-os nga nakigbahin sa ministeryo matag semana. (Basaha ang Colosas 3:23, 24.) Makasalig kita nga kon kinabubut-on natong itanyag ang atong kaugalingon sa Diyos ug buhaton ang atong maarangan sa pag-alagad kaniya nga bug-os kalag, aduna gayod kitay dapit diha sa iyang kahikayan.
Mga Butang nga Makaapektar sa Atong Dapit Diha sa Kongregasyon
7. Isaysay kon sa unsang paagi ang atong mga sirkumstansiya makaapektar sa atong dapit diha sa kongregasyon.
7 Hinungdanon nga atong susihon ang atong mga sirkumstansiya tungod kay, sa usa ka sukod, makaapektar kana sa atong mahimo diha sa kongregasyon. Pananglitan, ang dapit sa usa ka brader diha sa kongregasyon, sa pipila ka bahin, lahi nianang sa usa ka sister. Ang edad, kahimtang sa panglawas, ug uban pang butang makaimpluwensiya usab sa atong mahimo diha sa pag-alagad kang Jehova. “Ang katahom sa batan-ong mga lalaki mao ang ilang kusog,” nag-ingon ang Proverbio 20:29, “ug ang kahalangdon sa mga tigulang mao ang ilang pagkaubanon.” Ang batabata pa nga mga membro sa kongregasyon mas labaw tingalig mahimo sa pisikal nga paagi, samtang ang mga tigulang makahatag ug dakong kaayohan sa kongregasyon tungod sa ilang kaalam ug kasinatian. Angay usab natong hinumdoman nga ang bisan unsa nga mahimo nato diha sa organisasyon ni Jehova nagdepende sa iyang dili-takos nga kalulot.—Buh. 14:26; Roma 12:6-8.
8. Sa unsang paagi ang tinguha makaapektar sa atong mahimo diha sa kongregasyon?
8 Ang ilustrasyon bahin sa duha ka batan-ong managsoon nga babaye nagpasiugda sa laing butang nga makaapektar sa atong dapit diha sa kongregasyon. Parehas silang nakahuman sa hayskul. Managsama ang ilang mga sirkumstansiya. Ang ilang ginikanan naningkamot pag-ayo sa pagdasig kanila nga magregular payunir inigkahuman nila sa hayskul. Human sa ilang graduwasyon, ang usa nagpayunir, samtang ang usa full-time nga nagtrabaho. Nganong managlahi man ang ilang gipili? Tungod kana sa ilang tinguha. Ang matag usa mipili sa iyang gustong buhaton. Dili ba ingon usab niana ang kadaghanan kanato? Angay natong palandongon pag-ayo kon unsay gusto natong buhaton diha sa pag-alagad sa Diyos. Makagahin ba kitag dugang panahon sa pag-alagad kang Jehova, bisan pag nagkahulogan kanag pagpasibo sa atong mga sirkumstansiya?—2 Cor. 9:7.
9, 10. Unsay atong himoon kon kulang kitag kadasig sa pagpauswag sa atong pag-alagad kang Jehova?
9 Komosta kon kulang kitag kadasig sa pagpauswag sa atong pag-alagad kang Jehova ug kontento na lang nga basta makatambong ug makasangyaw? Sa iyang sulat sa mga taga-Filipos, si Pablo miingon: “Ang Diyos mao ang usa nga, alang sa iyang ikahimuot, nagalihok sa sulod ninyo aron kamo magtinguha ug ingon man mobuhat.” Oo, si Jehova mahimong molihok sulod nato ug mag-impluwensiya sa atong tinguha.—Filip. 2:13; 4:13.
10 Nan, dili ba angay kitang mohangyo kang Jehova nga aghaton kita sa pagbuhat sa iyang kabubut-on? Mao kanay gihimo ni Haring David sa karaang Israel. Siya miampo: “Ipaila kanako ang imong mga dalan, Oh Jehova; tudloi ako sa imong mga alagianan. Palakta ako diha sa imong kamatuoran ug tudloi ako, kay ikaw mao ang akong Diyos sa kaluwasan. Kanimo ako naglaom sa tibuok nga adlaw.” (Sal. 25:4, 5) Mahimo nato ang susama niana pinaagi sa pag-ampo nga aghaton kita ni Jehova sa pagbuhat kon unsay makapahimuot kaniya. Sa dihang kita mamalandong kon unsay pagbati ni Jehova nga Diyos ug sa iyang Anak sa atong pagsuportar sa ilang intereses, ang atong kasingkasing matugob sa pagpasalamat kanila. (Mat. 26:6-10; Luc. 21:1-4) Ang atong pagkamapasalamaton magtukmod kanato sa pagpangaliyupo kang Jehova nga aghaton kita nga mouswag sa espirituwal. Si manalagnang Isaias naghatag ug panig-ingnan sa tinamdan nga angay natong ugmaron. Sa dihang iyang nadungog ang tingog ni Jehova nga nangutana: “Kinsa ang akong ipadala, ug kinsa ang moadto alang kanamo?” ang manalagna mitubag: “Ania ako! Ipadala ako.”—Isa. 6:8.
