Mahala ang Inyong Amang nga mga Igsoon!

ANG katawhan sa Diyos karon maoy usa ka dakong pamilya sa kaigsoonan, nga masubay pa ngadto sa mga alagad sa Diyos sa karaang panahon. Naglakip kini kang Samuel, David, Samson, Rahab, Moises, Abraham, Sara, Noe, ug Abel. Apil sa maunongong mga alagad ni Jehova ang daghang amang. Pananglitan, ang unang duha ka tawo nga nahimong Saksi ni Jehova sa Mongolia maoy amang nga magtiayon. Ug tungod sa integridad sa atong amang nga mga igsoon sa Rusya, atong naangkon ang legal nga kadaogan sa European Court of Human Rights.

Niining modernong panahon, “ang matinumanon ug maalamong ulipon” nagtaganag mga publikasyon ug nag-organisar ug mga kongregasyon maingon man sa mga asembliya ug kombensiyon diha sa senyas nga pinulongan. (Mat. 24:45) Nakahatag kinig dakong kaayohan sa mga amang. a Apan nahunahuna ba nimo kon giunsa pagkakat-on sa mga amang bahin sa matuod nga Diyos ug sa pag-uswag diha sa kamatuoran nga wala kining maong mga tagana? Nahunahuna ba nimo kon unsay imong mahimo sa pagtabang sa mga amang diha sa inyong komunidad?

Sa Wala pa ang Modernong-Adlaw nga mga Tagana

Komosta kon mangutana ka sa pipila ka gulanggulang na nga mga amang kon giunsa nila pagkaila sa Diyos? Tingali sultihan ka nila sa ilang gibati sa dihang ilang nasayran nga dunay ngalan ang Diyos—kon sa unsang paagi ang pagkahibalo niana nag-usab sa ilang kinabuhi ug nakatabang kanila sa paglahutay sa daghang katuigan sa wala pay mga video o DVD nga motabang kanila sa pagkat-on sa mas lalom nga mga kamatuoran sa Kasulatan. Hayan isaysay nila kon sama sa unsa ang kahimtang sa dihang ang mga tigom wala dumalaha o hubara sa senyas nga pinulongan. Dunay motupad nila ug magnota diha sa papel aron matabangan sila sa pagsabot sa gihisgotan. Ang usa ka amang nga brader nakakat-on sa kamatuoran niining paagiha sulod sa pito ka tuig sa wala pa hubara ang mga tigom.

Ang gulanggulang na nga mga amang mahinumdom kon sama sa unsa ang pagsangyaw ngadto sa mga dili amang. Ang usa nila ka kamot nagkupot sa index card nga gisulatan ug simpleng presentasyon. Ang pikas nilang kamot nagkupot sa kinabag-ohang Bantayanang Torre ug Pagmata! Maglisod sila sa pagdumalag panagtuon sa Bibliya uban sa laing amang gamit lamang ang mga basahon nga parehas nilang wala masabti pag-ayo. Ang ubang mga amang lagmit mahinumdom sa ilang kahigawad sa dihang wala sila masabti sa tagbalay ug busa wala na sila makapatin-awg dugang bahin sa kamatuoran. Nahibalo usab sila kon unsay bation sa usa nga dunay halalom nga gugma kang Jehova apan walay kompiyansa sa pagpasundayag niana. Ngano? Tungod kay wala sila makaseguro kon husto ba ang ilang pagsabot sa usa ka butang.

Bisan pa niining tanang kababagan, ang atong amang nga mga igsoon naghupot gihapon sa ilang integridad. (Job 2:3) Sila malaomong naghulat kang Jehova. (Sal. 37:7) Karon siya nagapanalangin kanila nga labaw pa kay sa gidahom sa kadaghanan kanila.

Tagda ang pagpaningkamot sa usa ka amang nga brader kinsa usa ka bana ug amahan. Sa wala pay video sa senyas nga pinulongan, siya  regular nga nagdumala sa pagtuon sa pamilya. Ang iyang anak nahinumdom: “Nalisdan gyod ang akong amahan sa pagdumala sa pagtuon, sanglit ang magamit lang niya sa pagtudlo kanamo mao ang pinatik nga mga publikasyon. Sagad, wala niya kana bug-os masabti. Kaming mga anak wala sab makatabang kaniya. Amo dayon siyang koreksiyonan kon sayop ang iyang pagpatin-aw. Bisan pa niining tanan, kanunay siyang magdumala sa pagtuon sa pamilya. Para niya ang among pagkakat-on bahin kang Jehova mas hinungdanon kay sa kaulaw nga bation niya usahay tungod sa iyang limitadong pagsabot sa Iningles.”

Anaa usab ang ehemplo ni Richard, usa ka brader nga kapin na sa 70 anyos kinsa amang ug buta ug nagpuyo sa Brooklyn, New York, U.S.A. Si Richard ilado sa iyang pagkaregular sa mga tigom. Aron makatambong, mosakay siyag tren nga siyasiya ra, nga mag-ihap sa mga hunonganan aron mahibalo siya kon kanus-a manaog. Usa niana ka tingtugnaw, dihay grabe nga pag-ulan ug niyebe mao nga nakanselar ang tigom. Ang tanan sa kongregasyon gipahibalo, apan wala diay masultii si Richard. Sa dihang naamgohan kadto sa mga igsoon, ilang gipangita si Richard ug nakit-an nila siya nga nagtindog gawas sa Kingdom Hall, nga mapailobong naghulat nga ablihan ang pultahan. Sa dihang gipangutana kon nganong miadto siya bisag nagdaot ang panahon, siya mitubag, “Akong gimahal si Jehova.”