Paghimog Pag-uswag—Sa Unsang Paagi?
11. (a) Nganong adunay panginahanglan alang sa mga brader nga mokab-ot ug mga responsibilidad sa organisasyon? (b) Sa unsang paagi ang usa ka brader mahimong kuwalipikado alang sa mga pribilehiyo sa kongregasyon?
11 Sa 2008 nga tuig sa pag-alagad, 289,678 ang nabawtismohan sa tibuok kalibotan. Kini nagpakita nga adunay dakong panginahanglan alang sa mga brader nga manguna. Sa unsang paagi angayng mosanong ang usa ka brader sa maong panginahanglan? Sa yanong pagkasulti, pinaagi sa pagkab-ot sa mga kuwalipikasyon alang sa mga ministeryal nga alagad ug ansiyano nga gilatid diha sa Kasulatan. (1 Tim. 3:1-10, 12, 13; Tito 1:5-9) Sa unsang paagi makab-ot sa usa ka brader ang maong mga kuwalipikasyon? Pinaagi sa regular nga pagpakigbahin sa ministeryo, makugihong pagtuman sa iyang mga asaynment diha sa kongregasyon, pagpaningkamot nga mouswag ang kalidad sa iyang mga komento panahon sa mga tigom, ug pinaagi sa pagpakitag personal nga interes sa mga isigkamagtutuo. Sa ingon iyang gipakita nga gimahal niya ang iyang dapit diha sa kongregasyon.
12. Sa unsang paagi ikapasundayag sa mga batan-on ang ilang kasibot sa kamatuoran?
12 Unsay mahimo sa batan-ong mga brader aron mouswag diha sa kongregasyon? Sila mahimong maningkamot nga mouswag sa “kaalam ug espirituwal nga pagsabot” pinaagi sa pagkuhag kahibalo bahin sa Kasulatan. (Col. 1:9) Ang makugihong pagtuon sa Pulong sa Diyos ug aktibong pagpakigbahin sa mga tigom sa kongregasyon makatabang gayod kanila nga mouswag. Ang batan-ong mga lalaki makapaningkamot usab nga mahimong kuwalipikado nga mosulod sa “usa ka dakong pultahan nga nagatultol ngadto sa kalihokan” diha sa lainlaing natad sa bug-os-panahong pag-alagad. (1 Cor. 16:9) Ang pagkab-ot ug karera diha sa pag-alagad kang Jehova maoy makapatagbaw gayod nga paagi sa pagkinabuhi nga moresulta sa dagayang mga panalangin.—Basaha ang Ecclesiastes 12:1.
13, 14. Sa unsang mga paagi ang mga sister makapasundayag nga ilang gimahal ang ilang papel diha sa kongregasyon?
13 Ang mga sister makapasundayag usab nga ilang gimahal ang ilang pribilehiyo nga makigbahin sa katumanan sa Salmo 68:11. Didto atong mabasa: “Si Jehova nag-ingon; ang kababayen-an nga nagapahayag sa maayong balita maoy usa ka dakong panon.” Ang usa sa hinungdanong mga paagi diin ang mga sister makapasundayag sa ilang pagkamapasalamaton sa ilang dapit diha sa kongregasyon mao ang pagpakigbahin sa paghimog mga tinun-an. (Mat. 28:19, 20) Busa, pinaagi sa bug-os nga pagpakig-ambit sa maong buluhaton ug sa kinabubut-ong paghimog mga sakripisyo alang niana, ang mga sister makapamatuod nga ilang gimahal ang ilang papel diha sa kongregasyon.
14 Sa iyang sulat kang Tito, si Pablo miingon: “Ang tigulang nga mga babaye magmatinahoron sa panggawi, . . . mga magtutudlo sa maayo; aron ilang ikapasig-uli ang batan-ong mga babaye sa ilang kaamgohan sa paghigugma sa ilang mga bana, sa paghigugma sa ilang mga anak, sa pagbaton ug maayong panghunahuna, putli, mga manggimbuhaton sa balay, buotan, nga magpasakop sa ilang mga bana, aron ang pulong sa Diyos dili mapasipalahan.” (Tito 2:3-5) Ang hamtong nga mga sister makahatag gayod ug dakong kaayohan sa kongregasyon. Pinaagi sa pagpakitag pagtahod sa mga brader nga nanguna ug sa paghimog maalamong mga desisyon maylabot sa pamesti ug panghindik ug kalingawan, sila naghatag ug maayong panig-ingnan sa uban ug nagpabili sa ilang dapit diha sa kongregasyon.
15. Unsay mahimong buhaton sa usa ka dalaga aron masagubang ang pagkamasulob-on?
15 Usahay, mahimong malisdan ang usa ka dalaga sa pagpangita sa iyang dapit diha sa kongregasyon. Ang usa ka sister nga nakasinati niini miingon: “Masulob-on usahay ang kinabuhi sa usa ka dalaga.” Sa dihang gipangutana kon sa unsang paagi siya nakasagubang sa maong kahimtang, siya miingon: “Ang pag-ampo ug pagtuon nakatabang kanako nga makita pag-usab ang akong dapit diha sa kongregasyon. Akong gisusi kon unsay panglantaw ni Jehova nako. Dayon naningkamot ko nga magmatinabangon sa uban diha sa kongregasyon. Kini nakatabang kanako nga dili kaayo maghunahuna sa akong kahimtang.” Sumala sa Salmo 32:8, giingnan ni Jehova si David: “Ihatag ko ang tambag nga ang akong mata magatan-aw kanimo.” Oo, si Jehova interesado sa tanan niyang mga alagad, lakip na sa mga dalaga, ug iyang tabangan ang tanan nga makita ang ilang dapit diha sa kongregasyon.
Hupti ang Imong Dapit!
16, 17. (a) Nganong ang pagdawat sa pagdapit ni Jehova nga mahimong bahin sa iyang organisasyon mao ang labing maayong desisyon nga atong nahimo? (b) Sa unsang paagi atong mahuptan ang atong dapit diha sa organisasyon ni Jehova?
16 Si Jehova mahigugmaong nagkabig sa matag usa sa iyang mga alagad aron makabaton ug relasyon kaniya. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Sa bilyonbilyong tawo sa yuta, si Jehova nagdapit kanato nga mahimong bahin sa iyang kongregasyon karon. Ang pagdawat sa maong pagdapit mao ang labing maayong desisyon nga atong nahimo. Tungod niini, adunay katuyoan ang atong kinabuhi. Ug kita malipayon gayod tungod kay kita adunay dapit diha sa kongregasyon.
17 “Jehova, nahigugma ako sa puloy-anan sa imong balay,” miingon ang salmista. Siya miawit usab: “Ang akong tiil magatindog gayod sa patag nga dapit; taliwala sa mga nagkatigom nga panon magadayeg ako kang Jehova.” (Sal. 26:8, 12) Ang matuod nga Diyos adunay dapit alang sa matag usa kanato diha sa iyang organisasyon. Pinaagi sa pagsunod sa iyang pagtultol ug pagpabiling aktibo sa pag-alagad, atong mahuptan ang atong bililhong dapit diha sa kahikayan ni Jehova.
Nahinumdom Ka Ba?
• Nganong makataronganon ang pag-ingon nga ang tanang Kristohanon adunay dapit diha sa kongregasyon?
• Sa unsang paagi nato ikapakita nga atong gimahal ang atong dapit diha sa kongregasyon?
• Unsay mahimong makaapektar sa atong dapit diha sa kongregasyon?
• Sa unsang paagi ikapakita sa mga batan-on ug hamtong nga ilang gimahal ang ilang dapit diha sa kahikayan sa Diyos?
[Mga Pangutana sa Pagtuon]
[Mga hulagway sa panid 16]
Sa unsang paagi ang mga brader mahimong kuwalipikado sa mga pribilehiyo diha sa kongregasyon?
[Hulagway sa panid 17]
Sa unsang paagi ang mga sister makapasundayag nga ilang gimahal ang ilang dapit diha sa kongregasyon?