Unsay Imong Mahimo?

Duna bay amang sa inyong dapit? Mahimo ka bang magtuon ug senyas nga pinulongan aron makapakigkomunikar kanila? Kasagaran ang mga amang mapailobon kaayo sa pagtudlo sa uban sa ilang pinulongan. Basin makahibalag kag amang diha sa ministeryo o sa ubang mga panahon. Unsay imong mahimo? Paningkamot sa pagpakigkomunikar kaniya. Paggamit ug mga senyas, nota, drowing, letrato, o kombinasyon niini. Bisan pag ang maong indibiduwal dili interesado sa kamatuoran, ipahibalo kana sa Saksi nga amang o niadtong makahibalo sa senyas nga pinulongan. Basin ug modawat ang amang sa mensahe kon kini ipresentar sa senyas nga pinulongan.

Tingali nagtuon kag senyas nga pinulongan ug nagtambongan sa kongregasyon nga naggamit niana. Sa unsang paagi mahimo kang mas hanas sa pagsenyas ug sa pagsabot sa maong pinulongan? Mahimong sulayan nimo ang paggamit ug senyas nga pinulongan bisan sa mga igsoon sa inyong kongregasyon nga dili amang. Kini motabang kanimo sa paghunahuna diha sa senyas nga pinulongan. Usahay, mas sayonan kang mosulti inay mosenyas. Apan, sa dihang magtuon ug bag-ong pinulongan, kinahanglan kang molahutay aron mahimong larino niana.

Ang pagpaningkamot pag-ayo sa paggamit ug senyas nga pinulongan nagpakitag gugma ug pagtahod sa atong amang nga mga igsoon. Handurawa ang kahigawad nga bation sa mga amang matag adlaw tungod kay dili nila masabtan ang ilang mga kauban sa trabaho o mga klasmet. “Kada adlaw, ang mga tawo sa akong  palibot mag-estoryahay,” matod pa sa usa ka amang nga brader. “Sagad mobati kog kamingaw, ug tungod niana ako maglagot. Dili mahubit ang akong bation usahay.” Ang atong mga tigom angay nga mahimong makalilipay nga mga okasyon diin ang atong amang nga mga igsoon makadawat ug espirituwal nga pagkaon ug makatagamtam ug mainit nga komunikasyon ug panag-ubanay.—Juan 13:34, 35.

Dili angayng kalimtan ang daghang gagmayng grupo sa mga amang nga sakop sa mga kongregasyon nga wala maggamit ug senyas nga pinulongan. Ang tigom hubaron alang kanila. Aron bug-os masabtan ang gihisgotan, ang mga amang manglingkod sa atubangan. Sa ingon makita nila ang tighubad ug ang mamumulong. Gipakita sa mga kasinatian nga ang ubang mga igsoon sa kongregasyon dali rang maanad niini, ug dili na malinga. Kini nga mga kahikayan gihimo usab diha sa mga asembliya ug kombensiyon diin dunay tighubad ngadto sa senyas nga pinulongan. Ang makugihong mga membro sa kongregasyon angayng hatagan ug sinserong komendasyon sa ilang paghubad sa impormasyon sa mainiton ug natural nga paagi.

Lagmit sakop ka sa kongregasyon nga adunay grupo sa senyas nga pinulongan o naghubad sa tigom alang sa pipila lamang ka amang. Unsay imong mahimo sa pagpakitag personal nga atensiyon niining amang nga mga igsoon? Imbitaha sila sa inyong balay. Kon mahimo, pagtuon ug pipila ka senyas. Ayawg kahadlok nga dili kamo magkasinabot. Makakita ka rag paagi sa pagpakigkomunikar, ug ang pagpakita sa maong gugma moresulta sa makalilipayng pakig-ubanay. (1 Juan 4:8) Ang atong amang nga mga igsoon adunay daghang ikapaambit kanato. Sila makalingawng kaestorya, lantip ug salabotan, ug maayong mopakatawa. Usa ka brader kansang ginikanan parehong amang ang miingon: “Sa tibuok nakong kinabuhi kauban nako ang mga amang, ug dili nako kabayran ang ilang nahatag nako. Daghan kitag makat-onan gikan sa atong amang nga mga igsoon.”

Gihigugma ni Jehova ang iyang matinumanong mga magsisimba, lakip na niadtong mga amang. Ang ilang panig-ingnan sa pagtuo ug pagkamalahutayon nakaamot gayod sa pagkatalagsaon sa organisasyon ni Jehova. Hinaot nga atong mahalon ang atong amang nga mga igsoon!

[Footnote]

[Hulagway sa panid 31]

Mahimong dawaton sa usa ka amang ang mensahe sa Gingharian kon kini ipresentar sa senyas nga pinulongan

[Mga hulagway sa panid 32]

Ang atong mga tigom angay nga mahimong makalilipay nga mga okasyon diin ang atong amang nga mga igsoon makadawat ug espirituwal nga pagpalig-on